Öllere Daagbook-Notizen vun Marlou

7.5.05 ..."Stunn Null"

Wi leevt ja in de Epoche vun den "Klick"; allens, wat geiht, geiht lichthannig mit en Klick. Befreen geiht so nich; de "Stunn Null" vör 60 Johr weer ja gor nich so en Stunn, 'neem allens "klick!" nieg anfüng. Sowat gifft't nich; de Vergangenheit lett sik nich wegklicken, de is taag. Man en Befreen gifft dat; nich vun de Vergangenheit, man vun ehr Last, vun de Schadden, de se op dat Tosamenleven mit anner Minschen, Völker smitt. Dat is Düütschland lückt. Veel gode Will vun alle Sieden höört dorto; un Tied. En "Klick!" lett sogoor gewaltsam gegen so en sachten Prozess; man alle wohraftigen Saken sünd langsaam. In Johren un Johrteinde hebbt uns Grootöllern, uns Öllern, uns hüüdige Generaschoon un uns Nahvervölker mit all ehr Generaschoonen an düsse Befreen arbeit; un dat is lückt. Düütschland leevt nu mit sin Vergangenheit, avers as en Volk ünner Frünnen, un frie; frie ok vun ideoloogsche Dämonie, is to höpen. Dat is en groot Glück; ja, wi sünd en glückliches Land. Wi hebbt en Krieg verlaren un den Freden wunnen. Nich överall klappt dat. Opstunns hagelt dat Afsagen to de Kriegsenn-Fiern in Moskau; stückerwat Staatslü ut den "Ring of Fire" üm Russland rüm wüllt nich kamen. Se töövt op en Entschülligung för de sowjetische Besatzungstied, de Ünnerdrückung ünner den iesern Vörhang. De iesern Vörhang is fulln, man apensichtlich weer ok dat keen "Stunn Null" — dat geschichtliche Tellwark steiht nich bi null; dor sünd Tallen op, en wiet apene Reken, tominnst in dat Geföhl vun mennig Minschen. Echte Befreen mutt kamen, ok in düsse Weltregioon; dat gifft keen annern Weg as Snacken un Entschülligen un Versöhnung, Befreen nich vun de Geschichte, man vun ehr Last. Un woso schulln's dat nich versöken? Is Düütschland nich en opmünnern Bispill? Muchen doch överall ut verhasste Fienden willkamene Frünnen warrn! Gifft noog Fiendschap op de Welt, noog to doon. — Arroganz? "An't düütsche Wesen schall de Welt genesen?" Na, wenn se an genesen kann, wokeen wull ehr dat missgönnen?! Uns Nakriegsgeschicht is en Erfolgsstory — ganz sünner Arroganz.
Kann uns Schrödi morgen in Moskau sin leeven Fründ Putin, den "lupenreinen Demokraten", nich mal beten vun vertelln, wat Versöhnung doon kann? Denn sünd se ok amenn nich alleen, Schröder un Putin, sünnern anner Völker kaamt ok, de Versöhnung an sik to fiern. Wat för en schöne Vörstelln weer doch en vun Hass friee Welt!

30.4.05 ...Plagen-Paraad to'n 1. Mai

Düütschland is en plaagtes Land. "Münte", de Erfinner vun de Kapitalismus-Kritik un de Heuschrecken-Plaag, hett nu Botter bi de Fisch daan un en Liste vun de leegsten Heupierd rutbröcht — also vun de leegsten Afkaak-Ünnernehmen. Dat kann Guido vun de FDP (ja, de siet Johren anduernde Guido-Plaag) nich op sik sitten laten, he mutt mit Nadruck op de slimme Gewerkschaps-Plaag henwiesen. Un dat Gliekmakerie dat Leegste is. Riek un Arm mutt dat jümmers geven. — Vun wat reed de eentlich?!

