In'n Zippelpark

Zippelpark in'n Mai

vun Antje Heßler

Verleden Johr heff ik al wat över den Zippelpark schreven. Nu kümmt noch en Toogaav. Wi harrn al den Maimaand tofaten. De gelen Zittlööschen weern verblöht. Aver de witten lüchen noch ut dat gröne Gras vun de so nöömte "Narzissenwiese". Sehg ut, as wenn sik dor en wittes Laken över den Zippelpark utbreedt harr. De söötlich Ruuch vun de witten Zittlööschen steeg mi in de Nees.

Narcissus selbdritt

De enkelte Blööt is besünners smuck. "Is dat nich en Gedicht?", ward oftins seggt. Heet se dorüm villicht ok "Dichter-Narziss"? Se blöht wat later as de gele Zittlöösch. Wi hebbt se ümmer as echte Zittlöösch betekend. Se wasst enkelt ut en Zibbel up enen kräftigen Stengelschaft. In de Meern vun de witt Blööt sitt en geel-rod farvten Kelk. De verströömt den kräftigen Ruuch. To Huus is se egentlich in den Mittelmeerruum. De Zippel vun de Bloom is bannig giftig.

Narziss, de schöne Jüngling, de sik in sien egen Spegelbild verleev un an doodbleev — hier is he

'n beten wieder lang in de "Narzissenwiese", achter de witten Zittlööschen, keken ut dat hoge Gras dicke lila Blödenstännen. Dicht an dicht seten de smucken lila Blöden an enen Stengel. Dat weern luder Orchideen. Den Naam vun de Blööm wüss ik noch ut mien Schooltiet: "Breitblättriges Knabenkraut"oder "Geflecktes Knabenkraut". Wi kennt se aver ok as Kuckucksbloom.

Dat Knabenkruut mang Gräser un en Blööd vun Dichten sehn

So veel Orchideen up enen Hupen heff ik lang nich sehn. Alle Oorten vun Knabenkruut staht ünner strengen Natuurschutz.

Mank de lila Orchideen wöör ik ok noch en anner Orchidee wies. Se weer gröön mit veel lütte Blöden an enen langen Stengel. An jede Blööt hüngen twee länger gele Bläder. Kunnst meist mit en Beffchen verglieken; so as de witte Halsbinn an en Talar. Dat weer en Tweeblatt "Zweiblatt".

Dat Tweeblatt is meist nich to kennen, wenn dat so mang de Gräser steiht

Tweeblatt wat genauer ankeken...

Tweeblatt-Blööt vun Dichten

Tweeblatt

De Zittlööschenwisch weer nu en Orchideenwisch. Ümmer mehr verscheden Planten weer ik wies woorn. Vun de Hunnenblööm gor nich to snaken. De hebbt mit ehr gelen Blödenköpp mit de gelen Zittlööschen üm de Wett blöht. Nu weern an de Blödenköpp blots noch de smucken Samenkugeln. Dat weer'n de so nöömte Pusteblööm.

De Melksteern is würklich so schöön, dat een andächtig warrt!

Mank al de verscheden Gräser un Plantenoorten full mi noch en smucke witte Bloom up. Dat weer de Melksteern, de wasst as de Zittlöösch ut en Zippel. De harr ok noch den Naam "Stern vun Bethlehem". Sien Blööt harr de Form vun den Wiehnachtssteern. De hett de dree Weisen den Weg na Bethlehem wiest.

Mien Weg güng nu wedder na Huus. Ganz seker weer ik nich dat letzt Maal up düsse Wisch. Ik heff dor al veel verscheden Planten un Bloom funnen. Aver dörtig sünd dat noch nich!