Maat Jan simmeleert över

Schweden, Schulz un en schlechten Schutzmann

Miene Damen un Herren, leve Mitbörger, ick segg blots eens: Schweden!

Kiekt jo an, wat ut Schweden worrn is. Dat Land versackt in Chaos. Un weekeen hett dat wedder as Eersten markt? Donald Trump! Sogor noch vör de Schweden sülbs.

In miene Kinnertiet weer Schweden en magisch Land. Dor hett dat Elche geven, de harrn Möbel verkoopt! So weer för mi Schweden: Astrid Lindgren un Ikea. Un denn keem Henning Mankell — un hett allns kaputt mokt!

Sietdat weet ick, Polizisten in Schweden sünd all depressiv, geschieden, rookt in eensento un suupt sogor Schimanski ünner den Fichtenholtdisch. Sietdat kiek ick ok de Helden ut miene Kinnertiet anners an. Pippi Langstrump ton Bispeel: Kind vun en alleen-optrecken Vadder, de nienich dor is, schnackt mit wilde Deerten un lööst Probleme opleevst mit Muskelkraft. De is doch en Fall för dat Jugendamt! Oder Karlsson vom Dach: Is dat nu en gewieften Mietnomaden oder en illegalen Huusdackbesetter? Hett de öberhaupt en Flugschien? Hett sien Propeller en TÜV-Siegel? Wekeen weet dat? Een op jeden Fall: Kommissar Blomquist, Kripo Lönneberga.

De Eerst weer Trump denn doch nich. Al för Lou Reed weer Schweden en gruselig Land: "Wiel dor allns funktioneert." För en New Yorker unvörstellbor. Man de gröttste Bang vör Schweden harr de Berliner AfD. De hett vermellt, dat de Bundsregeerung vör Reisen nor Schweden wohrschugen de. Doot wi nich, seggt de Regeerung, keen Spur. Dor weer de AfD muulsch: "Dot ji wohl! Wi blievt bi use Meldung. Bäh! Wenn Donald Trump dat seggt hett, denn mutt dat jo wohr ween."

Dorop kunns di wiss verloten. So as op de SPD. Wat weern de Sozis noch vör korte Tied doch bedröppert: Ümfrogen in'n Keller, Stimmung in'n Keller, Gabriel un Genossen goht kiffen in'n Keller. Op mol seggt Gabriel to Schulz: "Du Martin, segg mol, wülls' een op Kanzler moken? Also ick hebb keen Bock!" Und wat seggt Schulz? Jüst wat jedeen von us ok seggt, wenn he opmol vör en schwore Frog steiht, vun de heel veel afhangt: "Kann ick een anropen?" Schulz treckt den Telefonjoker un frogt sien Fro: "Schatz, de Siggi hett seggt, ick kunn Kanzler warrn. Wat meenst du?" Fro Schulz versteiht fix de historische Situation un seggt: "Martin, mok, wat du wullt, man lot di blots nich tohus blicken!"

Vun dor an güng dat jümmers höger för de SPD bi de Ümfrogen. Se hebbt al Angst hatt, dat se up end richtig beleevt warrt. Man dorgegen harr de SPD en unfehlbor Middel. Se nöömt dat "Wahlkampf". Dat Wahlkampf-Team in't Willy-Brandt-Huus hett offiziell sien Orbeit opnohmen — un foorts weer dat vörbi mit ehrn Höhenfloog. Davör güng dat vun Dag to Dag up, 28%, 29%, 30%, 31%, 32% — Wahlkampf füng an — un Sluss! Sietdat steiht se still bi 32%.

Links: Ümfraag. Rechts: Wahl.

Dat langt ober, üm de Union heel nervös to moken. Dorüm wull de Schulz nu angriepen - mit Inhollen. Wiss, dat weer jo al jümmers de grode Starkde vun Merkel: klore, faste Inhalte, so as

"De Wehrpflicht is en Markenteken vun us Demokratie" oder
"Düütsche Atomkraftwerke sünd seker", oder
"De Minnstlohn vernicht Arbeitsplätz" oder
"En PKW-Maut warrt dat mit mi nich geven" oder...

Dor is Schulz al wieder. He brickt keen Wahlverspreken, wiel he so god as gor keen mokt. Dat mokt em so glovwördig. Un glovwördig ween, authentisch ween, dat is dat Wichtigste hüüttodag. Dorüm hett Merkel de letzte Wohl wunnen mit en simplen "Se kennt mi." Schulz seggt nu "Se kennt mi nich. Dorum wählt mi. Anners wart ji mi kennen lernen."

De SPD lett sick nich lang bitten un mokt em to ehrn Vörsitter. "Dat Ergevnis vun 100% vun de Stimmen överwältigen mi." Bi so veele Överwältigungen mutt sin Dütsch wohl nich 100% stimmen. Dorvör wart he denn glieks intim: "Opleevst mit di" wull he winnen, wüspert he siene GenossInnen verföhrerisch to.

Man ehrdat de mit ehrn Martin in de Kabine verschwinden kunn, wählt eersmol de Franzosen. Dor kämpft de konservative Kandidat Fillon gegen "Penelopegate". Penelope, so heet sien Fro. As de vun Odysseus. De hett bi Dag en needed Kleid woven un bi Nacht allns wedder tweireten, dormit se need anfungen kunn. Üm ehrn Mann to helpen, hett se so daan, as wenn se orbeit. Jüst dat hett Penelope Fillon ok daan, man för veel mehr Geld. Sietdat is ehr Mann op en Irrfohrt dör Frankriek. Tominnst kriegt he dat nich mit Hexen, Seeungeheuer un Zyklopen to doon. Blots mit en Hex, de Marine heet un up dat rechte Oog blind is.

Fro Fillon is nich de eenzige. Rainer Wendt, de Chef vun de Polizeigewerkschaft DPolG, het ok johrenlang so daan, as wenn he noch as Polizist arbeiten dee — un veel Geld dorför kasseert. Wobi "arbeiten" sowieso nich ganz passt. De DpolG höört jo to den Düütschen Beamtenbund.

Dat de listenreiche Rainer in Talk-Shows luut den starken Staat fordert, den he toglieks heimlich mit sien Geldgier schlapper mokt, passt moi tohop. Dorüm verdeent he ok datsülbe, wat he för de "kriminellen" Flüchtlinge fordert: Afscheebung! Op't best nor Schweden. Oder noch beter dorhen, wo he her kummt: Duisburg.

Dat is denn Straaf noog.

Joon Maat Jan