 |
|
Öllere Daagbook-Notizen vun Marlou |
|
|
Fief Minuten dat Licht utmaken. För dat Klima. Dat hett dat würklich geven düt Johr, 2007, in'n Dezember. Fief Minuten! Wi sünd Helden. Märtyrer för't Klima, dat sünd wi. — Later mal warrt se över schüddköppen, as wi nu schüddköppt, wenn wi leest, dat se in't 13. Johrhunnert de Pest mit Danzvergnögen hebbt bekämpfen wullt. Dat mit dat Klima, dat is en teemlich hoge Wand, op de wi mit Vullgas losdüüst. Fraag an Radio Eriwan: Wüllt wi stoppen? — Anter: Im Prinzip ja. Gode Vörsätz hebbt wi ja. Merkel snackt vun 40% CO2-Redukschoon, man wenn een Lobby opduukt, de Autolobby orr de Stroomlobby orr süss een, is dat erstmal wedder vörbi. 40% is denn jümmers noch 40%, avers nich graad hüüt un nu. Wi düüst noch jümmers op de Wand, man wi maakt Foortschreed: meddewiel is dat Konsens, dat wi villicht mal in'n 3. Gang rünnerschalten schulln. De FDP meent avers noch, de 4. Gang wöör langen. Un wi hebbt ja Airbags, mööt wi da överhaupt bremsen? Bi dat ganze Klima-Gesabbel warrt een Woort verdächtig püük utspaart, as weer dat unanstännig, ja vergift. Tabu as dat F-Woort in't Amerikaansche. Fuck! — Uns' Tabu-Woort fangt mit V an. Nee, nich "Vorsatz". Ok nich "Verbot". Dat V-Woort in de Klimadebatte heet: Verzicht. Ganz eenfach Verzicht. Verzicht is nich dat eenzige, man ahn Verzicht warrt allens annere nix helpen gegen den Klimawannel. Verzicht? Quiiietsch! Vör düt Woort maakt wi nu foorts uns Vullbremsung. (De FDP to allereerst.) Dat is doch en Tomoden is dat! — Na good, fief Minuten Licht ut, dat geiht noch. Man allens annere kann doch nich eernsthaftig angahn. Dat is doch Spinnerie. Dat weern alltied Spinner, de vun Verzicht snackt hebbt. Kannst doch de Lü nich seggen, dat Wohlstand un Wohlleven nich wieder wassen dröfft, köönt, schallt. Trüch in de 70er mit'n Levensstandard? Orr in de 60er? Dat kann nich ween. Dat mutt en technische Lösung geven, en Lösung, de vörangeiht staats trüch. Dat mutt eenfach! Dat güng jümmers vöran, dat kann doch nu nich anners warrn! Woneem kaamt wi denn da hen?! Gegen de Wand villicht? —— |
|
|
Is dat nich fies, dat de EU solk strenge Afgasnormen för PKW inföhrn will? Dat geiht gegen de düütsche Autoweerschap, jawoll. De buut ja doch düsse dicken Stinker, de extra kosten schallt. Dat is böse Afsicht is dat. Antidüütsch. — Mit de glieke Logik kunnst seggen, de Drogenpolitik in de ganze Welt geiht mit Afsicht gegen de afghanische Landweerschap — denn de leevt ja vun't Opium. Antiafghanisch is dat. Ehr Fehler, dat se den Dreck anbuut? Ach wat! Ok en Weerschap, de Dreck produzeert, mutt schuult warrn. Weerschap mutt jümmers schuult warrn. Bloots nich de vun de annern. Schuult warrt ja avers op jeden Fall de düütsche Wienbuu. Wieldat dat bi us (noch) nich warm noog is, dat de Wien so richtig sööt warrt, dröfft uns Winzer ok wiederhen Zucker tokippen, solang dat Tüüch gäärt. Dat hebbt se in de EU dörkregen. De Wien warrt dorvun nich söter, nee, man he knallt miehr; denn de Zucker vergärt to Alkohol. Man woso extra Zucker mit den Wien vergären? Ik meen ja, dat weer ehrlicher, direkt Alkohol totokippen — dat kunn een eenfach in den fertigen Wien doon, nich komplizeert in de Gärung. Fienste, reinste Alkohol kunn in den düütschen Wien — destilleert t.B. ut de hooch subventioneerten Wienseen vun de EU. So warrt wi den överschüssigen Wien glieks mit los, un de Wiensee kriggt togliek hochperzentigen Naschub ut Düütschland, un dat Geld — de Subvenschoonen — zirkuleert munter sinnlos wieder. Weerschap mutt jümmers schuult warrn! Nee, de sünd nich alle besapen bi de EU. So sünd de jümmers. Tominnst in't Landweerschaps-Ressort. Mit de Autos sünd se beten vernünftiger — süh baven. |
|
|
12.12.07 ...Club der Verschmähten Oha, nu mutt ok noch de "Spegel" annerwegens bedeln gahn. Klaus Kleber, wat de ZDF-Narichtenminsch is, hett ehr afseggt, he will nich ehr Baas warrn. Batz, so'n Korv mutt de "Spegel" insteken. Man dat is gor nix gegen de grote Tall an Körv, de de ingelsche Football-Naschonaalmannschap al kregen hett. Nüms will ehr Baas warrn. Un se hebbt würklich alle fraagt! Nu warrt ehr dat gahn as Belgien: al en halv Johr keen Regeern. Nüms will ehr Baas warrn. Ok in teihn Johr hett England noch keen Trainer un Belgien — na wenn't dat noch gifft... Se kunnen meist en Club opmaken, Belgien, de "Lions" un de Spegel. Den Club vun de, de nüms hebben will. To Noot geiht dat ja ok ahn Regeern!
|
|
|
Nu is de ingelsche Lehrersch frie, de in'n Sudan verhaft weer. Begnadigt is se. Se harr in de School den Klassen-Teddy "Mohammed" nöömt, as de Kinner dat wulln un as 90% vun de muslimischen Jungs heet. Gottslästerung. Se harr den Islam beleidigt. Welk feddern sogoor de Doodsstraaf. Welk vun de, de de Doodsstraaf feddern, muchen wohl ok "Mohammed" heten. Man se sünd keen Teddys, sünnern utwussen Mannslüüd, de den Islam würklich restlos to'n Gespött maakt. Un dat is ja keen Gottslästerung nich. Dat is Frömmigkeit. Wat weer sachs passeert, wenn de Kinner feddert harrn, ehr Teddy schull "Mohammed" heten, un de Lehrersch harr dat weigert? Naaa? Richtig, dat kunn liekso "Beleidigung vun'n Islam" west ween, en Akt vun Hass, doodswördig. De sudanesischen Mohammeds mööt dat bloots wulln, denn is dat dat ok. Markst Müüs? Dat's Terror. Terror is, wenn de Gefohr unberekenbor warrt. Du kannst nix mehr richtig maken. Du kannst di nich schulen. Överall liggt borgen Minen, de hoochgahn köönt, wenn Du bloots de harmloseste Bewegen maakst. En rein Hart un en graadut, oprichtig Hanneln na best Weten un Geweten schuult Di nich mehr. Din Hanneln hett villicht gor nix mit to doon — villicht warrt reine Willkür gegen di öövt. Vörwänn langt. Kann jeden drepen. — Warrt seggt, de Sudan harr dat grulich Speel inszeneert, Grootbritannien un den Westen een to verpulen. Mag ween. Man brukt hebbt se dorför klassischen Terror. Wokeen mi an'n mehrsten leed deit, sünd — de Kinner. De Lehrersch kann't verkraften, se versteiht, wat mit ehr speelt warrt, avers wat geiht in de Kinnerseelen vör?! Jüst noch weern se unbesweert, ahn Arg, hebbt lacht, wulln ehr Knuddeldeert den Naam geven, den se al so mennig vun ehr Knuddeldeerten geven hebbt — un nu höört se, dat weer en Verbreken, för dat een ok starven kann. De Schock! De Angst, Angst vör sik sülven, vör dat Unbegreifliche, villicht al de Angst, an de falsche Steed to lachen, to arglos to ween, to fröhlich, de Angst vör en eenzig unbedachte Bewegen... de Angst vör den Dood. Terror. För düsse Kinner is de Kindheit toenn. Wenn Kinner nich arglos ween köönt, is de Höll los. Is dat Islam? En Tied vun Dämonen fangt an för düsse Kinner, bet de Gehetzten sülven to Hetzer warrt un villicht den Dood feddert för een, de bloots en rein Hart harr un slicht graadut hannelt hett. So slütt sik de Krink. — Hett jichenseen da wat vun, Minschen so to verbögen? Ja. Minschen in Angst laat allens mit sik maken, wenn du ehr bloots dat Leven lettst. Jüst da wüllt de profeschonellen Mohammeds de Sudanesen, Kinner un Grote, henhebben. Un us ok. — Wokeen noch Minschen leevt, mutt sehn, dat se ok Opper sünd; man wokeen noch een Bregenzell hett, kann sehn, dat wi düssen Terror, de överall Gedankenminen leggt, nich een Zentimeter nageven dröfft, egaal ünner welk Maske he optridd — Islam orr en anner Bigotterie. |
|
|
De "Diäten" vun de Afgeordneten warrt wedder höger. As jümmers hebbt se dat sülven beslaten. Man gifft ok Lü, de nich Afgeordnete sünd un dat liekers verdeffendeert. "Wenn wi de besten Köpp in de Politik halen wüllt," seggt solk, "mööt wi jüm wat anbeden. Wi mööt mit de friege Weerschap konkurreern üm de besten Köpp, wi mööt Spitzenkräfte anmeten betahlen!" Dat is en Ansicht, över de sik nadenken lett. Wi wüllt also de besten Köpp, un so beed wi jüm "anmeten" veel Geld. Denn kriggt wi de besten Köpp — de dat för Geld gifft. Anners wöörn düsse Lü in de Weerschap gahn. Nich vunwegen de Weerschap sülven, sünnern vunwegen dat Geld, dat se da verdenen köönt. So as se in de Politik gahn wöörn vunwegen dat Geld. Nich üm de Saak. Also eentlich kriggt wi Söldner. Wat ik nu vun solk regeert warrn will, dat weet ik nich so recht. Man ik weet ok nich so recht, wat ik nich al lang vun solk regeert warr. Ik glööv dat meist. Düsse "besten Köpp" sünd denn welk, för de ganz natüürlich de gröttste Gewinn ok de gröttste Nutzen is. Op jüst düsse Wies warrt se ehr Amt bruken: Geld is dat Wichtigst! Düt eendimensionale Profitdenken warrt ok vun Staats wegen predigt, un mennig Lü sünd so tutig — orr so resigneert — un glöövt dat al. Ganz sülvstverständlich plant sik so de Geldgier as gottgeven Natuurgesett foort. Wenn de besten Köpp bloots för dat beste Geld to hebben sünd, sünd logischerwies de Ehrenamtlichen altohoop Idioten! Klaar, nich? Weern se gode Köpp, weern se ja al in de Weerschap. 'neem dat de grote Penunze gifft. So is de "Denke" vun düsse besten Köpp. Kannst vör solk Lü överhaupt Respekt hebben? Un nu will ik vun de würklich besten Köpp vertelln. Gifft welk, de doot ehr Arbeit, wieldat se meent, dat is dat, wat daan warrn mutt. Un se doot dat mit ganze Knööv. Mit mehr Geld kunnst ehr da nich vun weglocken. Ok nich mit veel mehr Geld. De Fruuns, mit de ik jedeenen Dag tohoopwarken dröff, weet, dat ik se meen. Man anner ok. Dat sünd Minschen, mit de een geern arbeiten deit. — Un denn will ik noch de Anekdote navertelln, de ik jichenswoneem leest heff: de Anekdote vun den Wetenschapler in de USA, den se anhaugt hebbt, so'n Vördrag op'n groot Fest to hollen. Nee, sä he, he kunn nich vun sin Forschung weg. "Man wi geevt Se 20.000 Dollar!", hebbt se seggt. Un de Forscher sä den unstarvlichen Satz: "Ik kann min Tied nich mit Geldverdenen verplempern!" Solk Köpp kriggst nich för Geld. |
|
|
De SPD hett op ehrn Parteidag in Hamborg Tempo 130 op Autobahnen beslaten. Dat weer mööglich, wieldat de Verkehrsminister Tiefensee (SPD) nich vun de Autolobby köfft is — anners as sin Amtsvörgänger Matthias Wissmann, de hüüt ok för de Autolobby arbeiten deit. Verkehrsminister Tiefensee (SPD) is nämli vun de Bahnlobby köfft. Dorwegen hett de Parteidag sik ok mit Wedderwilln fründlich stellt to de Bahnprivatiseern. Un bi de privatiseerte Bundsbahn warrt Verkehrsminister Tiefensee (SPD) jichenswenn in de Tokumst en lukrativen Job hebben — wenn he mal nich mehr in de Politik is. So funscheneert Korrupschoon hüüt. En Tempolimit vun 130, seggt se avers, warrt doch glatt en halves Perzent CO2 op de Straten insparen. Stimmt nich. Wi weet nich, wat Tempo 130 inspaarn wöör, man dat Tempolimit spaart gor nix in, denn nüms höllt sik an. Gifft bloots poor niege Schiller. As nu bi de ganzen Tempo-120-Zonen. Dormit maakt sik de Staat bloots lächerlich, un dat kunnen se man beter nalaten. Nich verbeden — meten! Blixen, wat dat Tüüchs höllt. Dat wöör helpen. Eerstmal de Regeln, de al gellt, dörsetten, ehrdat se niege maakt. |
|
|
21.10.07 ...Manntje, Manntje, Timpe Te... Sünndagavend. Ik kiek "Titel, Thesen, Temperamente" in't Kiekschapp, en Kulturmagazin. De Moderatorsche steiht vör us, smuck, chic, en sundes, sülvstbewusstes Minschenkind mit gode Billung un en prima Job bi de ARD. Un se künnigt en Bidrag mit düsse Wöör an: "Wer von uns kann schon von sich behaupten, dass Gott es gut mit ihm gemeint habe? Der Architekturfotograf Julius Shulman sagt das von sich. Wir müssen uns ihn als glücklichen Menschen vorstellen." — Hallo?! Wokeen kann vun sik seggen, dat Gott dat good mit em meent harr?! Is da noch een Bregenzell aktiv? "Na, wat will se denn?" sä de Butt.
