 |
|
Öllere Daagbook-Notizen vun Marlou |
|
Hach ja! De Hoge Wächtersch vun de düütsche Spraak un Sitte, de Bild-Zeitung, is to en heldenhaftige Reddungsakschoon för de düütsche Schriftspraak oplopen, tosamen mit'n Spegel un noch so'n poor. De olen Rechtschrievregeln schallt wedder gellen, wüllt se. Dorbi warrt doch "Sex" un "Gewalt", de eenzigen Wöör, de de Bild-Zeitung würklich bruken deit, jümmers noch gliek schreven! Un Kommaregeln bruukt se sowiso nich, ehr Sätze sünd ja maximal 3 Wöör lang. — Wokeen rett mal de ehrn Verstand? Gifft dat dor eentlich noch wat to redden? In't Schrift-Hoochdüütsch gifft dat ok nix to redden, denn
dat schrifft sowiso nüms korrekt. Wüllt wi so vele Regeln
afschaffen, bet dat Kauderwelsch, wat de Pennäler un Bläder
vundaag aflevert, as "korrekt" gellen kann? So veel Regeln
gifft dat gor nich, as wi denn afschaffen mööt. Ik meen,
wi bruukt veel nödiger en Reform, de sik mit den Inholl
vun't Schrevene befaat. Dat mutt tominnst de ringsten Vernunftkriterien
genügen; de Regeln vun Logik un goden Smack. Na, ji Jungs vun
"Bild" un "Spegel"? Sünd ji jümmers
noch dorför? Orr fladdert juuch nu de Büx? ——
Un solang se sik mit de Rechtschrieven nich enig sünd, schrievt
wi alle op Platt. Dor gifft't keen starre Regeln, man verstahn kannst
liekers, wat din Mitminsch di seggen will. Sogoor de ut Westfalen!
|
|
3.8.04 ...Höpen is Minschenrecht Un as'n Kommentaar op min Kommentaar to "Flüchtlinge" keem dat Unweder in Bangladesh. Twee Drüttel vun't Land ünner Water, Millioonen ahn en Dack, ahn en Rieskoorn, ahn en drögen Fetzen op'n Lief — un ahn en Sekunn Tokumst, ahn en Funken Höpen in ehr Leven. Minschen, de tovöör sowiso nix harrn; ganze Familien, för de 1 Euro an'n Dag en riekes Inkamen weer, för dat se Dag un Nacht maracht hebbt. De düchtigen, schönen, flietigen Minschen — dor liggt se nu, in ehr ünnergahn Land, in ehr Heimaat, de bookstäävlich to'n Ünnergang verdammt is, un krepeert vör sik hen. Un opneegst kümmt de Monsun. Dat is ja keen Tofall, dat de Flootkatastrophen Bangladesh jümmer slimmer drepen doot. De gröttste Deel vun't Land liggt ünnern Meeresspegel — un de stiggt an! Bangladesh warrt wohraftig ünnergahn. Dat lett sik ok nich mehr afwennen; nich mal, wenn de ganze Welt nu dat Klima-Ruder rümrieten wöör. Dorför is't to laat. Dormit redd de Westen (denn wi sünd dat, de de ganze Energie verpulvert) man graad villicht sik sülven. För de povern Minschen dor, de in ehr ganzes Leven nich so veel Dreck maakt as en Huushund bi us, för de is't to laat. (Weet Se, dat för Foder vun Huusdeerten in entwickelte Länner mehr Geld utgeven warrt as weltwiet för Entwicklungshülp?) Nu kriggt se villicht wat to eten, avers se bruukt mehr. De Klimawannel versenkt ehr Heimaat; wi juckelt jümmers noch fröhlich mit Flegers in de Ferien; wat sünd wi düsse Minschen schüllig? De Minsch brukt to'n Leven mehr as Gegenwart, he (orr se) brukt Tokumst. Tokumst, dat heet: en Bild vun en Leven, in dat he orr se sik wedderfinnt, sik sülven un sin Minschenwöörd utdrücken kann. Un düt Bild dröff keen Utopie ween, dat mutt to verwirklichen ween — dör egen ehrliche Arbeit. Höpen! Dat Höpen, dat dat beter warrt — för sik sülven, för de Kinner — dat is dat däägliche Broot vun'n Minschen. Un en Minschenrecht! Dat sünd wi alle een den annern schüllig. Doran mööt wi mitdoon, dat uns Mitminschen höpen köönt. — Dat warrt mehr un mehr nödig warrn in tokamen Tieden. |
|
