Maat Jan ut BremenMaat Jan hett keen...

Corona Hysteria


Oppass: Düt is en satirischen Text. Deele dorvun kunnen de Bevölkern verunseekern! Wieterlesen op egen Gefohr!

Üm en Infektschoon mit Computer- un Coronaviren to verhöden, holl en Afstand vun 30 cm to'n Bildschirm un kumm op gor keen Fall mit de Muus op dat lüdde x in de rechte bövere Eck!

So, nu aten deep ut. Dat helpt twoor ok nix, man een weet nie. Seeker is seeker. Baadt Se ok al in Desinfektschoonsmiddel? Good, dornoh rüükst as en vergammelten Otter. Man een weet nie. Seeker is seeker. De Kanzlersche hett seggt, wi schallt al soziale Kontakte so wiet as mööglich instelln. Un dat schafft een mit so en lütt Vullbad ganz wiss! De gode Noricht: In dat Desinfekschoons-Tüüch stekt hochperzentig Alkohol! Un ick heff jo al jümmers seggt, een kann ok ohne Spaaß Alkohol to sick nehmen.


Proost Desinfekschoonsbad!

Good, dat verätzt jo vellicht de Organe, man seeker is seeker. Hauptsook is, nich infiziert! Denn wenn een eerst infiziert is, denn is Fierobend! Dat is jo nich bloß so en popelige Grippe-Virus.Nee, de Kanzlersche seggt, dat is een heel niede Bedrohung. Düt Virus is afsolut döödlich! ...

...för 0 bis 4 Prozent vun de Infizierten. Un wegen disse veellicht 4% stellt wi us sozialet Leven to 100% in. Wat Al Kaida nich schafft hett, wat RAF, NSU un IS al nich schafft hebbt, wat nich mol AIDS schafft hett — un de Virus weer to'n Anfang absolut döödlich —, dat schafft nu so een popelige, beten mutierte Grippe-Virus. He leggt dat soziale Leven lahm. He dwingt us, op en anner Art to leven. Un dat toeerst in Scholen, Kitas, Unis un bi disse annern Kasperköppe dor mit ehre Kultuur. Ick meen, de brukt sowieso kieneen — ober egaal...

Komisch is, dat dormit jüst de Steden dichtmookt warrt, 'neem sick junge Minschen drepen doot. Dorbi sünd de gröttste Risikogrupp de över 70-Jöhrigen. Good, bi't Kabarett, dor passt dat denn wedder.


Weerschap, Kultuur, Sellschap — all in't Visier vun de Gerontokratie!

Man dor kunnst doch mol sehn, wo wichtig us use olen Lüüd sünd. De Kanzlersche hett jo ok seggt, se wull allns Nootwennige doon, üm ole Minschen to schützen un Minschenleven to wohren.

Dat heet, naja, jüst so hett se dat nich seggt. Se wull "allns Nootwennige doon, üm de Wirtschap to schützen un Arbeitsplätze to wohren" — dat hett se seggt.


Krieg: En unschüllig Virus in't Fadenkrüüz!

Man so fidelinsch genau draff een dat nu nich mehr nehmen. Diskuteern, kritiseern, demonstreern,... dat is al soooo vör-Corona! De Politik hett den Virus den Krieg verkloort. Dor sünd Bildung un Kultur man bloß Kollateralschäden. Nu heet dat: mitmarscheern bit to'n Endsieg! Un de kummt jo, dat steiht fast. Drogen to'n Bispeel hett de Politik jo al vör 40 Johr den Krieg verkloort. Un Drogen, dat weet wi al, gifft dat jo all lang nich mehr.

Dat mummelt in sien Armböög

Joon Maat Jan



18.3.2020

 


na baven