De Minschen in uns Land wüllt doch keen Gliekmakerie! Himmel, kiek di doch mal üm, Guido! Wi sünd en Volk vun Lottospelers! Lotto, dat is de grote Ümverteilung vun nerrn na baven: Jeder gifft 1 Euro, een Minsch kasseert denn 1 Millioon. Un alle finnt dat goot! Jedereen günnt sin Naver dat. Nee, Soziaalneid süht anners ut. Wi sünd nich niedsch. De "lütten Lü" an't allerminnste. Se sitt in ehrn Schrebergoorn, den Lottoschien in'e Tasch, leest in de Klatschpresse vun de "armen Rieken" un sünd ganz tofreden. Nüms wöör de "armen Rieken" ehr Geld missgünnen, so wenig as Schumi sin Millioonen. Op Arm un Riek kümmt dat nich an; de Lü wüllt wat anners: gerechte Chancen un anstännige Behannlung.

Se wüllt de gerechte Chance för jedereen, dör ehrliche Arbeit ok an den Wohlstand Andeel to hebben. Gerecht, as de Chancen bi't Lotto sünd: jedereen kann't schaffen, nüms is utslaten. — Wokeen nu mit 40, 45 Johrn sin Arbeit verleert, kann de noch jemalen wedder den Kopp hoochkriegen? Hett se orr he noch Höpen? Un de jungen Minschen, de nix Rechtes lehrt? To dösig? Sülven schuld? Dat ännert nix! En Schulligen to hebben lööst keen Problem. De Minsch brukt Höpen. Höpen is en Levensmiddel un en Minschenrecht! — Fazit: Riek un Arm is nich leeg; man wenn Riek un Arm, Baven un Nerrn in de Sellschap zementeert un fastschreven warrt un de Chancen, dör ehrliche Düchtigkeit sülven wat to warrn, afschafft warrt, denn is de Sellschap binnerlich dood un mutt nieg opbuut warrn.

Liekso kümmt dat ok op an, woans een de Minschen behannelt. Wenn een ehr föhlen lett, dat se in de Sellschap gor nix mehr gellt un bloots noch en Gnadenbroot freet, denn kümmt de Minsch in Woot; denn de Minsch hett en natüürliches Geföhl för sin egen Wöörd. Leider nich jümmers för de Wöörd vun'n Mitminschen! Ik kann dat meist nich faten, wa instinktloos en Herr Esser ween kann, 200.000 (tweehunnertdusend!) Euro "Schmerzensgeld" vun'n Staat (also vun Stüergeller!) to feddern, wieldat se em in'n Mannesmann-Prozess belangt harrn (neem he friespraken woor). Un 10.000 Euro kriggt he nu ok — vun min Stüergeld! Vun annere wüllt wi man gor nich reden. Villicht weet düsse Lü ok, wat se dor anricht't; villicht denkt se bloots, se kunnen sik dat leisten, dat Recht vun anner Minschen to ignoreern. Dat is driest un zynisch. Un dat kann bloots ween, wieldat ehr Riekdoom al würklich zementeert is: Se sülven köönt nich mehr afstörten. Dor sitt de Fehler in't System: De Gliekwertigkeit vun alle Minschen is perdü, wenn welk de annern so seker as en Nix behanneln köönt.

Wenn Chancen un Wöörd gerecht verdeelt sünd, denn sünd de "lütten Lü" — also wi — de nobelsten un groottöögschsten vun'e Welt, missgünnt nüms wat un laat sik de Arbeit nich verdreten. Ik bün vull Höpen, dat dat gau vun alle kapeert warrt. Amenn maakt ja jümmers noch Minschen uns Sellschap un nich de lütten runden Geldstücken; Minschen snackt, Minschen plaant, Minschen kööpt in un Minschen kriggt Kinner — nich de lütten runden Euros. En Plaag is düsse Sellschaps-Süük schon, man nich de Weltünnergang. De Weltünnergang weer ganz wat anners: Hansa Rostock dröff nich afstiegen!

25.4.05 ...1 cm wieder denken!

Nu heff ik mi gistern dochen mal de "Christiansen"-Talkshow andaan. Dor güng dat mal wedder üm allens: Wat de Kapitalismus-"Kritik", de SPD-Münte opletzt erfunnen hett, de Welt redden kann, Münte weer dor, Rüttgers ut NRW weer dor, de Wahlkampf weer dor, un en Bischop harrn se ok noch dorbi, mit den Papst harr't ok wat to doon — also wedder mal Tied un Ewigkeit vun'n Kopp op de Fööt stelln. För Sabine Christiansen en Klacks.

