Maat Jan ut BremenMaat Jan luustert...

Wiese Wöör


Halleluja! Kort vör Wihnachten sünd us de dree Wiesen ut'n Morgenland wedder kamen un hebben en Bottschap hier loten. Noja, egentlich sünd dat jo nich dree Wiese, sonnern fiev. Un ehre Ideen kummt ok nich ut'n Morgenland. Ob se överhaupt vun disse Welt kummt, is nich klor, wohrschienlich ut en Vörgistern-Land. Un se bringt ok kine Geschenke för dat Kind, sonnern nehmt leever de Groten solang wat weg, bis se jüst so wenig kriegt as de Kinner. Over Wiese sünd se, gor kien Frog.

Allns klor? Ick meen natürlich de fiev Wirtschapswiesen, de vörslogen, den Regelsatz vun Hartz IV op 250 €uro to senken. Dat is so veel, nee so wenig, as hüüt en Kind unner 14 Johr kriggt — un sogor dor pröövt dat Bundsverfatensgericht jüst, ob dat langt as Existenzminimum för Kinner. Nu schall dat ok noch för utwussen Lüüd rieken.

250 €uro is ok veel weniger, as de Regelsatz för fiev Johr ween is. Man dormols hett dat ok noch "Sozialhilfe" heeten, dat hett 294 €uro geven, un för all möglichen Krom hett een noch en Bihülp dorto beandrogen kunnt: för Möbel, Bettloken, Plünnen, Kiekschapp, Köhlschrank usw. Bloots so hett een vör fiev Johr jüst eben dorvun leeven kunnt. Over hüüt schall dat ok ohn Bihülp un mit 50 €uro weniger gohn. Is jo ok allns jümmers bloß billiger worn sietdem: Öl, Levensmittel,...

Övrigens hett dat dormols dorto föhrt, dat de Lüüd op Amt vör lauter Bihülpsandrääg keen Tied mehr för de Minschen hatt hebbt. Mit "Fördern un Fordern" hett dat denn nix mehr to doon, dat Motto is denn wedder "Verhindern un Plündern".


Wenn de dree Wiesen kummt, geiht dat an't — ja, genau: Plündern!

Over se sünd jo nich so, use Wirtschapswiesen, se wullen dorför mehr Möglichkeeten to'n Dortoverdeenen dör Arbeit toloten. Oh, wat warn se sick frein, al de Behinnerten, Olen, Kranken, Süchtigen, Alleenoptreckenden, Ungelernten un nich-dütschsprochigen Hartz IV-Empfängers, dat se nu all mehr arbeiten draft un sick so bannig wat dorto verdeenen köönt. De Arbeitgever rieten sick jo ok jüst um disse Lüüd as Mitarbeiters.


Weihrook? Guld? Myrrhe? Doch nich vun mi...!

Woans kummt een bloß op so en wiesen Vörslag? Dat hett de Rechnungshof nu rutfunnen: To'n Bispeel dat DIW, dat dütsche Institut för Wirtschapsforschung, hett dit Johr unner annern 234 Buddeln Wien, 144 Buddeln Sekt un mehr as 200 Buddeln Beer köfft — all vun Stüergelder un all bloß, um den Binnenkonsum so'n beeten nortohelpen, versteiht sick. Also entweder sünd de Wirtschapsforschers bi'n DIW dat heele Johr dauerduhn, oder ick weet, wo to Silvester de dollste Party vun heel Berlin stiegt. Vun dat Geld, wat de Forschers dor versupt, kunn een Hartz-IV-Empfänger nor den Wirtschapswiesen-Modell länger as een Johr leven.

Ick kunn dat jo verstohn, dat een sick de Wirtschapspolitik vun use Regeerung schönsupen möt. Wa anners schall een dat verknusen, dat en Stüergeschenk för Hotels un Kneipenwirte dat Wassdom besleunigen schall? Ick heb jo meent, de Unnerschied vun Gastwirtschap un Volkswirtschap möt eegentlich jedeen klor ween — bit ick Rainer Brüderle kennenlehrt hebb.

För em un sine kapitalliberalen Frünnen is de Vörslag vun use Wirtschapswiesen jo een funnen Freten. Irgendwo möt dat Geld jo insport warrn, dat wi dör Stüergeschenke för rieke Erben un Unnernehmer ut't Fenster schmeeten.


De Anbetung vun'n vullen Geldkuffer. Unbekannte Künstler, 1. bet 21. Johrhunnert

Over de Trick achter dissen Vörslag is de: Wenn de Armen sick beeten wat ansporn kunn, denn bringt so jo ehr Sporgroschen up de Bank — un de brukt nötig dat Geld, dormit se wieter spekuleern kunn. Dat is ok bloß normol, spekuleert wart hüttodag överall. Sogor bi de, de dat "Fest der Liebe" lever in Bordell fiern. Uk dor geiht allns um de Frog: Stiegt he oder fallt he? Dor hett sich al mennicheen Mann düür verspekuleert.

Over ok in de Politik wart spekuleert. De Nobelpreis för Obama — allns Spekulation. Se spekuleert dorop, dat sin Wert as Präsident in Tokunft noch stiegt. Un to Wiehnachten wimmelt dat sowieso överall vun Spekulanten — unner eern latinschen Nom: Spekulatius.


To laat — 2010 gifft dat bloß noch Krümel!

Oh, is dat herrlich, een vun de Banusen mol den Kopp aftobieten! Ok wenn wi foken nich weeten, wat in dat söte Tüch drin steckt — ok dor kunnt wi bloß spekuleern, meent

Maat Jan


29.12.2009
mehr vun Maat Jan


na baven