Dat Reddungsschipp "Cap Anamur" hett ja nu bannig Arger kregen, wieldat se 37 Flüchtlinge opgrepen harrn, de in't Middelmeer an't Versupen weern. Dat kannst ehr ja nur würklich nich övelnehmen. De 37 jungen Mannslüüd kemen nich ut dat Kriegsrebett in'n Sudan, as se vertellen, man ut Ghana un Nigeria. Eendont, versupen is versupen un redden is redden. Un nu geiht de Debatte los: Wokeen schall de Flüchtlinge opnehmen usw.? — Flüchtlinge? Sünd dat welk? Mit düt Woort sünd wi to liberaal, meen ik. Dat sünd apensichtlich Utwannerers. Achter Flüchtlinge is een Fiend her. Se flücht; faken üm ehr Leven. Flüchtlinge sünd de, de ut'n Darfur verdreven warrt. De Milljoonen Flüchtlinge hebbt dat nich verdeent, dat een ehr mit düsse jungen Glücksridder in een Pott smitt, för de ehr Familien spaart hebbt, dat se de Slepperbanden betahlen kunnen, de den Sohnemann na Europa bringt, dat he sik dor en Utkamen söken kann... Also sünd dat Armutsflüchtlinge? Dat kann een so seggen. Denn weern ok alle de Utwannerers, de in't 19. Johrhunnert (ut Düütschland, Irland, Italien, Polen, Armenien...) na Amerika güngen, eentlich Armutsflüchtlinge, nich? De Överseedampfers weern eentlich Flüchtlingsscheep? De Armutsflüchtlinge dormalen güngen avers mit Kind un Kegel, ganze Familien; se leten ok de Olen nich trüch. De mehrsten Armutsflüchtlinge vundaag sünd avers junge Mannslüüd twüschen 18 un 40 Johr. Komisch, nich? Sünd dat de Ärmsten? De Fruuns, Olen un Kinner, de se trüchlaat, geiht dat nich beter, man noch slechter. De flücht avers nich. Nee, düsse Jungs, dat sünd Utwannerers, Glücksridder, potenschielle Gastarbeiters, ok sachs düchtige Kierls — man laat Se uns dat Woort Flüchtling nich verslieten. Dat höört de, de en Doodfiend in'n Nack sitt — un för de höört uns Hart un uns Döör wied apen. |
|
10.7.04 ...Stimmt ja gor nich! Alarm! En groot Versehn is passeert. De USA hebbt den Irak op de Grunnlaag vun falsche Informaschoonen angrepen! De Experten vun'e CIA hebbt sik alltohoop irrt un Tüünkraam vertellt! Logen hebbt se! De Regeern is blameert, Bush schüümt vör Raasch. Alle Vörutsetten för den Krieg weern verkehrt — nix hett stimmt — harrn se dat wüsst, se harrn den Irak ja nienich angrepen! Hüüt is dat rutkamen. De Geologen hebbt alle scheep legen.
In'n Irak gifft dat gor keen Eerdööl!
|
|
4.7.04 ...Saddam: De eerste Akt vun't niege Spitakel Maakt Weddersehn Freid? Egaal, dor is he wedder — ganz de Ole. Inbildsch un grootsnacksch, drauhen un eitel. Nix kunn em verunsekern. De Verhältnisse sünd ja ok ganz de Olen: De Irak hett de Doodsstraaf wedder inföhrt. De "Westen" hett ja gegenan snackt, man se leten sik nix vertellen. Woso ok? Entweder se sünd souverän, denn dröfft se ehrn Schiet maken, orr se sünd dat nich. Natüürlich sünd se dat nich, dat wöörn wi sehn, wenn se mit ehr Ööl Schiet anstelln wulln. Denn avers...! De Konzessionen sünd ja sowiso alle in US-Hannen. Man Irakers hinrichten dröfft se, wenn se wüllt; jüst as fröher. — Nee, nich dat de USA dat good funnen. De USA hebbt sogoor gegenan snackt — gegen de Doodsstraaf in Irak — ja! Dat is ja jüst de Glaubwürdigkeit vun'n Westen. Wi foltert, man ji dröfft dat nich. Wi hebbt de Doodsstraaf, man ji schullt dat laten. Wi schiet op de UN, man ji schallt pareern. Wi maakt, wat wi wüllt, man ji schallt ziviliseert ween! Wi warrt juuch dat schon vertelln, woans wi us dat vörstellt. Zivilisaschoon! — Keen Wunner, dat de Irak sik dor nix seggen lett. Un nu hebbt se even de Doodsstraaf. Kann Saddam drepen. Mutt nich. 