En Mensch, de keene App nich hett, de döcht ok nix

vun Silke Frakstein


Leeve Lüüd, markt denn keeneen mehr, wat rundüm so passeert?

Müllbüdel gifft dat vun de tostännige Afdeelung blots noch mit Gootschien ut dat Internet. Hest du sowat nich, muttst de Dinger betohlen. Mafiatorte, orrer ok Pizza nömt, kümmt mit'n Roboter.
In de Bökerhall sitt twors noch Lüüd, doch de kiekt blots to, wenn du an den Automaten rumfummelst.
In de groten Lodens sit ok blots noch an jede tweete Kass en Mensch.

Un wullt du mol mit'n Fleeger weg, kümmt de Ünnerlogen mit'n PIN un den Rest mookt de Computer (wenn du enen hest). Ober wehe, du mookst den Hoken an de verkehrte Steed! Dennso hest du för 8 Lüüd de Ünnerlogen, un de quakt di denn ok noch an, morgens Klock söss op'n Flughoben.
Un de Kuffer? Ok keen Mensch mehr dor. Is de Kuffer denn verswunnen, seggt de Gesellschaft: "Ja, da haben Sie wohl etwas falsch gemacht. Das fällt nich in unseren Bereich." Süh so!

In de Bohn orrer in'n Bus gifft dat nu överall WLAN ("Wie lange?"), dormit du blots jümmers labern kannst. Eegentlich geiht mi dat mehr üm enen Sitzplatz. Orrer dat Bus un Bohn överhaupt to rechte Tiet dor sünd.

Bi de Bohn köff ik miene Fohrkort noch den Schalter. Lütt'n Snack un denn seggt de Deern doch to'n Sluss: "Danke, dass Sie an den Schalter gekommen sind und damit unseren Arbeitsplatz erhalten."

Ja, dat hett allens so sinnig anfungen, un nu explodiert dat. Nich blots bi de jungen Lüüd. Ok bi de Olen. Staatsoper: Ballett, dree Stünnen. Wi weern noch ganz berauscht vun allens. Un wat heuer ik: "Ja, ja ich stehe gerade an der Garderobe." Toll!! En Selfie hett de Olsch nich noch mookt.

De Olen köönt jo wenigstens noch schrieben un reken. Ober bi so männich een Jungendlichen is de Text bi WhatsApp eenfach gräsig.

Wo süht dat in 20 Johren ut? Wat mookt de App-Nutzer? Verdeent de noch Geld — un wenn, womit? Un wat mookt se mit de veele fre'e Tiet?

Kottens wull ik Erbsenpüree keupen. Gifft dat nich mehr. "Die jungen Leute kochen ja nicht mehr."
Ik glööv, ik wanner ut. Neuseeland villicht? Orrer ik versöch dat eenfach eerstmol mit mien Fohrrad in de Walachei. Dor kann ik denn de Piepmätze sehn un heuern.

Mit Smartphone un Tablets rückt de "Deutschen Avifaunisten, Dachverband der Vogelbeobachtung", de lütten Pieper op'n Liev. Wie mutt ik mi dat vörstellen? Dat Tablet hangt in'n Boom un allens, wat dor so rümfleegt, pickt op dat Tablet: Piep, Piep, Piep, ich hab dich lieb.


18.2.2018


na baven