 |
|
Öllere Daagbook-Notizen vun Marlou | |
|
Na prima. Vun uns Stüergeller warrt staatliche Folterknechte betahlt (Fall Murat Kurnaz), de USA maakt dat sogoor to'n Gesetz (Bushs nieges Antiterror-Gesetz), un Nordkorea will fründlicherwies de Klimakatastrophe mit en nuklearen Winter konterkareern. Süss helpt ja ok nix mehr. Is dat en Wunner, dat grote Mengen vun Lü binnerlich de Flünken hangen laat? Jahaa, avers düsse "niege Ünnerschicht", sünners in Oostdüütschland, ritt sik nich mehr an'n Reem. Se hett opgeven. Dat wiest, dat se noch en Rest Realismus in't Liev hebbt — mehr tominnst as de Schizophrenen, de anduernd "Druck auf die Arbeitslosen" maken wüllt — ehr bestrafen dorför, dat dat keen Arbeit gifft. "Jetzt kommt es auf Integration an!", bellt Soziaalwetenschaplers. Nanu? Wokeen schall hier wokeen in wat integreern? Mööt de alle Düütsch lehrn in Integraschoonskurs mit Zertifikat? Integraschoon is anschienen allens, wat gegen dat Dörchhangen geiht. Bloots Geld dröff dat nich kosten. Mutt dat ok nich unbedingt. "Integreern" heet op Latiensch ja "heil maken", "ganz maken", "to'n Deel vun en Ganzes maken". "Riek maken" heet dat nich, un wat dorto nödig deit, is ok mit Geld nich optowegen. Mit de Parole "Uns Kinner schall dat mal beter gahn as us!" hebbt Generaschoons un Generaschoons vun uns Vöröllern sogoor ehr egen Leven achteranstellt un sik de Finger blödig wuracht, dör Elend un Kriege, faken vergeevs, avers: dat geev Höpen. Se hebbt nich dörchhangen. Wenn Geld fehlt, kannst di rögen; wenn Höpen fehlt, röögst di nich mehr. De ganze Minsch verännert sik. Is dat Noot? Kann nich ween — Noot maakt doch erfinderisch, nich apathisch. De Existenzkampf üm't pure Överleven bringt de Minschen wedder op Draff, avers he hett us noch nich tofaat — verhungern deit noch nüms. In Hartz veer, düt smalle Fenster twüschen Höpen un Hunger, is anschienend de Lähmung tohuus. Woneemher kümmt bloots all düsse Freudlosigkeit?! Midücht, Höpen un Freud sünd Ressourcen, de bannig knapp warrt, knapper as Ööl, knapper as Arbeit. Höpen, nich Gier. Freud, nich Spaaß un nich fun. All Minschen hebbt Flünken — se mööt ehr bloots utspannen, de Knööv dorto finnen. Ünner welk Bedingen wöörn wi opgeven? Uns hangen laten, uns Kinner verkamen laten? Wat kann us gefährden? Wat gifft us Knööv, wat drifft us an? Geld alleen is dat nich. Wat köönt wi dorvun afgeven? Geld alleen is dat nich. | |
|
Ik harr en Mellersch, de kunnst mit Fakten beleidigen. För en Minschen mit rege Fantasie is dat natüürlich problematisch, un so een weer se. Se dach sik allerhand ut, glööv dat foorts sülven un vertell dat as de Wohrheit. Mennigmaal güngen de annern över weg, avers af un an müss een eenfach wat klaarstelln — de richtigen Fakten. Dat nehm min Mellersch bannig persöönlich. "Soooo?" maak se unglöövsch, tröck de Stimm achtern ganz hooch, un denn snack se de neegste Tied gor nix mehr. Se weer beleidigt — vun de Fakten, de ehr Wünsch wedderspreken dään. Dat de kaptaale Schrieversmann Pamuk den Literatuur-Nobelpries kriggt, freit mi bannig. Den Pries kriggt he för sin exzellenten Bökers. Man em geiht dat ja so mit dat türkische Naschonaalgeföhl un den armenischen Völkermoord: eersteres is dör letzteres beleidigt. Besünners pikant is dorbi, dat türkische Naschonalisten dat Verbreken, över dat sin Existenz se füünsch sünd, sülven veranstalt hebbt. Dat is mehr, as een vun min Mellersch seggen kunn. Se sünd ok nich beleidigt över, dat een ehr Moord totruut — se drauht ja de, de dat doot, sülven mit Moord. Nee, nich dat dat ween kunn, maakt ehr füünsch, sünnern dat dat west is — de reale Fleck op de Weste vun't Sülvstbild. Ik kann ja Beleidigtween nich af, un ik mutt togeven, wenn een so richtig schöön in Raasch kümmt, dat he sik liek as Rumpelstilzchen merrn tweirieten will, dat geneet ik; solk Lü to provozeern kann ik mehrst nich wedderstahn. Je bizarrer se sik argert, desto beter. Dat is en Fehler vun mi, kunn ok mal gefährlich ween; geern wöör ik uns islamistische Frünnen mehr reizen, man de smitt ja glieks Bomben. (Dorför, dat ik dat segg, smitt se mi villicht en Bombe?) Avers wat de Franzosen sünd, de överdrifft dat ja nu in de anner Richt. Se wüllt dat to'n Gesetz maken, dat een den armenischen Völkermoord nich mehr afstrieden dröff. Dat is good meent för de Armenier, avers woneem kaamt wi dor hen, wenn jedeen Fakt dör Gesetten schuult warrn mutt?! Dorför sünd Gesetten nich dor; se köönt nich wetenschapliche Wohrheiten dokmenteern. Wüllt se ok en Gesett erlaten, dat een de Relativitätstheorie orr de Evoluschoonslehr nich afstrieden dröff? De hett dat bannig nödig. Liekers is dat beter, jedeen dröff denken un seggen, wat he will — ok Unsinn. Dorför, dat to garanteern, sünd Gesetten dor. Sogoor wenn dormit Propaganda dreven warrt. Dat een bi us den Holocaust nich leugnen dröff, mutt en Utnahm blieven un warrt villicht ok jichenswenn överflödig. Dat de Holocaustleugner uns frieheitliches System nich wedder to en Unrechtsregime maken köönt, dorop kümmt dat an; dat mööt de Gesetten wehren. Frieheit is wichtiger as Fakten. Dat's en Fakt. | |
|