'keen weet, wat düt niege Saddam-Spitakel noch bringt? De Hauptdarsteller is op jeden Fall in Bestform. Gifft noch en tweten Hauptdarsteller, en Aart "griese Eminenz" in'n Hinnergrunn: John Negroponte. As US-Bottschaper bi de UNO (!) hett he den Härtetest bestahn un dröff nu direkt in'n Irak as "Bottschaper" de US-Interessen dörsetten. Un dat he dat doon warrt, dor gifft't keen Twievel. He is een, de sik utkennt mit Terrorismus — de sik wohlföhlt in dat blödige Chaos, vör dat Paul Bremer utneiht is — he is en Profi. Al vör 20 Johrn, ünner Ronald Reagan, hett he vun Honduras ut terroristische Angriffe in Nicaragua stüert — op "weke Telen" as Sükenhüüs, Buernhüüs usw. De US-Spionagefleegtüüch flögen mit ehr High-Tech över't Land un geven de Söldnertruppen an'n Borrn nipp Anwiesen, woneem de wehrlosen Telen to finnen weern. Dat hett Negroponte organiseert; dor hett he sik de Sporen verdeent. Ganz wiss is he de richtige Mann för'n Terrorkrieg! Dat niege Spitakel hett anfungen. En afsurdes Stück? En Publikumsbeschimpfung? Egaal — sett Se sik komodig trecht un weest Se paraat to klatschen. |
|
2.7.04 ...Hartz
IV kümmt: De Druck? Wat för'n Druck denn? Ach — de Druck, Arbeit optonehmen? Richtig so! De fulen Arbeitslosen, de den Staat up de Tasch liggt un bloots vun dat leven wüllt, wat ehr na Recht un Gesetz tostunn, de mööt mal ünner Druck sett warrn! Jedereen mutt för sik sülven sorgen — dat is dat bövelste Gesetz. Dor bruukst keen Geld to. Inköpen in'n Laden kannst ok ahn Betahlen — bloots Dösige warrt erwischt! De Düchtige helpt sik sülven. Anstännige Arbeitslose bruukt keen Stütze, de arbeit swatt. Jahaa — nich fuul rümliggen!! Wat — keen Swattarbeit för Se? Fuulpuup! Avers gifft noch vele annere Methoden, sin Levensünnerholl to verdenen! Flietige Arbeitslose beschafft sik Arbeit in Wassdomsbranchen, t.B. den Hannel mit Drogen un Waffen. Arbeitslose Fruuns köönt bavento ok op'n Strich gahn — dor warrt jümmers düchtige Nawuss sökt! Un wokeen sik anstrengt, kann in'n Minschenhannel Karriere maken. Wat — Se sünd keen Karrieretyp? Maakt nix. Nich fuul rümliggen!! Arbeiten! Müllsammeln to'n Bispill. Wat bi us liggenlaten warrt, warrt annerswo bruukt! Langs de Straten liggt so veel rümmer — herrenlose Autos to'n Bispill, de ehr Besitters eenfach weggaht. Autos vun alle Aarten staht hier in'n Weg! In Oosteuropa lengt vele Minschen na so en Benz orr BMW, den de Düütschen eenfach stahn laat. Arbeitslose, insammeln un af dormit! Ji mööt vun wat leven! Un wenn allens nix hölpt — hebbt ji villicht en lütt Kind, dat ji in de Kinnerporno-Industrie verköpen köönt? Bringt Geld! In Süüdoostasien maakt dat vele Familien so, se tüügt Kinner serienwies to'n Verköpen in't Bordell. Richtig so! De bruukt nix vun'n Staat — dat sünd dorüm ok de Länner, 'neem uns Arbeitsplätz hen afwannert! So as dor mutt dat hier ok warrn. De Düütschen mööt sik wedder op ehr Sekundärtugenden besinnen: flietig ween, spaarsam ween, Eigeninischative, Risikobereitschaft, Ehrgeiz, Disziplin. Es muss ein Ruck durch Deutschland gehn! Un wenn dat allens nix holpen hett, denn — ja denn warrt de
Druck op de Arbeitslosen even noch beten mehr erhöht. De Druck
— villicht de Druck, sik eenfach — ümtobringen? |
|
1.7.04 ...Olympia warrt verschaven! Leve Sportsfrünnen, de Olympiade in Athen mutt leider verschaven warrn. De Anlagen weern ja bloots fardig woorn, wenn de greekschen Bulüüd dor rund üm de Klock in Dag- un Nachtschichten wuracht harrn. Na, un dat is ja nu unmööglich worrn — dör den Football. Al bi't Veerdelfinale sünd de eersten Buarbeiters vör Opregung vun't Gerüst fulln un doodbleven. Un nu mit dat Halvfinale un dat Finale, dat köönt ji vergeten. De Arbeiten sünd instellt, dat Risiko is to groot. Dat Land mutt fiern un Autocorso fohrn. Buun kannst vergeten. Un överhaupt — allens, wat se nu buut, süht amenn ut as'n Footballstadion. Pech, wenn dat en Swimmstadion harr ween schullt! Nu schallt tschechische Gastarbeiters den Kraam toenn buun. Wat de woll Lust hebbt? |
