Maat Jan simmeleert över

Merz mokt mobil, den Rest kunnt wi us spahn

Nu weet wi dat al: Merkel wull nich mehr CDU-Chefin ween. De Partei brukt en needen Boss. Un wekeen kum as ersten ut'n Gebüsch? Friedrich Merz! Merkel har noch gor nich utsproken "Ick warr in Dezember nich wedder...", dor röp Merz al: "Ober ick! Ober ick!" Un as jümmers: Bild schnackt toers mit de Doden. Dorbi weer Merz bloß schiendood.

Fröher hett he de Westdütsche Landesbank afwickelt, nu versöcht he dat mit de CDU. As Merkel em as Fraktionsvize afserveert harr, woor he "Veräußerungsbeauftragter" vun de WestLB. Dat heet, he schull tominnst en Deel vun de WestLB an annere Banken verkopen. Man de eenzige Bank, de he funnen hett, weer een, wo he sülbs in'n Opsichtsrot seten dä. Un sogar dat güng in'e Grütt: He kunn sick mit sick sülbs nich eenigen. Dorför hett he aver vun dat Land NRW 5000 € kregen — per Dag! För en Deal, de nienich tostann kamen is. Jüst na sien Motto: "Wie möt all use Erwartungen an'n Staat trüchschruven."

Sien Erwartung weer ja, teihndusend Euro per Dag to kriegen.
Nich mickrige fiefdusend. Seht Se ok jümmers en Frettchen,
wenn Se Friedrich Merz seht?

Dat deit Merz wohrlich. He is nu al ünner annern Chef in'n Opsichtsrat vun BlackRock Düütschland. BlackRock is nich bloß en Bank, dat is de gröttste Vermögensverwalter up de Welt. In Düütschland höört em de halve DAX: Daimler, Bayer, Düütsche Bank, Düütsche Post — överall sitt BlackRock mit binn. För Merz weer Bundskanzler en echten Karriereknick!

Op End betohlt em jümmers noch sien Bundsland NRW. Sietdat de CDU dor wedder an't Ruder is, is Merz ehr "Brexit-Beopdraagte". En moie Job: Wenn de Brexit kummt, denn weer he erfolgriek; wenn nich, denn ok; un wenn dat gor keen Verdrag gifft, denn sünd eenfach de annern schuld!

Dat kann he nu ok blieven, denn de CDU hett anners wählt. Se hett nu dat, wat dat Autoland Düütschland brukt: Karrenbauer! Annegret Kramp-Karrenbauer, kort AKK. AKK! Dat is de perfekte Mischung ut AOK, PKK un TKKG. Wat de dree gemeensom hebbt, dat is de Markenkern vun de CDU. Bloß hett noch kieneen rutfunnen, wat de dree nu gemeensom hebbt.

AKK dorgegen hett de Nees vun en Fuuldeert — en echte Deertennees.
Dorbi is se gor nich fuul, nee nee, se is hellsch flietig!

Jens Spahn hett ok kandideert. Dorbi harr de dorto gor kien Tied. Eers hebbt sick al besweert: De kümmert sick üm all annern Krom, bloß nich üm sien Ministerium! — Hüüt wünscht wi us, he wöör sick mol wedder üm wat anners kümmern. Wat de disse Dag för dolle Vörslääge ruthaut! Ton Bispeel schalln Kinnerlose högere Bidrääg an de Krankenkass betohlen. Uter se kunnen nawiesen, dat se sick üm Kinners möht hebbt. Nu, woans wiest een dat na?

Neenee, bloots Sex hebben gellt nich as sik üm Kinner möhn! Utnahmen bi streng kathoolsche Lüüd!

Ton Bispeel wenn se en künstliche Befruchtung versökt harrn. Dor füng mennicheen an to reken: Wat kost de Befruchtung, wat spoort wi bi de Kass? Man de Kass betohlt sogor de Befruchtung, is also en Schnäppchen. De Kass betohlt denn ja quasi dorför, dat se weniger Bidrääg kriggt. — Een kunn ober ok Pick hebben, un de Befruchtung is erfolgriek. Dor wullst bloß en beten Geld sporen, un opmaal hest en Kind op'n Hals!!! — Eenzigen Troost: Kinner sünd good för de Stüür. Wenn to nix anners, sünd se good för de Stüür. Eltern weet dat: Kummt se eersmol in de Pubertät, kannst ehr komplett afschrieven!

Spahn wull ok, dat Pleegkräft mehr arbeiten doot. Dör en "leistungsgerechte Betohlung". De Pleegkräft, de ick kenn, wenn du de leistungsgerecht betohlst, denn is dat Krankenhus morgen pleite. Man de Krankenhüüs schallt ok na Leistung betohlt warrn! Wenn se also to wenig Pleger un Süstern instellt, wieldat se to wenig Geld hebbt, denn kriegt se minner Geld. Un mit dat Geld, wat se minner kriegt, schallt se Pleger un Süstern instelln un de ok noch beter betohlen.

Wekeen bi dissen Wahnsinn langsom mallig ward, de brukt egentlich Therapie. Kriggt he aver nich, wiel de Therapeuten överlastet sünd. Wenn een sick nich stantepe un up de Stell ümbringen will, mutt he eersmol en halv Johr un länger töven, bit dat he en Termin kriggt. Dorbi töövt mennig utbildte Therapeuten johrenlang, dat se vun de Kassen toloten warrt... De Lösung sünd för Spahn Telefon-Spreekstunnen. Dor mutt de Therapeut, staats dat he Lüüd therapiert, an'n Klöönkassen sitten un sick dat Elend vun de Lüüd anhören — bloß üm em denn to seggen, dat he keen Termin free har un se in en halv Johr wedder anropen schallt. — Komisch, dat dormit nich all tofreden sünd?!

Dorum hett Spahn nu noch en neede Idee: De Lüüd schnackt eers gor nich mit en Therapeuten, sünnern mit en Gootachter. De stellt denn fest, ob de Patient en echt Problem hett oder ob he bloß rümjammert, de fipsige Smachtlappen. Dat köönt Therapeuten so nich kloorkriegen, de hebbt dat ja bloß acht Johr lang studeert. Un denn sünd se noch so fuul, dat se sick bloß de lichten Fälle rutsöökt — meent jedenfalls Jens Spahn.

Den Gootachter betohlt de Kass vun dat Geld, dat se för Therapeuten nich hett. Bloß wenn een so verrückt is, dat ok de Gootachter dat markt, denn kunn he sick in de Töövlist vun en Therapeuten indragen — un in en halven Johr wedder kamen. Problem lööst!

Mit söckse Ideen höört Jens Spahn bi jedeen Therapeuten ganz na baben op de Töövlist,

meent

Maat Jan