Eiersöök in de Coronakries

De Hasen farvt de Eier fein, man nüms laadt hüüt to'n Feier ein;
un sliekt een an en Ei sik ran, heet't glieks: "Stellt an de Reih sik an!"
Un ok: "Dat kannst du beter, Mann! Denk an den 2-Meter-Bann!"

Bloots Fiete denkt sik: "Wat'n Schiet! Dor liggt en Ei in'n Schatten wiet!
Man ran! In lecker Eten suhl ik mi denn glieks!" -- Dor seet en Uul!
He grippt dat Ei -- "Wo is dat denn?" -- dor heet't al: "Stopp!" Dat is dat Enn!
Dor kümmt nich bloots een Udel ran, dor kümmt en ganzes Rudel an!
De Staatsgewalt is fixer west un sett den legen Wixer fest.
Glieks warrt he achter Latten schickt. -- Un still dat Ei in'n Schatten liggt...

Moinmoin, leve plattdüütsche Maten un Frünnen!

Ja, in den Schüddelriemel baven is en beten Hoochdüütsch in vermengelt, sorry! Man wi mööt ja langsam mal to'n Gegenangriep övergahn un dat dösige Virus attackeern -- un wieldat wi sünst nix hebbt, mööt wi dat mit Humor un Albernheit maken! Is doch wohr. Dor lees ik, een hett Schoko-Oosterhasen mit Mundschutz üm produzeert -- also en Mundschutz weer op dat Inwickelpapeer druckt. De müss de Hersteller wedder vun'n Markt nehmen, wieldat de Lü dat pietätlos un un-empathisch funnen... Also wirklich!!! Ik will düsse Oosterhasen!! Weer doch en geniale Idee. So kann een ok Kinner de Sekerheitsvörkehrn nehgerbringen!

Wi plattdüütsche Lü laat uns ja nich so licht ut de Roh bringen -- wi kriegt keen Corona Hysteria, ok Maat Jan nich. "Das kann doch einen Seemann nicht erschüttern!" De Seekrankheit is veel leger. Lever spöttert wi uns dör den Corona-Alldag. De wirkt ja unwirklich noog. Gottvertruun helpt, ok dat Gode in de Laag to sehn, t.B. de himmlische Roh. Natüürlich sünd wi vernünftig, denn wi kennt ja de Exponentialfunkschoon, un de Handslag is sowiso nich mehr, wat he mal weer. Man de fidele Geschicht "Rett sik, wer kann!" hett mit Corona nix to doon, denn bangmaken laat wi uns nich, un op gor keen Fall fallt Oostern ut! Oostern kümmt! Un op dat wunnerschöne hoge Fest to gaht wi mit de Psalmen vun de Passioonssündaag, de in de Överdragen vun Adeline Decker ehr Deepde künnig maakt, uns dörchut ok in uns Tied Tospraak geevt un sünnerlich ok Moot maakt. De Natuur is al lang hellwaak, de lüttjen Vagels sünd kregel as man wat, un de Plant vun'n Maand is natüürlich de Oosterklock. Dat beropen Wordsworth-Gedicht dorto gifft't nu ok op Platt. Vun Wichelkatten un eerste Violen vertellt de Kinnermärken in düssen Maand. Ja, de Lent weer fröh to Stell, un en Winter as fröher köönt wi uns knapp noch denken...

Ok anner Aktualitäten gifft't noch -- wirklich! --, so de niege Ruumsonde, de na de Sünn start't is, dat dore Magnetfeld to meten. Mit  wat för Instrumenten, dat verklaart uns Ludgerd Lüske allerbest. Afsünnerliche Kunstwarken vertellt uns vun't Opstiegen in de Welt. Vun afsünnerliche Typen vertellt Heinz Tiekötter. Un ok sünst noch düt un dat, as jümmers!

Noch en Tipp: Düssen Maand un düt Johr warrt ok an Friedrich Hölderlin erinnert, de vör 250 Johr doodbleev. Wokeen nochmaal wat vun em op Platt lesen much, de kann bi uns Gedichten vun em finnen -- dree beropen Gedichten, de sachs jedereen mal höört hett, un veer ganz besünner Gedichten ut sien Johren, as he al blangen de Spoor weer un sik den Naam Scardanelli geven harr.

