Fruunsdag, Mannsdag

vun Marlou Lessing,
Biller: Katja Renfert

Een mutt düllen,
een mutt bestahn,
een mutt sik wehren,
een mutt wiedergahn.

Een mutt vun sik sülven afsehn,
an de annern denken
un an dat Ganze,
sik dükern laten
un dochen wedder hoochkamen,
een mutt merrn in't Füür
noch de annern Troost un Leevde geven.

Een mutt doon,
wat daan warrn mutt,
un sik noch doför schamfeern laten.
Een mutt den Steen
den Barg tohööcht rullen
jümmers wedder,
elkeen Dag nieg.

Een mutt den Boom planten,
nicht för sik un ehrn Naam,
sünnern dat dor en Boom wasst
för Minsch, Natuur un Welt.

Un den Boom sülvst
mit Leevde un Schuul
un Schöönheit un Warms bedenken.

Wokeen kann
dat allens duurn, doon un bestahn?

Ja, wi Fruuns sünd dat.
Wi köönt dat.
Man ik bün wiss:
Dat kann ok
en Mann.
Un ok
nich bloots hüüt,
man jedeen Dag.

Ik glööv an de Gliekheit in allens Gode.
I believe in equality.