2.10.06 ...Bei Anruf kein Mord? Soso, Angela Merkel sülven hett bi den Siemens-Baas anropen; un nu vertagt de Vörstand den dicken Griep in de Gehaltskass un spendt wat för de Armen — för de Siemens-BenQ-Mitarbeiters, de toeerst verköfft un nu verraden woorn. Wat Angie em woll seggt hett? "Do mi dat nich an, ik krigg doch de Schuld!"? Man wokeen warrt ehr de Schuld geven för wat, woför se nix kann? Denn de Politik kann bi de Weerschap nix mehr lenken, bloots noch annersrümmer. De Politik is to'n Pracher woorn in de Paläste vun de Konzerne; ok Angie kann nix feddern, bloots noch bitten. Man dorför, dat dat so kamen is, dor kann de Politik wat för. Se hett sik in de letzten Dekaden konsequent sülven entmachtet. Mehr un mehr Gewalt över dat Leven vun Minschen is ut de Hannen vun wählte Politiker in de Hannen vun nich wählte, nich ropene, nich demokratisch legitimeerte "Ökonomen" övergahn, also vun en weltwiede Oligarchie. De drept nu de Entscheidung, dusende Familien eenfach mit Water un Broot in de Wildnis uttosetten. De Politik hett lang tovöör beslaten, dat se nix mehr to seggen hebben wüllt. Dat hebbt se mit Afsicht daan; hebbt se sik irrt? Hebbt se würklich dacht, se dröffen de Dynamik vun de loslaten Globaliseern nich hemmen, un dat weer good för de Minschen? Ik warr den Verdacht nich los, dat de enkelten "Entscheidungsträger" in de Politik för later gode Jobs in jüst düsse Grootkonzerne in Utsicht harrn. Poor hebbt de Jobs ok al antreden. De Middelstand kann dat nich beden, he fallt achternöver. Dat is en inspeelte Mechanismus — dücht mi. En korruptes System, en fremdbestimmte Politik? Weer nix Besünners; anner Länner hebbt dat ok, de USA sogoor ganz apen. De Lü merkt dat, se vermoodt dat tominnst; se wählt nich mehr. "Wenn Wahlen etwas ändern würden, wären sie verboten." Düsse Sprook is al ut de 70er, man mi dücht, he warrt nu eerst wohrer un wohrer. — Hett Angela to den Siemens-Baas so seggt?: "Gehaltsverdoppeln för den Vörstand, Hartz veer för de Lü, so düüdlich kannst dat doch nich maken! Denn kapeert dat ja jedereen. Ik mutt doch de Illuschoon wohren, dat dat noch en Politik gifft! Maak mi dat nich so swaar. Nich, bet ik ok en Posten bi juuch antreden kann!" — Ik höp, se hett dat letzte nich seggt. | |
|
26.9.06 ...Bangemaken gellt doch! Nee, dat is ja nu nich so, dat de Islamisten us to jichenswat dwingt. Dat kannst ehr nich naseggen. Wi laat dat nämli gor nich eerst so wiet kamen. Rein ut vörutnahmene Beflissenheit pareert wi al, wenn de Islamisten villicht sacht mit'n lütten Finger wackelt. De Presse is al inschüchtert — Karikaturen —, de Papst warrt künftig sin Tung höden, un nu kuscht ok de Kunst. De Deutsche Oper Berlin hett en provokante Inszeneern vun "Idomeneo" vun'n Speelplan nahmen, ut Angst vör Bomben. Nee, Idomeneo is nich vun Salman Rushdie, dat is en Oper vun Mozart. De Sülvstzensur funscheneert also al. — Opneegst dröff ok de "Entführung aus dem Serail" nich mehr wiest warrn, dor sünd Moslems ja de Bösen, un "Nathan der Weise", dor is en Jood ja de Gode, dat is de Islamisten nich totomoden... huch? "Nathan" weer ja al ünner de Nazis mal verbaden? — Ja, avers de müßten em explizit verbeden. De Islamisten brukt dat nich mehr. Wi verstaht ehr ok, wenn se bloots mit de Oogen pliert, nich? Zensur is nich nödig, wenn Sülvstzensur klappt. Wi köönt dat nich mal de Islamisten ankreiden. Se doot ja nix, se sünd bloots dor. Dat langt. Wi stiert op ehr as dat Kanink op de Slang. Opneegst warrt hier ok de Fruunsbeopdragten un -ministerschen afschafft. In Afghanistan hebbt se de dore ja graad doodschaten. Dor köönt wi dat hier nich mehr riskeern, welk to hebben, nich? 'keen weet, wat allens passeern kunn... wenn wi wi sülven blievt? | |
|
17.9.06 ...Sünd Manieren fascho? Nu is de NPD in'n Landdag in Meck-Pom, un foorts geiht dat los mit den Krampf: Woans gaht wi mit de ehr Vertreders üm? In't Interview, in't Kiekschapp? Oh, de Journalisten sünd dull op bedacht, dat se de NPD-Lü ok ja demonstrativ slecht behannelt. De NPD-Vertreder mutt blangenbi stahn un kümmt as letzte an de Reeg. Wenn se em nich al in de Frage rünnermaken köönt, mööt se em op jeden Fall na dree Wöör ünnerbreken un to Ordnung ropen, egaal wat de seggt. Bloots dat wiest Distanz. Wokeen de NPD-Lü mit normale, ziviliseerte Höflichkeit begegnet, is ja sülven Faschist, nich? So kriggt de Tokiekers den Indruck, nich de NPD sünd de Rüpel, sünnern de annern, de sik för de "Goden" hollt. — Wenn ji de Lü nich hebben wüllt, denn laadt ehr doch eenfach nich in! Un süss: Weest anstännig! De Unanstännigen, dat sünd de Nazis. Dat warrt se unweigerlich wiesen. Cool blieven! | |
|
16.9.06 ...Trüch in de Tokumst Noot maakt erfinderisch: De US-Armee will üm Bagdad nu en Stadtmuur buun, inclusive Wallgraven, as in't Middelöller. Dör wenige, aftellte Doren schall de ganze Verkehr vun de 7-Millionen-Stadt lopen (orr krupen). Prima Idee, nich? So as Clown-Nummer. De Stars vun de Middelöller-Festspelen sünd ja avers de Muslime. Dat langt nich, dat de Papst (ok en Retro-Star, avers nich middelöllerlich noog), de dummerwies ut middelöllerliche Schriften ziteert hett, seggt, dat em dat leed deit. Nee, dat mutt duller un duller ween; he schall sik hulend in'n Stoff winnen, he schall wohraftig "zu Kreuze kriechen", also eentlich "zu Halbmond kriechen", avers wenigstens na Canossa. Meddewiel stekt se Karken an — dormit ja nich een op de Idee kümmt, den Islam gewaltbereit to nöömen. Ok de Papst is övertüügt un bereut oprichtig. — Nöömt dor een de Nazis noch "de Ewiggestrigen"? Ha! De sünd ganz vun hüüt: Morgen nehmt se bi de Wahlen in Meck-Pom de 5%-Hürde un haalt sik uns Stüürgeller. Wahlkampfkostenerstattung. För de! Schöne Utsichten. | |
|
15.9.06 ...Hurra, wi sünd beleidigt
