Maat Jan ut BremenMaat Jan is...

De Krisenmeester


Nu is dat endlich kloor. Lange is dat hen un her gohn: Meister ween oder nich ween, Fiat oder Magna, Bayern oder Wulfsburg, Porsche oder VW. Nu weet wi Bescheed: Wulfsburg ist Meister, Porsche is klamm un de amerikaansche General Motors het kapituleert. Sestich Millionen har Felix Magath för sin Crashkurs "vun Null up Eens in 63072000 Sekunnen" kregen, un dat mitten inne Rezession. Ober dat hebben de in Wulfsburg bannig klook henkreegen: Jüst vör de Winterpause har Porsche dörsickern loten, dat se veellicht VW kopen wullen — un fix is de VW-Aktie hoch gohn, so hoch as johrenlang nich. Mit dat Geld kunn VW nu ehren VFL sponsern, so dat de Meister worn is. Dormit is woll ok klor, dat de Zentrole vun den tokünftigen VW-Porsche-Konzern nor Wulfsburg kummt — Stuttgart kann froh ween, wenn se wieter in'n internationalen Geschäft mitspeelen köönt!

Blos as nu Porsche sülben in Kalamitäten komen is un Geld brukt hett, dor har VW leider afwinkt: Deit us leed, wi hebt nix mehr, Meisterschaft geiht vör.

Wat dat nu mit Mario Gomez to doon hett, de jo vun Stuttgart no Bayern goht, is nich so klor. Wullen de bi Porsche statt mit de Wulfsburger mit BMW fusionieren? Oder kummt dat doch noch to de Droomhoochtied vun Günner Öttinger un Ferdinand Piech?

Opel jedenfalls is nu wohl doch övern Barg — dat heet, nich heel över den Barg, dor liggt bekanntlich Italien, un dor is Opel op End nich mehr good ankomen. Man so op un twüschen de Bargen, dat heet in Österriek — to een Deel. To een Drüttel höört Opel nu nor Russland, een Drüttel nor Amerika, een Föfftel geiht irgendwo zwischen Kanada un Österriek hen, teihn Perzent kriegt wi — un dor freit sick use Politiker noch, dat Opel nich tweisloogen worn is...

De neede Retter vun Opel kummt also ut Österriek un'n beten ut Amerika un heet — nee, nich Schwarzenegger; he heet Frank Stronach. Born is he as "Franz Strohsack", man dat hebbt de Amis nich utspreken kunnt. Bi us is he nu en Star, dat heet sogor, de Papst wull em hillig spreeken — to'n "hilligen Strohsack"!

Un dat de Autos vun Opel nich so bannig veel köfft warrt, dat schall sick nu ok ändern. De erste grode Idee hebt de Managers al: Se wullt wedder Wartburgs buun! Jawoll, Wartburg, den olen "Edel-Trabbi" ut de DDR, schall dat bald wedder geven. Wenn denn de Opel-Retter Steenbrück, Merkel un vun Guttenberg ok bloß noch Dienst-Wartburgs nor de Orbeet föhrt, wart dat wiss de grode Renner. Bloß nor "Klimaschutz" un CO2 drafs du de Herrschaften denn nich mehr frogen.

Dat hebt wi nu dorvun, dat wi eene ut'n Osten to Kanzlerin mokt hebben: Överall verstootlichte Betriebe, un al sünd se Pleite. Wenn Angie dor bloß nich nostalgisch ward. De Ünnerschied ist, dormols harn se stootliche Betriebe unner stootliche Kontrolle — hüt hebbt wi stootliche Betriebe ohne Kontrolle.

De HSH Nordbank ton Bispeel hört nu to 85% de Länder Hamburg un Schleswig-Holsteen, man de beeden Wirtschaftsminister ut de Länder sünd togliek ut'n Opsichtsrot utsteegen. Dorför hebbt se nu en heel "profilierten Banker" holt: Hilmar Kopper! De Över-Erdnuss-Knacker vun de Düütsche Bank har dat tohus mit Brigitte Seebacher Ex-Brandt nich mehr utholen (kunn ick verstohn!) un loot sick wedder mol so'n poor "Peanuts" dör de Finger gohn, as wi dat vun em kennt.

