Gröönkohl mit allens. Foto: Wilfried Wittkowsky/Wikimedia Commons
Gröönkohl mit allens. Foto: Wilfried Wittkowsky/Wikimedia Commons

Kohldamp

vun Brigitte Fokuhl


Also, wer up Diät is, de sall nich an'n Bökerschapp gahn! Nix gegen Goethe un Schiller, Courths-Maler, Pilcher un Simmel, de höört dorhen. Man wenn du al dorbi büst, dormank rümtosöken, finnst du bestimmt ok dat een odder anner Kaakbook. Un denn warrt dat leeg. Wer up Diät is, hett egenlich jümmers Kohldamp. Reed nich gegenan! So is dat! Odder du hest noch keen Diät maakt odder hest dat nich nödig, wieldat du een Spiddelfix büst un liekers allens eten kannst, wat un woveel du magst. Denn geiht di disse Geschicht nix an. Man de mehrsten geiht dat doch woll so, se mütt' uppassen, dat se sik nich de Flomen ranfreten. Wenn dat Tüüg anfangt to kniepen, denn is't sowiet. Denn is Diät anseggt. Nich, dat denn allens verbaden is. Du dörfst den helen Dag Water drinken, soveel as ringeiht, odder Tee, wenn du magst. Man ofteens smeckt de as dat Heu, dat vun dat letzte Rasenmeihen noch liggenbleven is. Smeckt as Knüppel up'n Kopp, segg ik di. Un dat sall je ok woll so sien, denn vergeiht di sowieso de Aptiet. Man de Kohldamp, dat lerrige Geföhl in'n Maag, dat's nich schöön. Dorgegen gifft dat Knäckebroot mit magern Kääs odder Gemüüs odder mal 'n Appel odder sowat in de Oort. Un dat jed'een Dag, wekenlang, wenn dat helpen sall.

Un nu steihst du doch tofällig mal vör'n Bökerschapp, nee, nich wegen Goethe odder anners een groten Dichter, nee, du wist blots mal in dat Kaakbook kieken, of du dor nich een nieges Diätrezept in finnst. Woans Wötteln schraapt un Appeln häckselt un denn allens dörcheneenröhrt warrt mit Zitronensaft an, blots kenen Zucker, höchstens mal 'n beten Saccharin, dat weetst du je middewiel. Un bi dat Söken in'n Kaakbook bliffst du up eenmal hacken, utrekent bi dat Rezept vun Gröönkohl mit Kassler, Swiensback un Kohlwust. Wat en Gedicht! Un denn schöön krosch in Speck braadte Puulkantüffeln dorto! Hm, dor künnst du di glatt rinleggen. Mal kieken, woans dat maakt warrt. Aha, den Gröönkohl mit Swiensback un Kohlwust in'n Pott kriegen un gorkaken. Den Kassler in de Röhr schuven un mit 'n goldbrune Krust dörchbraden.

Wieldes du dat dörchleest, is up eenmal in dien Muul so'ne Oort Füürwehrmann togang mit en Watersprütt. Dat Water löppt di man so över de Tung, is kuum daltoslucken, so veel is dat! To glieke Tiet stellt en Motorradfohrer siene Maschin an un düüst dormit dörch dien Maag, up un dal, vör un trüch, liek so as de lütte Häwelmann in sien Rullenbedd. Also, dat is je nich uttoholln! Eerstmal in de Köök nakieken, dor liggt noch een dröög Schiev Knäcke. Dor kaust du up rüm, un denn stöövt dat 'n beten. De Füürwehrmann höllt mit Watersprütten up, un de Motorradfohrer stellt siene Maschin ut — eerstmal.

Gröönkohl in'n Goorn. Foto: Curly kale/Wikimedia Commons
Gröönkohl in'n Goorn. Foto: Curly kale/Wikimedia Commons

Also noch mal to den' Gröönkohl. Egenlich is dat je Gemüüs, steiht bi uns achtern in'n Goorn un is je soo gesund. Na ja, Swiensback, Kohlwust un Kassler, dat versleit 'n beten wat, aver wi mütt' in'n Winter je ok wat totosetten hebben wegen de Küll. Na, un de schönen Linda-Kantüffeln, de bruukt de Minsch je ok — wegen de Stärke. Dor geiht keen Weg an vörbi.

Verdammi! De Füürwehrmann hett de Sprütt wedder ingang kregen un bit to'n Anslag updreiht. Un de Motorradfohrer, de dösige Keerl, de sitt alwedder up siene Maschin un pedd dat Gas dörch, dat rummelt forchbor. Is in de hele Stuuv to höörn. He düüst in'n Maag rüm un mit Vulldamp dörch de Slaglöcker, dat "kesselt" man so. Un weh deit dat ok noch.

Gröönkohl mit allens. Foto: Wilfried Wittkowsky/Wikimedia Commons
Gröönkohl mit allens. Foto: Wilfried Wittkowsky/Wikimedia Commons

Na, nu helpt dat nich mehr. Morrn gifft dat Gröönkohl mit Kassler, Swiensback un Kohlwust un fiene Braatkantüffeln. Un is je meist as en Diäteten — wenn man dat so süht. Dor kannst du bi disse Gelegenheit je glieks noch mal na dat Rezept för de fienen Pletten kieken, de so up de Tung wegsmölten doot. Nee! Nu is't aver noog! Woans kann man sik so vergeten! Fix dat Kaakbook toklappt un mank Goethe un Schiller deponeert! Un denn to mit dat oll' Bökerschapp, afsluten un den Slötel in de Spieskamer versteken! Wenn blots de verdammigte Kohldamp nich wäär!


4.1.2009


na baven