Man se sünd nich de eenzigen, de dat geneet. De halve muslimische Welt (orr: Deel vun de Welt? leevt wi all in desülvige Welt?) frohlockt, d.h. randaleert, brüllt, flöökt un verbrennt Saken. Wat Schönert kann't nich geven för ehr Sülvstgeföhl. Se söökt graadto de Anläss, un wenn dat keen gifft, denn denkt se sik de ut. Wat nu de versapene Prinz vun Hannover op de Expo 2000 an den türkischen Pavillon pinkelt, wat dat Gammelfleesch den Döner in Verroop bringt, wat in Dänemark Teknen druckt warrt, wat de Papst uurole Schriften ziteert — jümmers is bloots de Islam, de ganze Islam, ja de Prophet sülven beleidigt. De kann avers ok nix af! Is he'n Waschlappen? De ewig Beleidigten sünd wiss welk. Wenn du nämli so as Waschlappen dulle Minnerwertigkeitskomplexe hest, kannst din Wöörd bloots föhlen, wenn se beleidigt woor. Ok Kritik is natüürlich Beleidigung. Bloots wenn du luut warrn un den Laden tweikloppen kannst, föhlst di stark. Un tweikloppen muttst den Laden, süss büst keen Mann. Jümmers is de Ehr in Gefohr. Jümmers mutt se bestätigt warrn, süss twievelst an di sülven. Souverän is wat anners. Arme Keerls! Laat wi ehr winnen, as de Kinner bi't Spelen. Schall de Papst sik entschülligen, in kabarettistische Vullendung. Triumph! He kann bavento vull Reu den Obermufti vun Dingsda bidden, em de Bicht aftonehmen un em sounsoveel Rosenkränz as Buße optoleggen, wieldat he Mohammed beleidigt hett. Denn kann he düsse Buße bi sin Türkei-Besöök öffentlich in en Moschee afbeden. Triumph för den Islam! — Speelt wi mit ehr! Mal sehn, wa gau se dat kapeert. Min Tipp: nienich. Ironie is för ehr en Frömdspraak. So köönt wi veel Spaaß hebben. Man wenn se dat kapeert, denn — na, de Fahnenindustrie freut sik. | |
|
10.9.06 ...Moralische Hööchten O neeoneeonee, de Papst, de Papst! "Die Menschen suchen Orientierung in unserer Welt der Beliebigkeit", blabla. Blabla? Över 50% vun de Düütschen seht den Papst as Vörbild, seggt de Ümfraag-Lü. De Iesenfreter Ratzinger, de to den brasiliaanschen Befreiungstheologen Boff, as he em den vatikaanschen Muulkorv verpassen dä, sä: "Op dat Hart kümmt't nich an, dat sühst nich" — he is hüüt en moralisches Vörbild. So sehn, hett ok Donald Rumsfeld noch Chancen, maal everybody's darling to warrn. Man dat wiest eentlich bloots, wa goodaardig un tutig de Minschen sünd; wa geern se Godes glöövt, wa geern se na Vörbiller opkiekt, den Ansprook för de Würklichkeit nehmt. Dat is gefährlich eenfach, man in'n Grunn en gode Toog. An de Lü, nich an den Papst. Un denn heff ik mi de Talkshow vun Christiane Sabinsen, äh, Sabine Christiansen ankeken. Dat is jümmers en Fehler, ik wüss't ja; liekers leet mi "Welk Religioon hett Gott?" en to intressante Titel, un de afdreihte Imam, de Fruuns nich de Hand schüddeln will, weer ok dor. Pustekuchen! Üm "Werte" güng dat, "Werte" hier, "Werte" dor. Un dat Religioon de Werte vörgifft, us lehrt, wat recht is. O nee! So'n Dummtüüchs! Bloots een eensame Atheistin höll de Fahn vun'n sunden Minschenverstand hooch un meen, dat een ok ahn Religioon en goden Minschen ween kann. So is dat! De Werte sünd een un all weltlich, nich göttlich. Werte sünd ja ok för de Welt, nich för Gott. De Minsch süht, wat good un wat slecht is, ok ahn Gott. Woneemher nehmt de Religioonen düsse Arroganz?! Arroganz un togliek de Fuulheit, nich mehr sülven to denken un to uurdelen, sünnern dat Geweten dör en Hillig Book to ersetten. Ok dat is gefährlich eenfach; 9/11 is jüst fief Johr her. Gloov is keen Gesetzbook, sünnern dat grote Lengen, de Kiekut in de Ewigkeit, Adress för Dank, Heimat för de Seel un Troost. Mennigmaal sünd de, de gloovt, dorwegen glücklichere Minschen. Nich betere. Vun de moralische Hööcht schulln se alle mal rünnerkamen. | |
| "Gammelfleisch — Schützt uns endlich!" schriegt de Wild-Zeitung in mannshoge Lettern. Na good, wi köönt dat ja versöken. Also schuult juuch man sülven — vör juun Gier. Jümmers mutt dat Fleesch ween, un billichbillichbillich mutt dat ween! Dönerkrieg an'n Wandsbeker Markt in Hamborg: Hier en Döner för 2 €, dor een för 1,50, dor een för 1 €... Düres Fleesch? Dat köfft keen! Billig mutt't ween! — Na, denn warrt de Markt dat je woll richten! Den letzten Dreck vun de afgnibbelten Knaken hobeln un orrig scharp verwürzen, denn rünner damit. Verbeden schall een dat? Ji wüllt doch nich etwa in Marktmechanismen ingriepen? In Angebott un Nafraag? En Sakrileg! Wat köfft warrt, dröff een ok verköpen. Woso schall de Staat Kunnerlöörs betahlen — vun Stüürgeller? 'keen sik bedregen laten will, schall sik doch bedregen laten! Kannst di ja an fief Finger aftelln, wat dat 99-Cent-Fleesch för Fleesch is. Wa dat to Leevtieden de Deerten geiht, de ehr Fleesch dat is. Wa se to Dood bröcht warrt un woans dat togeiht in so'n Megaslachthus. Woso dat so veel Twüschenhändlers gifft. Un woto de ehr Köhlhüüs eentlich bruukt... — Ach, dat wullt du di gor nich aftelln? Lever nich nadenken, wiedereten un töven, bet een dat nich mehr leugnen kann, un denn den klassischen Satz seggen... "...das haben wir doch alles nicht gewusst!" | |
|
3.9.06 ...10 ewige Wohrheiten:
| |
|
12.8.06 ...Insider-Informaschoonen
