Alln's genormt

vun Heinz Tiekötter


Dat mit de Löcker in mien Gördl heff ik nu in Griff. Dor heff ik 'n Feller mookt: Dat weer falsch, em optowickeln un in de Schuuv to leggen. Dat mookt em kötter. En Gördel müsst du ophangen, so streckt he sik 'n beten. Kledoosch rigtig to logern, is nich so licht. De dröffst du ok nich eenfach henhangen. Dörch dat Egengewicht treckt se sik un ward länger un dormit eng. Un denn gifft dat noch de Kalorien; dat sünd so lütte Öster, de vergoht sik in'n Kleederschapp an diene Klamotten un mookt se enger.

Freuher harrn de Kledooschfabriken so'n Normen-Utschuss. Alle fief Johrn kemen de tosomen un hebbt faststellt, wat sik — seggen wi mol bi de Grötte 56 — de Längde vun de Arms or de Büxen bi de Bevölkerung ännert hett. Ik harr dor ninich 'n Probleem mit. Bi mi hett sik dat mit de Tiet vun alleen ännert. Eerst harr ik 54, denn 56 un nu passt dat Jäcker an besten, wenn dor 60 insteiht. Wat'n Tofall ok; ik weeg jümmers duppelt so veel as de Tall, de dor insteiht. Bi 54 heff ik 108 Kilo wogen, bi 56 harr ik all 112 Kilo un siet dem ik de Grötte 60 drääg, weeg ik 120 Kilo. Man dat is nich de eenzige Tofall: Miene Gördels sünd jüst so veel Zentimeters lang, as ik an Kilos op de Woog bring. To Tiet sünd mien Gördels 120 Zentimeters lang; nu kiek mol. Dat hett de Natur doch klook inricht. Dink mol an de Proporschoonen vun Leonardo da Vinci sienen vitruvianschen Minschen. Dor harmoniert ok allns wunnerbor.

Siet Kottem is allens anners. Nu gilt dat nu nich mehr bi mi. Ik find mi nich mehr torecht in düsse Modewelt. 60 is vörbi; dat gifft nu för mi de Grötte XXXL. De ober in dree Sorten. Ik gläuv, de arbeit nu mit de Gastronomie tosomen. Bi Steaks gifft dat jo rare, medium un welldone. Bi de Mode gifft dat nu ok dree Normen: slim, regular un normal. Ik meen, sowat mookt een doch bregenklöterig wenn he ut de Provinz is.

Annerlest heff ik mi to den dunklen Antog, den ik vun mien Vadder arft harr, 'n West in XXXL komen loten. Ik heff dacht, dat hübscht beten op. In de West stunn slim fit. Un in mien Ingelschbook steiht för slim jo schlank. Also, bi schlank harr mi de West jo passen musst. Bi de Anproof heff ik mit de Knööp unsen groten Spegel tweischoten.

Also wenn de Modemackers nich wedder trüchfind to da Vinci un de düütsche Norm, denn sühst du mi tokünftig blots in'n Kittel rümlopen.


Da Vincis Ideaalminsch weer ok nich even dünn


5.2.2017


na baven