Maat Jan ut BremenMaat Jan beduert:

Demokratie is ok keen Lösung


"Dat Regeern vun en Land is veel to wichtig, as dat een dat de Lüüd överloten kunn." Schall Thomas Jefferson in en lichten Moment seggt hebben. Man ob he dat nu wirklich seggt hett oder nich, Recht hett he. Nehmt wi bloß mol dat wählen. Dat mokt wi in Dütschland al so veele Johr, een schall meenen, dat de Lüüd dat bilütten mol lernt hebben.


Also vun Natuur ut— schient dat — is NRW Rood-Gröön, nich?

Over nu seht wi in NRW, dat dat jümmers noch nich richtig klappt. Dor hebbt se nu wählt, over en neede Regeerung will eenfach nich dorbi rutkomen. Kum harrn de Lüüd Swatt-Geel in'n Bundsdag de Mehrheet geven (ick weet, is keeneen ween, as jümmers), dor wählt se desülbe Koalition in erstbesten Land wedder af.

Heel grot is dat Angebott bi de Wahl jo nich ween: Up eene Siet en "Arbeiterführer", de vun Politik afsehn noch nich veel Arbeit in sin Leven anfot hett. Up de anner Siet en Fro, de de Kohlezechen open loten wull, bloß för den Fall, dat wi se villicht mol brukt. Wenn wi all dat Geld, dat us de Ruhrkohle kostet het, in Hunnerter-Schiens in de Minen smeten harn, wärn de Zechen al tein Mol vull. "Kraftilanti" harn eer Gegner se in Wahlkampft nöömt. Ween ick se reden hör, fallt mi een anner Nom för se in: De rode Merkel.


Kunnst ja tominnst menen, dat dat beter lett...

Över de FDP bruk ick hier woll nich veel to seggen, so gründlich kunn ick de gornich verhohnepiepeln, as de dat sülven doot. Un denn is dor noch de Linke, de ok drollige Ideen in eer Wahlprogramm het: Ersmol wulln se de "Schlüsselindustrien" verstotlichen, al voran RWE un E.on. Dor warn de Lüüd sick frein, wenn in Tokunft de Stot sülbs em de Stromrechnung schickt. In de neede linke Gesellschap schalln denn ok Gerichte nich mehr brukt weern. Klor, dat mokt de Stot al sülbs, kennt wi jo in Dütschland. Ersmol wulln de Linken den Verfassungsschutz afschaffen. Over dat hett natürli gor nix dormit to doon, dat de Verfassungsschutz en poor vun de Genossen op'n Kieker het.

Goot, ick gev to: Monarchie is al lang keen Lösung. Dor brukt een gor nich, as ick, över de Weltmeere to seiln, vun England bit nor Thailand, üm dat ruttofinden. Sogor in England hebt se nu en Koalition. Dat harn se dor bitherto gor nich kennt. Un in de Labour-Party strieten sick twee Bröders, welk nu "Thronfolger" warn schall. Schienbor hett de noch keeneen vertellt, dat se gor nich mehr an de Regeerung sünd. Dor regeert nu ok Konservative un Liberale tohop. Also Swatt-Geel, as bi us. Wenn de Queen mol ehre dütschen Verwandten frogt har, wa een swatt-geele Regeerung utsicht, har se den Düvel dohn, de intoswören. Veel eher har se Cameron, Clegg & Co gliex in Tower sparrt, un denn kunn vun mi ut Prinz Charles de neede Regeerung bilden. Schlimmer as Swatt-Geel kunn dat ok nich ween. Over nee, Elisabeth het brav eer Rull speelt, un de Londoner Finanzbosse is dat sowieso egol, wer ünner eer regeert.


Woso "Monarchie keen Lösung"? In Mäkelborg hebbt's tominnst dat Rindveech, also den Stüertahler, kröönt!

Ok in Thailand gifft't en König, over de Lüüd sloot sick eher gegensiedig de Köpp in, as dat sine Majestät sick mol'n beeten üm sin Land kümmert.

Over, as ick seggt hebb: So wiet brukt een gor nich to fohren, üm to verstohn, dat Monarchie ok keen Lösung is. Een brukt bloß den düütschen Football ankieken. Dor hebt wi sogor en Kaiser, over dat hülpt us ok nich wieter. Nu is sogor us gode ole Michael Ballack kort vör de WM versehrt worn — vun Kevin Prinz Boateng! So veel to Monarchie.

Is jo nich so, dat wi Ballack sportlich bruken — over wi hebt us so an em wennt. Un dat is nich de eenzige, de utfallt. Dat düütsche Team fehlt ok en goode Mann för Rechtsbuten. Welk schall dat ok moken, nu wo Roland Koch nich mehr dor is? Sin Norfolger is sess Johr öller as Koch un is de eenzige Innenminister, de in sin Amtstied en Razzia vun sin ünnergevene Polizisten in sin eegen Büro beleevt hett. Dat nöömt een wohl "brutalstmögliche Upklärung". Un ick weet ok, wo ick Jürgen Bouffier nenn: De Uthülps-Koch.

Over in Südafrika, wo de WM is, dor in Mandela-Land is villicht allns anners, hebb ick dacht. Dor regeern de Swatten sick endlich sülbs. Man wekeen steiht dor överall vör de Döör un will an de Bodenschätze ran? De Chinesen! De bringt so veel Geld mit, dat se binoh automatisch ok mitregeert. Swatt-Geel op Afrikanisch.


Horst Ballack in't Nationaltrikot bi de WM in Afrika

Komisch, woans kumm ick nu bi Afrika up mol up Horst Köhler? Weet ok nich, villicht wiel he us jümmers vun "de lütte Aishe ut Afrika" gröt har. Un nu hett Köhler op mol allns hinsmeeten. Wekeen schall us nu eenmol in Johr de Gröte vun us lüdde Fründin Aishe utrichten? Möt ick dor nu sülbs vörbiseiln? Denn har Köhler us in sin Afschiedsrede tominnest ehre Adress vertellen kunnt. Afrika is bannig grot...

Un wi sün natürli bannig schockiert. Mit Köhler is dat so'n beeten as mit Ballack: So recht bruken doot wi em nich, man wi hebt us so an em wennt un us jümmers dacht: Och de Horst, keen Bange, de deit nix, de wull bloß... — jo, wat har he egentlich wullt? Op jeden Fall nich, dat wi em tohöört un ok noch glöövt, wat he seggt. Ick meen, dat use Soldaten för Handel un Profit in'n Krieg schickt warn, dat kunn he jo gor nich so meent hebben, oder???

Villicht geiht jo nich anners, wi möt jo al sporen un up leev wordene Gewohnheiten verzichten, as de Regeerung jümmers seggt. Denn könnt wi ok up us Bundeshorst verzichten. Denn over ok ganz un gor, en Nachfolger brukt wi denn ok nich. Dat wär jo mol en gode Gelegenheet to'n Sporen. Un de lütte Aishe, de wart ok woll irgendwie dormit leeven könen,

meent

Maat Jan


6.6.2010
mehr vun Maat Jan
Foto Köhler: Roosewelt Pinheiro/ABr/Wikimedia Commons
Foto Ballack: /Wikimedia Commons


na baven