|
Mit de düütsche Footballmannschap, seggt min Ole Daam,
weer dat ja jüst so as dunntomals mit den Bundespräsidenten
Lübke. Elkmaal, wenn he optreden dä, barmen de Düütschen
vör't Kiekschapp: "O nee, wat he sik bloots nich wedder
blameert! Wat he doch den Mund hollen much! Wat he doch nich in'n
Fettnapf pedden much! Da! Is passeert! Man nu "Rudis Riesen" in Portugal ünnergahn sünd un sogoor "Rudi Riese" sülven ok trüchtreden is, nu warrt dat noch swarer för de Regeern, nich? Weet een doch, wenn't in'n Football good löppt, is dat Volk in gnädige Stimmung mit sin Regeern; wenn nich, denn nich. Berti Vogts sin Patzers hebbt nich unwesentlich to Kohl sin Enn bidragen!! Bavento kann dat konsequente Trüchtreden vun "Rudi Riese" as Bispill för Schröder gellen, dat he partu nich namaken will. För de Wahlen 2006 gifft't bloots noch een Schangs för Schröder: Wi mööt tovöör Weltmeester warrn! Hm. Ut welk politische Eck kümmt eentlich Ottmar Hitzfeld? |
|
Wat weidt eentlich op uns Wischen? Fröher frei
een sik, wenn in'n Sommer Leven op de Wischen keem, Köh överall,
ok Melkköh, nich bloots Jungveeh. Kunnst an en Gatter gahn un
mit ehr snacken, op Platt; se harrn ehrn sinnigen Vermaak an allens,
wat en Afwesseln weer... De Köh sünd nich mehr to sehn.
Se staht in'n Stall, kriggt Kraftfoder un sünd dor ok veel lichter
to melken. De Weiden sünd lerrig; kannst stünnenlang dör'n
lerriges Land fohrn... Alle de unsichtboorn Köh staht in Ställe
un seht dat Daglicht nich un nich Man ganz lerrig sünd de Wischen nich. Af un an kunn een opletzt Wahlplakate sehn, vunwegen de Europawahl. Angela Merkel steiht op de Wisch, de ja süss nich mehr bruukt warrt, un op de anner Siet steiht "Besser für Deutschland". — Beter för uns? Beter för de Köh? Beter för Merkel? Ik weet nich. Ik much geern min ole Frünnen wedder hebben, de Köh. Dat weer beter, finn ik. |
|
Soso, Se sünd also alle mal wedder nich wählen gahn! Dor segg ik doch: Danke! Denn dordör hett min Stimm mehr Gewicht kregen. Is doch so: Annahmen, wi hebbt 50 Millioonen Wählers in Düütschland. Wenn alle to Wahl gaht, hett min Stimm dat Gewicht 1/50000000 — een Föfftigmillioonstel. Naja. — Gaht avers bloots halv so veel hen, denn verduppelt sik dat Gewicht vun min Stimm! Denn denn bün ik een vun 25 Millioonen, nich vun 50 Millioonen. Gaht bloots 10% to Wahl, denn verteihnfacht dat dat Gewicht vun min Stimm... Dat is as bi de lütten un de groten Demokratien. In Indien (1 Milliarde Lü) fraagst di würklich, lohnt sik dat för mi, wählen to gahn? In Luxemburg is dat ganz anners — bi de poor Lü merkst jede Stimm! Dor lohnt sik dat op jeden Fall. Ik heff dor gor nix gegen, wenn de Wahlbeteiligung noch wieder sinkt. För de Wahlbeteiligung gifft dat ja keen 5%-Hürde. Stellt se sik vör, jichenswenn bün ik de eenzige, de wählt! Ha! Denn bestimm ik allens alleen! Dull, wat? (Upps... mutt ik denn ok sülven de Regeerung stelln? Kanzlersch warrn un so...?) Dör de niege Oosterweiterung kümmt Europa mit sin 350 Millioonen Wählers ok in düsse Sackgass vun de groten Demokratien, 'neem de enkelte Stimm nich so veel tellt. Dat is slecht. Dorgegen helpt bloots sinken Wahlbeteiligung. De maakt dat ganze grote Europa wahltechnisch to so en kuschlige, överschaubare, basisdemokratische Saak as Luxemburg. Jedeen Afordnete warrt opneegst alle sin Wählers persöönlich kennen! — Also, leve Lü, blievt Se bitte vun de neegsten Wahlen weg! So is dat doch veel netter. |
| Öllere
Notizen: Hier klicken
|
den
apen Heven, warrt nich natt vun Regen un freet keen gröön
Gras... un maakt, ja, veel weniger Arbeit. 