So weer dat Wedder in Julimoond

Dat Wedderdaagbook vun Uwe Mohr



De Eerdbeern wüllt aarnt warrn. Foto Uwe Mohr

Batz, een halves Johr is rüm, un wi sünd egentlich in Hochsommer ankomen, wo wi mit hitte Doog reken. Un wat mookt dat Juliwedder? Mit kohle 15°C un wenig Sünnschien geiht dat los. Allerdings is Regentrude sinniger worrn. Bloots 0,4 l/m² hett se de ersten 3 Doog utgoten. Over wat nich is, kann noch warn, denn de hittesten Doog von't Johr stoht uns noch bevör. De Hundsdoog! Dat söllt de wärmsten Doog in de Tied von 23. Juli bit to'n 23. Augustmoond sien. Ganz slecht sünd de Utsichten nich, denn Hoch "Walpurga" bringt uns dat Azorenhoch mit Sünnschien un Warms, — hebbt de Meteorologen to weten geven.

Liekers een beten op'n Kieker heff ik de Wedderpoggen, denn sieht 15 Doog in Sommer, hebbt wi bit hüüt, 5.Juli, noch keen Sommerdag hatt.


Gassen, maalt vun Rudi Witzke

Nu mookt sik over Wedderhoch "Xena" breet. Villicht geiht dat jo nu langsom over seker endlich mool sommerlich wieder. An 8. 25°C, blauen Heven, liesen Wind un 14 Stünn Sünnschien, sünd schon mol een Anfang. Goot so, denn de Gassen ward riep: "Sankt Kilian bringt de eersten Döscher in Arbeit". De tweete Snitt steiht an, Eerdbeeren wöllt plöckt warn, un de Immen sammelt Nektar in de Linnenblööt, in Wittklee un noch veele anner Blöten. "Allens mookt de Juli good, wenn he hett veel hitte Glood."


Heu warrt maakt. Foto ML

Gestern heff ik in en hunnert Johr oles Book leest, dat jede Moond in't Johr ok een passenden Edelsteen hett. So gehört to'n Juli de Rubin. Von em ward seggt, he "erweckt Leidenschaften"!? Over ik bün jo bi't Wedder un stell fast, bit hüüt, 17. Juli, is de Moond veel to dröög. Regentrude meent wull, se hett in Mai/Juni al noog utgoten. Af un an frische Wind, dröögt dat Land ok noch wieder ut. Deshalb ward al vör Wooldbrandgefohr wohrschoot. Dat is eben so bi Sommerwedder. Dorüm schön vörsichtig sien in Woold, op de Fohrt hen na't Wooder un bi't Grillen!


Dat Veehtüüch söcht den Schadden bi de Hitten. Foto ML

Bedanken köönt wi uns bi Hoch "Yasmine", se hett dat schöne Wedder in't Gepäck. Se sorgt dorför, dat wi nich broden mööt. Kann over ok anners warn, denn hüüt an 23. fangt de Hundsdoog an. Nu, to'n Enn von Moond, loopt se to Höchstform op. Hoch "Zlatka" un Deep "Zaki" bringen uns Luft ut de Sahara. An 27. een broddigen Dag. Ovens Blitz un Donner mit Regen. Böen mit söven Bft, hebbt enige Bööm op de Sied leggt. Dat Thermometer is von 29°C op 19°C afsackt. "Een düchtig Juligewidder is goot för Buern un Winzer." Schön is dat, Fenster un Dören opreten, un glieks ward dat Huus to'n angenehmen, köhligen Platz. An 29. wull uns Regentrude wiesen, dat se doch noch Woter in Rock hett. In een Stünn fullen 24,6 l/m² von Heven. Liekers, verloten deit uns een veel to drögen un to warmen Julimoond.

Wedderdoten Moond:

  • De Dörchsnittstemperatur in 2m Hööchte harr 18,6°C. Dat weern 1,3°C övert Middel.
  • De hööchste Temperatur harrn wi an 22. mit 30,5°C, un de deepste an 7. mit 6,7°C.
  • 20 cm in de Eer harrn wi in Dörchsnitt 18,5°C, un 5 cm över de Eer de deepste mit 6,1°C an 7.

  • De Gassen is riep. Foto ML
    De Sünn hett dat goot mit uns meent. 319 Stünn hett se schient.
  • Goode Oorn för de Strombuern. In Dörchsnitt 386 W/m² hett dat bröcht. Hoch weern an 15. 1063 W/m².
  • Jo, un mit Regen weer dat recht mau. Bloots 53 l/m² sünd in 14 Doog fullen. 68% von't Soll. Aftrocken dörch Evapotranspiration sünd denn ok noch 98,5 l/m².
  • De Pusterich hett am meisten mit 46% ut WNW pustet, un am stärksten mit 55 km/h (7 Beaufort) ut O-SO.
  • In Moond harrn wi 13 Sommerdoog (Tmax >=25°C), een hitten Dag (Tmax >= 30°C) un 31 warme Doog (Tmax >= 18°C).

Mehr Wedder gift dat ünner: hartenholmer-wetter.de.


4.8.2013


na baven