bitte! Soso, Günter Grass weer bi de Waffen-SS. Jaaa, avers dor weer he doch meist noch en Kind, seggt sin Fans, un he hett doch gor nich wüßt, op wat he sik inleet, un eentlich weer he en Opper. — Na und? Ach, leven Lü, woso mutt een denn bi de Nazis jümmers ahnungslos orr en Opper ween? En Butensieder also, een, de op't best jümmers op en moralische Hööchte seten un allens richtig maakt hett. Orr hööchstens unweten un arglos weer. Düsse Gerechten gaht mi mennigmaal op den Nerv; ok wenn se nich alle sülvstgerecht sünd, köönt se mi doch mehrst nix lehren. Intressant sünd doch de annern Lü, de Insider. De köönt us an'n mehrsten vertelln. Ik wöör dat Grass nich övelnehmen, wenn he ut Övertügen na de Waffen-SS gahn weer — un dorna sin Övertügen ännert harr. So as vör 250 Johr de frame John Newton, de toeerst lange Johrn Kaptein vun en Slaavenschipp weer, denn avers to Besinnen keem un as för dull gegen de Slaaverie fechten dä. He schreev dat frame Leed "Amazing grace", dat jedereen mitsummen kann. So en Minsch, de beed Sieden vun binnen kennt, beed Sieden föhlt hett, de kunn us vertelln, woans dat kamen kann, dat dat Geföhl för Moral bi den enkelten Minschen utknipst warrt, wa sik dat anföhlt, an de Nazi-Ideen orr de Slaaverie to glöven, un wat nödig deit, dat een to anner Insichten kamen kann — to Besinnen. "I once was lost, but now am found, was blind, but now I see", schreev John Newton in sin Leed. Vun düt Sehn-Lehren wüßten wi geern mehr. De Gerechten köönt us dat nich lehren; se köönt us wat anners lehren, avers dat nich. Avers Minschen, de sowat vertelln köönt, gellt jümmers noch as tabu, as pfui. Is dat dat Besinnen, wat pfui is? orr dat Differenzeern? Midücht, sünnerlich bi den Nazi-Themenkrink is dat unklook. Nazi dröff een nich west ween, süss is een ünnendörch. Nazi = Unminsch, Nazi = Monster, dat warrt jümmers noch lehrt. Un dorüm seggt se ok vun Grass, jaaa, avers he weer doch noch so jung... Nazis weern avers nich bloots Unminschen, sünnern ok Minschen. Grass ok. Un bloots wenn wi ehr Minschen ween laat un uns sülven ok truut, welk to ween, köönt wi ok vun slechte to gode Insichten wesseln — un lehren, woans dat geiht, un anner Minschen helpen, dat to doon. En Bekennen to en Besinnen, so as Grass dat, naja, halvwegs deit, dröff keen intellektuelles Doodsurdeel ween. Süss köönt wi uns Kinner glieks vertelln, de Nazis weern Buteneerdsche west, gor keen Minschen, se kemen vun'n Mars, wi harrn nix mit ehr to schaffen, un de Oostereier bringt de Oosterhaas. | |
|
Laat in de Sünnavendnacht. Min halv-jüüdsche Frünnin Anke un ik kaamt vun't Restaurant trüch. Wenn wi in min Auto utfohrt, liggt min lütte Düütschlandflagg in'n Kofferruum; Anke is dat wohler. Blangenan bi Ankes Nahvers is Grillparty; dat Grillen is al vörbi, dat Beersupen avers nich, dat höörst. De Musik speelt Footballleder, allens singt. Miteens is de Naschonaalhymne dor un warrt mitgröölt. Anke schuddert. "Aber sie singen nicht die erste Strophe", begöösch ik. "Aber nur weil sie den Text nicht kennen!" schamfeert Anke. — Wedder tohuus, maak ik min Radio an. Deutschlandradio. "Auschwitz. Stimmen" heet de Sennung, en Collage vun Toonbänner ut de Auschwitzprozesse. Bet an't Enn bliff ik dorbi — dat kannst nich utknipsen. Klock 3 kaamt Narichten: De Hisbollah hett Israel den "totalen Krieg" verklaart. Israel föhrt em al. Langsam warrt dat hell in't Oost, as ik slapen gah. "Wenn sich
der verrückte Iraner durchsetzt, der Israel nach Europa verlegen will, dann
könnten die doch Ostdeutschland kriegen", seggt en Fründ in'n Spaaß.
"Da hauen alle jetzt ab, bessere Zuwanderer können wir gar nicht kriegen,
die sind so tüchtig, und die Gegend ist auch viel besser als ihre komische
Wüste." "Mein Gott, wie erniedrigend das alles ist!" röppt
en anner Frünnin. "Soll nie was anderes als das Überleben für
die Juden bleiben?" En heftige Diskuschoon geiht an. Is Gewalt bloots de
Fratze vun Angst? | |
|
Kannst ja vun Football denken, wat du wullt, avers denn hüüt meddag: De Footballers dankt ehr Fans — Reesen-Oploop an't Brandenborger Door in Berlin. Kunnst in't Kiekschapp sehn. Allens is ut de Tüüt un singt, Mannschap un Lü. Un to'n Sluss kaamt spontan nochmal dree na vörn — David Odonkor, Lukas Podolski, Gerald Asamoah — un singt solo "Marmor, Stein und Eisen bricht". Op ehr Hemden steiht "Danke Deutschland!" Bi de Toonaart vun den Gesang weern se noch nich ganz övereen, man egal: alle singt mit. Wow! Dor schall mi nochmal een mit Nazis kamen. En Halv-Ghanaer (Odonkor), een ut Polen (Podolski) un een ganz ut Ghana (Asamoah) singt en Leed vun en Sinto (Drafi Deutscher weer ja Zigeuner) — un se alle sünd Düütschland! Se alle sünd wi. Nix is dor mehr exotisch an. Düütschland is in't 21. Johrhunnert ankamen! Dat hett nu de Football nich maakt, avers he hett dat wiest. Un villicht ok beten mitholpen. Ik bün froh üm, heilfroh! Danke! Wi alle sünd tohuus in de Frieheit. För ehr staht wi in. Ja, ik weet, Fiern is noch lange nich Alldag, un dat much en lange Weg ween, bet nüms mehr in'n Alldag vunwegen Raaß un Herkamen benachdeeligt warrt. In Frankriek hett '98 ok en bunte Multikulti-Truppe de WM wunnen, woor vun alle fiert, un liekers brennen düt Johr de Autos in de Vörstäder. Man villicht köönt wi dat ja noch beter maken? Dat Düütschland, dat wi düsse Daag sehn hebbt, dat döögt dorto, allens to integreern, wat good is. Godes integreern, Godes stiften — dor kannst denn mit Recht stolt op ween. Un vunavend nochmal: Allez les Bleus! | |
|
