Maat Jan ut BremenMaat Jan maakt:

Gröne Geschäfte


Wat hebb ick dor gistern morgen höört? Mi is vör Schreck bald de Koornbuddel ut'e Hand fullen: Flinten-Uschi is ünner de Ökos gohn!

Jüst dat de Merkelsche se nor Brüssel los worn is, dor kummt se upmol mit en "Green Deal" üm't Eck. Up Düütsch: "Grönet Geschäft" — un dat geiht so: De Polen kriegt Kohle vun us, dormit se ehre egene Kohle nich mehr ut de Eer buddeln doot. En groot Geschäft — tominnst för de polnische Regeerung, de up "Europa" un "Solidarität" jümmers geern ehr "groot Geschäft" mookt. Up de Flüchtlinge harr se ok scheten: Nich een eenzigen wullen de Polen upnehmen, man bi dat Kasseeren vun EU-Subventionen sünd se jümmers ganz vörn mit dorbi.

Dat de Polen nu bi Uschi ehrn "Green Deal" al wedder afkasseert, hett natürlich gor nix mit de Fraag to doon, wokeen de Uschi in ehr Amt rinwählt hett. Jawoll, dat sünd de Polen mit ehre Pis-Partei west, tosom mit de Insel-Aapen vun de britischen Tories. Man de kunn dat egol ween, se sünd bald rut ut de Nummer — wenn se dat nich doch noch op'n letzten Meter wedder vör de Wand fohren doot.


Warrt dat Geld hier etwa in Monokultuur anbuut? Dat is nich öko!

Over ok för us is dat noch keen Malöör: So lang as Flinten-Uschi de Saak in de Hand nimmt, mutt dat jo en Erfolg warrn. So as dormols, as se Kinnerpornos in't Internet sperren wull. Oder loter, as se de Hartz IV-Kinners mit foftein Euro in'n Monat to junge Mozarts moken wull. Us Gurken-Truppe harr se jo ok mit'n Bombenerfolg kaputtreformeert. Se weet all, weckeen Vereen ick meen. Wo heet nochmol disse düütsche Chaos-Combo, wo nix klappt un wo Krampen-Gretel nu de Reste tosomenfegen schall?

Akkuraat: CDU!

Dorbi is Uschi nich de eenzige bi de Swatten, de dit Johr upmol grön anlopen is. Fix vöran marscheert dor Markus Söder, de Bilderbook-Franke: Sportlich as Otfried Fischer un geistvull as Loddar Matthäus. Klimaschutz in't Grundgesetz, rut ut de Kohle bis 2030, weg mit Eenweg-Plastiktüten, ... allns dat, wat de Grönen siet Johr un Dag hebben wüllt, will he nu ok. Dorto ümfaat he elkeen Boom, de nich bi dree up'n ... na Se weet al.


E-Roller: Allens vull dorvun!

Dor hebt sogor de radikalen Klima-Aktivisten dat schwor, sick noch vun'n swatt-grönen Mainstream aftogrenzen. In Frankriek hebbt de Jungs un Deerns vun "Extinction Rebellion" nu een nieden Fiend funnen: De Elektro-Rollers. 3600 Stück dorvun hebbt se an een Dag "ut'n Verkehr trocken". Nu mag een sick veellicht wunnern, worüm de Utrottungs-Rebellen jüst de E-Roller utrotten wullen. Man dat hebbt se fix verklort. De E-Roller

  • mööt herstellt warrn (dat kost Energie)
  • mööt to'n Wedder-Uploden to een Ladestation brocht wern (dat kost ok Energie)
  • hebbt Lithium-Batterien (dor kunns nich veel an recyclen) un
  • sorgt veellicht dorför, dat de Lüüd weniger to Foot goht.

Dat is so wiet allns wohr. Man dat kunn een allns ok jüst so vun E-Autos seggen. Man nu kümmt noch een Doodslag-Argument, wat typisch französisch is un wo du en Franzosen jümmers mit kriegen kunns: E-Rollers sünd nömlich "Striekbrekers"!

In Frankriek warrt vandaag wedder mol striekt un demostreert. Dit Mol geiht dat üm de Rente mit 60 Johr för elkeen. Man schietegol, üm wat dat geiht, de Busse un U-Bahnen in Paris striekt mit. Un de Lüüd, de anners Bus un Bahn fohrt, kunnen sick möglicherwies een vun de Miet-E-Rollers nehmen, de dat in Paris gifft. Dorüm sünd E-Rollers "Striekbrekers" un "Speeltüüg för gröne Kapitalisten". Ick bün nu all bang, op wat de Utrott-Rebellen as Neegst kaamt. Veellicht fallt ehr in, dat de Lüüd ok to Foot gohn kunnen. Denn mööt se jüm wohl ok noch de Been breken, bloß dat de nich as Striekbreker fungeert.

Seeker up See grööt
Ehr

Maat Jan



31.12.2019

 


na baven