"Ach Butt," sä de Fischer, Kann ja nich jedereen en glückliches Naturell hebben. Man woto gifft dat eentlich Narichten? Berichten vun de Noot in de Welt? Villicht, dat wi verglieken köönt? Dat se us dankbor maakt? — Wa harr dat noch mit us kamen kunnt? Is dat amenn so wiet, dat wi de poversten vun de Minschen sünd? "Wat will se denn nu?" froog de Butt... Un woto hebbt wi anner Minschen, de us vun sik vertelln köönt? De Olen? "As min Moder doodbleev, ik weer man dree Johr", vertellt min egen Moder, "un ik min Vadder da so hülplos sitten un wenen sä, da föhl ik mi meist ganz alleen op de Welt; eentlich bruuk ik all Leev, de dat geev in de Welt, man noch mehr bruuk ik, dat ik wat geven dä. Un ik bün hengahn na min Vadder un heff em an'n Ärmel tuckt un seggt "Nich wenen, Papa, du hest doch mi!" So heff ik in't Leven jümmers dat, wat ik nödig bruken dä, geven kunnt. Gott hett dat heel good mit mi meent." — Wokeen partu nich dankbor ween will, de höört da ok nich hen. De meent bloots, em stünn allens to, un Gott weer em dat schüllig. "Gah man hen," sä de Butt. "Se sitt all wedder in'n Pissputt." |
|
|
Ursula von der Leyen hett ehr söben Kinner as Testköpers för Drogen un Gewaltvideos anbaden — en Storm vun Opregen, un as se ehr dat Sorgrecht wegnehmen wulln, hett se den Steert wedder inknepen. Dorbi harr se doch bloots mal an so intressante Gewaltvideos kamen wullt. In ehr heile Welt kann se de anners ja nich rechtfardigen. Bloots as Testkööp. Nee, nich dat se op Gewalt steiht — igitt — se wull dat doch bloots mal testen... De Testgedanke warrt meddewiel epidemisch. Mennig Öllern hebbt al bi de Regeern anropen un seggt, wenn de Göörn den Alkohol un de Videos, de se testköfft, mit na Huus nehmen dröfft, wöörn se ehr Kinner ok to Verfögen stelln. De Göörn sünd natüürlich sowiso inverstahn — to'n Test. Överhaupt sünd wi ja en Volk vun Testköpers. Ach, Se köfft Kondome? Ja, bloots to'n Test! Illegale Software? Natüürlich to'n Testen, wat de Copyright-Mafia ok op'n Posten is! Bloots to'n Test raast ok de Lü op de Autobahn — se wüllt mal kieken, wat de Udels ok oppasst. Klaun in't Koophus? Nee, bloots mal testen, wa fix de Detektive sünd! Wi kunnerleert de Kunnerlöörs, dat is doch klaar! Bloots so warrt sekerstellt, dat Recht un Ordnung gellt. Ok Schäuble will ja bloots pröven, wa fit uns Demokratie noch is. Dorwegen maakt he den Big Brother — bloots to'n Test. |
|
|
18 Johr al Düütsche Einheit — de Einheit warrt mündig. Nu dröfft ok de Ossis wählen. Wählt warrn dröfft se ja al länger, wi hebbt ja en oostdüütsche Bundskanzlersche. De hebbt wi avers bloots ut Sporsamkeit, wieldat oostdüütsche Arbeit ja billiger is — ok oostdüütsche Politikers kriggt 10% weniger Gehalt. De Finanzminister plaant dorwegen, de ganze Regeern Stück för Stück dör Ossis to ersetten; toletzt ok sik sülven. (De weerschapsliberale Flögel sleit vör, glieks Chinesen to nehmen, avers so wiet will de Finanzminister noch nich gahn.) De düütsche Einheit warrt denn bavento vullendet, indem dat alle Bundslänner eenfach de niegen Bundslänner toslaan warrt. Denn gifft dat överall weniger Lohn un mehr Subvenschoonen. Denn sünd wi alle Ossis, un nüms kann mehr seggen, da weern to wenig Fruuns. Düütschland is een! Heizen wir ein! |
|
|
1.10.07 ...Wi sünd de Champions! |
|
|
25.9.07 ...Oginaal un Fälschung Soso, de Bayern buut nu doch den Transrapid, de vun München rutfohrn schall na den JWD-Fleeghaven — pardon, na den FJS-Fleeghaven, denn he is ja na Franz Josef Strauß nöömt, avers he is jwd. Twee Milliarden orr so schall de Transrapid kosten, Bayern un ok de EU betahlt dorto. En düres Afscheedsgeschenk maakt de Stüertahlers Stoiber! Man dat kunn billiger warrn, wenn de Bayern noch beten töövt: Neegst Johr beedt China wiss en Kopie vun den Transrapid an — süht liekso ut, man kost bloots en Drüttel. Den schulln se man nehmen! Stoiber, schoonst he sülven en Oginaal is, hett wiss Verständnis daför — he drinkt ja ok Tee ut'n Beerkroog. Op Oginaal orr Fälschung kümmt em dat wiss nich an. |
|
|
Gesetzlich is dat nich verlöövt, un dat Verfatensgericht seggt ok, nee, dat dröffst nich, avers Verteidigungsminister Jung seggt, dat is em allens egaal, he warrt liekers kaperte Fleegtüüch afscheten, ok wenn dor massenhaft unschüllige Lü in sitt. Un dor kann nüms wat gegen seggen, meent he, denn he sett eenfach fast, dat dat en "übergesetzlicher Notstand" is, un Zack! kannst dat Fleegtüüch afscheten. — Düsse Logik hett he ja nu nich erfunnen, nee, de heff ik erfunnen. So maak ik dat ok jümmers, wenn ik narms en Parkplatz finnen kann, wieldat dat Parken överall verbaden is. Denn roop ik korthannig den übergesetzlichen Notstand ut un stell min Auto direktemang ünner't Halteverbotsschild. Notstand heet ja: To Noot stah ik even ok hier. — Man wat passeert? Nich bloots Zedels krigg ik, nee, opletzt hebbt se min Auto sogoor mal afsleppt! Kapert sotoseggen. Wenn se dormit en Terroranslag harrn maken wullt, harr ik dat batz! afscheten kunnt. Un 'keen weet, wat de Udels nich allens vörharrn? Man gegen hoges Lösegeld hebbt se dat denn doch wedder rutrückt. Na, ik segg di...! Minister Jung, wohrt Se sik, dat Se nich bald ok op so'n Afstellplatz buten de Stadt landt! Tominnst en Zedel warrt Se kriegen — en Denkzedel, nich to lütt. Dat warrt würklich langsam gefährlich in Düütschland mit den Terrorismus — un mit sin Bekämpfers, as Se un Schäuble. |
|
|
In sin nieges Video sleit Osama Bin Laden ganz niege Töön an. De westliche Kapitalismus — so leeg! So unsoschaal! So unmoralisch! (Waveelfacher Millionäär weer he doch glieks?) De Klimawannel — so gefährlich! De USA schulln man dat Kioto-Protokoll ünnerschrieven, avers fix! Al-Qaida hett dat längst daan; se maakt ehr Moordanslääg nu bloots noch mit Fleegtüüch, de mit Bio-Kerosin fleegt. Dat explodeert liekso schön as normales Kerosin — un een hett en godes Geweten dorbi. Un wi alle schulln uns bekehren! Nee, nich so as Bush, sünnern to'n Islam. In'n Irak wöör dat süss je woll mallöören, mahnt he — as wenn dat nich al längst mallöört weer. — So milde! So vull Wiesheit! De Boort so schöön swatt klöört, meist as de Hoor vun Gerhard Schröder! In Tokumst mööt wi jedeen Week en Video vun em hebben. För uns geistliche Erbauung. Osama bin Lammfromm maakt us vun nu an jedeen Week dat Wort zum Sonntag! |
|
|
4.9.07 ...De Minschen un de annern Düt is wedder mal so'n Satz, den mööt wi op Hoochdüütsch stahn laten, wieldat ik de nedderdüütsche Tung nich mit em schietig maken mag:
Funnen heff ik den Satz op "Spegel online". Erinnern deit he mi an den berühmten Satz över den Golfkrieg 1990/91: "Im Golfkrieg starben ca. 200 Menschen und 200.000 Iraker." De 200 Minschen weern de britischen un US-Suldaten, de doodbleven weern. De 200.000 Iraker weern — egaal. Da hett sik nix an ännert. Doch: Dormalen woorn de doden Iraker noch wohrnahmen, noch tellt; vundaag nich mal mehr dat. Op Bush sin Seelenleven drückt bloots de doden US-Suldaten. Üm ehr weent he sogoor — an Gott sin Schuller, as he meent. Vun de annern weet he nix. Bet nu ca. 100.000 dode Iraker, tweimaakte Leven sünner Tall, Lieden, dat to'n Himmel schriegt. Se liggt nich op sin Geweten. Dat ehr Dood un Lieden sin Schuld is, is em nich bewusst. Se tellt nich — bloots noch bi ehr egen Lü, un de: de tellt ok nich. Wi sünd de Minschen. Wi sünd de Richtigen. Ik höör dorto; ik heff de richtige Huutfarv, de richtige Religioon, de richtige Herkumst. Man nich all, de nu düsse Wöör leest, sünd solk "Minschen": ok welk mit de falsche Huut un falsche Herkumst köönt ja Nedderdüütsch. Un mennig nich; mennig köönt nich mal jichenseen Spraak lesen. Tellt se all nich? Blievt se nich dood? Hebbt se amenn nienich leevt? För Bush is dat good, dat he so wenig weet. Süss wöör he sachs tosamenbreken ünner de Last op sin Geweten. (Dat will ik för em höpen.) Man sin Landslü, un wi all, schulln anfangen, all Minschen as Minschen to telln. Süss warrt wi ok in Tokumst wedder Kriege maken, bi de wi denkt, dat bloots de annern doodblievt, nich "our boys"; un de Dood höllt denn sin Aarn op beed Sieden. Un amenn weent wi, an Gott sin Schuller, üm de Doden, un wi tellt dorbi doch bloots uns egen Lü. Gott nich. Un denn gnade uns Gott. |
|
|
Wa hooch dröfft de Toorns vun niege Moscheen in Düütschland ween? Dat is anschienend wichtig, so wichtig, dat se sik överall de Köpp üm hitt reedt. 50 m? Nienich! 30 m? Wat, wüllt de hier en Kathedraal buun? Sünd de hier tohuus?! Wüllt de us batz ehrn Gott vör de Nees setten?! Sied un bescheiden höört sik dat! Dat passt nich in uns Kultuur, so'n hoge Moschee. Dat is doch unanstännig; anstößig is dat, jawoll. Hoge Toorns un dicke Kathedraaln buun, dat dröff in uns Kultuur bloots een Gott, un de heet nich Allah — de heet Mammon. "Der Gott der Stadt", vör den wi all uns Knee böögt. Wokeen em nich vör allens annere ehrt, den kannst nich truun! De is unberekenbor.