Un denn snacken alle wedder taagnackig an de kloren Slussfolgerungen vörbi, de groot un breed vör ehr stunnen. Münte sä, dat kann nich angahn, dat de Düütsche Bank hoge Gewinne maakt un dochen Lü rutsmieten deit, dat mööt wi stoppen! Jahaa, full Rüttgers in, man wenn wi dat stoppt, denn warrt de Düütsche Bank foorts vun en anner Grootbank opköfft, de noch slimmer sünd, un denn hebbt wi gor keen Düütsche Bank mehr! — Dor stunn de Erkenntnis direkt vör ehr, bloots 1 cm wiet weg — un in solk Oogenblick stellt Sabine Christiansen mit sanfte Stimm en totaal afwegige Fraag an ganz wen anners un stüürt so ehre Talkshow-Titanic sekerhannig an den Erkenntnis-Iesbarg vörbi. — Man de Erkenntnis stunn dor, un alle Tokiekers hebbt ehr sehn; un dorüm wüllt wi ehr hier bi Plattpartu tominnst de Ehr geven. De eenfache, logische Erkenntnis is düt:

De Düütsche Bank mutt sik unminschlich benehmen, orr se warrt opfreten. Dat Weltweerschapssysteem dwingt ehr dorto. En Weltweerschapssysteem, dat to Unminschlichkeit dwingt, höört as Ganzes afschafft. Danke, Herr Rüttgers, dat Se mit ehr Argument bewiest hebbt, dat de ganze Kapitalismus nix döögt. — Wi mööt also över nadenken, woans wi de ganze Weltweerschap op anner Fööt stellt. Dat mutt globaal passeern, denn de Globaliseern kriggt wi nich mehr rut. De Kommunismus is nich de Lösung, dat woor ja al utprobeert. De Kapitalismus is't ok nich, dat hebbt wi nu Swatt op Witt. Maakt nix, wi kriggt dat hen. Wi köönt na'n Mars flegen, denn warrt wi ja woll ok sowat henkriegen?! Wi mööt bloots losleggen, alle tosamen.

Man nee, wi hebbt ja anners to doon: Vundaag is Joschka-Visa-TV. (Eentlich heet he ja Joseph Fischer — Joseph, as Papst Ratzinger.) Den ganzen Dag vör de Kamera! Schröder hett dat good, de kann achterna sin Fru fragen: "Wie war ich, Doris?" Bi Joseph Fischer warrt dat prekäär, denn he mutt sik jümmers niege Naams merken: "Wie war ich, äääh — wie heißt du noch gleich?" Wat för'n Anter warrt he denn wull kriegen?

21.4.05 ...Allens verkehrt!

Wat is bloots los in de Welt?! Nüms is an sin rechte Steed, nüms deit, wat he schall. Ratze, de griese Eminenz, de in'n Achtergrunn höört un dor de Strippen trecken schall, kümmt miteens ut de Kulisse un warrt sülven Papst; de rood-gröne (!) Bunnesregeern drievt de Rüstung hooch un buut den Datenschuul af; un de niege Wehrbeopdragte is en Wehrdienstverweigerer. Wat is dat för verdreihten Kraam?! Wat kümmt neegst? Warrt Bush nu en Hippie? — De hillige Geist müss dor mal twüschenfohrn un för Ordnung sorgen. Avers de is ok nich an sin Platz; is sachs in en ingelsches Wettbüro versackt. (Alkohol in'n Deenst! Dat gifft Arger!) He hett sik totaal verutgaavt bi Charles un Camilla, dat he dor mal endlich allens in de rechte Ordnung bröcht hett — de eenzige Lichtblick. Na, un ik natüürlich. Ik bün an min Steed, vör'n PC, un pleeg de Plattpartu-Siet. Schullen sik man alle en Bispill an nehmen. Orrer schull ik etwa jüst nu ganz woanners ween? Etwa in de Köök? — Himmel, brennt dat Gulasch an?