Ok annerswo hebt Opsichtsrotslüüd heel veel to don. Nich dat se Opsicht föhrt un op ehr Ünnernehmen oppast — ach wat. Se mööt Politik moken. Twölf Opsichtsrotsvörsitters ut grode Ünnernehmen hebbt in en Breef an Merkel dorvör wohrschuugt, dat de Regeerung nu doch tatsächlich Regeln för de Betohlung vun Managern upstellen wull. All vöran Gerhard Cromme, de to sine aktive Tied de Hösch-Stahlwerke in Duisburg-Rheinhausen stilleggt hett — un den heelen Stadtdeel glieks mit. Ok de Opsichtsrotschef vun de Firma Hochtief is dorbi. Gegen de Firma Hochtief löppt in de lieke Tied en Perzess wegen Dumpinglöhnen! Ober de Över-Upseher het keene annern Sorgen, as dat he sine Manager wieder mit Millionen füttern kunn! Denn hett ok noch de Ex-Infineon-Chef Schomoker ünnerschreeven. Gegen em löppt en Anklaag wegen Korruption, sin oles Ünnernehmen het sick bis hüt nich vun em verholt un is kort vör de Pleite. Un natürlich draf ok de berühmte Manfred Schneider nich fehlen. Wat, kennt se nich? De kontolleert as Opsichtsrotschef glieks dree grode Ünnernehmen: Bayer, RWE un Linde. Dat heet, he föhrt Opsicht över üm un bi 219.000 Mitorbeiters överall up de Welt. Wiel em dat nor nich riekt, sett he ok in Opsichtsrot vun Allianz, Daimler, Metro un TUI. Bi so veel Orbeit kunn een wohl nich so genau op achten, wat een so allens ünnerschrifft.

Dorbi hebt de Herren jo ok Recht, Managers möt veel Geld kriegen, anners komt de Top-Lüüd nich nor Düütschland. So Top-Lüüd as Wendelin Wiedeking to'n Bispeel, de Chef vun Porsche. De verdeent 77 Mio. €uro per Johr un is dormit de drittbestbetohlte Manager in Europa — sin Ünnernehmen möt to lieke Tied bi'n Staat um Kredite bitten.

In so en Gesellschop kunn een sogar Josef Ackermann bald as'n netten Kerl vörkomen. Goot, he har sin IT-Vörstand, den sin Froo, Mitorbeiters un Aktionäre utspioneeren loten — ober wer hett dat nich vun de Herren? As Utländer har Ackermann meent, dat weer in Dütschland so begäng.

Begäng is dat op jeden Fall worn, dat Firmen, de Geld brukt — un brukt wi dat nich all? — nor'n Stoot ropen doot. So ok "Arcandor", op düütsch Karstadt-Quelle. Un an disse "Quelle" har lange Tied de Billerbook-Yuppie Thomas Middelhoff seeten. He weer dat ok, de de Immobilien vun Arcandor (wat de Nom het, weet woll bloß Middelhoff alleen) verköfft un vun de Köpers trüch hüürt har — för en bannig hoge Miete. Köfft hett de Hüüs een Immobilienfonds, un to den sine gröttsten Anleggers hört —: Thomas Middelhoff!

Nich veel loter is he as Arcandor-Chef tröchtreden (worrn) un kasseert nu de veel to hoge Miete, de he op Kosten vun sin ole Firma sülben uthannelt hett.

Dorüm het use Kanzlerin Recht: de Arcandor-Managers köönt den Konzern alleen wedder ut de Krise holen — se möt bloß ersmol al tohop tröchtreden. So Managers as de löst dat Problem nich — se sünd dat Problem!

Meent tominnest

jo Maat Jan



na baven