|
|
|
Tosamenbrook in'n Radsport! Sponsoren smiet hen! Fohrradprofis barmt: Wi staht op de Straat! Na und? Da höört ji doch hen. Un wenn ji da so staht, denn geevt wi juuch en Fohrrad. En richtiges, so mit Klingel un Lampe. Wannehr hebbt ji sowat sachs toletzt fohrt? Un denn köönt ji anfangen, ehrlich Geld to verdenen mit Radfohren:
Un wenn ji denn na en ehrliche Arbeitweek sünndags en lütte Spritz-Tour inleggt, denkt ok nüms mehr an Sprütten. Liekers is de Arbeit swaar, un wenn een so an Doping wennt is, kunn een versöcht ween, ok as Fohrradkurier damit wiedertomaken... Orr mit dat ganz niege Gendoping? Angeevlich warrt dat ja al maakt. Bi't Gendoping warrt ja so en Radsportler manipuleerte Gene in de Zellkerne vun sin Lief smuggelt, un düsse niegen Gene produzeert denn direkt in'n Lief de exotischsten Mega-Turbo-Power-Substanzen. Sprütten is denn vörbi, dat maakt de Lief allens sülven. Man so'n gendopte Radfohrer is denn ja en genmanipuleerte Organismus. Un för den gellt dat niege Gentechnik-Gesett:
Un bi Rennen? Na klaar, datsülvige: To konvenschonell dopte
Radfohrers 150 m Afstand, to Öko-Radfohrers (dat sünd de
ganz sünner Doping) 300 m. Man dat is ja licht för so en
Genmonster: De annern lett he ja sowiso alle stahn. |
|
|
|
|
De kathoolsche Papst hett en nieges Heftchen schreven, 'neem he in seggt: Wi sünd de eenzig wohre Kark, de annern döögt all nix! De Lü vun Calgon hebbt en niegen Werbespot dreiht, 'neem ehr Schauspeler in seggt: Calgon is de eenzig wohre Water-Enthärter, de annern döögt all nix! De lütte Amselhahn sitt avends op't Dack un singt: Ik bün de eenzig wohre Amselhahn, de annern döögt all nix! Man sinnig. Jedeen Hahn kreiht op sin egen Messhupen, denn da leevt he ja vun. Man Ehr Waschmaschien geiht nich twei davun, wenn Se mal dat annere Middel probeert. Un ok de Ünnerscheed twüschen de Glovensrichten hett beten wat vun Coca-Cola un Pepsi-Cola, nich? Laat ehr man. En good Glas Melk geiht ok. Hauptsaak, de lütte Amselhahn singt. |
|
|
9.7.07 ..."Gezielte Tötungen" in Düütschland Mi versleit ja so licht nix de Spraak, avers "Dr. Seltsam" Wolfgang Schäuble schafft dat. Deeper un deeper driggt he uns politische Realität in en Horrorthriller rin — sachs in den Horrorthriller, in den he sülven leven mutt siet dat Attentat, dat em to'n Verklaamten maakt hett. Düsse hülplose Allmachtsfantasie is nu bi en niege Eskalation ankamen: "gezielte Tötung" vun besünners gefährliche Terrorverdächtige. Terrorverdächtige. Terrorverdächtige. — De Doodsstraaf gifft dat bi us nich; hest du wat verbraken, för dat du vör Gericht kümmst, denn kannst froh ween, denn du kümmst maximal leevlang in'n Knast. Man hest du noch nix verbraken, denn Wohrschu! Denn büst in Doodsgefohr. Dat kümmt bloots op an, dat Dr.Seltsam di vun sin Rullstohl ut in't Visier nahmen hett, dat he en besünnern Verdacht gegen di hett. Denn kann he di exekuteern laten. Düsse Verdacht mutt ok nich vun jichenseen Gericht objektiv för vernünftig verklaart woorn ween; nee, dat Besünnere is ja graad, dat dat keen Gerichtsurdeel geven deit. Bloots de Geheimdeensten michelt dat ünner sik ut. Nüms vun us is mehr seker an Liev un Leven. Wenn Stalin slecht slapen harr, müssen annern Dag twintigdusend Esten na Sibirien, orr en anner Minnerheit müss an glöven. Warrt Schäuble uns niege Stalin? Wosaken warrt solk Terrorverdächtige opfunnen? Dör Tipps ut de Nahverschap? Na, wokeen hebbt Se in Verdacht? Schall he doodblieven? Man denn Wohrschu! Allto nehg schulln Se nich in de Nahverschap wohnen. Kiekt Se sik mal an, woans solk "gezielte Tötungen" vun't israeelsche Militär in'n Gaza-Striep maakt warrt: Nachtens, wenn de Verdächtige to Hus is, kaamt fief Helikopters an un scheet twee Dutz Raketen op dat Hus. Batz, de Verdächtige is dood, un de Sippschap ok — mit Fru un Kind un Hunn un Katt. Tja, un de Nahverhüüs links un rechts kriggt ok orrig wat af. Ach, Se denkt, dat weer in Düütschland nich mööglich? Ik bidd Se: Wenn dat mööglich is, een Minschenleven op Verdacht to vernichten, denn is dat doch bloots noch en lütte Schritt dorto, en Dutz Minschenleven op Verdacht to vernichten! Orr mehr. De Gefohr, de vun den Verdächtigen utgüng, weer even so groot! Da is dat Opper doch ring! 'keen weet, villicht harr he Hunnert ümbröcht, wenn he kunnt harr — man wi hebbt bloots 90 ümbröcht, nu wi em tonicht maakt hebbt, dat is doch en Gewinn! — Nee, dat is Krieg in't egen Land. An de Saak mit Raketen glöövt Se gor nich? Wenn ik ehrlich bün, ik ok nich. Ik glööv ehrder, dat dat dör en enkelten Schuss passeert. Man dorto mutt de Verdächtige — seht Se ok en Muslim mit dicken Boort un Turban vör sik? Mutt avers nich! Kann ok eenfach en smucke brünette junge Mann ween, en Student, as se överall rümmerloopt; as de 9/11-Attentäters even; as Se sülven villicht? —, ik segg: de Verdächtige mutt den Staat — nee, dat much ik vun uns Staat nich seggen! — he mutt Schäuble vör de Flinte lopen. Op't best alleen. Man wennehr is so een alleen? Studenten kaamt ut de Uni, Scharpschützen mit schalldämpte Waffen lagert överall ümrümmer. Welkeen is't? De tweete vun rechts. Nee, de drütte! Seht doch alle liek ut. Du nimmst den tweten, ik den drütten. Peng, zisch. Oh, da hett sik de Verdächtige doch glatt na sin rünnerfalln Handy bückt, un de Kugel hett de Studentin achter em drapen! Se is nu dood, sinnlos storven för de gode Saak. Een vun de dunklen Studenten is ok dood. Weer dat nu de Terrorist? Egal. Un nüms weet, vun woneem de Schüss kemen. De Scharpschützen verdrückt sik. — Överall in't Stadtbild kunnen in Tokumst solk Scharpschützen luern! Weest Se vörsichtig, woneem Se gaht! Un laat Se ja ehr Kinner tohuus. De kunnen miteens in de Schusslinie vun de gode Saak lopen... An Schüss in de Öffentlichkeit glöövt Se ok nich? An wat denn? De Verdächtige warrt doch verhaft, alleen? Op't best morgens Klock veer vun swatte Leddermäntel; avers he kümmt vör keen Gericht, he warrt in en Achterstuuv föhrt un dor ahn Verfahren stumm hinricht? Giftsprütt? Legale Morde? An wat glöövt Se, wenn Se vun "gezielte Tötungen" in Düütschland höört? — Staatliche Killer, de vun de Stüergeller vun ehr Oppers betahlt warrt: jichenswenn, wenn na en niege Katastrophe wedder en Rechtsstaat opricht warrt, landt solk Lü op de Anklaagbank vun en Minschenrechtsgericht. Un dor seggt se denn wedder den ewigen Satz: "Ich habe doch nur meine Befehle befolgt..." En Minister, de sowat will, is bi us in't Amt! Dat kann doch allens nich wohr ween, ik drööm doch. Kann mi mal een kniepen? |
|
|
Söben niege Weltwunner söcht se nu, heet dat; en schwiezer Ünnernehmer hett en weltwiede Afstimmen utschreven. Dat alleen is al dösig noog; man to Wahl staht solk banale Albernheiten as de Eiffeltoorn, de Frieheitsstatue vun New York orr sogoor dat zuckerbäckerhaftige Slott Niegenswaansteen. Wokeen staunt vundaag över sowat?! Da kunnen se ja glieks Disneyland as Kandidaten nehmen. Moderne Wunner — da mutt dat doch wat Beters geven? Hier en poor Vörslääg vun mi:
Dat sünd nu bloots söss, avers as Hööftkandidat kann to jede Tied de Dösigkeit vun de Minschen herhollen. Orr fallt Se wat Beters in? |
|
|
23.6.07 ...Poolsche Versöhnung Polen hett Düütschland in düsse Week en besünneres Versöhnungsangebott maakt, dat meist ganz un gor verkannt woor: Se wullen den tweten Weltkrieg — naja, nich vergeten, avers doch as ungeschehn ansehn. In ehr Bevölkerungstall wulln se de Kriegsdoden mit inreken, as weern de lebennig. Is dat nich en oles Lengen vun uns Düütsche — een Maal dat Rad trüchdreihn könen, trüch vör düssen verhängnisvullen Krieg? Allens op Anfang? Keen Nazis wied un sied, Düütschlands Roop nich ruineert, Europas Juden un Zigeuner nich verdreven un vergast — och, wa wulln wi ehr op Hannen dregen, wenn wi bloots düt Rad trüchdreihn kunnen! "Ahn den 2. Weltkrieg weer Polen en veel grötteres Land", sä Jaroslav Kaczynski. Ja, un Düütschland eerst! Wa veel Millioonen weern wi hüüt? Wa veel Nobelpriesen harrn wi, wenn de Nazi-Kotzbrocken de ganzen jüüdschen Wetenschaplers nich wegjaagt harrn? De Spraak vun de Wetenschap weer Düütsch, Göttingen weer dat Weltzentrum vun de Wetenschap! Stellt sik vör: Ganz Europa speelt "De Welt vör den 2. Weltkrieg"! De Polen mit ehr Geschick in't Restaureern maakt de histoorschen düütschen Binnenstäder wedder trecht — Wunnen sünd verheilt, ja, se sünd nienich opreten. Vun de Grenzen wüllt wi gor nich snacken, de köönt blieven, as se sünd — un natüürlich wüllt wi so klook ween, as de Krieg us dat lehrt hett: wi wüllt Europa, ja, de Welt as freedvulle Gemeenschap, nich as explosiven Hupen vun muulsche Striedhammel. Da wöörn wi allens för doon! In so en EU harr Düütschland denn sachs en grotes Gewicht, veel grötter as hüüt; un nüms wöör sik vun bedrauht föhlen. Dat allens wulln de Polen us anbeden. En enorme Sülvstlosigkeit! Och Angela, woso hest du dat utslaan? |
|
|
De grote Koalischoon hett nich veel beslaten, man düt doch: mehr för demente Minschen to doon. Dat is vernünftig, denn Demenz dröppt ja Politiker veel lichter as anner Minschen. Wa faken hebbt wi Politiker sehn, de t.B. vör en Ünnersökenutschuss stunnen — un sik miteens an nix erinnen kunnen! Mennig seggt, se harrn nienich nix wüßt! Ok na de swaren Wahlkämpfe kümmt dat faken vör, dat de Protagonisten allens vergeten hebbt, wat se vör de Wahl verspraken harrn. Mennig Afgeordnete hebbt massenhaft Nevenjobs, an de se sik gor nich alle erinnern köönt — good, dat dat Geld liekers kümmt. Un wat so in Koalischoonsverdrääg steiht, dat hebbt uns demente Vulksvertreder mehrst ok vergeten. Poor ganz slimme Fäll hebbt sogoor vergeten, wat se in ehr Amtseide sworen hebbt! Solk Minschen mutt holpen warrn. Se dröfft nich diskrimineert warrn. För ehr Hanneln sünd se nich verantwoortlich; se mööt vör Konsequenzen schuult un mit Nasicht behannelt warrn. Un natüürlich: finanziell afsekert. Good, dat dat nu beslaten is. Un nich vergeten warrt! |
|
|
19.6.07 ...Nawassen Rohstoff Minsch Verleden Week geev dat poor Narichten, de ganz ünnerscheedlich schienen, avers dochen wat mit'nanner to doon hebbt. De een weer: De Güllen Moschee in Samarra in'n Irak woor nu endgüllig tweimaakt. En grotes Kulturdenkmal verlaren. De anner weer: 900 Milliarden € woorn 2006 för Rüstung utgeven, de Löwenandeel vun de USA. En ringe Andeel dorvun, woor överall vörrekent, wöör langen, mennig Leven to redden, Aids torüchtodrängen usw. Man dat warrt nich daan. — Un woso schienen mi beed Narichten tosamentohöörn? Een schreev mal: Wenn vundaag en oginaale antike Louis-seize-Sessel tweislaan wöör, dat weer uns Minschen vundag en grötter Greuel, as dat den König Louis XVI. sülven de Kopp afslaan woor. "Laat den Sessel leven! He is eenzigoordig!" wöörn wi schriegen. Saken köönt eenzigoordig ween, avers Minschen ——? De Minsch is en nawassen Rohstoff. Üm em is nich schaad. Starven mutt he sowiso. Un alltied kaamt intelligentere, schönere un vör allen mehr Minschen to Welt. Minschen gifft't in Överfluss, se drängelt sik graadto üm de wenigen Saken, de dat nich in'n Överfluss gifft — Platz, Weertsaken, nich-nawassen Rohstoffe, Macht... So güng mi dat mit de Güllne Moschee. An de Minschen dach ik nich, de bi den Anslag to Dood kamen sünd; ik wüss nich mal, wa veel dat weern; man dat Kunstwark is twei, dat wunnerschöne Objekt. Liekso denkt de, de dat vele Geld in de Rüstung stekt, över de Macht. Minschen kaamt un gaht, man de Macht — wenn se mal weg is, bringt nix ehr trüch. Dat weer villicht anners, wenn een de Minschen in't Gesicht kieken müss, wenn een ehr överhaupt kennen un bi'n Naam nömen dä. Denn wöörn sachs sogor de ganz Grootkoppschen op de een orr anner Atoomrakeet verzichten un lever en Minschen retten. Dat Persöönliche kehrt mennig Saken üm. Kannst ok sentimental nömen. Orr verlogen. Man de groten, unpersönlichen Mechanismen in de Welt sünd nich verlogen un nich sentimental. Se warrt jümmers so funscheneern. In ehr is düsse Zynismus inbuut. Se kaamt nich mit religiöse orr humanistische Grünnen. Minschen sünd nich kostbor — wieldat se nich roor sünd. Dat ännert sik, wenn Minschen knapp warrt, as nu bi uns in Düütschland. Wi brukt Kinner — dat heet, wi brukt Arbeitskräfft, Konsumenten, Stüertahlers, Pleegpersonaal. Jümmers noch ganz unpersönlich. Se sünd Mittel, nich Zweck. Nawassen Rohstoff. Zweck, dat is — to'n Bispill en schöne Antiquität. |
|
|
Wüllt höpen, dat Bush hart blifft un dat dat noch klappt mit de niegen Waffensysteme in Oosteuropa. Wat schaad weer dat, wenn wi nu doch keen niegen Kolen Krieg kriegen wöörn! Putin weer so'n prima Fiend. Ik harr mi al de schöönsten Höpen maakt. So'n Wettrüsten hett doch nix as Vördeel. To'n Bispill:
Ja, dat sünd paradiesische Utsichten, nich? Schoonst ik seggen mutt, dat de Wahl vun Russland as Fiend villicht nich den gröttsten Wietblick wiest. Bush hett ja nienich veel Wietblick hatt. Nee, wenn wi würklich för de neegsten 20 Johr en schönen Kolen Krieg hebben wüllt, gifft dat bloots eens: China as Fiend. De döögt noch beter as Putin. |
|
|
3.6.07 ...De Rinfall vun Rostock Ganz sluukohrig staht se da, de freedvulln Demonstranten, de vun de Steensmieters in Rostock so rinreten woorn. Ganz in de Defensive sünd se, versekert jümmer wedder, dat se dat nich wullt harrn. Nee, leven Lüüd, un ji hebbt dat ja ok nich daan! Weest nich mehr benaut, vermünnert sik! Süh, wenn ji för Steensmieters un Füerleggers verantwoortlich warrt maakt, dat heet, en Idee för ehrn Missbrook verantwoortlich maken. Dat weer jüst so, as wöör een de Marktweerschap verantwoortlich maken för den Slaavenhannel. Den Football för de Hooligans. Orr Christus för de Hexenverbrennung. Laat sik so'n Verantwoorten gor nich eerst toschuven! Wokeen juuch so kümmt, wokeen feddert, ji schulln de Oppasser un Kinnergoorners ween för de Gewaltfans, de will juuch beschäftigen, dat ji an nix anners mehr denken köönt; de will juuch weg vun't Finster hebben. "Teile und herrsche" heet düt Prinzip. Laat dat nich to. De juuch so angriept, sitt mehrst in't Glashuus, denn ok ehr Ideen warrt missbruukt, un op veel slimmere Wies as juun. Juun Gegner sünd de Utwüss vun de Globaliseern, nich de Utwüss vun de Autonomen; dat is de Udels ehr Saak. Ji mööt nich bewiesen, dat ji freedvull sünd. Ji mööt gor nix bewiesen. Kaamt ut de Defensive rut un böört den Kopp wedder hooch, man gau! Dat gifft noch veel to doon — ahn Gewalt, avers mit Macht. |
|
|
De Tuun vun Hillgendamm mutt schuult warrn. Ach, Se hebbt dacht, de Tuun is sülven to'n Schuul? I wo. He süht bloots robust ut, avers he is nich to'n Trutz un Schutz buut, sünnern to Tier un Smuck. Dat is en empfindliche Tuun. He mutt zaart behannelt un dröff nich unsanft anpackt warrn. De G8-Organisatoorn höpt dull, dat dat nich regent, denn dat kunn ween, dat sik de Tuun denn oplööst. Seker is dat nich. Dorüm heet dat Ding ok "Sekerheitstuun". Man seker is: Lü as Gerd Schröder, de an so'n Tuun rüttelt un schriegt "Ich will da rein!", da kunn de Tuun reinweg vun ümfalln. Wa licht kann de Nato-Draht baven rünnerfalln orr dat Gitter Folen kriegen! Eentlich bruukt de Tuun noch en Tuun butenrümmer, de em afschirmt. Orr en Rosenheck, as Dornröschen. Wieldat dat nich geiht, hebbt se sik en Zone infalln laten, en Zone ümrüm, 'neem nüms demonstreern dröff. Toeerst weer de Zone bloots 200 m breed, avers denn hebbt se den Tuun nochmal ünnersöcht un faststellt, 200 m sünd to wenig. De Schallwelln vun Spreekchöre kunnen den Tuun nervös maken, un dat is ja ok nich garanteert, dat de Demonstranten in de Zone sacht noog optreden doot! Dorwegen schallt dat nu vulle 6 km ween. To Sekerheit. Is ja en Sekerheitstuun! De Spezialisten ut de DDR hebbt sik even utkennt, dor dröff ja ok nüms an de echte Muur ran — bloots Tuunplegers, sachtmödige Lü, de besünners utbildt weern. Anner Lü kunnst an dat filigrane Gebild nich ranlaten. Dorwegen kunn ok de Muur nich wiederverköfft warrn an de velen Stelln in de Welt, 'neem na solk Sperrwarken Nafraag besteiht; un ok de Hillgendammer Tuun warrt sin eersten Insatz nich överleven. Eentlich schaad. Dat gifft mi doch to denken: Woso kann en High-Tech-Land as Düütschland nich mal en Tuun entwickeln, de en echte Demo uthöllt un de sik achterna recyceln lett?! Dat mutt doch mööglich ween! |
|
|
"Jan Ullrich swiegt noch jümmers still!" "Wannehr warrt Jan Ullrich reden?" De Bläder kriegt sik gor nich mehr in. Lü, nehmt sik en Bispill an Jan Ullrich: hollt den Rand! — Hebbt wi Glück, denn swiegt Ullrich för jümmers. Vun em wüllt wi nienich wedder wat höörn. Bruukt wi ok nich — wi weet ja allens. Un kümmt em doch noch mal en Mikro in'e Mööt, denn wüllt wi bloots een Satz vun em höörn — sin letzte Wöör. Dorför hett he twee Varianten to Wahl:
Variante 1 wöör mi beter gefalln. Driest geiht de Welt togrunn. Man best is: swiegen. |
|
|
22.5.07 ...Dat Radfohrerprinzip De Telekom (orr T-Com orr wa se nu heet) hett en radikale Reform
beslaten: Radsport — ja! Doping — nee! Ach nee, pardon,
dat heet ja: Radsport — nee! Doping — ja! Dat is
nämli so: De Radfohrerie is publicitymäßig doot, eentlich
ok dat ganze Sport-Sponsoring. Dat hebbt se bi de Telekom insehn.