10.4.05 ...Papst virtuell

Verstaht Se dat mit den Papst-Wahn? Woso de Millioonen Lü partu na Rom fohrn müssen, üm dat Gräffnis dor op'e Lienwand orr in't Kiekschapp orr op'n Bahnhoff orr ok gor nich to "beleven"? Meddewiel denk ik, dat is allens en Medien-Gewees. Wöör mi nich wunnern, wenn dat inszeneert weer. Wenn de opbohrte Papst-Liek in Wohrheit en Hologramm weer, gor nich reaal. In uns virtuelle Welt is doch meist nix mehr reaal; man nix verköfft sik so good as dat Echte. Jüst düsse Aura vun Echtheit, vun't Authentische, weer ja dat Besünnere an Johann Paul II. Sülven echt ween? Hmm, is to anstrengend. Man henfohrn, 'neem wat Echtes stattfinnt orr begraven warrt, un denn trüchkamen mit'n T-Shirt "Ich war dabei" — borgte Echtheit, en beten Afglanz vun Wirklichkeit, ja, dat is uns Welt. Dorbi langt de Massenhysterie sülven as Ereignis ok ut; dat kriggt en Egendynamik, un woneem een Millioon Lü al tohoopstaht, kümmt de twete Millioon licht dorto. "Ich war dabei". Bi wat? Bi de Menge.

Wat wi as grote Menge anseht, warrt dorbi ok bestimmt vun de Antall vun Kameras un Live-Sendungen un Mega-Groot-Lienwänn. Dat Papst-Gräffnis mit 4 Millioonen Lü weer nämli gor nich dat weltgröttste Gräffnis; dat weltgröttste Gräffnis harr 1970 Gamal Abdel Nasser mit 8 Millioonen Lü in Kairo. Dat Papst-Gräffnis weer ok nich dat tweetgröttste; dat weer Ayatollah Chomeini sin Gräffnis 1989 mit 5 Millioonen "Truurgäst". Avers dat is för us nich "wohr"; liekso as de kaputten Hoochhüüs vun New York för uns en gröttere Katastrooph sünd as de Völkermorde vun Ruanda un Kongo, liekso as de "Titanic" de gröttere Schippsünnergang weer as de "Wilhelm Gustloff" — 20 Kinofilme grötter! Sogoor de Würklichkeit, de wi us stückenwies utborgt, is in uns Medienwelt en Fälschung.

Wat schallt se nu maken in't Konklave? Ik meen, de neegste Papst warrt würklich en Hologramm. Se mööt en Papst-Charakter digitaal designen, beten Woityla, beten Südamerika, villicht en lütten Schuss swatte Huutfarv — un dat Gesicht vun, na, wo heet düsse Schauspeler ut de "Dornenvagels"? Dat Ganze warrt denn holografisch in de Gegend projizeert. Dat hett vele Vördeel: De Papst kann togliek an stückerwat ünnerscheedlich Steden ween, t.B. op Butenlandsreis in ünnerscheedlich Länner und in Rom; Moordanslääg sünd sinnloos; de Papst blifft nienich dood un brukt ok keen Dokters mehr, un dat Hologramm kann den Oostersegen in noch mehr Spraken snacken, ok in Klingonisch. Kardinal Ratzinger programmeert de Reden un Enzykliken för em, dat deit he ja sowiso. De Kosten sünd ok man minn. Den virtuellen Papst kann sik jedereen utborgen — "Ich war dabei"! Unfehlbarkeit? Wokeen is woll unfehlbarer as Kardinal Ratzinger un de moderne Digitaaltechnik?!

Ach ja, he schall ja de Stellvertreder vun Gott op'e Eer ween. Na, denn mutt Gott sachs mal ahn en Stellvertreder utkamen. Orr — wi mööt alltohoop sülven Gott op de Eer stellvertreden. Echt ween. Authentisch. Nix utborgen, wat geven. Nich bloots dorbi ween, sünnern dat sülven ween. Den Blick vun de Lienwänn nehmen hen op de reale Welt. Dat maakt ruhig un stark, as Johann Paul II. weer. Denn mööt wi ok nich mehr na Rom jachtern. Denn is dat würkliche Leven nu un hier.

