Anfang vun en Johr

vun Cord Denker
Melodie: Schneewalzer

Güng nu wedder mol een Johr,
güng vörbi, is nich mehr dor,
weer so lange doch aktiv,
man nu kümmt dat in't Archiv.
Un een nie'es, noch ganz lütt,
drängt nu ran, will in de Bütt.
Ward jo denn bilütten groot,
schwingt sick op ut dat Morgenrood:

De Tied löppt gau, se is jo bannig quick:
Nie'es Johr — nie'es Glück!
Een Walzer klingt, Musik lockt uns to Danz:
De Schöpfung geiht wieder,
geiht wieder mit Schwung un Glanz.

Wat dor kümmt, is nich bekannt
un stickt achter düsse Wand,
de uns Minschenkraft nich dwingt,
wiel bloots Gott de Tokunft bringt.
Mennig Argernissen blievt,
man ok niee Blomen drievt.
Bunte Mischung, licht un schwoor,
un de Minschheit bruukt veel Humoor:

De Tied löppt gau, se is jo bannig quick:
Nie'es Johr — nie'es Glück!
Een Walzer klingt, Musik lockt uns to Danz:
De Schöpfung geiht wieder,
geiht wieder mit Schwung un Glanz.

Trump un Putin Hand in Hand,
dat geiht öber den Verstand...
Un Angela will noch mol
op den hogen Kanzler-Stohl.
Martin Luther mookt sick kloor
as dat Highlight vun dat Johr:
Jubiläums-Rummel satt,
un för jeden een beten wat:

De Tied löppt gau, se is jo bannig quick:
Nie'es Johr — nie'es Glück!
Een Walzer klingt, Musik lockt uns to Danz:
De Schöpfung geiht wieder,
geiht wieder mit Schwung un Glanz.