Eva Herman: So en Nerverie!Eva Herman: Dat Eva-Prinzip

Frisch vun Heim un Herd: Wedder mal nervt en nagelniege Emanze mit radikale Wohrheiten — natüürlich mit'n Book

En Bookkritik vun Marceline Reich-Ranicki


Ach ja, dat is mal wedder so wiet: En niege Steern is an'n Heven vun den Populär-Feminismus opgahn. Eva Herman debüteert mit ehr Book "Dat Eva-Prinzip". Eva Herman? Den Naam hebbt Se wiss noch nienich höört. Ik ok nich. Nüms kennt Eva Hermann — meist nüms as ehr Ehemann un ehr fief Kinner. Eva, blond, smuck, middelplietsch, hett sik as junge Fru ganz gegen den Trend staats för de Karriere för Familie un Kinner entschieden, hett heiraadt, fief Kinner kregen, ehrn Mann den Rügg friehollen för sin Karriere, all Daag Appelkoken backt un Kerzen afbrennt as för dull un is alltied för ehre Leven dorwest. "De mehrste Tied", schrifft Herman in ehr Book, "heff ik dacht, ik weer glücklich. Man in de letzten Johrn föhl ik, dat ik jümmer mehr untofreden woor mit min Alldag, mit min Eh — un överhaupt. Een Dag heff ik in'n Spegel keken un mi seggt: Eva, bald warrst du 50. Wat hest du maakt in din Leven?" In düssen Momang, seggt se, weer se batz! vun't Wonneweibchen to en metzscharpe Feministin muteert. Dat bekannte Femi-Coming Out güng los: Se klöör sik de Hoor knallrood, bammel sik een kilometerlangen Ohrring an, leet sik scheiden, tröck üm in en WG, nehm sik twee orr dree jüngere Leevhebber, füng an to studeern — natüürlich Sozialpädagogik un Psychologie — un, na klaar, parallel düt Book to schrieven, mit dat se us nu beglückt. Solk schrievt jümmers glieks Böker. Un wat in steiht, weet wi ok: Fruuns schallt sik nich in Fesseln slaan laten, Fruuns schallt sik utleven, Fruuns schallt Karriere maken usw. Bloots keen Familie! Bloots keen Ünnerordnen ünnern Mann! Bloots nienich den Mund hollen! Allens, wat se sik bi Germaine Greer, Juliet Mitchell, Alice Schwarzer un all de feministischen Klassiker tosamenleest hett (orr ok nich?), warmt se nieg op un serveert us dat, as weer dat ehr egen niegste Erfinnung. Allens, wat se tovöör maakt harr, weer verkehrt; avers nu, mit 50, hett se de Wohrheit funnen, de Sülvstverwirklichung! Hach. För 18 Euro.

En Huusfru is mal wedder ut ehrn Kokon sluppt un as Bottervagel wegflagen. Kennt wi de Story nich? — Wa kümmt dat eentlich, leve Mit-Fruuns, dat dat jümmers so mit 50 passeert? Kann dat wat mit to doon hebben, dat Fruuns mit 50 eenfach untofreden warrt? De Wesseljohrn? Hebbt mennig Fruuns denn villicht eenfach dat Geföhl, in ehr Leven is wat nich richtig lopen, un dat harr eentlich allens ganz anners ween müßt? — Mannslüüd geiht dat ja faken so. Wull Eva in de Wesseljohrn ehr Leven utwesseln?

Wat, wenn Eva staats Familie Karriere maakt harr? Villicht mit knapp 40 en eenzig Sinnstiftungs-Kind kregen, avers süss nix vun Familie weten dä? Wat wöörn wi denn för'n Book vör us sehn? Wiss een, dat den ganzen Feminismus un de Karrieresucht in Grund un Borrn verdammen dä. För Mannslüüd ja, avers för Fruuns — nee! Fruuns sünd för de Familie boorn, wöör Eva denn schrieven, se schallt sik ünnerordnen! Kinner kriegen! "Das goldene Blatt" lesen! Un Appelkoken backen, Appelkoken, nix as Appelkoken! — So, as se dat nich maakt harr, so müss dat richtig ween!

Kinners, eentlich weer dat binah ogineller. Böker vun Bottervagel-Huusfruuns hebbt wi nu noog. Böker vun Heimchen-an'n-Heerd-Preesterschen hebbt wi twoors ok noog, avers nich so vele, wieldat de ehr Devise ja is, Fruuns schallt stillswiegen; un tominnst weer dat erfrischender, Eva Herman wöör sik as Heimchen an'n Heerd optakeln un endlich düsse Irokesenfrisur un den kilometerlangen Ohrring opgeven. Man ehrn Appelkoken wöör ik liekers nich eten. Bi solk, as se een is, tru ik den Appelkoken ok nich.

Dat Book is so un so Ooltpapeer. Frisch ut de Druckerie.


Marlou Lessing, 7.9.06


na baven