3.4.05 ...Papst total

Nee, keen Naroop! Allens is seggt. Mehr as allens. Nu de Papst sin letzte grote Butenlandsreis antreden hett, gifft dat doch in alle Medien Papst total. Weer as bi'n Tsunami: Musik woor afstellt, kollektive Truur. Kuba (!) hett Staatstruur utropen, un bald warrt he wiss hillig spraken (de Papst, nich Fidel Castro). Dat seggt us veel över en Lengen ünner us Minschen na dat Annere in uns materialistische Welt. Keen gewöhnliche Minsch wöör dat schaffen, noch in'n Dood düt Lengen so to bünneln un de halve Welt so in en Geföhl to sammeln! Dat schafft en ganz besünnere Persöönlichkeit as Johann Paul II., en Tsunami vun Minsch — un de Medien.

Sünnerlich dat Kiekschapp sleit mi op'n Maag. Wiss, se ermööglicht alle Lü, dat direkt mit to beleven, ok mit to föhlen; man dat Starven sülvst warrt to en sinnfreie mediale Duurveranstaltung, as tovöör bi Terri Schiavo in de USA. Dor denkst, de Fernsehteams staht mit de Stoppuhr in een Hand un de anner an'n Puls vun'n starven Minschen dorblangen un summt "Lebt denn der alte Holzmichel noch...?" — Wat schall us dat, de naue Sekunn to weten, wenn de ole Herr orr de junge Fru ehr letzte Puust utatent? Wat schall us dat, wenn de Reporters de Lü op Plätze un in Karken fraagt "Was fühlen Sie jetzt?" Is dat nich sinnlos un schaneerlich? In't Middelöller hebbt se dat mennigmaal eerst na Jahren mitkregen, wenn wedder en Papst orr en Kaiser doodbleven weer... dat lett binah diskreter as vundaag.

Man Diskreschoon is keen Vokabel för't Kiekschapp; de kennt bloots Knaller orr Flops. De Papst — düsse Papst — is apensichtlich en Knaller. Is to'n kathoolsch warrn! Wat kümmt nu? Nu mutt ja de niege Papst bestimmt warrn. Dat ZDF warrt natüürlich en Sendung "Unsere Besten" maken, 'neem de Tokiekers den besten Papst wählen köönt. De Privaatsenders gaht forscher ran un maakt "Deutschland sucht den Super-Papst", mit Kandidatenvörstelln, -vörsingen un -vörpredigen, Heiligenraten un Kledaasch-Proov. Mit Internet-Voting. Un dat Ganze weltwiet; de Gewinner vun Düütschland mutt sik denn eerst in'n European Pope Contest dörsetten, denn in de Welt-Utscheidung. Germany 12 Points! So wöörn se opleevst allens terfleddern.

In'n Protestantismus dorgegen is rein gornix los. Keen Naam, keen Gesicht, dat to'n Idol warrt, överhöht orr terfleddert warrt. Nix verdeckt de Bott vun't Krüüz, dat Gesicht, dat dor hangt, dat Annere in uns Welt. Keen Mediengesicht... Is't en Knaller? orr en Flop?

31.3.05 ...Mutt Knofi gahn?

Dat weer man fataal, meen ik, wenn uns Knofi — pardon: Kofi Annan, de UN-Generalsektretäär, nu dat Handdook smieten schull. Wiss, he hett wat an'n Hals mit sin verzogenen Bengel, de an dat iraaksche Ööl-för-Nohrnkraam-Programm profiteert hett. Dorför hebbt se em gewaltig tribeleert, oh, wat hebbt se dat ünnersöcht! En unabhängige Kommischoon nämli. Ja, dat müss ween. Knofi harr man ehrder sin Balg beten trechtstuken schullt — Vadderplichten. Man egaal, denn wat passeert, wenn he nu geiht? Denn mööt wi en niegen hebben, un de USA warrt sik een utfinnen. Kiekt Se sik mal an, wat de so opletzt för Personaalentscheidungen drapen hebbt: John Bolton as US-Bottschaper bi de UN — oha; Paul Wolfowitz as niege Weltbankpräsident — ohauaha; un nu de UN-Generaalsekretäär? Wokeen kunn dat woll warrn? Gifft't noch en gröttern Iesenfreter as Wolfowitz? Arnie Schwarzenegger is al vergeven; Rambo is bloots en Filmfiguur, King Kong ok. Hööchstens Rumsfeld; ja, dat wöörn se maken: Se wöörn endlich Rumsfeld entsorgen, he kriggt Knofi sin Posten. Ohauahauaha! Condi Rice wuppt denn ok dat Kriegsministerium noch mal even blangenbi. Un alle düsse Lü hebbt Saken an'n Hals, de för hunnert unabhängige Kommischoonen langen wöörn, man de nüms nienich ünnersöcht hett. — Nee, Knofi, smiet nich dat Handdook. Ik warr ok nich mehr Knofi seggen — Herr Kofi Annan. Wi hebbt em ja doch geern.

