Eier op Ies

vun Jens-Peter Bey


Dat Kinnerkriegen is so'n Saak för sik. Wenn de Hitten groot is un dat Hatt un de Ünnerliev düchtig tosamen speelen doon, kann dorbi fix wat Lütts bi rutsuern. Un de een oder anner schnackt denn vun Malöör. Dat hett meist 'n tweeten un drütten Noom so as Kimberley oder Rocco-Maik. Bi betere Lüüd ok mol Emma-Sophie un Willem-Alexander.


"Rocco-Maik, ik kann di in'n Momang gor nich bruken!"

Hüüttodaags is dat Malöören nich mehr so in Mood. Wenn't allerbest klappen deit, künnt de tokamen Mudder un ok de Vadder reguleern, wann de Ogensteern, de Sünnschien op de Welt kamen schall. De passende Pill vörher oder achteran kann plietsch insett warrn op de Agenda för Kinner un Karjeer. Mennigmol is dor partu keen Tiet för wat Lütts.

PiDaNa, de Pill för achterna, gifft dat för 'n Appel un 'n Ei in de Afthek. Dor mutt keen Dokter fragt warrn. Anners is dat bi't niemoodsche "Egg-Banking". Dor brukst du Perfessers, Dokters, en Köhlschapp un tominst 20.000 Euros för dat "Social freezing". De fikelienschen ingelschen Wöör mütt 'n lütt beten verkloort warrn. Dat geiht nich anners as bi Iglu, Iesmann un Frosta üm dat Infreern. De lierlüttjen Eier vun de Fruunslüüd künnt in Stickstoff bi minus 196 Grad op Ies leggt un to passende Tiet opdaut warrn. De biologische Klock speelt denn keen Rull mehr. Dat Slagwoort heet: "Köp di Tiet"! Keen Fru mit dörtig noch nich will, un mit veertig ok nich, kann bit föfftig den Kinnerwunsch wohr warrn laten.


20 Johr later: Sünd de Hoor ok al gries — dat Ei leeg op Ies!

Is nich anners as bi'n Football. Na de reguläre Speeltiet gifft dat en Verlängerung. Kunn liekers sein, dat de Fru nich weet, wat de Keerl, de bi ehr tohuus rümsitten deit, noch de richtige is. Denn schull se sik gau en annern ran-tindern, de wat beteres tostüert för den Last-Minute-Cocktail.

Moderne Minschen, de nich to kniepig sünd, künnt sik allens topass maken. Dat kust düchtig wat, aber so'n seut Göör in't Öller is sien Geld weert. Keen bi Apple, Facebook oder Intel arbeiten deit, kriggt dat Infreern sogoor för ümsünst. De Firmen sünd fein ruut, wenn de taffen Fruunslüüd sik in de knackigen Johrn nich dörch de Blagen aflenken laten. Schull sik dat Infreeren dörchsetten, blievt de Eierbanken mit Risikokapital in't Geschäft un de Fruuns op "standby". Dat is niemoodsch un hett Tokunft.


Smölt bi Hitten un mutt ok op Ies!

Mit dat Kinnerkriegen "just in time" schull man liekers nich to lang töven. Wenn Mudder Griepsch to laat un Gevadder Dood to fröh kümmt, gifft dat Dörcheenanner in den heel feinen Levensplan. Schull man de oldbacksche un vergnögliche Oort, Kinner to kriegen, nich doch 'n beten mehr afgewinnen? Keen Tied dorför? Gah mi af, gah mi los!


1.8.2016


na baven