"Mit so'n Hupen Pelz up'n Kopp rümtolopen bloots vunwegen de Warms — wat argerlich!"

Lisbeth freert

vun Jens-Peter Bey


As Lisbeth noch en smucke junge Deern weer, hest du di wunnert, dat se nich freert, wenn se dörch de koole Westminster-Abbey trippeln de. Klor, wenn se so'n unkommodigen Guldklumpen mit Blinkersteen op'n Kopp hett, kümmt se nich so gau vöran. Dat hört sich nich, dörch de Kark to jachtern. Un lädileik is dat ok nich. Eenzig ehr Hermelin hett ehr vör Goospickels bewohrt. Philipp, düssen Stiesel, kannst bi't Warmholen ok vergeten. Dat is hüt noch so. Lisbeth is nu in de Johrn kamen. Opstiegende Hitten is nich mehr. Wenn se buten bi de Peer togang is, deit ehr Koppdook noch gode Deenste. Süht verdeubelt ut. En lütt beten na ünnergahn Empeir un Hannoveranerin anno 1946. Dat weet Lissy sülm. As de Fruunslüüd so sünd: Veel beter föhlt se sik mit so'n pinken Pisspott op'n Kopp. Un warmer is dat ok. De Putzmakers hebbt bi ehr Dag för Dag good to doon. Aber keeneen wull ehr Persianer-Ohrnklappen inneien. Dor weer de ingelsche Butenminister ok froh. Nu kann Ahmadinedschad nich nörgeln. — Nülichs in Balmoral hett de Kamerdeener ehr so 'ne schottsche karierte Wulldeek för de Knee bringen wullt. Jungedi. Den hett se aber wegpüstert. Se weer bannig ut de Tüt. Ehre Kamerdeern keem glieks mit de Glennfiddich-Buddel. De weer noch vun Queen Mum överbleeben. Geiht nix öber'n warmen Buuk bi de Küll.

Nülichs in Buckingham Palace weer Philipp dorbi, sik de Reken vun den ingelschen Hein Gas antokieken. Veel to düer! Lisbeth keem doröber to. Beid weern se fix in Brass un hebbt schimpt as ingelsche Lünken. "Philipp, uns armselige Apanaasch reckt vörn un achtern nich", meent Lissy gnadderig un nippt an ehr Tass Tee. "Nu schriev mal enen Brandbreef an't Ünnerhus, dat wi keene königlichen koolen Fööt hem wüllt. De hebbt dor doch enen Hölps-Fond för Krankenhüser, Schoolen un Sozialwahnungen. Wenn du dat fikelinsch nug verkloren kannst, dat uns Buckingham-Palace ok nix anneres as en grötere Sozialwahnung is, sünd wi een poor Milljonen Pund rieker un künnt düchtig in uns Slaapstuv inböten." — Öko-Charles weer jüst to Besök, leep grön un rot an un weer not ämjused. "Wenn wi all en lütt beten tosamen krupen dot un du diene Corgies op de Fööt leggst, bringt dat düchtig Warms. Ik kann mienen Rottweiler ok mitbringen, un wi künnt veele Pund sporn, Modder." Nee, dor wull Lisbeth nix vun weten.

Wokeen de hoge Gas-Reken nu betahlen deit, weet ik nich. Is mi ok egol. Ik bün tofreeden, dat Lisbeth uns klor makt hett: Ole Lüüd dörft nich freeren un in en koole Slaapstuuv klappern!

P.S. Modder hett mi as lütten Jung 'n hitten Backsteen ut'n Kachelaven wahlwies in den Holsteenschen Courier oder dat Volksblatt wickelt. Dor kunn ik mi ünner de Daunendeek fein de Fööt warmen. Schall ik Lisbeth 'ne Mail schrieven, dat dat mit 'n ingelschen Backsteen, de "Times" un den "Guardian" ok geiht?


Foto Lisbeth: Man vyi/Wikimedia Commons
Foto Buckinghampalast: Diliff/Wikimedia Commons
Foto Lisbeth mit Pelzhoot: Lzur/Wikimedia Commons
17.10.2010


na baven