Ooooch, nu is dat doch so wiet: Wimpel op Halvmast! Ik warr noch en Patent anmellen: de Moll-Hupe. Autocorso in Moll. Man wi sünd jümmers noch Weltmeester — bi de Deerns. De Jungs treckt jichenswenn na! Un wenn nich — maakt nix! Se hebbt ja ok de swareren Gegner in ehr Turniere. Italien weer würklich beter. — Nu hebbt wi also en Speel verlaren. Wat wi avers behollen kunnen, is dat lockere, beswingte Düütschland-Geföhl. Dat hett mi gefalln. Besünners veel wert weer mi dat, wenn wi dat ok ahn anduernde Siege behollen kunnen. Bloots Waschlappen mööt anduernd siegen, dat se sik ehr sülven gewiss ween köönt. — Souverän ween heet: siegen un bescheiden blieven, verleern un blied blieven. Düsse Souveränität fehlt uns Düütschen faken, nich bloots in'n Football. Winnt wi, warrt wi glieks överspöönsch, ünnerliggt wi, kriggt wi de dicken Komplexe. Wenn wi dat mal afleggen kunnen, wöör mi uns Naschoon doch glatt richtig sympathisch. Kann Football ok dorto noch helpen? Denn kunn dat ja bald de WM as Wunnermiddel op Krankenschein geven. Danke, Klinsi! — Villicht seht wi ja ok de swatt-rood-güllen Autowimpel noch beten länger. Ik warr mien af un to nochmal opsteken. Un hebbt Se Angela Merkel sehn? Hett se doch glatt de italieensche Hymne (de ja würklich flotte Musik is) mitfleit! Dat dücht mi salomonisch: de Hymne vun'n Gegner mitfleiten is de ideale Midd twüschen Utfleiten (wat leider veel Lü maakt hebbt) un Mitsingen (wat ja nu nich nödig deit). Meist philosophisch is dat. Laat us de Spele, de WM, dat ganze Leven mitfleiten! As neegst: de Marseillaise. Allez les Bleus! | |
| As dat 1:0 för Argentinien full, harr ik meist de Höpen opgeven; dor heff ik anfungen, över natodenken, wat een nu mit de ganzen swatt-rood-güllen Autowimpel maken schull. Wegsmieten is eentlich to schaad. Wat dat wohl mööglich weer, de op Halvmast aftosenken? So en Mechanismus weer eentlich vernünftig för en Fall vun allgemeene Staatstruur... Al füng ik an mit Konstrukschoonsteknen för en Patentanmellung: De Halvmast-Autowimpel, en Patent ut Düütschland — tominnst Patentweltmeester schull Düütschland mal wedder warrn! —, batz, dor hebbt de Jungs den Utgliek schaten! Wat?! Warrt wi nu doch Footballweltmeester staats Patentweltmeester? Denn dat Ölbenmeterscheten. De Waaahnsinn! Jens Lehmann, en echte düütsche Held — blondlockig, basig, bescheiden. So leevt wi dat. Halvmast is vergeten. Dat ganze Land flaggt Vullmast. LaOla! Vergeten is ok anneres, un dat is mehrst ok good so. De fiese Förderalismusreform hett sik in'n Rügg vun de Afwehr sliekert, Dweerpass, Tor! "Reform" beslaten. Dorbi is dat Ding so verunglückt as bloots wat. Foul!! Un denkt een noch an La Ulla? Nee, nich LaOla, sünnern La Ulla, Schmidt, de Gesundheitsministersch. Un düsse unsäägliche Reform. Keen LaOla dorför! Kunnen wi dat doch gau vergeten. — Jümmers vergeten warrt bi jedeen Gesundheitsreform ja ok de Pharma-Industrie. Man de sünd dor gor nich trurig üm. Ganz in de Still scheffelt se Milliardengewinne. An de nüms röögt. An'n minnsten La Ulla. De Patienten schallt berappen, de Stüertahlers, ja sogoor de Ärzte blifft nich verschoont — bloots de Pharmaindustrie, de vör Geld stinkt, warrt noch profiteern. De Düwel scheet wedder op den gröttsten Hupen. De Düwel? Nee; düsse Wahnsinn hett bi us Methode. Avers nich jümmers verstekt sik de Pharmaindustrie; se hett ok ehr Gala. De steiht nu bevör — dat jährliche Schaulopen vun ehr niegsten Errungenschaften, vun de humane High-tech. Kennt Se nich?! Wat denn — noch nienich wat vun de Tour de France höört? Tjahaa, dat is de Produktpräsentaschoon vun uns Pharmaindustrie. Se kann't ja. Un will nich mal Geld dorför, as de Al-FIFA. Se schenkt de Welt en Super-Show. Wahnsinn, nich? Dor schulln wi nu nich so pingelig ween. Rin mit de Pille! Un denn wedder LaOla. | |
|
"Der Kompromiss zur Gesundheitsreform ist eben der kleinste gemeinsame Nenner der Koalitionspartner. Auf einen größeren Nenner konnten sie sich nicht einigen." Dormit wüllt uns de Journalisten seggen: beter güng dat nu even nich. Ja, leve Journaille: Beter geiht dat ok nich! Woneem sünd ji denn bloots to School gahn?! Al siet Johrn un Johrn gaht ji mi op den Wecker mit juun Ingnoranz. Wat nu kümmt, is Bruchreknen för Journalisten: Also, de Nenner vun en Bruch is dat, wat nerrn steiht. Klaar? Bi 1/4 is de Nenner 4. Wüllt wi twee Brüche tohooptellen, denn mööt wi ehr tovöör op een Nenner bringen. Bi 1/4 + 2/6 is de eenfachste Methood, de twee Nenner mitnanner to multiplizeern (un de twee Zähler denn mit densülven Faktor): 1/4 + 2/6 = 6/24 + 8/24 = 14/24. Dat stimmt, is avers dumm. Dat Wohre is dat, de Nenner nich to multiplizeern, sünnern dat lüttste gemeensame Veelfache vun beed Nenner to söken — den lüttsten gemeensamen Nenner. In düssen Fall is dat twölf. 1/4 + 2/6 = 3/12 + 4/12 = 7/12. So bruukt wi dat Ergeevnis denn ok nich mehr körten. En lüttern Nenner gifft dat nich — beter geiht dat nich! De lüttste Nenner is also de gröttste Erfolg. Jede gröttere Nenner is en fule Kompromiss. — Wa kann dat angahn, dat so veel Un- un Halfbillung in en Profeschoon togang is, de sik för "gebildet" hollen deit?! Is Grundschulmathematik villicht keen Billung? Grundkenntnisse in Mathe un Natuurwetenschapen höört nich to de Billung, de ji anduernd beswöört? Goethes Werke ja, avers dat Differenzeern vun en Polynom nich? orr tominnst weten, woans en Batterie funscheneert? — Naja, richtiges Düütsch höört ja bi juuch ok al lang nich mehr dorto. Amenn sünd ji bloots de Indikator för uns dalgahn Standards. De gaht dal un dal bet op den allerlüttsten gemeesamen Nenner: de Kürzel vun SMS un poor Grunzluden. In teihn Johr kommunizeert wi so un nich anners. | |
