Maat Jan mutt hüüt mal preestern:

Laudatio op den Bundsfinanzminister

Leeve Gemeende,

dree Weeken is dat nu her, dat mit Oostern wedder mol de Fastentied to End gohn is. En Tied, wo veele Lüüd in sick goht, üm ehre Laster to överwinden. So ok us Bundsfinanzminister. Un dat gröttste Laster vun Christian Lindner is – wekeen wet dat nich? – sien hemmungslose Freegevigkeet, sien allto groot Hart för de Armen.

Lindner is en Hillige un leevt as'n Mönk!

Dat schall nu anners warrn, hett Lindner versproken. Un he laadt us all in, mit em tosomen dissen Weg to gohn. Man nich bloots för de normale Fastentied vun söven Weeken, nee, dree vulle Johr will he mit us “eenfach Mol mit dat utkomen, wat wi hebbt.” Un up all wietere Sozialleistungen verzichten.

Lindners Drom is en “Wirtschaftswende vun Verdeelen to'n Erwirtschaften“. Bet hüüt hebbt wi also noch nix erwirtschaft't; wi hebbt bloots dat Nix man fix verdeelt. Jüst bi de Povern is heel veel Nix ankomen! De Rieken dorgegen hebt sogor noch Nix afgeven müsst – wat se ok jümmers doon hebbt.

Dormit dat nu beter warrt, geiht Krischan Lindner sogor mit goden Bispeel vöran. Staats dat he as bether lumpige 16.815,-€ in'n Maand verdeent, kriggt he siet März tominnst 17.990,-€. Dorto en Pauschale vun 3.681€ in't Johr – stüerfree, versteiht sick. „Jawoll!“, much een em toropen, „Bravo, Krischan! Ick wull ok dree Johr lang eenfach Mol mit dat utkomen, wat du hest.“

Man he deit noch mehr för siene Mitminschen. He wull nämlich, dat „all de, de arbeiten kunnen un Börgergeld kriegt, wedder op den Arbeitsmarkt trüchbrocht warrt.“ Nu kunnen wi em pünnenschieterich verkloren, dat jüst de Lüüd, de Börgergeld kriegt, al op den Arbeitsmarkt sünd. Se sünd jo de Ware, de op dissen „Markt“ hannelt warrt. Man dorför is de Utdruck „op den Arbeitsmarkt bringen“ veel to schöön. Dat klingt as en Almafdreev in de Bargen:
De Rindveechers, de sick bether vullfreten hebbt op de fetten Wischen vun usen Soziaalstaat, de bringt wi nu trüch na Hus in'n Stall, dat wi ehre Arbeitskraft wedder melken köönt.

"Klei mi doch...!"

Dor freit sick wiss ok use Buurn, de jüst op Autobahnen un in de Innenstädte ehren Mest verdeelt un verbrennt. Se köönt den Kampf upgeven un sick ahn Missgunst achter usen Bundsfinanzminister stellen: So veel Mest as he köönt se gor nich moken!
Amen.