Kuddel sien Bertha leest jümmer noch Avendblatt:

De Steen kummt in't Rullen

Kuddel

"Nu is ja doch een vun de ‚Stones' Kanzlerkandidat worrn", see Bertha un leed dat Blatt op'n Disch.
Kuddel müss lachen. "Wo kummst du op den Naam?"
"Woso? De schrievt doch al maandenlang so vun Steinbrück un Steinmeier."
"Sietdem wi dat Avendblatt abbonnomiert hebben, büst du ganz plietsch worrn! Ik gloov, wi köönt uns sogor över Politik ünnerholen."
"Kloor!", entrüst sik Bertha. "Dat kunnen wi ok al fröher! Wenn du mi nich ümmer so ünnerdrückt harrst!"

Kuddel treckt en söötsuer Snuut. "Wat höllst du denn vun Peer?"

"Ofschoonst he as du Hamborger is, muttst du nich gliek ‚du' op em seggen!" Bertha weer jümmers noch füünsch. "He is sachts de best vun dat Kleeblatt, woans seggt se noch dor op?"

"Troika."

"Richtig, Treuka! Komisch, wo de doch keen beten tru sünd. Na. Aver ik denk, he hett gegen Fru Merkel keen Chance!"

"Worüm nich?"

"He schall ja so'n Finanzexperte sien. Dat is ja wichtig in uns Krisentiet, denn as de Finanzexperten uns rinreden hebbt, bruukt wi villicht ja ok welk, dat se uns wedder ruthaalt. Aver he seggt, he will mit tweehunnert Perzent tegen de Kanzlerin strieden. Dat is bregenklöterig! Ik heff in de School lehrt, mehr as hunnert Perzent geiht nich! Nu bün ik beförchten, he is een vun de, de uns rinreden hebbt, un nich vun de, de uns ruthalen köönt. En Dööskopp even."

"Dat muttst du nich op de Waagschaal leggen! Dat is doch blot en Spröök!"

"Na, Dat is bloots so'n Spröök is ja woll eerst recht so'n Spröök! Un wat is dien Menen?"

"Fru Merkel mutt em för vull nehmen! He warrt ok vun ehrtiets Unions- un FDP-Wählers respekteert."


Welk Steen kümmt da in't Rullen? Bild Rudi Witzke

"Ja, aver de Linken vun de Sozis mögen em daför nich. Dat is slecht för en Genossen, wenn se em in de egen Reeg ehren, aver nich leef hebben!", see Bertha övertügt. "De Stimmen, de he vun de anner Siet kriggt, fehlt em in sien Lager!"

"Mann in de Tünn!" Kuddel weer baff. "Du warrst op diene olen Daag noch to'm Analytiker!"

"Anal—— Also Kuddel, dat ik mi vun di solk Wöör —!!!"

"Wat denn? Analytiker is doch nich — och Bertha, wat du wedder denkst! — Nu also, de Linken vergeven em nich, dat he för de Agenda 2010 weer. He warrt ok nich an den plaanten Rentensatz vun tweeunveertig Perzent rütteln."

"Dat is al so ene Frechheit! Un denn beduern se schienhillig de Armoot in'n Öller! Aver de Pensionen, de saken se nich, de blifft bi söventig Perzent!"

"Dat is ja keen Wunner nich: De mehrsten Politiker sünd doch Beamte!"

"Dorüm möten wi mehr vun de Straat in't Parlament wählen. Minschen as du un ik! Du as ehrder Havenarbeider verstehst doch de Sorgen vun de lütte Lüüd!"

"Ja, du hest recht, aver ik harr doch noch anner Scholen besöken möten. Un welkeen weet, as ik korrumpiert worrn weer?!"

"Och nu gah mi doch af, Kuddel Stahwedder! Da schast du dat doch för doon! Ik will ok an so'n Pension kamen mit söbentig Perzent! Uns Rente langt doch achtern un vörn nich. Un dat du mi mit keen Perzent weniger ut'n Bundsdag trüchkümmst! Denn köönt se di ruhig korrodie- äh, komponie-, na, komodingsda!" Bertha süüfzt. "Aver in welk Partei schast du intreden, dat du an de Pension kümmst? De Ümfragen hebbt ja keen Mehrheit nich, nich för Swart/Geel un nich för Root/Gröön. Da mutt bit to de Wahl noch en besünner Begevenheit schehn!"

"Un wenn nich, hebben se doch noch de Piraten, üm an de Macht to kamen."

Bertha maakt ene minnachtige Handgebeer. "Go mi an Land mit de ‚Klappreekner-Generatschoon'! De schölen torüch na Somalia!"



na baven