Swatt-Witt

vun Wolfhard Sauerbrey

In Chemnitz maaken se een doot,
wiel Swatt-Witt sik nich lieden doot;

dorbi weet ik, dat blots bi'n Schach
Swatt nich dat Witte lieden mag.

"Na, na! Nich mit den Klassenfiend kuscheln!", mahnt Kalle Marx in Chemnitz

Ansünsten passt de Twee tohoop
un staht sogor in'n besten Roop;
to'n Bispill, bi Schandarmerie
sünd düsse Farven good dorbi;

'ne witte Fru finn't dor nix an
un smiegt sik an 'nen Swatten ran;

de Preußen, sporsam as man wat,
hebbt in de Fahn blots Witt un Swatt;

Swatt un Witt ahn Snicksnack: Preußen

un bi dat ole Schattenspeel
sühst du statts Swatt denn ok nich veel.

In Nepal strieden damals mit
US-Soldaten Swatt un Witt;
dat Zebra, as son swatt-witt Peerd,
maakt mit de Farv ok nix verkehrt;

ok de Panda gifft nich mehr
as Swatt un Witt an Farven her

un ok de Orcas sünd nich faul
un imiteert den Zebra-Gaul!

Scotch Terriers sühst in Engelland
du oftens ok swattwitt bin'and,
de finn'st sogor mit düssen Naam
op Whisky-Buddels as Reklaam!

So wiet, so good. Nu dücht dat mi,
Swattwitt, dat leevt in Harmonie.
Man kiekt een in de USA,
in't Witte Hus, Amerika,

denn markt een, dat se bannig slecht
mit de twee Farven kaamt torecht.
De eerste Farv, dat weer dat Swatt —

Obama bröch uns Freden satt,
un keen em ut de Neegde sehg,
kunn höpen: allns blifft in de Reeg!

De witte Kruuskopp maakt di avers
blots jümmersto Stunk mit de Navers:

hett keenen Funken Empathie nich,
denkt an dat grote Ganze nienich,
glövt blots an sik, maakt op'n Dutt
de heele Weltwertschopp kaputt —
ach, Lüd, wat weer dat wunnerbar,
as vörher noch de Swatte war!