21.3.05 ...Verhungern laten verbaden!

Nu hebbt wi dat Swatt op Witt: Dat is gesetzlich verbaden, en Minschen verdösten un verhungern to laten! De US-Kongress hett dat vunnacht beslaten — mit Hoochdruck, denn dat geiht üm dat Leven vun en Fru, de in't Koma liggt un künstlich fodert warrn mutt. Se kann/dröff/mutt nu wiederleven, wieldat dat Verhungernlaten verbaden is! Tominnst al mal in Amerika. — Wat sik wohl wat ännert?

20.3.05 ...Achterrücks, sünner Gesicht

Allens, wat en Gesicht hett, kannst di licht merken. In de verleden Week weern dor de Gesichter vun Heide Simonis (verbaast), P.H.Carstensen (vergnöögt) un t.B. ok dat Gesicht vun Paul Wolfowitz, de nu Weltbankpräsident warrn schall (!!). Gesichter fallt op, dat is natüürlich; avers wichtiger is faken, wat keen Gesicht hett — un prekäär is dat, wenn dat denn nich mal opfallt. Ok düsse Week gifft't wichtige un heel vertrackte Entwicklungen un Entscheidungen, de sik achterrücks insliekt hebbt:

• Gröön Licht för de Agrar-Gentechnik: De Äcker, 'neem genmanipuleerte Planten op anbuut warrt, dröfft in Tokumst geheim blieven. De Öffentlichkeit dröff't nich weten. Renate Künast hett de Kraasch verlaren. Profiteern doot de groten Agrar-Konzerne (Monsanto, Bayer & Co.). Leeg: Dat kannst nich rückgängig maken. Sünd de verdreihten Gene eerstmaal ünnerwegens, blifft dat so.
• De EU-Weerschapsminister hebbt dat idiotische Software-Patentrecht bestätigt, dat — groff seggt — Patente op Ideen mööglich maakt. Schädlich is dat an'n mehrsten för den Middelstand un för lütte Software-Firmen. De letzt Höpen is nu, dat dat EU-Parlament dat trüchwiest.
• Noch idiotischer: De düütsche Binnenminister will in Tokumst de Daten vun alle Klöönkassen-, Handy-, SMS- un Email-Verbinnungen in de ganze EU johrenlang opbewohrn. De enormen Kosten dreegt de Börgers. Ok hier: Letzt Höpen, dat dat bi de EU nich dörkümmt. Höpen? Ja?

Tschüß Datenschuul? Hallo Genmanipulation? Hallo Privaategendom an Ideen? Woneem kaamt wi dor hen — woneem sünd wi al? Dat lett, as weern Staat un Grootkonzerne dorbi, sik de Börgers vun'n Lief to hollen, ehr to kunnerleern, alle Informaschoonen vun ehr to sammeln, man ehr sülven nix to verraden. Big Brother? Wi — de Gemeenschap vun de Börgers — sünd de Staat; un wi sünd de eenzige Souverän, den dat gifft. Uns Stüern sünd dat, de allens finanzeert; un de Kern vun uns Weerschap is uns Middelstand. De Grootindustrie gifft keen blanken Penn mehr för Opgaven, de de Allgemeinheit deent! Woso laat wi us dat gefalln? — De Souverän sünd wi; nich de Regeern un nich de Grootindustrie. Regeern, de denkt, se weern de Staat, de staht amenn ahn Börgers dor (süh DDR). Ünnernehmen, de Minschen as Kostenfaktor, Störfaktor un Fiend anseht, staht amenn ahn Kunden dor. Man wichtig is, dat wi henkiekt, ehrdat dat so wiet kümmt — ok wenn de Naricht keen Gesicht hett.

13.3.05 ...En Krokus för Helga Feddersen

Den eersten Krokus vun't Johr wüllt wi Helga Feddersen toeignen, en grote noorddüütsche Schauspelersch un Schrieversch. Morgen, an'n 14.3., weer se 75 Johr oolt woorn, man se is 1990 doodbleven an Kreevt.