| Alle Völker hebbt Angst vör düütschen Naschonalismus. An'n mehrsten een Volk: de Düütschen. Klaar — de Düütschen sünd ja ok jümmer wedder vun de Düütschen överfallen un ünnerdrückt woorn. Dorüm hebbt de Düütschen glieks bannig Angst, wenn se de Düütschen ehr Naschoon fiern seht; un wenn dorbi en swatt-rood-güllen Fahn opduukt...! Denn verjagt se sik as för dull; dat Weltende naht. "Dat is en gefährliches Vulk!" warrt ehr denn klaar. Wi sünd en gefährliches Vulk. Wi maakt us angst. Güng dat bi us teihn Minuten lang to as in Ingland, wi wöörn stantepe starven vör Angst vör uns sülvst. Wi bevert vör dat Düütsche in us. So dull, dat wi lever keen Vulk mehr weern. Beslaat wi nu de Sülvstoplösung? Anners is dat nich to verstahn, wenn de Kommentatoorn nu bi de Football-WM ehr Interviewpartners mit gesenkte Stimme fraagt: "Und wenn Sie die vielen deutschen Fahnen jetzt sehen, wird Ihnen da nicht mulmig?" orr "Kriegen Sie da keine Bauchschmerzen?" Doch, ik krigg glieks welk... ik bün ja en gode Düütsche, dor mutt mi ja vör min Naschoon bang ween... Düütsch ween heet ja Nazi ween, nich? Un allens, wat för Düütschland steiht, is vun Övel... — Hallo?! Bitte opwachen: De swattroodgüllen Fahn, dat is nich de Fahn vun de Nazis. De weer nämli — naa? weet dat een? — jawoll, swatt-witt-rood weer de. De swattroodgüllen Fahn weer ünner de Nazis verpönt. Verbaden. Uns Fahn, dat is de Fahn vun de Frieheitskriege, vun de Republik, de Fahn vun 1848, vun de börgerliche Revoluschoon — un, ja, vun'n Antifaschismus. Wenn us dorvör nu ok bang ween schull, bloots wieldat dat düütsch is, denn is mit de glieke Logik jede Vegetarier en Nazi, wieldat Hitler ok Vegetarier weer. Wenn wi al so blöd sünd, denn laat us man lever doch uns sülvst oplösen. Villicht adopteert us ja de Holländer. Dormit is denn ok de ole Football-Rivalität vörbi. — Weer eentlich schaad, orrer? (Psst, nich wiederseggen: Ik bün geern Düütsche. Ja, echt. — Dat is nu meist beten schaneerlich, nich? As en "Outing", as en sexuelle Perverschoon... bloots slimmer. Uns Frünnen mit de Hitler-Vegetarier-Logik meent nu wiss, ik harr seggt, ik wöör den Holocaust good finnen. Klaar, nich? Ik bün ja en gefährliche Düütsche. Buh!) | |
| 15.6.06 ...Beelzebub? Nee, Düvel! Vör ölben Johr sünd de UN-Blaaghelme ut Somalia aftrocken — nee, flücht sünd se meist vör den besinnungslos toven Stammes- un Börgerkrieg. Kannst ehr nich verdenken: Dor weer würklich nix to maken. Nich mal de Hülpsorganisaschoonen, de ja würklich Kraasch hebbt (faken mehr as Suldaten), kunnen dor uthollen. Un in düsse Börgerkriegshöll leevt sietdat (un al tovör) de somalischen Kinner, Fruuns un Mannslüüd, un nüms fraag mehr na ehr. Man nu! Nu hebbt sik dor de Islamisten dörsett, un dat is ja ganz leeg. De USA sünd "besorgt". (Dat weern se tovöör nich.) Wi ok. Somalia kunn ja to en "Rückzugsraum" för Islamisten warrn. Gresig! De Islamisten, dat sünd doch de Lü, de mal vör fief Johr bi us — also in New York — en Hoochhus tweimaakt hebbt. Sietdat hebbt se twoors nix mehr beschickt, avers immerhin — uns Hoochhüüs sünd in Gefohr! Wat de somalischen Minschen "Rückzugsräume" hebbt? Egaal. För ehr is dat en Schangs, dat tominnst wedder Roh in ehr elenniges Leven kümmt; de Düvel Krieg kunn villicht mit den Beelzebub Islamismus utdreven warrn, un villicht is en "Gottesstaat", so leeg dat is, beter as de totaal idiotische Stämme-Klopperie, de se an'n Hals hebbt. Dat is us egaal; se schullen ehrn Düvel Krieg behollen un us vör den Beelzebub Islamismus wohren! För us is dat beter. Dat tellt. Töövt wi eentlich jümmers, bet dat to laat is? | |
|
"Nix los in't Kiekschapp — hest bloots de Wahl twüschen Football un Schiet. Un mennigmaal is de Football ok noch Schiet!" So schafutert min Ole Daam, en Footballkennersch vun Geblüt. Un amenn kiekt se sik doch de ganzen Footballspelen an! Anners min Leevsten: "Man müsste das Spiel umdrehen", seggt he. (He is'n Hoochdüütschen.) "Zuerst kommt das Elfmeterschießen, und wenn es danach noch unentschieden steht, wird zweimal 15 Minuten gespielt, und wenn es dann noch unentschieden steht, kommt das 90-Minuten-Spiel." Un bi Gruppenspele, de nich in't K.o.-System utspeelt warrn mööt? "Da gibt's eben nur das Elfmeterschießen." Is denn nüms mehr en echten Footballfan, bloots ik?! Doch! Dor seh ik doch in Hamborg en Rollifohrer, de sin Elektro-Rullstohl mit twee Düütschlandfahnen dekoreert hett. Un denn: Vullgas! So suust un fladdert he langs de Hauptverkehrsstraat. Dat is de rechte Geist. Den wünscht wi uns Mannschap. Ok vunavend gegen Polen! | |
|
11.6.06 ...Sülvstmoord is Krieg Wat uns schaadt, is Krieg gegen uns, nich? Eendoont, wat wi sülven an schuld sünd orr nich. So denkt de Lagerkommandant vun Guantànamo, en Herr Harris. He hett seggt, de Sülvstmoord vun dree Gefangene verleden Week, dat weer keen Akt vun Vertwieveln, nee, sünnern vun Krieg. Dat mutt een sik wedder mal op de Tung tergahn laten. Ik entföhr di un quääl di so lang, bet du di nix mehr wünschst as den Dood. Man dat du di nich ümbringst, dor pass ik för op! Denn schaffst du dat avers doch. Nu kiekt de Lü mi scheep an — "De hett een in'n Dood dreven!" Dat gefallt mi nich, un dorüm weer dat vun di ganz fies, di ümtobringen — Krieg gegen mi weer dat, jawull! Du harrst wieder smachten schullt. Du Egoist, denkst bloots an di! Wa stah ik denn nu vör de Lü dor?! As'n Mörder... du Mörder, du! Ja, min goden Roop hest du moordt mit din Sülvstmoord! Dorför much ik di ümbringen. Man beruhigt Se sik, Herr Harris.
