Maat Jan denkt na över

Glövenssoken

Een glövt gor nich, wat een allns so glövt, un nich över nordenkt. Ick har to'n Bispeel jümmers glövt, de Sozialdemokroten weern tominnest noch Demokroten. Vun dat "Sozial" harn se sick jo in de grode Koalition ganz un gor verafschiedet. De Armen kreegen weniger för ehre Kinner (Öllerngeld), die Rieken beholen ehre Chefarztbehandlung (Gesundheitsreform), wi dröft all länger orbeeten un de Stüürn gohn för us Verbruker hoch un för Konzerne dal.

Ober Demokroten sünd se, har ick jümmers glövt, dat löppt nich so as in de CSU. De wart jo nu vun Seehofer dorto dwungen, över ehren Vörsittenden aftostimmen. Un dat se dat gor nich geern doot, dat kunn een in veele Kommentore ut de Parteibasis marken. De sünd dat eenfach nich wennt, dat kineen seggt, wo dat längsgeiht un wat se wählen möt. Ober wi mööt Gedüür hebben, Demokratie hebbt wi jo erst siet sösstig Johr. Dor kunn een Bayer sick nich so gau an wennen. Un tofällig kummt jüst nu rut, dat Seehofer en Affäre hatt hett. Dat hett he nu dorvun, sin Parteifründ so to argern. De weet sick, as een süht, to wehren.

Un dor har ick jümmers glövt, bi de Sozis in'n Norden giftdat sowatt nich. Ober nu har de SPD in Hamborg ehren Kandidaten för dat Börgermeesteramt wählt — dat heet, se harrn versöcht, eenen to wählen. Ober up een Mol sünd dor so'n poor Wahlschiene verschütt gohn un nich wedder updukt. Un dat weern so veele, dat de heele Wahl ungültig worn is. Nu hebt se kin Kandidaten un sogor de ole Kaptain Voscherau wull nich noch mol een Foot up dat morsche Schipp setten. So wat is bi de SPD noch nich passeert. Goot, in Wiesbaden hebt se letzt Johr eenfach vergeten, ehren Kandidaten vör de Börgermeesterwahl antomelden. Dat is al dösig noog. Ober so wat as nu in Hamborg passeert anners doch bloß in Entwicklungslänner, as in Afrika oder USA.

Ick meen, wenn se al nich wählen kunnen, denn brukt se de Help vun ehren groden Vörsittenden, Kurt Beck. De Beck hett dor nämlich vör korde Tied eenen kennen lehrt, de jüs en Job söcht un de sogor redig weer, sick dorför to waschen! Dat is jüs de rechte Mann för Hamborg! He is politisch unbescholten, har noch kin Tied hatt, sick in Skandole to verwickeln, un is wohrschienlich ok paraat, jedeene Menen to vertreten, de bi de Genossen jüs so aktuell is.

Woanners harn se kine Probleme mit de Demokratie. Bi de katholsche Kark to'n Bispeel brukt kineen sinen Bischop to wählen, un so kummt se to solk Lüüd as Walter Mixa. De, so harn en por Lüüd nu seggt, schall tröchtreden. Bloß wiel he Froons, de nich as Mudder tohus bleven, "Gebärmaschinen" nöömt har. Dat weer natürlich gor nich böse meent, de Kark har jo nix gegen dat Gebären an sick, in Gegendeel. Froons, de sick dormit tofreer geven, sün bi de Kark jümmers good ankamen. Ober Bischop Mixa is eenfach al een Schritt wieder. He is mehr vör de "extended version" mit all Extras: De kombineerte Kook-Gebär-Bicht- un Windelwuschmaschine.

Mixa is sülven ok so een Allzweckmodell. He is nich bloß Bischop, he is ok noch de böverste dütsche Militärseelsorger. Dorum meen ick ok nich, dat he tröchtreden schall. Solk Stimmen sünd sowieso nor nienich achter de Alpen hört worn. Ober veellicht kunn he sin Schwerpunkt so'n beeten verlagern, to'n Bispeel nor Kabul. Dor har he allns, wat dat kathoolsche Hart begehrt: Mannslüüd, de fiev Mol an Dag op de Knee to Gott beten, un Froons, de to de produktivsten Gebärmaschinen up de heele Welt tellt. Un wenn em dat nich langt, schall he sick en beeten vun de doren heimischen Krüder in sine Weihrookschleuder stoppen un anzünden. Dat beruhigt, meent

Maat Jan