Dat Geld, dat se dor verplempert hebbt, wüllt se in Tokumst dorto
bruken, dat se ehr egen Produkte dopt. Dat heet: De
Produkte seht na nix ut, doot avers ümso mehr. De gewöhnliche
Ortstarif t.B. ümfaat bloots Hamborg; de gedopte Ortstarif ümfaat
avers locker noch Lübeck un Bremen dorto. DSL-1000 is na dat
Doping so flott as DSL-6000, de Servicetechniker, de eerst övermorgen
kamen schall, kümmt al hüüt, för en Prepaid-Handy-Koort
von 50 € kannst för 80 € telefoneern, un de T-Aktie
is duppelt so veel weert, as buten op steiht. Leider hebbt de bi'n Vörstand dat in'n verkehrten Hals kregen: se denkt, dat gellt nu ok för de Mitarbeiters. De schallt alle dopen. En Mitarbeiter schall denn dat Duppelte leisten — un bavento bloots halv so veel kosten. De Mitarbeiters hebbt dor nix för över; se meent, de Vörstand schull mal dopen un denn duppelt so veel doon un halv so veel kosten. Best weer dat, wenn se sik op einigen, dat beed sik dopt. Denn, schast sehn, geiht de Firma af. Un denn brukt ok nüms mehr na nerrn pedden un na baven buckeln. |
|
|
En Dichter! Ik weer begeistert, as ik lees, dat Sarkozy sik to'n Premierminister en gewissen François Fillon utsöcht harr. Natüürlich leeg ik wedder scheep, denn de niege franzöösche Premier is François Fillon, en Biedermann, nich François Villon, de legendäre middelöllerliche Lump, Röver, Mörder un geniale Dichter. Dat wöör een as Sarkozy nienich maken. Dorbi weet Villon dörchut Bescheed vundaag, t.B. in de Staatsfinanzen — ik heff't mal översett:
Un de ganzen Vörstadt-Kriminellen, de "Super-Sarko"
wegputzen will? Villon weer ja sülven een. He dicht:
Un da hett he ja recht, ok wenn't 600 Johr her is. Villon snackt even Klaartext — man Sarko hett mehr to bargen as to wiesen (un bildt sik noch wat op in). So'n Premier geiht da nich. — Och, Sarkozy, harrst du doch Villon staats Fillon nahmen! Dat harr ik di hooch anrekent. — Nu wüllt wi för di dat Nachtgebeet doon, dat Villon di widmet. Dat is dat Gebeet, dat du, Nicolas Sarkozy, johrenlang sülven för Chirac beedt hest. Dat geiht so:
In Psalm 109, Vers 8 steiht: Sin Daag schöllt bloots noch en poor ween, un sin Amt schall en anner kriegen. — Un de dat Amt kregen hett, weerst du sülven... so schall denn ok din Enn ween! Amen. |
|
|
19.5.07 ...Vorslääg för Dr. Seltsam Nich bloots binnen den Tuun in Hillgendamm, nee, ok buten den Tuun dröffst nu nich mehr demonstreern. De Zonen, 'neem een nich demonstreern un sik nich versammeln dröff, sünd nau utwiest un wasst schrittwies, je nehger de Gipfel kümmt. Komplizeert!! Ik heff en betern Vörslag: Staats to defineern, woneem in Düütschland een överall nich demonstreern dröff, weer dat nich eenfacher, to seggen, woneem een överhaupt noch demonstreern dröff? Dorto wöör ja een Stadt för ganz Düütschland langen. Schön wietaf, dat de Lü sik nich op de Fööt peddt. Finsterwalde in Brandenborg? Müllheim in Swaben? Orr jichenseen lerrig Öödland? Egaal — een so'n Platz warrt denn de bundswiede Steed för alle Demonstraschoonen. Da stöört se nich! Un schast sehn: De ganzen Demonstraschoonen warrt denn ok weniger. Liekso mit dat Afhöörn. Woso hebbt wi eentlich noch so'n rückstännige "Positiv-Liste" vun de Ümstänn, ünner de afhöört warrn dröff? Woso maakt wi nich eenfach en List vun de (wenigen) Ümstänn, ünner de nich afhöört warrn dröff? De Rest vun us mutt mit Wanzen leven. Jeder is doch verdächtig! Un solk Regel bruukt wi ok för dat Verhaften. Un för Razzien. Ümkehr vun de Bewieslast! Dat is ja al so wiet kamen, dat wi us vun Putin wat naseggen laten mööt (ja, Angie Merkel hett't beleevt: "Minschenrechte? Demonstraschoonen? Ji maakt dat doch nau so!" hett Putin ehr kontert). Denn köönt wi em dat ja mal vörmaken! Ümkehr vun de Bewieslast gifft dat in Russland praktisch al — de russische Justiz hett en Friesprookquote vun 1%. Dat heet: Anklaag = Schuldsprook. Praktisch!! Avers dat mit de landswiede öde Eck för alle Demonstraschoonen wöör Putin us foorts namaken. De Russen hebbt dorför in Sibirien noog Platz. Villicht köönt wi ok bi de Russen en Eck vun Sibirien för düütsche Demonstraschoonen pachten. Bi us is dat doch överall to vull... Na, wa is dat, Herr "Dr. Seltsam" Schäuble? |
|
|
17.5.07 ...Brandstifter un de Biedermänner Soso, de Khalid al-Masri, de vun de CIA kidnappt un foltert woor, hett en Supermarkt ansteken. Denn harr de CIA ja doch Recht hatt, nich? Wa klook de doch sünd. Weet al Johren tovöör, dat en Minsch Gefangenschap un Folter later mal verdenen wöör. Nix blifft ehr verborgen. Dat sünd even nich ümsüss Geheimdeensten! — De Kausalität, de Gesetten vun Uursaak un Wirken also, gellt hier natüürlich nich — orr sünd sogoor ümdreiht. De CIA hett al-Masri ja entföhrt, wieldat he nu en Brandstifter is, nich annersrüm (annersrüm, dat seggt bloots sin Anwalt). Orr hebbt villicht Entführung un Brandstiften gor nix mitnanner to doon? Dat glöövst ja sülvst nich! Dat geiht doch dör alle Medien, wieldat dat wat mitnanner to doon hett: al-Masri hett sik amenn doch schüllig maakt! — Un nu, leven Lü, merkt good op: Opneegst is de G8-Gipfel in dat verminte Horrorloch, dat fröher mal dat Seebad Hillgendamm weer. Un in MeckPom warrt mit Stüergeller vörsorglich niege Massengefängnisse praat maakt. Dat passeert nich vun ungefähr! Maakt Se dat dull? Seht Se, dat fangt al an. De Geheimdeensten weet, wat Se noch nich weet: Se warrt sik schüllig maken. Ja, Se köönt gor nix mehr gegen doon: Se warrt demonstreern gahn, Se warrt mit Klöörbüdels smieten orr mit Steen, un batz! sitt Se in so'n Massenknast, över den Se nu al anfangt, sik optoregen. Merkt Se, wa de Woot stiggt? Dorför sünd de Kaschotts ja da. Wieldat de dor sünd, kaamt Se rin. Se un ik, wi alle sünd meent — wi biederen Lü, de wi düssen Gipfel obszön finnen doot. Denkt Se, Schäuble weer de Brandstifter, orr de CIA? Pustekoken. Se sülven sünd de Brandstifter, un sodraad de Se dorto bröcht hebbt, is dat ok bewiest. Logisch, nich? Nehmt Se Ehr Schicksal an un gaht Se demonstreern! Laat Se sik ansteken vun de Empörung. Avers stekt Se lever nix an. |
|
|
29.4.07 ..."Schön ist es, auf der Welt zu sein... ...sprach die Biene zu dem Stachelschwein..." Dat mutt denn woll de letzte Imm west ween, de dat sä, denn so ganz veel Immen sünd nich mehr op de Welt, un wat de, de noch dor sünd, dorbi Spaaß hebbt, dat lett sik antwieveln. De Immen starvt, un nüms weet so recht, woso. Egaal? Nee: För 4 Milliarden Euro Bestäubungsarbeit doot de Deerten elk Johr — natüürlich ahn Betahlen, un de Summ is sachs ok noch ring ansett. Dat wüss ik vörher nich, avers nu, as üm de Immen allerwegens Bang is, kümmt dat rut. Wi wüllt mal vun afsehn, dat ut de Perspektive vun de Immen to bekieken. Man wokeen bestäubt ahn Geld uns Aavt un Ackerplanten, wenn de Immen dat nich mehr doot? Na? Richtig: Hartz-IV-Empfänger! Mit grote Stoffwedels utstaffeert, warrt se in Hunnertschaften ("Völker" nöömt) dör de Aavtplantagen jaagt un mööt an de Blöden rümmerwedeln. Later geiht dat in de Äcker, un ja nich op de Planten pedden! Jümmers schön in de Fohrrillen blieven. — Dat deit de Figuur vun uns Düütsche wiss good, denn wi warrt ja jümmer dicker, un alle negenkloken Gesundheitsapostel snackt uns dorwegen in't Geweten. Man dat hebbt se verkehrt verstahn: Wi Düütschen warrt ja ok weniger. Wi kriggt ja nich noog Kinner. Wenn wi nu avers wüllt, dat tominnst de düütsche Masse — also de düütschen Kilogramm — op de Welt konstant blievt, dennso mööt de nableven Düütschen ja jümmer dicker warrn. Wenn bloots noch een Düütsche na is, mutt he (orr se) also ca. 4.600.000.000 kg wegen — so üm un bi. Man dat wi bi de minschlichen Immen blievt: Düsse dicken düütschen Hartz-IV-Empfänger queest natüürlich veel vunwegen Krüüzpien un slecht Weder; dorwegen warrt de Buurn gau op verfalln, för de Saison poolsche un rumänische Bestäuber för wenig Geld to importeern. De klaagt nich, bringt ok ehr egen Stoffwedels mit un köönt för de Aavtaarn glieks dorblieven. So swarmt denn würklich de Völker ut in uns immenlose Landweerschap. Villicht singt se dorbi en flottes Leed ("Schön ist es, auf der Welt zu sein!"), dat wi dat Summen vun de Immen nich so vermisst. Man een Saak blifft wiss: Honnig gifft dat so nich! |
|
|
In Iran hett dat hööchste Gericht söss Mörder friespraken. De Mörder sünd Liddmaten vun en staatliche Miliz, un se warrt friespraken, wieldat se ehr Opper för "moralisch verdorven" ansehn hebbt. Twee vun de "moralisch verdorven" Oppers weer en junges Poor, to Eh verspraken, dat op de Straat tosamen spazeern güng. Dat Moorden vun solk Spazeergängers is in'n Islam angeevlich verlöövt. Liekers sünd mennig Iraners in Raasch, sünnerlich as de neddern Gerichte de Mörder alle verurdeelt harrn. Man dat kümmt noch schöner: Ok wenn du fälschlicherwies en Mitminschen för en Sünner höllst, seggt dat hööchste Gericht, dröffst em ümbringen. Du muttst bloots achterna Blootgeld betahlen — wieldat dat ja en Irrdom weer. (Wokeen mutt dat eentlich bewiesen?) En Mann kost 40.000 $ Blootgeld, en Fru halv so veel. Rieke köönt also moorden un achterna seggen "pardon, weer en Irrdom". Ganz Rieke köönt Männer moorden, de Middelstand kann sik bloots en Fruunsmoord leisten, un ganz Povere mööt op Kredit moorden. Villicht warrt dat mal to'n Statussymbool, as en Auto. Solk Moral maakt dat Leven ja nu lichter. Is ja ok frustrerend, wenn de Rechtspreken un din persöönliches Gerechtigkeitsgeföhl anduernd nich övereen kaamt, nich? Weer dat nich schöön, wenn een Klaus Esser orr Peter Hartz eenfach unstraaft ümhaugn kunn? To Noot muttst vör Gericht noch seggen "De sehg so schwul ut", dat langt. (Villicht sünd Schwule ja ok billiger to moorden, mehr so as Fruuns?) In de Türkei hebbt se't al anwendt un dat Personaal vun en lütten christlichen Verlag doodfoltert. Friesprook kümmt, natüürlich! En gode Daat. Un de Killer an de Uni vun Virginia ok: he hett in sin Afscheedsvideos luut gegen de Verderbtheit vun sin Kommilitonen wettert. En hoochanstännige Jung! — Wenn wi uns Mitminschen prinzipiell nich för unschüllig, sünnern för doodswördig hollen doot, gaht wi keen Risiko in. Wolfgang Schäuble is dor al op den richtigen Weg. Dat wöör de Eer bald gründlich entvölkern. Un de RAF-Terroristen harrn nienich insparrt warrn müßt. Un wenn wi dat ok twüschen Naschoonen anwennt, hebbt de Iraners bald würklich Schorschi Bush & Co. op de Matte stahn. He is ja en ganz Fixen, wenn dat na Unmoral stinkt! |
|
|
"De Opper hebbt ehr Schicksal nich verdeent. Se weern eenfach to falsche Tied an'n falschen Plack." Oettinger över Filbinger? Nee, Bush över de doden Studenten vun Virginia. Op de offizielle Truurfier. Un woneem Bush Recht hett, hett he Recht. Dat is de Schuld, de de Opper dröppt: se weern da. (Dat is ok Filbinger sin eenzige Schuld west, nich wohr, Meister Oettinger?) Dat mööt se sik nu naseggen laten. Denn dat de Mörder to falsche Tied an'n falschen Plack west is, kann ja nüms behaupten: He harr en Knarre. Un de mit de Knarre bestimmt Tied un Ort: se höört em to. Dat Verbreken is Natuurgesett; dat kannst nich verhinnern. Bloots weglopen köönt de Opper, orr gor nich dor ween; un wenn se dat nich doot — orr nich köönt: Pick hatt. Op Amerikaansch: Shit happens. Peng, du büst dood. Wenn de Opper vun uns Lü weern, gifft dat en Truurfier. Süss nich so. Dat gifft ja noog Lü, de sik miteens an'n verkehrten Plack wedderfunnen hebbt, wenn de Typ mit de Knarre keem. De Lü in'n Irak to'n Bispill. O ja, ok de Plack, an den du din Leevlang wahnt hest, kann de falsche Plack ween, wenn de mit de Knarre opduukt. Denn höört de Plack nämli em to. He bestimmt Tied un Ort; dat's en Natuurgesett. Un wenn du tofällig op dat Ööl — orr süss en leckern Rohstoff — sittst, sittst du eentlich jümmers op'n falschen Plack, egaal, wat du da nu boren büst. — 4 Millioonen Iraker versöökt nu al, ehrn Fehler to korrigeern, un wesselt ehrn Plack. Dat's gor nich so eenfach, denn en richtigen Plack gifft dat för ehr eentlich nich. Hööchstens kunnen se ja mal in't Witte Hus in Washington vörbikieken, wat se da nich ünnerkrupen köönt. Mi dücht, se harrn en Recht dorop. — Dat köönt leider de Lü in Darfur nich vun sik seggen. Twoors meent ehr Piesackers, de nakelte dode Wööst weer jüst de rechte Plack för düt Gesindel, avers dat Gesindel sülvst hett dor — verständlicherwies — en anner Menen to. Dat se övereenkamen weern, is nich bekannt. Un süss gifft dat keen annern Placken för düsse dösigen Opper! Tja, shit happens. Peng, du büst dood. Liekso geiht dat Millioonen Minschen, de eenfach in de verkehrte Gegend, in de verkehrte Huutfarv orr dat verkehrte Geslecht boren sünd — ahn sik wat dorbi to denken, dösig, as se sünd. Wenn de Gewalt kümmt, hebbt se verlaren. Se hebbt ehr Schicksal nich verdeent. Avers en Truurfier gifft dat dütmaal nich. Hett Bush eentlich ok vun de 9/11-Oppers mal seggt, se weern to falsche Tied an'n falschen Plack west? Ik heff so'n Geföhl, weern de Attentäters vun dormalen nich Kuffnucken ut de achtersten muslimischen Ecken vun de Welt west, sünnern harrn se mit en ehrlich köffte amerikaansche Knarre üm sik schaten, denn harr Bush dat seggt. Denn weer dat ja en Natuurgesett. — Vun een weet ik, de momentan ganz wiss an'n falschen Plack is. He sitt in't Witte Hus. Man wi köönt nich veel bi doon. Shit happens. Se denkt, Se sünd seker? Wohr di! Wokeen kümmt wohl as neegst üm't Eck? Vun'n Präsidenten gifft't bloots en Schullertucken. De Typ mit de Knarre, dat is nämlich ok he sülvst. |