De Saak hett ok ehr Godes. Eerstens: Wenn wi de Sülvstmöörders
as Fieslinge henstellt, de bloots dat Ansehn vun de USA schaden wullt, denn brukt
se uns foorts nich mehr leed doon. Se hebbt dat allens verdeent, wat ehr passeert
is! Un se weern ja nich vertwievelt, nee — nüms in Guantànamo
is vertwievelt, ach wat! | |
|
30.5.06 ...Wannerungen dör de Mark Brandenburg... ...vun Theodor Fontane — äh,
nee, vun Günter Beckstein un Wolfgang Schäuble. Günter Beckstein
un Wolfgang Schäuble hebbt nämli beslaten, hööchstpersöönlich
to bewiesen, dat dat in Düütschland keen so nöömte
"No-go-Areas" för farbige Lü gifft. Dat jedereen överall
hengahn kann. Tominnst eenmaal. Dorüm maakt se nu to Pingsten en Wannerung
dör de Mark — inkognito, ahn Sekerheitsbeamten un Bodyguards, un verkleedt
as "Migranten" (dat heet op Latiensch nämli "Wannerer").
Schäuble warrt sik Gesicht un Hannen swatt anmalen un solo in sin Rolli dör
de Grenzrebetten na Polen rulln. Beckstein wull eentlich as Muslim losgahn, so
mit Slabbertüüchs un Turban, as in't Märkenbook orr bi Karl May;
dat hett he sik al jümmers mal wünscht. Avers ik heff em de Menen seggt.
Dat ganze Gejammer, heff ik seggt, vunwegen nachtens in de U-Bahn-Staschoon angrepen
warrn un sik nich mehr frie in de Straten bewegen könen, heff ik seggt, dat
kann ik nich mehr höörn. Mannslüüd, heff ik seggt, sünd
doch sünnerliche Waschlappen. Fruuns hebbt dat alltieds uttostahn un jammert
nich! Do wull Beckstein sik nich lumpen laten. He verkleedt sik nu as swatte Fru
(sik as Fru optotakeln, dat hett he sik ok al jümmers mal wünscht Wokeen een vun de twee sehn deit — also en swatte Fru orr en swatten Rollifohrer —, de dröff ehr mal kort op de Schuller kloppen, avers mehr nich. Sünd Helden, de twee. Se doot dat för Düütschland, för Düütschland sin godes Ansehn. Un wenn se nich trüchkaamt un op Nimmerweddersehn verschütt gaht, sett wi ehr en Denkmaal merrn in de wiede märkische Heid: En swatte Fru un en swatten Rollifohrer, un "Se weern Düütschland — Du ok?" steiht denn dorünner. Un nüms weet de Anter... it's blowing in the Wind. | |
|
Ut Raps maakt wi Diesel, ut Weten Ethanol, ut allens Möögliche Biogas. Mit allns drievt wi Autos an. "En Schann!" röppt min Moder. "Dat Brot, dat op'n Acker wasst, verfüert wi!" Dröfft wi dat? Wieldess anner Minschen hungert? Fröher wuss op'n Acker dat Eten. Man hungern doot wi in Europa al lang nich mehr. Dor sünd wi över weg, wi hebbt ja veel to veel to'n Eten, wi mööt wegsmieten. De Mobilität is nu uns gröttst Vergnögen. Fohren un flegen, alltieds. Mobilität heet betherto: Eerdööl. Dat weer de Kraftstoff to'n Bewegen. Un Eerdööl kann ja nu würklich nüms eten, dat kannst mit ruhigen Geweten verfüern, nich? Dor nimmst nüms dat Brot weg. Man mit dat Eerdööl is dat so'n Saak. Eerstens geiht dat toenn, un tweetens sitt de falschen Lü op den Rest. Schiet. Man wi hebbt ja noch uns Äcker. Buut wi "Energiegetreide" an! Verfüert wi dat! Hebbt uns Vörfohren nich jüst datsülvige daan, wenn se Haber an de Peer verfodert hebbt? Dat weer ehr Kraftstoff för Mobilität. Ja, man wenn de Peer dat freet, is dat doch Nohren. Dat kümmt sin wohre Bestimmung to. Un Mobilität weer dormalen ganz wat anners as vundaag. Verswennen un Wekenenn-Trips na Mallorca geev dat nich. Ik weet nich, wa Se dat geiht; min egen Hemmungen, ut Koorn Drievstoff to maken, sitt deep. Dat hett nich so veel mit de Minschen to doon, de vundaag hungert; an de denk ik dorbi weniger (min Schann?); nee, ik denk an de Tieden, as dat ok bi us Hunger geev, un ik denk an dat Märken vun'n Fischer un sin Fru, 'neem de, de jümmer mehr un mehr wull, amenn wedder in Povertee sitt. Kann düsse Mootwill, den wi vundaag drievt, mal bestraaft warrn? Warrt us dat mal leed doon üm dat Koorn, dat wi nich eet, sünnern verswendt? — Üm dat Ööl deit us dat al leed... Föhlt wi dor en Anstandsgrenze? Wüllt wi düt Geföhl nich Gewalt andoon, denn mööt wi uns Anspröök an Mobilität un Energieversorgung verännern, rünnersetten. Min Moder wöör dat wiss doon. Ehr is dat to arg, dat gode Eten to vergeuden — Kriegsgeneraschoon... Un ik? Laat ik mi korrumpeern? Ik denk noch na... | |
|
De "Riekenstüer" brukt wi doch nich. De bringt doch nix. 'keen över 250.000 € per Johr verdeent, schall 3% extra afdrücken. Avers nich Gewarvinkamen, un nich Frieberoplers. Bloots de Gehälter un Tinsinkamen, de dat nich schafft, sik rünnertoreknen. Bringt bloots poor Millionen. De Verwaltungsopwand is veel to hooch! Lohnt nich. Laat ehr doch lopen. Liekso dat Gliekstellungsgesetz. Min Gott, schallt wi villicht för de poor Behinnerten överall Rampen un Optöög buun, dat se sik gliekstellt föhlt?! Wat dat kost! De Weerschap...! Dat lohnt doch nich för de poor Lü. Laat ehr doch buten sitten in ehr Rullstöhl. Un lohnt dat, 95-jährige Naziverbrekers noch vör Gericht to bringen? Se köönt ja doch nüms mehr ümbringen. Un wat solk Prozesse jümmers kost! Lohnt nich. Laat ehr doch lopen. Lohnt Gerechtigkeit? Lohnt Solidarität? Ach wat. Dor kümmt doch nix bi rut. Nich Mark un Penn, nich Euro un Cent. Dat köönt wi us nich länger leisten. Ahn düssen Ballast fohrt wi — wetten? — veel beter: na de Höll. | |