De mehrsten Lü kennt Feddersen ja as "TV-Ulknudel", en Naam, de weder noorddüütsch noch in sik wohr is — en totalen Tüün-Naam.
Helga Feddersen weer en grote Charakterschauspelersch un togliek en noorddüütsches Oginaal — en Minsch, de noorddüütsche Wesensaart so in sik opnahmen hett, dat he dormit een weer. Nu gellt en "Oginaal" ja vundaag glieks as "komisch", un dat is man en trurige Saak. Alle Welt will echte, oginaale, authentische Minschen sehn; man togliek gaht se geern beten op Distanz to düsse Echtheit, lacht över, un schon gor nich will jichenseen sülven so en Oginaal ween. Nee, dat wüllt se alle nich; se wüllt sik narms fastleggen, se wüllt de glatte, urbane, "coole" Typ ween, de överall op de Welt gliek is — en globaliseerte Minsch, jüst so, as se uns Städer mit postmoderne Buwarken vun Stahl un Glas toplastert, de överall gliek utseht — glatt, urban, cool. Allens Typische, Oginaale is för düsse Minschen kurioos un beten lächerlich; cool büst bloots sünner Bindung, sünner Fastleggen, sünner Egenschapen.

Helga Feddersen weer nich so een; se hett sik fastleggt un ehr noorddüütsche Heimaat so in ehr egen Wesen opnahmen, dat se dat sülven wedder utstrahlen dä. Dor höört Kraasch to. Toeerst woor dat noch respekteert, un se kunn dormit noch eernsthaftige Rullen schauspelern; man achterna woor se in't Komik-Metier afdrängt (vundaag wöörn wi seggen "Comedy-Metier". Süüfz!). Se müss sik lächerlich maken. Man sogoor dat hett se mit Stil daan. Ehrt wi ehr as een, de versöökt hett, wat wi ok versöökt: in en globaliseerte Welt de bedrauhte regionale Kultur un Levenswies en Gesicht to geven — en echtes, oginaales, minschliches Gesicht.

6.3.05 ...Armoot is nich Verkamenheit!

In Hamborg verhungert en Kind, wieldess de arbeitslosen Öllern Dag för Dag in de Kneipe hangt. Unterschichtenproblem? — In Frankriek staht 66 Kinnerschänder vör Gericht, deelwies Analphabeten, de lüttste Kinner as'n Stück Fleesch verköfft hebbt. Bildungsferne Schichten? Is de Verlust vun elementarste Geföhle villicht en Bildungslücke? Warrt Öllernleev in de School lehrt? Hebbt wi nich jümmers dacht, de "bildungsfernen Schichten" fehlt mehr de Ratio, nich de Emoschoonen? Heet nich Monniers Roman sogaar "Liebe, Brot der Armen"?

Min Öllern sünd in arme Familien opwussen, man nich in düsse Verkamenheit; Armoot an Leev geev dat dor nich. Kunnst mit Anstand arm ween. De seelische Verkamenheit, de wi vundag överall finnt, kümmt nich vun Armoot alleen, un Armoot is ok keen Entschülligung dorför. Se is nich mit Geld to kureern. Ik denk, se kümmt dorvun, dat Geld würklich dat eenzige is, wat noch tellt. Dat gifft keen anner Telen in't Leven mehr. Also tellt ok nix anners. Düsse Verkamenheit finnt wi överall, nich bloots in de "Ünnerschichten". Minschliche Ruinen överall. Un wat mal Ruine is, warrt nienich wedder heel. — Is uns Tied würklich materieller, zynischer as fröher Tieden? Wat is dat in uns Tied, dat so veel Kultur, Tradischoonen, Tosamenhänge unwedderbringlich afbreken lett as de Wissower Klinken op Rügen? Sünd dat de Medien? Wa köönt wi düssen daltrecken Strudel gegenan gahn? — Ik weet't nich, ik söök in den Riekdom vun min Bökerschapp na en Anter; ik sett mi dal mit den wunnerbaarn Raabe sin "Hungerpastor". Nee, Armoot mutt nich Verkamenheit ween.