|
|
Gifft Saken, de warrt jümmer slimmer, je mehr du ehr beschönigen wullt. Günter Oettinger hett in sin Graffreed över Hans Filbinger seggt, Filbinger weer gor keen Nazi west, sünnern en Nazigegner. Dorwegen warrt he, Oettinger, nu gewaltig schamfeert. Löög! Geschichtsfälschung! usw. Man ik glööv dat nich. Hett Oettinger nich bloots — allerdings ahnweten — en noch schrecklichere Wohrheit seggt? Dat kann good angahn, dat Filbinger, christlich optrocken, keen Nazi weer. Un? Wat hett dat bröcht? Hett jichenseen wat vun merkt? Nix. Wat he dach, harr nix to doon mit dat, wat he dä. Wat Gresigers kannst je woll över en Minschen nich seggen — schon gor nich över en Politiker. "Sin egen Vördeel weer sin hööchste Övertügen!" heet dat. He hett mit de Wülf huult, Lämmer reten, ehr Fleesch eten un sik alltohoop as Musterwulf opföhrt, wieldat he Karriere maken wull. Wenn he amenn ankümmt un seggt, dat he in Wohrheit en Lamm weer — is dat nich bloots bitter un lächerlich? Wat hebbt de Lämmer dorvun, de doodbleven sünd? Un wedder hett Oettinger recht: In düssen Sinn weer Filbinger wiss en ganz normale Minsch — ut sin Tied, un sachs ok ut uns Tied. Man ok düt entschülligt nix un maakt nix beter, sünnern noch maal allens gresiger. Millioonen Nazigegner, vun de nüms wat merkt hett! Eerst as allens vörbi weer, hebbt se sik as Lämmer künnig maakt. Ok noch in Nürnbarg op de Anklaagbank hebbt sik solk "Lämmer" ut de dicksten Wülfspelze pellt. Se weern ja eentlich nienich dorför west usw. Wiss, ja: So dull, dat se dormit ünnergahn wulln, hebbt se dat Naziriek nich leev hatt. Opstiegen wulln se dormit. Wülf op Tied. As Filbinger. Op solk "Gegner" kunnen de Nazis sik verlaten. Wat Beters kunnen se sik nich wünschen. Ja: Wokeen solk Gegner hett, bruukt eentlich keen Frünnen mehr. Un de harrn de Nazis ja ok nich. Eentlich weer ja nüms würklich Nazi. Nich, as dat nix mehr to winnen geev. Un Oettinger? Glöövt he eentlich allens, wat he dor seggt hett? Orr will he sik dormit bloots bi de erzkonservative Swaben-CDU insmusen? Is he also villicht en niege Filbinger? Warrt he us jichenswenn vertelln, he weer ja nienich vun övertüügt west usw.? — Un wi? Wenn de Filbingerie würklich minschlich sehn ganz normal is, un dat glööv ik wohl, wat kann denn nich allens ut de Welt warrn? "Der Sachzwang erfordert es" — "Momentan ist das die beste Lösung" — "Wir können doch nicht einfach, wo kämen wir denn da hin...?" Kannst an uns Doon ok sehn, wat wi denkt? |
|
|
Dat Apen in de US-Regeern överproporschonaal vertreden sünd, is en Legende. Apen, Esel un anner Deerten kaamt in teemlich veele Regeern in Massen vör. De US-Regeern is nich mal Weltmeestersch in de klassische Apengymnastik: Oogen to, Ohren to, Muul hollen. Avers se speelt dor doch in de Weltspitze mit, dat is wohr. Dat Muulhollen is dorbi ehrder anner Lü ehr Saak. De Wetenschaplers etwa, de nu den tweten Deel vun de UN-Weltklimabericht verfaat hebbt, hebbt em amenn meist nich wedderkennt, so veel weer rutstreken. Un dat, wat nich binn steiht, kann ok nich passeern! Liekso as Gerhard Schröder sin Hoor nich mehr klöört weer, nadem dat gerichtlich faststellt weer, dat een dat nich seggen dröff. Nüms dröff dat seggen, un dorüm weer de Klöör echt. Klaar, nich? Liekso is en gerichtlich friespraken Bonze ja ok en Ehrenmann un nienich korrupt west. Un wieldat nüms in den UN-Klimabericht schrieven dröff, wa slimm dat warrn kann, kann dat ok nich slimm warrn. Un süh, so hebbt de USA mal wedder de Welt reddt! Se hebbt de Klimakatastrophe afwendt. Dat an de Weltreddung dütmaal ok Russen, Chinesen un Saudis bi weern, dat is en Unfall. Eentlich deit dat jümmers en Amerikaner alleen. Bruce Willis to'n Bispill. Wiss is he achter de Kulissen togang west! Hett em een sehn? Gifft dat eentlich en Copyright op Politikmethoden? Denn wöör ik vörslaan, dat de Erfinner vun de Dree-Apen-Politik sin Rechte anmellt. Denn dröff dat nämli keen anner mehr bruken. Orr wat is mit en Patent? Dor sünd de USA doch wedder groot in. Se patenteert ok Saken, de nüms erfunnen hett, t.B. natüürliche Genmuster. Wenn de US-Regeern sik nu dat Oogen-un-Ohren-Tomaken patenteern lett, köönt se vun alle, de dat ok bruken wüllt, Lizenzgebühren feddern. Ofschoonst — de Chinesen sünd ja bekannt dorför, dat se sik an Copyright & Co. nich dull kehrt! So gifft dat denn Politik as Roofkopie. Dat is even de Globaliseern! |
|
|
De Krischan Klar, de Ex(?)-Terrorist, de is ja nu würklich unbelehrbor. 25 Johr hebbt se em insperrt, un jümmers noch is he nich to'n Kapitalisten woorn! Nee, he schrifft düsse Grußbottschap an de "Rosa-Luxemburg-Konferenz". "Rechte der Massen"! "Niederlage des Kapitals vollenden"! "Menschliche Potentiale fördern"! "Das geht anders"! Ha! Dor weet wi doch glieks, woso solk Lü noch in't Kaschott sitt. Dorüm is he ja ok achter Trallen kamen. Ach nee, dat weer ja, wieldat he moordt hett, oder? Na, avers Gnaad kriggt he nich — nich wieldat he wedder moorden kann, sünnern wieldat he noch jüst so denkt as fröher. Een mutt avers ok seggen, dat wenig för sin Resozialisierung daan woor. Wo schall he sik denn to'n Kapitalismus bekehren, wenn he gor nix dorvun hett?! Se harrn em tominnst en lütt Aktienpaket schenken schullt un em verfolgen laten, wa he rieker un wedder ärmer, rieker un wedder ärmer woor. Orr se harrn em as Opsichtsraat op Spesen in de Karibik flegen schullt. Ach nee, he sitt ja in't Kaschott. So kunn he ja gor nich lehren, dat Riek un Arm, Stark un Swack, Gewinn un Verlust de gottgeven Weltoordnung sünd, wa schöön dat ween kann — un dat "Entlassung" nix to'n Freun is! Vorzeitige Entlassung al gor nich. Dat blifft em nu ja wohl ok erspaart. |
|
|
Dat krüüzbrave ZDF will en "Forum zum Freitag" inföhrn, wat so'n Aart "Wort zum Sonntag" för Muslime ween schall (denn de Muslime is ja de Friedag hillig). Düt brandgefährliche Forum schall avers nich in't Kiekschapp kamen, bloots in't Internet. Slimm noog! De Welt mutt dorvör rett warrn, un dat deit mal wedder de CSU. Ehr Genraalsekretäär, de Tango-Typ Söder, maakt us künnig, dat sowat nich de Integraschoon föddert, sünnern Parallelgesellschaften opbuut. Richtig so! Integraschoon heet ja, de egen Individualität optogeven, ok den egen Gloven. Dat dat t.B. in Noorddüütschland överhaupt kathoolsche Karken gifft, is en Unding; kümmt en kathoolsche Bayer in'n Noorn, mutt he sik hier in de protestantische Kark integreern, süss bildt he en Parallelgesellschap, un dat dröff he hööchstens in'n Ünnergrund. Treckt een na Oostdüütschland, mutt he sin Religion altohoop opgeven, denn dor sünd de mehrsten ja nich religiös. Dat is Integraschoon! En Utnahm sünd de jüüdschen Gemeenden mit ehr rund hunnertdusend Liddmaten; avers nich de dree un en halv Millioonen Muslime in Düütschland! Vun Salomon Korn ut den Zentralrat vun de Juden kümmt nu en echt salomonische Vörslag: En "Wort zum Wochenende" för alle Religioonen. Bravo! Ok dat Albernste is recht, wenn man bloots de Muslime keen Forum kriegt. In dat "Woort to't Wekenenn" seggt dree Geistliche denn in'n Chor: "Seid nett zueinander!" un: "Hoffentlich gibt's schönes Wetter!" un villicht ok "Viel Spaß beim Fußball!" un op jeden Fall: "Friede, Freude, Eierkuchen!" Eierkoken is ja en politisch korrekte Spies, de ok Muslime un Juden eten dröfft (oder nich?). So warrt de Sprengsatz Religion optimal entschärft, Sülvstmoordbomber warrt to freedvulle Blümchen-Hippies, un alle sünd glücklich. Un uns' Muslime sünd endgültig integreert, d.h. verweltlicht un tamm woorn, wenn dat Wekenenn, de Frietied un de Bundsliga ehr eenzig hillig sünd. As sik dat höört. So'n Gott is eenfach to gefährlich. |
|
|
21.2.07 ...Ik schuul de Ümwelt Ik schuul de Ümwelt, indem dat ik min oles Köhlschapp wegsmiet. Dat is twoors noch ganz good, avers dat gifft vundaag al wedder betere, de noch weniger Energie verbruukt. Ik mutt jümmers dat niegste un beste Köhlschapp hebben — dat verlangt min Ümwelt-Geweten. Bavento schuul ik ca. alle 2 Johr de Ümwelt, indem dat ik min Auto wegsmiet un mi so'n nieges köff, dat noch weniger CO2 utpuust. En Auto, so warrt schätzt, hett al 2/3 vun sin Gesamt-Levensenergieverbruuk achter sik, wenn dat fabriknieg vör di steiht — dat ganze Metall ut de Eer halen un verhütten, dat Plastik ok, de Warktüüchmaschiens ansmieten, den Kraam tosamenbuun un lackeern un vun Japan hierher transporteern... Un wieldat dat so is, mutt ik denn mit min totaal ümweltfründlichen Niegwogen ok totaal veel fohrn, denn süss hett sik dat ja för de Ümwelt gor nich lohnt, wenn ik na 2 Johr wedder en noch ümweltfründlichern Niegwogen köff. De Politik bestärkt mi: Ja, seggt se, dorför kriggst du Stüern schenkt. De Autoindustrie dogegen is gaaanz trurig över, dat se jümmer noch ümweltfründlichere Autos buun schallt, de ik mi alle twee Johr nieg köff. Dat maakt mi en godes Geweten, denn wenn de Industrie jammert, mutt dat ja good för de Ümwelt ween. — Nu mutt ik avers ok gau min Computer wegsmieten, dat gifft vundaag welk, de Stroom spoort un keen Stand-by hebbt usw. Dat kann ik mit min Geweten nich verantwoorten, wenn dor nich bald en nagelniegen Ökoputer steiht! Un de Glöhlampen, de al siet Johrn ehrn Deenst doot, igitt, dat is ja en Sünd! Weg damit in den ökoloogsch korrekten Mülltrennsack! Her mit de niegen Energiespoorlampen! Kunn ik nich ok min Plünnenschapp utrüümen? Wa veel Socken heff ik, de nich vun Boomwull ut kunnerleert bioloogschen Anbuu sünd...! De mööt alle weg — eentlich sünd se Sondermüll! Ökoloogsch korrekte mööt her. Överhaupt mutt allens nieg. Hier sünd noch de Regale an de Wand, Pressspanplatten, igitt! Tropenholt vun bioloogsch kunnerleerten Anbuu mutt her. Un hier de Böker dorin, de ik leevheff... chlorgebleicht, keen Ökopapeer... weg, weg, weg... |
|
|
Klimawannel-Panik överall, avers gode Narichten ut Düütschland: wi sünd rett! Nadem dat wi faststellt hebbt, wa veel Schiet de Kohlenkraftwarken utpuust, hett de Regeern beslaten, dat bi us allens op Kohlkraftwarken ümrüst warrt. De funscheneert natüürlich na dat Biogas-Prinzip, völlig unschädlich, un de Rohstoff wasst in Dithmarschen op'n Acker. Un de Bundsregeern warrt CO2-neutraliseert — mit Geld. För all de dicken Deenstwagen un Fleegtüüch warrt se beten Geld spenden, mit den in de drütte Welt Klimaschuul maakt warrt. So as dat in min Kinnertied weer: Dor stunn bi us de Spoordoos vun "Brot för de Welt", en knakige Kinnerhand renk sik vör orangen Achtergrund, un op stunn: "Wenn du wieder satt geworden bist, gib 5 Pfennig für die Hungernden!" Dat hett mi dull Induck maakt as Kind, un min Vadder acht streng op, dat wi ok spenden dään. Avers dat Frieköpen vun de Bundsregeern is ja anners, denn wieldess "Brot för de Welt" will, dat de annern ok eten schallt, will de Bundsregeern mit ehr Geld verhinnern, dat de annern ok in'n Benz na't Büro fohrt. Dat is Klimaschuul! Wi sünd de Goden! Un Storms warrt dat in Tokumst ok nich mehr geven. Tominnst nich in Düütschland. Wi schickt ehr alle na Afghanistan, de Tornados toeerst, avers de Orkane, Wirbelstörm usw. warrt folgen. Wi behollt bloots dat schöne Weder hier. Is dat nich fien? Weern alle so kreativ, kunnst seggen: De Welt is rett! |