| 30.4.06 ...Finanzielle Sterilisation Dat niege "Öllerngeld", dat höört sik ja gor nich so slecht an. De Lü schallt dorvun mehr Kinner kriegen. "Geld köfft keen Autos", dat weet wi al, man Geld kriggt villicht Kinner — orr maakt welk. Dor kann wat an ween. Man een Saak muttst di op de Tung tergahn laten: Dat Öllerngeld — so warrt plaant — schall op dat Hartz-IV-Inkamen anrekent warrn. D.h. kriggt arbeitslose Öllern Öllerngeld, denn warrt ehr dat vun Hartz IV wedder aftrocken. Vun Hartz IV! Op de Tung tergahn laten! Nich vun de hogen Inkamen, nee: vun de ringen warrt dat wedder aftrocken. Vun de hogen Inkamen warrt nienich nix aftrocken; is al een mal op de Idee kamen, de Nevenjobs vun de Parlamentarier op ehr Diäten antoreken?! Nee. Avers Öllerngeld op Hartz IV. Vun de Minschen, de dat an'n Nödigsten bruukt. Dat seggt nu klipp un klaar: Arbeitslose, wi wüllt juun Kinner nich! Wi wüllt de annern Kinner, de vun de "Leistungsdregers", man nich juun! Ji schullt man lever utstarven. — Dat wedder seggt us wat anners: Arbeitslosigkeit warrt nich mehr as momentane, verännerbore Laag vun en Minschen ansehn, sünnern as duerhaftes Stigma: Wokeen arbeitslos is, blifft dat, un sin Kinner ok; Arbeitslose stiggt af un bildt en niege Ünnerschicht, de sik fastsett. Klaar — dorför sorgt Hartz IV. Arbeitslosigkeit, Unbillung, Chancenlosigkeit warrt arvlich, meist as en Gendefekt. De letzten Chancen warrt de niege Ünnerschicht wegnahmen. Un vermehren schallt se sik nich ok noch! Un dorüm kriggt se keen Geld för Öllernschap. De Nazis weern dor ja ehrlicher. Se hebbt "levensunwertes Leven" glieks physisch steriliseert. | |
| "Liquidatoren" hebbt se de Minschen nöömt, de vör 20 Johr as eerste op dat brennen Reaktorwrack vun Tschernobyl klabastert sünd. "Liquidatoren", dat heet wöörtlich Verflüssiger, Oplöser, in'n överdragen Sinn Vernichter. Ja, oplösen schall sik dat, 'neem wi versagt hebbt — opleevst in Wohlgefalln, as weer nienich wat west. Wat dorbi oplööst un tonicht maakt woor, dat is tomehrst ok Sundheit un Leven vun düsse tappern "Liquidatoren" west. Dusende sünd dood. Avers se hebbt de Katastrophe in Grenzen hollen. In Grenzen? Ja, denn weern se nich west, weer de ganze Reaktor bet op'n Grund utbrennt, denn harr 10 Maal so veel strahlen Tüüchs in de Wulken opstiegen un Europa todecken kunnt. De "Liquidatoren" sünd also so en Aart internaschonale Helden. Se hebbt ok uns reddt. Ehr Andenken schall sik nich "oplösen" in nix! 10 Maal so veel? Dusende dood? Nix is verbürgt, nix weetst nau. Bloots de Johrstall: 20 Johr. Un na 20 Johr treckt een "Bilanz". Taxeert de Dodentall. Welk seggt, 500.000 weern an Schäden un Folgschäden to Dood kamen, anner seggt, nee, bloots 50.000, un noch anner, nee, eentlich weern bloots 50 Lü bi de Saak doodbleven — nich veel mehr as bi'n Busunfall. Dat schall denn de "Bilanz" ween. Wat schall dat? De Reaktor brennt noch ünner sin Betonsarg. Nüms weet, wa lang. Nüms weet, wat kümmt. Alle Daag starvt in Wittrussland un de Ukraine Minschen an Strahlenschäden, un Kinner mit schreckliche Missbillungen kaamt to Welt. Wokeen waagt dor, vun "Bilanz" to snacken? Un wat maakt dat, wa veel Nullen jichenseen Dodentall wiest? Is an den Holocaust de Tall dat Schreckliche? Un wat is mit de annern Kreatuurn, de verstahlten Deerten un Planten, de sik mit slimme Gendefekte dör ehr Leven sleppt? Se weet nich, worüm. Man se liedt. "Liquidatoren", "Liquidieren", so seggt wi, uns vörtomaken, wi wöörn wat beherrschen, wi harrn wat in de Hand. In de Hand hebbt wi nix, nich mal en "Bilanz". Man de Wunsch, to beherrschen, is unbeherrschbar. He is dat, de Monster vörtüüg bringt — ok dat Wrack vun Tschernobyl. Dat sik nich "liquidieren", nich oplösen lett. | |
| Öllere
Notizen: Hier klicken |
De
Fahnenmakers frohlockt: de Prophet woor mal wedder beleidigt! Dütmaal vun'n
Papst. Geelwitte Vatikan-Fahnen warrt mit Hoochdruck för't Verbrennen trechtmaakt;
bloots dat vigeliensche Wappen maakt Malesch, avers egal — wat brennt, dat
brennt. Güng dat na de Fahnenmakers, kunn de Prophet jeden Dag beleidigt
warrn!
)
un wannert nachtens alleen dör de Mark. Gifft keen No-go-Areas!