Un noch en Bidd: Wi kunnen poor mehr Naturnotizen bruken. De Rubrik warrt heel geern leest. Man sietdat uns wunnerbore Antje Heßler sik op't Olendeel sett hett, beschickt meist bloots Thomas Seemann un ik de Rubrik. Dorwegen: Wenn Se mal wat Schööns orr Besünners in de Natuur seht, maakt Se doch en Foto, schrievt en poor Wöör dorto un af dormit an webmaster@plattpartu.de! Un wenn Se sik dat Schrieven op Platt nich truut, maakt wi dat ok för Se. Keen Problem!

So, nu blifft mi bloots noch to seggen, wat wi hüüt all enanner wünscht: Sund un munter blieven! Nich ünnerkriegen laten! Sogor de Oosterhasen hollt de Ohren stief, denn köönt wi dat ok. Oostern geiht de Himmel op, geneet wi dat! Un neegsten Maand leest wi uns wedder, un denn gifft't al veel Nieges.


Nu de Linkliste. Op de Links bruukt Se bloots klicken, dat Se henkaamt.

Plattdüütsch Künst:

De Zittlööschen. Gedicht-Översetten vun Marlou Lessing    (29.3.)
Corona exponentiale. Vun Marlou Lessing    (21.3.)
De Weg na baven. Kunstfotos vun Secil Yusun mit Wöör vun Marlou Lessing    (12.3.)
Notizen ut'n Aarnmaand. Fotos un Verse vun Marlou Lessing    (1.3.)


De Welt un Gott:

Passion: Sünndag Judica: Bidd üm Lecht un Wohrheit. Psalm 43, Platt vun Adeline Erika Decker    (29.3.)
Seemannsgarn: De Seekranken. Vun Günter Sohnemann    (29.3.)
Passion: Sünndag Laetare: Freu di, Jerusalem! Psalm 122, Platt vun Adeline Erika Decker    (22.3.)
Mit den Sleden na San Fernando. Vun Klås Tüxen    (18.3.)
En Beden in Coronatieden. Vun Marlou Lessing    (15.3.)
Passion: Sünndag Oculi: Bußgebett im Twiefel un Wedderpart. Psalm 6 un 8, Platt vun Adeline Erika Decker    (15.3.)
Passion: Sünndag Reminiscere: Gebett üm Gnaad. Psalm 25, Platt vun Adeline Erika Decker    (8.3.)
Handspake. Vun Heinz Tiekötter    (8.3.)
Passion: Sünndag Invocavit: Ünner den Scheerm vun'n Hööchsten. Psalm 91, Platt vun Adeline Erika Decker    (1.3.)

In't lütte Gebeedbauk:

        He kümmt. Vun Marlou Lessing    (27.3.)


Natuur un Wetenschap:

Dei ESA-Sünnenkieker: Sien EPD-Instrument. Vun Ludgerd Lüske    (18.3.)
Dei ESA-Sünnenkieker: Sien Instrumente, Deil 1. Vun Ludgerd Lüske    (12.3.)
Du hest wohl'n lütte Meesch?! Vun Silke Frakstein    (10.3.)
Planten in Pagels' Goorn: Plant för'n Märzmaand: Narzissen -- Oosterklocken. Vun Thomas Seemann un Marlou Lessing    (8.3.)
Dei ESA-Sünnenkieker. Vun Ludgerd Lüske    (5.3.)


In't Natuur-Notizbook:

        Märzfleder. Vun Thomas Seemann    (29.3.)
        Himmlische Roh. Vun Marlou Lessing    (21.3.)
        Lütt Roodbost kiekt op'n Koffi rin. Vun Thomas Seemann    (2.3.)


Wat in de Welt vörgeiht:

Keen Handslag tellt! Vun Heinz Tiekötter    (18.3.)
Maat Jan: Corona Hysteria. Vun Maat Jan ut Bremen    (18.3.)
Rett sik, wer kann! Vun Heinz Tiekötter    (12.3.)
Uns Bürgermeester hett dat swoor. Vun Heinz Tiekötter    (8.3.)

1 niegen Indrag in Ewald Edens Blog Eden meent...

...un 7 niege Indrääg in Marlous plattdüütsch Notizbook.


För Kinner:

Modder Sünn ehr Kinner: De Katten an de Wichelbusch. Märken vun Sophie Reinheimer, Platt vun Klås Tüxen    (22.3.)
Modder Sünn ehr Kinner: De eerste Viool. Märken vun Sophie Reinheimer, Platt vun Klås Tüxen    (21.3.)



Hartlich grööt

Marlou Lessing un dat lütte Plattpartu-Team