|
|
Hillgendamm. En lütt smuck Seebad mutt nu utbaden, dat sik de Polit-Bosse ut alle Welt sowat vun verhasst maakt hebbt, dat se sik in normale Städer gor nich mehr sehn laten köönt. Eentlich köönt se narms mehr hen as hööchstens noch in de Antarktis, avers se wüllt nu partu na Heiligendamm. Un dorwegen warrt Heiligendamm nu to en Gefängniszelle verbuut. Die Mauer muss her! Womit hett Hillgendamm dat verdeent? De Polit-Elite wannert in en mobiles Hightech-Luxus-Ghetto dör de Welt, un de Sekerheitsappraaten bestärkt se noch in ehr Paranoia. Ok in de Antarktis wöör de Bande gegen de povern Pinguine noch en Doodsstriepen mit Muur anleggen. Avers op de ganzen sinnlosen Drepen to verzichten un dat beten, wat se to bekakeln hebbt, in en diskrete Videokonferenz aftohanneln — nee, woneem blievt denn dor de Kameras un Kaviarhäppchen?! Dat geiht nich. Düütschland hett avers doch den G8-Vörsitt; se mööt sik doch in Düütschland drepen? Ach wat! Man wenn sik düsse unmöögliche Bagaasch partu in Düütschland drepen will, gifft dat en optimale Lösung: Helgoland. Vun Natuur afriegelt, översichtlich, kahl, mit Demonstranten is nich to reken. Keen Platz för Journaille un Polit-Tross? Ach Tüünkraam! Ji warrt doch woll dat een orr anner Krüüzfohrtschipp anhüürn könen, dat vör Helgoland ankern kann! Dor is Platz noog. Un as wi jüst in dat Satiremagazin Extra 3 höört, hett sik de hoochmoderne helgoländer Polizei nu sogoor en Auto toleggt. Se sünd also rüst — al en halves Alcatraz! Kümmt de G8-Zirkus, mööt se en ganzes warrn. As Hillgendamm nu. |
|
|
Merkt Se wat? Dat Bild vun de böse EU, vun dat Monster Brüssel, ännert sik. Ut Brüssel kaamt opletzt jüst de vernünftigen Vörslääg: to'n Nichsmökerschuul, to de Produktsekerheit, to'n Klimaschuul; nu wüllt se de Autos bi ehrn CO2-Utstoß per km packen. De schall rünner op 120 g/km. De Unvernunft un Stuurheit kümmt nich ut Brüssel, de kümmt vun naschonale Politiker un Lobbies. Naja, dat de Lobbies allens tweimaakt, dat is ehr Job; avers dat Angela Merkel de Autoindustrie gegen de EU ünnerstütt, dat nehm ik ehr övel. Se hett sik ja den Klimaschuul op de Fahn schreven — Angela Merkel, nich de Autoindustrie (jaja, de ok). Dor, op de Fahn, steiht he good; dor warrt he ok stahn blieven. Dat mit dat Op-de-Fahn-Schrieven weer wohl so'n Friewillige Sülvstverplichten. De Autoindustrie harr ja ok so'n Friewillige Sülvstverplichten ingahn, wieldat se mit Gesetten bedrauht woorn. Gesett? Nee! Denn maakt wi gau en Sülvstverplichten! — Un worüm denn keen Gesett? Wenn ik mi to wat verplichten do — ok noch friewillig! —, denn is dat jüst so bindend as en Gesett. Denn seh ik de Saak as min Plicht an. En friewillige Sülvstverplichten is noch veel stärker as en opdwungene Fremdverplichten. Also eentlich noch bindender as en Gesett, orr? — Orr is dat bloots en Vörwand, en Placebo, en "Wi wüllt mal sehn" — jüst so bindend as de Amtseid vun Politikers, för den nüms in Regress nahmen warrn kann? Also keen echte Verplichten? Wat schallt wi vun Lü hollen, de so'n Sluderee drievt mit de Plicht? Sünd de wohl de Gesetten tru? Dat lett, as harrn düsse "Sülvstverplichten" nich mehr Kraft as de goden Vörsätt ut de Silvesternacht. Un mit gode Vörsätt is, so seggt dat Sprickwoort, de Weg na de Höll plastert. Na, much de Weg dor man nich langs gahn! Wenn doch, warrt wi em mit fliggen Fahnen gahn — op de Fahnen staht schöne Mottos un edle Sülvstverplichten. |
|
|
28.1.07 ...Lizenzmörder & Desasterverhinnerer "Ik bün de, de de Entscheiden drepen mutt. Ik bün de, de dat Desaster verhinnern mutt!" sä Schorschi Bush gistern bi dat Präsenteern vun sin niegen Irak-General. Ach verhinnern schull he dat...! Un wieldat dat ja toeerst gor keen Desaster geev, geev dat ok nix to doon för en Desasterverhinnerer. Also müss gau en Desaster her. Dorwegen de Irak-Överfall! — Un wat so'n rechten Desasterverhinnerer is, de maakt vör nix Halt: Nu hett Bush sin Irak-Suldaten de Lizenz zum Töten geven. Jedeen schall sik as 007 föhlen. De Lizenz to'n Doodslaan gellt eerstmal bloots gegen "iraansche Agenten" (de natüürlich glieks doodmaakt warrt, nich eerst, wenn faststeiht, dat se würklich iraansche Agenten weern). Wokeen mit so en Lizenz doodmaakt warrt, warrt rechtmäßig doodmaakt un kann sik nich beklagen. — Nu is dat avers so, dat Osama bin Laden de Piloten vun 9/11 jüst so en Lizenz geven harr! — Aha! Also woorn de 3000 Opper in New York rechtmäßig, lizenzmäßig moordt! Also kunn nüms sik beklagen, un de ganze Krieg in Afghanistan un Irak weer —— Stop! Stop! Verkehrt! So geiht dat nich! Osama bin Laden kann doch solk Lizenzen nich utstelln! Un Ahmadinedschad vun Iran ok nich! Överhaupt nüms, bloots — Gott? Nee, Bush. Na good, also Gott dör Bush. Denn wat Bush seggt, sünd ja eentlich Gott sin Wöör. De swiestert Bush ja anduernd in't Ohr. Ach wat, dat seggt Ahmadinedschad ok? — O Gott, schick us en Desasterverhinnerer... stop, nee, nich so een! En echten! Un al gifft't en nieges sülven maaktes Desaster to "verhinnern": den Klimawannel. Noch so en Opgaav för 007 Bush! Un ok hier will he en Moordslizenz utgeven: eenfach de Eer vun de Sünn afschirmen, falls (!) dat mit de Drievhusgas-Redukschoon nich klappt (un natüürlich klappt dat nich bi Bushi). Dorto wüllt se denn jichenswat in de Atmosphäär smieten — grote Spegel orr massenhaft Swefel... orr en Atompilz... Nich nadenken, man jümmers rin damit! Chaos un Verdarven töövt op us, överall, dor mööt wi koppheister rin! Köönt wi dat Chaos nich in en AG ümwanneln? Ik wöör foorts Aktien köpen. De Kurs warrt stiegen un stiegen... |
|
|
München, Akschonäärsversammeln vun Siemens. De Medien sünd utslaten, allens streng geheim. De Akschonääre warrt bi't Intreden filzt: keen Kameras! Allens Ton- un Bildmateriaal schall bloots vun Siemens sülven kunnerleert warrn. Wenig Utsneed hebbt wi in de Medien sehn — v. Pierer, de Baas, un de annern Delinquenten betreed den Saal, v. Pierer höllt sin beswören Entschülligungsreed — un denn nix mehr, bloots noch de Ergeevnissen. Ha! Man nu is passeert, wat harr passeern müßt: en Handy-Video is opduukt! Geheim opnahmen vun en Akschonäär in'n Saal mit en Handykamera! Dor seht wi allens, wat in dat offizielle Bildmateriaal zenseert woor: woans v. Pierer na sin Reed vun dat Akschonäärs-Exekuschoons-Kommando grepen woor, woans em de Strick ümleggt woor — Beleidigungen — Gebrüll — un denn —— Dat gresige Enn vun Kartelle, Swattgeld, Korrupschoon un 30% mehr Vörstandsgehalt! Von Pierer sin Anhängers sünd entsetzt un in Raasch. Drauht nu en Börgerkrieg ünner de Siemens-Akschonääre? Ach nee, dat mit de geheimen Handy-Opnahmen, dat weer ja nich bi Siedam, äh, Siemens, sünnern bi Saddam. In Düütschland hebbt wi ja keen Handys, un nüms hier wöör op de Idee kamen, so en lausige Privatzensur as bi Siemens en Nees to dreihn. In Düütschland nich. Siemens seggt: Filmen verbaden!, un jedereen höllt sik an. Woneem wöörn wi denn ok henkamen, wenn wi us nich mehr an de Regeln hollen wöörn, de de groten Bedregers un Regelbrekers för us opstellt?! |
|
|
Dat dat Stinkdeerten gifft, weet wi all, un mennig vun us finnt de lütten Beester ganz knuddelig (antosehn). Man meist gor nich höört wi vun de Stinkminschen. Dat hett nich dormit to doon, dat de roor weern; nee, se nehmt to. Schoonst wi meist allens för doot, dat se utstarvt! Doodswiegen is dat eenzige, wat funscheneert. Wat sünd nu düsse Stinkminschen, wa seht se ut? Na, vör een knappen Maand hett dat Oberlandsgericht in Stuttgart fastsett, dat Mieter in en schickes Bürohus de Miete minnern köönt, wieldat dor opmaal so veel — Ratten? Kakerlatschen? — nee: Hartz-4-Empfänger rümmerlöpen! Dor harr nämli de "Arbeitsagentur" ok en Büro inricht. Un de Lü, de dor opduken, weern as Müll, de anduernd in't Treppenhus steiht — Stinkminschen even. Minschen as en övel Ruuch. En Schaden för't Hus. Düsse Stinkminschen weern mal Minschen, avers meddewiel sünd se en egen Raaß. Ehr Kinner warrt ok mehrst Stinkminschen. Se reproduzeert sik sülven. Un uns annere is dat ok ganz recht; tominnst wüllt wi ganz seker gahn, dat wi un uns Kinner keen Stinkminschen warrn köönt. Dat is an'n sekersten, wenn se en anner Raaß sünd. Op alle möögliche Wies sett wi us gegen ehr af. Vun ehr snacken deit een ungeern. Se sülven ok. Se snackt eentlich gor nich. Dat hebbt se nich mehr richtig lehrt. De Welt ut de Stinkminschenperspektive warrt meist gor nich beschreven. Stinkminschen warrt ok nich fraagt, wat ehr stinken deit. As nu in't niege Johr dat "Öllerngeld" inföhrt woor, wokeen hett dor wat höört vun de Minschen, för de dat en Verlust weer? Also ik heff bloots vun den Winst dör Öllerngeld höört un vun Poore, de höpen dään, dat ehr Baby in'n Januor to Welt keem. So veel mehr Geld... ja, för den Middelstand; för Öllern, de good betahlte Arbeit harrn. Man de, de eh nix verdeent, verleert dör dat Öllerngeld orrig. Dat weer ja ok Afsicht: De Stinkminschen schallt sik nich so dull vermehren. Wat seggt de dorto? Keen Toon vun ehr. Se sülven hebbt nich den Plie un den Tosnitt, de dat in de Medien schafft un dor sin Saak vertreden kann; un nüms anners deit dat för ehr. Heemlich sünd se uns unheemlich. Wat schall ut ehr warrn? Billung warrt jümmer dürer; Unbillung un Povertee warrt so mehr un mehr arvlich, as Billung un Riekdom al lang sünd. Hartz IV backt meist physisch an de Lü — as weer't HIV. Un ok ehr Kinner warrt infizeert, för't ganze Leven. De Schichten verfastigt sik, un nüms snackt över. Dat 19. Johrhunnert kümmt trüch. — Warrt de Stinkminschen utstarven, orr warrt wi bloots een Dag gor nix mehr vun ehr höörn un sehn? — Dat kümmt eentlich up datsülvige rut, nich? För us. |
|
|
"Die CSU braucht Geschlossenheit!" töönt dat överall in't CSU-TV (dat hebbt wi ja ut heitern Heven op alle Kanäle kregen). "Geschlossen", slaten mööt se ween! Un düsse Slatenheit schall angeevlich denn kamen, wenn Edi Stoiber de Geschäfte opgifft. — "Wegen Geschäftsaufgabe geschlossen!" warrt denn op en groot Schild an de CSU prangen. Un wokeen schallt de Bayern denn wählen?! — Unwichtig as de CSU is, wöör mi dat doch leed doon, wenn se bald ganz slaten wöör. Amüsant is se ja doch. Man düsse Slatenheit wünscht sik ja alle Partein luuthals. Weer nich slecht, wenn poor vun ehr slaten wöörn. Un för'n Anfang köönt se ja so lang al mal de Klappe slaten hollen! |
|
|
De USA rüst to'n Aftoog ut'n Irak. — Glöövt Se nich? Se denkt, dat de USA mehr Suldaten schickt, is dat Gegendeel vun Aftoog? Ha! Dat is en Aflenkungsmanöver, en Alibi. In Wohrheit maakt se sik kloor för'n Heimweg. Dat wichtigste Utensil dorto is al praat: en Schülligen. En Sündenbuck. Al as de Bericht vun de Baker-Kommission rutkeem, kunnst dat al twüschen de Reegn lesen: De iraksche Regeern, heet dat dor, müss nu avers ok för mehr Ordnung sorgen, süss... Un nu hett Bush dat wedderhaalt: De iraksche Regeern schull weten, dat de Solidarität vun't amerikaansche Volk nich grenzenlos weer... Nachtegall, ik hör di trapsen. Dor hebbt se een söcht un funnen, den se de Schuld geven köönt. Un dat deist bloots, wenn dat Enn afsehbar is. — Un dat is en doodsekern Sündenbuck. Denn wat schall de iraksche Regeern groot maken? Se is praktisch machtlos. De Irak hett keen Fienden, he besteiht ut sin Fienden. Dat is wunnerbaar, denn amenn kannst prima de Iraker de Schuld geven un aftrecken. Wi hebbt allens daan; de hebbt versaagt... Klaar. Bi us sünd ja ok de Arbeitslosen schuld, wenn dat keen Arbeitsplätze för ehr gifft. De Machtlosen sünd de besten Sündenbück. |
