Mien Goorn

Heww' Wöddeln un 'n Wrukenbeet,
Gemüs' ick goot to bruken weet.
Ok Rot- un Wittkruut, Dill,
wiel ick blots dit Kruut will.

Moinmoin, leve plattdüütsche Maten un Frünnen!

Fröher hett dat "Sneemaand" heten, wohraftig "Sneemaand" -- de Januar. Man dat kannst ja hüüt nich mehr seggen, klingt ja, as wullst di över lustig maken... Na, nu snackt wi doch wohraftig över't Weder! Hebbt wi uns nix anners mehr to vertelln? Na wiss doch! Den Schüddelriemel baven to'n Bispill. De is dütmaal nich vun mi, sünnern vun Karin Albrecht ut Mäkelnborg. Se is en Natuurtalent för Schüddelriemels un hett nu mal wedder na lange Tied welk schickt. To finnen sünd de op uns Süstersiet numanto.de -- dor sünd se op de Startsiet verlinkt!

Op Plattpartu weer düsse Maand nich so riev as de verleden Christmaand; man Verpuust mutt ja ok mal ween. De Wiehnachtstied klingt noch na in dat moderne Steernsingerleed, dat Cord Denker de dree Könige in'n Mund leggt (tosamen mit en poor Beer). Se hööpt op en freedvuller, gerechter Tokumst, jüst so as Rudi Witzke, de över de böseren ünner de Engels nasinnt. Leges gifft dat ok in't niege Johr; besünners beweegt hett uns dorbi dat Gedenken an dat Befrien vun Auschwitz vör 75 Johr un de Unminschlichkeit, de ok vundaag överall to sehn is.

Dat milde Weder (o nee, al wedder dat Weder!) sorgt dorför, dat sik dat Natuurnotizbook al mit Vörjohrsnotizen füllt. Naja, kannst ok positiv sehn. Dat niege Johr bringt ok en niegen Klenner: In de verleden Johrn harrn Thomas Seemann un ik ja elk Maand Klennerbläder för Bottervagels un anner Luftakrobaten rutbröcht; düt Johr schallt mal Planten de Hööfdrull spelen, Planten, de in den schönen Pagels-Goorn in Leer wasst. De eerst is dat Schilf. Jede Plant warrt kort vörstellt un amenn mit en Gedicht ehrt.

Ok en poor schöne Vertelln un Beschrieven hebbt wi. In Fiete Lüttenhus sien Vertelln vun't Gottesgericht is noch echte Winter; de jüngst doodbleven Günter Weber vertellt postum vun sien letzt groot Angelaventüür; Heinz Tiekötter drippt anstännige Lü, 'neem een ehr nich vermoden is, un unanstännige liekso. Un besünners spannend: de hoochdramaatsche Bericht vun Güter Sohnemann "Mann över Bord!" in twee Delen.

Nu wünsch ik uns all, dat dat niege Johr good wiedergahn müch, un grööt Se hartlich bit neegsten Maand!


Nu de Linkliste. Op de Links bruukt Se bloots klicken, dat Se henkaamt.

Plattdüütsch Künst:

Notizen ut'n Braakmaand. Fotos un Verse vun Marlou Lessing    (2.1.)


De Welt un Gott:

Seemannsgarn: Mann över Bord, Deel 2. Vun Günter Sohnemann    (27.1.)
Dat Gottesgericht. En Wintervertelln vun Fiete Lüttenhus    (23.1.)
Un doch heff ik em kregen! Vun Günter Weber    (19.1.)
Anstännige Lüüd. Vun Heinz Tiekötter    (5.1.)
Angelus militans -- de Stried-Engel. Vun Rudi Witzke    (12.1.)
Seemannsgarn: Mann över Bord, Deel 1. Vun Günter Sohnemann    (5.1.)
20 - C - M - B 20. En Steernsingerleed vun Cord Denker    (5.1.)

In't Lütte Gebeedbauk:

        Oppers un Deders. Gedenken an de Konzentraschoonslager    (26.1.)


Natuur un Wetenschap:

Planten in Pagels' Goorn 2020: Januar-Plant: Schilf. Vun Thomas Seemann un Marlou Lessing    (19.1.)

In't aktuelle Natuurnotizbook:

        Kätzchen in'n Januar. Vun Marlou Lessing    (31.1)
        Floogöven in'n Januar. Vun Marlou Lessing    (27.1.)
        Lent in'n Winter. Vun Ewald Eden    (26.1.)
        Na du, Nandu? Vun Marlou Lessing    (19.1.)


Wat in de Welt vörgeiht:

Wenn de Minsch di ankiekt. Vun Marlou Lessing    (23.1.)
De ehrbore Koopmann. Vun Heinz Tiekötter    (19.1.)
Mathematik! Vun Wolfhard Sauerbrey    (5.1.)
Ik verstoh dat nich mit de Ümwelt! Vun Heinz Tiekötter    (5.1.)

...un veer niege Indrääg in Marlous plattdüütsch Notizbook.



Hartlich grööt

Marlou Lessing un dat lütte Plattpartu-Team