Maat Jan ut BremenMaat Jan freit sik an:

Summer, Sünn, Drohnen


De Summer is dor, un överall schwirrt de Immen vun eene Blom nor de anner. Man nich disset Johr. De Immen, hebb ick hört, sün an't Utstarven. Un keeneen deit wat dorgegen.

Keeneen? Doch! Us fleedige Verteidigungsminister hett sick insett för use lütten Frünn un hett neede Drohnen bestellt. Dat sünd bekanntlich de Keerls vun de Immen, un ahn Keerls gift op End ok keen Wieverslüüd, de de Arbeit doot. Nevenbi kunnen de Drohnen ok use Bundswehr vör't Utstarven retten, wiel keeneen vun de jungen Lüüd mehr nor'n Bund will. Worüm eegentlich nich? De jungen Lüüd speelt doch ok al disse gresigen Ballerspeele op ehre Computers, de bekanntlich wöpsch maakt, also aggressiv. Wenn dat stimmt, worum gaht se denn nich no'n Bund? Wiel disse Speele vellicht aggressiv mookt, over wiss nich doof!


"Moin, ik bün en Hummel, un ik mutt seggen, düsse Drohnen maakt uns Hummeln ganz wöpsch!"

Un dorum brukt us Verteidigungsminister Thomas de Maiziere — Tommy de Misere, as sine Frünn em nömen wöörn, wenn he welk harr — nödig unbemannte Drohnen as Ersatz för fehlende Soldaten. Man he draf keen kriegen, wieldat de Drohn keen "Kollisionsschutz" hett. Un de is wichtig. Denn bi so en Insatz kunn en Drohn schon mol mit een, twe Grundrechte kollideeren. Un wenn de sik ungeschützt bemöten doot, kunn dor up End wat Lüttet bi rutkomen?! Nee, keen Bang, Drohne un Grundrecht sünd nich kompatibel, dor passeert nix. Dorum hett ok de katholsche Kark nienich wat gegen Drohneninsätz seggt, Grundrechte hin oder her.


"Wat de Drohn flüggt, spikeleert ji? Na, dat bestimmt doch jümmers bloots een — de Königin!"

Un wiel de Drohn vun sülvst keen Nawuss kriggt, hett Tommy glieks en poor mehr dorvon bestellt. Un nu sün op Mol 600 Millionen Euro futsch. Mokt over nix, as Tommy seggt hett: Wenn he wegen en poor Millionen jümmers glieks de Reißleine trecken schall, denn harn wi gor keen Rüstungsprojekte mehr! Dat mut een sick mol vörstellen: Dütschland ohn Rüstung — denn weer de Minister jüst so överflödig as sine Drohn!
De draf nu in Dütschland nich flegen. Liekers will Tommy sogor för de heele Welt noch mehr Drohnen bestellen. Dor frogt een sick, weekeen eher flüggt: de Minister orr sine Drohn.


Wi hebbt versöcht, en lustige Montage mit Klaeden sien Bild to maken, man düssen Mann kannst nich karikieren — de Wirklichkeit is di eenfach över...

Over wo een afstürzt, stiegt de anner op: Stootsminister Eckart von Klaeden is nu in dat hööchste düütsche Stootsorgan upstegen: nor Daimler Benz. De Kanzlerin seggt ok, dat is en Ehr, denn düütsche Automokers sünd heel innovativ. Wat de al erfinden doot! De erfind to'n Bispeel nedrige Verbruukswerte. Neede Autos sün op ehr Papiere al een Veerdel sporsamer as in Wirklichkeit. Leider langt dat jümmers noch nich, dat düütsche Autos de EU-Afgasnorm erfüllen doot. Over ok dor sünd se innovativ: Se baut eenfach en poor Elektroautos, un de schalln bi de Afgaswerte dreefach telln. Dat helpt ok de Kanzlerin, de hett jo mol "een Millioon Elektroautos" versproken. Wenn jedeen Auto dreemol tellt, kummt se dor vellicht so üm un bi ran. Ick frog mi bloß, wo veel een drinken mutt, um Autos dreemol to sehn. Dorum hebbt ok use Politiker un Autobosse all ehrn Chauffeur: An't Stür drafst du de nich mehr loten.


"Wo veel een drinken mutt?! Solk Böcke scheet ik doch al stocknüchtern!"

Nor de sülbe Methode kunn een sick ok de Kita-Plätze schönsupen: Wenn de al dreemol tellt, denn hebt wi vellicht jüst noch Plätze för jedeen drütt Kind. För de annern gifft dat Playstations vun'n Stoot mit extra veele Ballerspeele, dormit se später ok brav nor'n Bund goht.

Trüchtreden draf Tommy apenbor nich, so kort vör de Wahl. De Regeerung is jo so al dorbi, sick uptolösen: Sogor us ole Bildungsministerin is gohn worn, wieldat se in ehre Doktororbeit en beten too fleedig afschreven har. Dor schäm ick mi nich bloß heemlich... sünnern unheemlich! Un de Familienministerin wull ok nich mehr — hett de överhaupt promoveert? Jedenfalls hett se nu Familie un kann dorum nich mehr ehr Ministerium hebben. Dat Kinner un Karriere bi us en Problem sünd, harr se jo ok nich weeten kunnt, se wehr jo bloß Ministerin för... wat noch Mol?

Tominnst kriegt se en ordentliche Pension för ehre nich mol veer Johr in Amt: 46.000 € in Johr. Un ick mutt seggen: De gönn ick ehr. Man nich bloß dat: Vun mi ut kann se ehr Betreuungsgeld, ehr Elterngeld un ehre Flexiquote ok noch mit nor Hus nehmen. Alleen de Möglichkeet, dat wi nor ehr mol en engagierte, kompetente Frunministerin kreegen, is mi dat Geld allemol wert.

Wat sün ok 46.000 Euro? In Bayern lacht se över so en Bedrag. Dor kunn een eenfache Sekretärin goot 60.000 Euro in Johr kreegen. Wenn ehr Mann Fraktionschef vun de CSU is, heet dat. Dat löpt denn wohrschinlich as Schmerzensgeld, meent

Joon Maat Jan


Bild v. Klaeden: Bischöfliche Pressestelle Hildesheim (bph)


na baven