|
|
Armes Somalia! Na Johrteihnte vun Börgerkrieg noch keen Freed. Den Nahver Äthiopien un den Westen is't egaal, wa entsetzlich dat de Minschen dor geiht, Hauptsaak, keen Islamisten! De hebbt se plattmaakt mit äthiopische Panzer. Nu hett de Al-Qaida dat Land to'n "Kriegsschauplatz" utropen. Goodnacht, ji Minschen! Nee, ik bün wohraftig nich för en islamistischen "Gottsstaat". De Somalis ok nich. Se hebbt bloots de Wahl twüschen Pest un Cholera. Wat de Minsch bruukt, is en Minimum an Ordnung un Berekenborkeit. Een mutt weten, wat een morgen noch leevt. De Islamisten harrn dat schafft in Somalia — na Johrteihnde vun Chaos. Utrekent de Islamisten. Wenn wi Düütschen vör de Wahl stünnen twüschen de Tostänn in'n 30-jährigen Krieg un, na — de Nazidiktatur, wat wöörn wi wählen? Ja, wat? Jichenswenn is di allens egaal, bloots Roh, bloots Ordnung, un wenn't en Freedhoffsroh is. Dat kannst nüms veröveln! Un wokeen de Islamisten nich an de Macht sehn will, de schall för sorgen, dat se nich nödig sünd. Punkt. — Man dat is de Welt to opwännig, lever bekämpft wi bloots Symptome. Un Flüchtlinge wüllt wi hier ok nich sehn! — Dat kann good ween, dat de Börgerkrieg in Somalia en 30-jährige Krieg warrt. Orr noch länger... |
|
|
29.12.06 ...Time is running out... Hebbt Se't noch in't Ohr, dormalen, as se den Krieg anfüngen, Bush, Rumsfeld, Rice, alle? Bi jede Gelegenheit hebbt se töönt "Time is running out for Saddam Hussein!" Dormalen leet dat as reine Behauptung, avers nu is't so wiet — villicht steiht Saddam nu al vör sin ewigen Richter. Noch düt Johr, noch düsse Nacht wüllt se em üm de Eck bringen. Woso de Hast? Un woso schient dat so bedrauhlich? Un woso hett een dat Geföhl vun Verschaamtheit, Iel un Vertuschung? Dor warrt wat bi Nacht un Nevel ut de Welt ruumt: en Stück Vergahnheit warrt an de Siet bröcht. Un wenn dat nu nich passeert, kann dat morgen to laat ween. Wohraftig: Dat Bedrauhliche is de Laag in Irak, is dat Chaos. Nüms weet, wat he morgen noch leevt. Saddam hintorichten lett as dat Verbrennen vun en Brügg; en panische Akschoon, dormit nüms trüchlopen kann? Time is running out for Irak... Man so lett sik Vergahnheit nich an de Siet bringen. Saddam woor afurdeelt för en lütt Stück vun sine Verbreken; de groten Moordakschoonen an Kurden un Schiiten woorn doodswegen — se sünd dormalen mit Rüggdecken vun de USA passeert, dat will nu nüms mehr weten. Dat dröff nich to Spraak kamen, woor püük utblendt un warrt nu mit hinricht. — So kannst nix opklaarn, so köönt Wunnen nich heel warrn, un Geschichte kann so nich schreven warrn. Wüllt se dat so? Midücht, ja. Schaad. Saddam harr en echten Prozess á la Nürnbarg verdeent, öffentliche Geschichtsschrieven mit alle Tügen. De Irak harr dat ok verdeent. Un de Welt. Man vun en Slachthus as Irak kannst nix as Slachten verwachten. Ahn Besinnen vör Glück hebbt de Berliner eis de Muur dalreten, bet to Unkenntlichkeit; nu beduurt se, dat een den Verloop nich mehr finnen kann. Kannst di vörstelln, wa sik dat later in Irak anföhlt? Wenn in 10 Johr un na 2 Millioonen Dode de Börgerkrieg sik utblöödt hett, fehlt düt Stück Geschichte, düsse Mööglichkeit to Vergewisserung, de en utföhrlich apen Prozess un Diskussioon á la Nürnbarg de Naschoon harr geven kunnt. Dat warrt ehr mehr fehlen as alle Stücke ut de plünnerten Museen. To weten kriegen, nadenken, sik klaar warrn, Stellung nehmen — nix Wichtigers gifft för den enkelten Minschen so as för en Volk! Time is running out... Adjüß, Irak. Adjüß, Geschichte. Adjüß, Saddam. Orr is dat doch bloots wedder een vun de Duppelgängers? |
|
|
Erinnert Se sik noch an dat "Luftsekerheitsgesetz"? Wenn en Fleegtüch vun Terroristen kidnappt woor, de 9/11 dormit spelen wulln, denn dröffst dat tovöör afscheten — ok wenn unschüllig Lü in sitt. Düt Gesetz hett vör't Verfatensgericht en Bruchlannung henleggt: De Minschenleven an Land dröfft nich gegen de in de Luft afwäägt warrn. — Nu plaant de Bundsregeern en nieges Luftsekerheitsgesetz. Den Passus mit de Minschenleven wüllt se nu uttuuschen gegen en schwammigen Passus mit "Gemeinschaftsgüter": Wenn en "elementarer Angriff auf Gemeinschaftsgüter" mit dat Fleegtüüch maakt warrt, schall dat afschaten warrn. — Dat is ganz apensichtlich en niege Maßnahme to'n Ümweltschuul. De Luft — un ok de Roh — sünd Gemeinschaftsgüter. Stinken un lärmen Fleegtüüch warrt also opneegst batz! afschaten. Dat warrt afschaten Fleegtüüch hageln! Besünners üm de Flughavens rüm warrt dat gefährlich. Ik denk avers, dat Verfatensgericht warrt ok dor wedder en Nootlannung anoordnen. Denn dat wöör ja heten: Ok de Jagdfleegtüüch, de dat Afscheten övernehmt, mööt achterna afschaten warrn — se stinkt un lärmt nich minner. En Insatz vun de Bundswehr gegen sik sülven — un ok noch in't Binnenland! Dat geiht nich an. — Wat de Bundswehr-Insatz annerswo in de Welt verfatensmäßig is, dor twievelt ja anschienend nüms an. |
|
|
Soso, de Astronaut Thomas Reiter weer also "in't All". Dat schient ja de grote Utnahm to ween. Un mit knapp en halv Johr Existenz in't All weer he vun alle Düütschen an'n längsten in't Weltall. Hallo? Ik bün siet över veertig Johr in düt schöne Weltall! Dat is länger as Reiter. Ik bün de Rekord. Man ik kenn öllere Lüüd, de dat Weltall noch länger bewahnt. Bloots wieldat wi hier op de Överflach vun en Himmelskörper stärkere Gravitaschoon föhlt, sünd wi doch nich buten't Weltall. Thomas Reiter weer bloots för en Tied in de so nöömte "Swaarlosigkeit" (de ok nich ganz sünner Gravitaschoon is, süss wöör de Ruumstaschoon ja vun de Eer un vun de Sünn wegflegen). Wi alle sünd in't All, wi sünd alle Astronauten, Steernfohrers, un reist dör't All op de schöne Eer. Un dat mutt een ja seggen: De Eer is schöner as de Ruumstaschoon ISS, de ole klapprige Blechkassen. Orr bün ik villicht buten't Weltall? Is de Eer nich in't Weltall? Dat weer denn ja noch spannender! Denn sünd wi de echte Sensaschoon. Dat wöör ok so eeniges klaarmaken. Mi wasst al lütte gröne Antennen an'n Kopp. Beam me up, Scottie! |
|
|
Düütsche Tornados schallt nu na Süüd-Afghanistan; de Nato röppt dorna. — Wat?! Dorför hebbt wi ehr doch nicht anschafft! — Ach nee? Woto denn? — Na bloots to'n Afschrecken! — Prima. Denn versöch mal, en Sülvstmoordattentäter aftoschrecken! Tornados sünd Kampffleegtüüch. Nu schallt se kämpfen. Wat hebbt ji denn dacht? De Prinzessin mutt den Pogg, to den se lichtfarig vun Eh snackt hett, nu ok heiraten. — Poggen sünd so. Wenn se di den güllen Ball ut'n Soot haalt hebbt, bestaht se ok op Heiraat. Dor schull een jümmers mit reken, wenn een sik mit'n Pogg inlett! Schöön rinfulln is ok de Arbeitslose Henrico Dingsda, de den Kurt Beck üm en Job anpöbelt hett. Batz, dor is de Job! Sogoor acht Stück to Utwahl. Dor hett he nich mit rekent. — Leeg is, dat düsse Dröhnbüdel nu alle redlichen arbeitssöken Minschen in Verroop bringt. Ik mutt seggen, ik bewunner ja de Chefs, de em en Job anbaden hebbt. Also ik wöör den Keerl ok mit Rasur nich instelln! Lever do ik min Arbeit sülven! — Dat meent ok Henrico. 8 Jobs? Allens Poggen! För 6 Euro per Stunn en öde Maschien bedenen? Doch nich för en Prinzessin as em! Man denn schust ok nich vun snacken. Nu heiraat den Pogg! Orr, wenn du so wullt, sluck de Kröte dal. En verdreetlichere Snuut kannst ok denn nich trecken. Keen Snee in Oberhof, un de Biathlon-Wettkämp sünd al utverköfft! De Sneekanonen puust Dag un Nacht Snee un Afgas in de Luft, man dat langt nich. Nu karrt se Ies vun woanners ran — künstliches Ies ut en Iessporthall. De Iessporthall steiht in Bremen. Dat Ies kümmt mit en Karawaan vun Laster na Oberhof. — Wunnert sik noch een, dat dat bald keen natüürlichen Snee mehr gifft? Ji wüllt den güllen Ball, dat vele Geld; nu kümmt de anner Siet. Jaja, woto de olen Märken doch good sünd. Man in't Märken warrt de Pogg in de Hoochtiedsnacht, as de Prinzessin em an de Wand knallt, to'n schönen Prinzen. Woneem is düsse Wand? Woans köönt wi't allens to'n Goden dreihn? |
|
|
16.12.06 ...En Steilvörlaag warrt rinmaakt De Realsatiriker ut de Weerschaps-Eck günnt uns eenfache Sprücheklopper ja nich veel: Dat is swaar un swarer woorn, ehr in Afsurdität to toppen. Man so en Steilvörlaag, as se us nu geevt, de mööt wi doch rinmaken, nich? Also: Grote Stromkonzerne, all vöran de vun de Ruhrkohle AG, hebbt de Bundsregeern beschülligt, to veel (ja: to veel) för den Klimaschuul to doon. Dat maakt, seggt se, dat Investischoonsklima kaputt. — Kapito? Klima un Investischoonsklima sünd twee poor Schoh; se maakt een dat anner twei! — Man düsse Retro-Ansichten vun ehrgüstern sünd noch nich de Steilvörlaag; dat Best kümmt nu: Wenn dat ganze Rümquesen vunwegen dat Weltklima un dat ewige CO2-Insparen nich ophaalt, seggt de Stroombaasen, denn wüllt se ehr Investischoonen vun Düütschland weg verlagern — na Südamerika un vör allen na Asien. Ha, dor liggt de Ball op'n Ölbenmeterpunkt. Naaa, wüllt wi em inlochen? Wüllt wi...? Leve Stromkonzerne, denn gaht doch na Bangladesh! Zack, Ölbenmeter is inlocht! 1:0 för us. — Naschuss: Denn weet ok ji Stroomkonzerne bald, wa sik dat anföhlt, wenn een dat Water bet to'n Hals steiht! Betherto kann een dat ja nich vun juuch seggen — betherto swemmt ji bloots in Geld. Nauer seggt: In uns Geld. — Un kaamt hier bloots nich as povere Umweltflüchtlinge an, wenn Bangladesh versapen is! Ha, dat weer mal en lichtes Speel för us, nich? Danke, keen
Applaus! Bi solk Gegner kann't ja jeder. Dat is ja meist, as speel
een gegen den HSV, nich? |
|
|
All Minschen in de Welt denkt düsse Daag doran, wat Öösterriek de Welt Grotes un Wunnerbores geven hett — düsse unstarvliche Musik... Ok na Johrhunnerten unvergänglich, jedereen kennt vundaag de himmlische Musik... Nienich wöörn wi ehr missen wulln... Jüst nu höört een överall, warrt wi op Schritt un Tritt erinnert an... Mozart? Wokeen schall dat ween? Ach, ok en Musiker ut Öösterriek? Hüüt Doodsdag? Komisch. Kenn ik nich. Ik snack natüürlich vun... "Stihilllle Naaaacht, heiiiilige Naaacht...!" |
|
|
29.11.06 ...De achtersten Been Vör Gericht, seggt de Volksmund, kriggst en Urdeel, avers keen Recht nich. Dat stimmt avers nich: Mennigmaal kriggst ok keen Urdeel un dochen keen Recht. Josef Ackermann to'n Bispill, den sin Prozess woor nu instellt — dorför betahlt de Anklaagten lumpige 10% vun de Geller, de se verschaven hebbt, in de Staatskass. Dat lohnt sik denn för beed: för Staat un Korrupte. En "Win-Win-Connection" nöömt dat de Weerschapslüüd. Dat erinnert mi nu an mennigwat. Toeerst fallt mi Klaus Groth sin Ballade vun Lütt Matten in, den de Voss mit Hülp vun de Kreih ümbröcht hett un nu verspiest. Amenn heet dat: "Un de Kreih, de kriggt een / vun de achtersten Been." So en Achterbeen is dat ok, wat Ackermann & Co. de Staatskass tosmieten un dorför triumphal as "unschüllig" ut'n Gerichtssaal marscheern dröfft. Midücht, de Lütt Matten, de hier verspiest warrt, sünd wi, de slichten Stüerbörgers. Dat de Justiz dorbi de Kreih maken mag, nimmt mi wunner. Mit wa veel Minnachten mööt de Essers un Ackermänner vun uns Tied op den Staat dalkieken! För en Achterbeen! Dat harr mehr ween müßt. Ja, harr juristisch nich anners gahn, avers... dat sünd min Achterbeen! Heff ik dor nix mittoreden?! Beten mehr bilöpig fallt mi dorto ok noch en köstliche
jüüdsche Witz in: Wi köönt us op de Achterbeen stelln, so veel wi wüllt, dat nütt us nix — uns Achterbeen sünd ja sowiso al lang verspiest. Meist as en gerechte Ungerechtigkeit will dor schienen, dat de korrupte Schiedsrichter Hoyzer nu ok nich verurdeelt warrt. En Urdeel schall he wohl kriegen, avers dat warrt sachs en Friesprook ween. Ok he warrt denn as "unschüllig" ut'n Saal stappen, un he un Ackermann speelt denn in desülvige Liga. Nich finanziell, avers moralisch: in de Euro-Liga, 'neem nix tellt as Geld. Dat is nu würklich dat Achterste — op Hoochdüütsch: das Hinterletzte. |
|
|
Soso, de Papst, op Besöök bi de Türken, wünscht,
dat de Türkei in de EU kamen schall. Na de kann good snacken!
De Vatikan, den sin Baas he is, is ja nich mal sülven in de EU!
Un se weet ok nau, woso nich. Sodraad de Vatikan Liddmaat in de EU
warrt, höört de Spaaß op. Demokratische Reformen,
Gliekberechtigung vun Fruuns, Trennung vun Staat un Kark...! Un Brüssel
schrifft quasi mit an de neegste Enzyklika. Ha, dat mag de Papst de
Türken tomoden wulln, man sin egen Land — nee! Schier endlose
Verhanneln, frie Papstwahl mang alle Inwahners (ok Fruuns), de Schwiezergard
af in de NATO un op't best glieks na Afghanistan, un denn de Nettozahlungen
an de EU-Kass! Karkenstüer betahlende Katholiken wöörn
opschriegn: Wi betahlt duppelt — eenmal as Düütsche
un eenmal för'n Vatikan! Hach, Arger ahn Enn. Nee, dat snackst
doch lever de Türken op, as dat sülven to maken. Ofschoonst:
De Vatikan wöör wiss dorför sorgen, dat in de Präambel
vun de EU-Verfaten en Gottsbetoog steiht. Man — villicht sorgt
dor ja amenn de Türkei för Wat hebbt wi noch höört? Ach ja, de Stasi hett dunntomalen Hotte Köhler utspioneert! Jungedi, solk Schubberjacken avers ok! — Un woso hebbt se mit ophöört? De Verluste weern to hooch: All Stasilüü, de op Hotte Köhler passen müssen, sünd vör Langewiel sturven. As en Dutz orr so doodbleven weer, hett de Stasi de Akschoon afbraken. — Natüürlich is dat reine Taktik vun Hotte. So weer he de Stasi Övermann. Wat ut de Lü warrt, de ehr nich Övermann sünd, dat süht een ja an den armen Keerl, den se in London to Sondermüll maakt hebbt. Se mööt em sachs in Gorleben verbuddeln, so dull is he verstrahlt. Atomkraft? Nein danke. |
|
|
Jaja, de Peter Hartz. Nu steiht he vör Gericht vunwegen de ungeheuerliche Korrupschoon mang VW-Vörstand un -Bedreevsraat, de he mit Unsummen an't Lopen hollen hett. (Ja, Unsummen weern dat, nich bloots Peanuts! Wat de Grootkoppten dorop seggt, is us egaal!) Mennig Minschen, de ehr ganze Levenstostand dwangswies dat Brandteken "Hartz IV" driggt, kaakt binnerlich vör Woot. Wa kann en Minsch, de so schaamlos un liederlich mit Geld üm sik smitt, anner Minschen op 345 € per Maand vergattern? Dröff de dat? Mit welk Maat warrt hier meten? Is dat en Schann orr en Witz? De ganzen "Hartz-Reformen" sünd nu diskrediteert, wiss. Sünd se avers dorüm verkehrt, wieldat Peter Hartz sülven nich gloovwördig is? Nee. De Fehlers vun de Hartz-Reformen stekt in de Saak, nich in ehrn Maker. (Süss weer ja ok de düütsche Weddervereenen dorüm falsch, wieldat Kohl sik later as eidbrüchig un korrupt wiest hett.) Vun den Maker dröfft wi de Saak nich afhängig maken — süss kunnen wi meist gor nix mehr anfaten, denn de Minsch hett tomehrst noch mehr Fehlers as de Saken, de he maakt. De eersten Hartz-Reformen (Ich-AG & Co.) sünd ja al in'e Büx gahn — ganz vun alleen, nich dör dat High-Life vun'n VW-Vörstand. Ahn Bispill is Hartzens Chutzpe nich. "Ich kenne die Weise, ich kenne den Text, ich kenn' auch die Herren Verfasser, ich weiß, sie trinken heimlich Wein und predigen öffentlich Wasser", beklaagt sik al Heine. Man schoonst de Waterpredigers heemlich Wien drinkt, is Waterdrinken doch gesunner as Wiendrinken. Ik höp, dat Peter Hartz dat nu to weten kriggt. So'n beten Knast kann em good doon — un endlich mal mit dat Maat meten warrn, dat he an anner Minschen anleggt hett. Un wenn he denn würklich to Besinn kümmt un wieswarrt, wat he maakt hett, denn deit he mi al wedder leed — denn dann warrt he sik unendlich schamen. Wa kann so en Minsch je wedder ünner de Lüüd gahn? |
|
|
Dat mit den Dodenschädel, dat harr mi ok passeern kunnt. Lachen, dormit dat nich so gresig is. Afwehr. Beten Albernheiten drieven, den Horror verharmlosen, em lütter maken, un en Gedanken, dat düsse Schädel ok en Moder ehr Kind weer, in't Stille för mi behollen. Wenn du jung büst un unseker un ünner Druck, denn kann di dat passeern. Mi ja. Is minschlich. Liekers is düt Minschliche ok unminschlich. Gegen de Moder, de ehr Kind dat weer. Wokeen denkt an ehr? Wokeen kann dat uthollen? De Knaken liggt dor in den afghaanschen Sand, bleek, ahn Andenken, mit Föten peddt, unendlich eensaam. Wi schulln ehr en Graff maken. Man geiht nich; is frömdes Land, is Krieg. So köönt jichenswenn ok uns Knaken hier liggen... Gau en derben Sprook kloppen, dat een dor nich över nadenken mutt! Wat kann ik ut lehren? Minschen maakt Krieg, un Krieg maakt sik sin Minschen. Dor töövt he bloots op. Ok en Fredensmission is em recht. Denk nich, du kannst mit Scheep vör de libanesische Küst trecken un togliek alle empfindlichen Tabus gegen Israel wohren. Is Krieg. He maakt de Regeln, nich wi. Denk nich, du kannst di wohren un di Hannen un Seel nich schietig maken. De Krieg spelen wüllt, mit de speelt de Krieg, bet se sik sülven nich wedderkennt. He is uns övermann, wenn he eerst dor is. Wenn. Dat is dat, wat wi in de Hand hebbt. Wi schulln de Döör na de Höll fein toslaten laten. |
|
|
24.10.06 ...De Profit, de Profit... Süh, Hotte Köhler is ja doch för wat good. He ünnerschrifft dat Gesetz nich, dat de Luftsicherung privatiseern schull. Is gegen de Verfaten, seggt he un de Staatsrechtlers. Soso, bi us sitt de Verfatensfienden also in de Regeern — se maakt verfatensbrüchige Gesetten. Weet dat de Verfatensschutz? Schull he de Lü nich mal beobachten? Man Angie un ehr Lü seht nich ut, as wenn se sik dull schaneert. Immerhin, nu wüllt se wat ännern. Ja wat? Dat Gesett doch wiss, nich? Nee — de Verfaten. Dat harrn wi us doch eentlich denken kunnt!!! Wenn de Verfaten en Privatiseern gegenan steiht, mutt de Verfaten wieken. Nich annersrüm. O nee, dat nienich! Privatiseern un Privatweerschap staht natüürlich över de Verfaten un dröfft sik ehr trechtstuken, as dat passt. Dor köönt een de armen Islamisten binah leed doon, de bloots Allah över de Verfaten stelln wüllt. Allah dröff nich, avers de Profit dröff. "De Profit, de Profit, de hett jümmer Recht" is uns geheime Naschonaalhymne. Nu segg mi mal een, wenn dat keen Verfatensfienden sünd...! Wokeen vun de dröff mit'n Finger op George Bush wiesen, wenn he de Genfer Konvenschoon "interpretiert"? Dree Fingers wiest denn trüch. |
|
|
23.10.06 ...De Wettloop vun Eitelkeiten De Swienegel Schrödergerd sä to den Haas Grassgünter: "Laat us en Wettrennen maken, wokeen för sin Book duller Reklaam maken kann!" Un de Haas legg los un nööm sin Book "Beim Häuten der Zwiebel". Ha, dat kunn de Swienegel aver beter! He nööm sin Book "Entscheidungen". Un as de Haas anpeddt keem, reep de Schrödergerd: "Ik bün al dor!" — Dor sä de Haas Grassgünter, "Dat weer nix, dat weer doch bloots de Titel! Nu eerst geiht dat richtig los!" Un he schreev prompt in sin Book: "As ik noch en jungen Bengel weer un nich wüss, wat ik dä, dor weer ik bi de Waffen-SS." Groot Staunen överall. "Ha!" kreih de Swienegel Schrödergerd, "dat kann ik beter!" Un he schreev in sin Book: "As ik al en opwussen Keerl weer un nau wüss, wat ik dä, dor weer ik bi de CSU!" Huiii, dat is en Schandaal! Gerüchte kaamt op, dat Schrödergerd as fiendliche Agent in de CSU Franz Josef Strauß vergiftt hett. Schrödergerd dementeert man bloots lau. "Reine Taktik!", schimpt Grassgünter, "un mit dat Henmaken vun Strauß hett he de CSU doch bloots en Gefalln daan!" Nütt nix, Schrödergerd föhrt 2:0. "Avers ik", kreiht Grassgünter, "heff den Nobelpries!" "Un ik", kontert Schrödergerd, "heff Bild, BamS un Glotze!" Grassgünter warrt bleek. Würklich — noch nie is en Romaan vun em as Vörafdruck in de Bildzeitung rutkamen! Dat schall sik ännern! "As neegst", röppt he, "schriff ik en Slötelromaan över de Waffen-SS!" "Ach wat, allens Gedöns!", grient Schrödergerd, "ik schriff en Enthüllungsbook över de Gazprom. Ik bün ja al dor!" Dor fallt de Haas Grassgünter dood üm. De Swienegel kiekt em minnachtig an, mümmelt nochmal "Gedöns!" un trollt sik op sin kotte Been. |
|
| Öllere
Notizen: Hier klicken
|
Glieks
mit intreden kann denn Giftzwerg Nicolas Sarkozy. Sin Fru wull em
ja ok nich mehr hebben. Man wat noch leger is, ok weltbekannte Mörder
un Kotzbrocken so as Gaddafi laat em stahn un behannelt em as den
letzten Dreck. Un wenn een sik vun solk as de letzte Dreck behanneln
lett, denn is een dat sachs ok... nich? Un wat Sarkozy
nich allens deit, wat he fiechelt un Gaddafi den Spie vun de Mördervisage
leckt! Allens för en poor Milliarden an Staats-Opdrääg
för de Weerschap, un ok de nich seker. Man wokeen Kröten
sehn will, mutt Kröten slucken. Ok de dicksten! Dat deit Sarkozy.
In't Krötenslucken kann he de annern Verschmähten wat vörmaken.
Wenn se em noog fiechelt, wöör Gaddafi villicht ja so gnädig
ween, Belgien un den "Spegel" un de ingelschen Kicker glieks
mit to regeern. So wiet rünner kaamt de ok noch, schast man sehn.
Wi
sünd mal wedder Weltmeestersche! Spaaß hett dat maakt.
Un kiek: Överall warrt de Leistung vun de Footballerschen "sogar"
mit de vun de Männer vergleken, de Dramatik vun ehrn Finalkampf
"sogar" mit den Männerklassiker Düütschland-Brasilien.
Oh, küss die Hand, der Herr! Dat buukpinselt us nu avers dull.
Man nödig deit dat nich. Wi weet ja: Mannslüüd maakt
dat allens, wat se doot, dat de Deerns na ehr kiekt; se mööt
sik jümmers rutstelln un Indruck maken 
Fruuns maakt allens üm de Saak un för sik sülven. Wokeen
will, dat de Jungs na ehr kiekt, de warrt nich Footballersche —
op Jungs maakt anner Saken Indruck. Also Dank för de Kumpelmenten,
man wi hebbt dat bloots üm den Spaaß daan, nich üm
de Lorbeeren. Un wi doot dat wedder. Wi sünd nich bloots Weltmeestersche
— wi sünd de Welt. Mit orr ahn Jungs. Bloots wat wi ok noch
Päpstin warrt — dat överleggt wi noch.
He
hett nix mehr, em freet de Motten,
