Koornblomen

Unkruut

vun Antje Heßler

In mien old Leesbook funn ik dat lütt Gedicht vun Julius Sturm "Der Bauer und sein Kind". In dat Gedicht schimpt de Buur up dat Unkruut in sien Feld. He seggt: "Das hat der böse Feind getan!" He snackt vun dat Düvelstüüg, dat Unkruut!

Unkruut an'n Ackerrain: Stöört bloots?

Dor heff ik över dat Wort "Unkruut" senneert. Wat is egentlich Unkruut? Dat is för jedeen wat anners. För mennigeen sind dat Krüder, sogoor Heelkrüder. För den annern sünd dat Planten, de sik mank sien anseit Saatgoot breet maakt un stöört. De tüchten Planten ut dat utseit Saatgoot hebbt so nich noog Ruum to'n Wassen.

Lila Flockenblomen an'n Weg

Wen stöört nich de Giersch in dat Blomenbeet oder de velen Boddersteker in den Rasen? Ok de Brennetteln tellt bi de meersten Minschen to dat Unkruut. Dorbi warrt all düsse Planten hüüt un ok al fröher as Salat up den Disch brööcht. Veel so nöömte "Unkrüder" warrt dröögt un Tee dorvun kaakt. Man snackt sogoor vun ehr Heelkraft. Vun dat smuck Utsehn ganz to swiegen!

De smucke lila Flockenbloom

De Buur in dat lütt Gedicht hett ganz besünners de "Ackerunkrüder" meent, de sik mank sien Koorn breet maakt harrn. Un de lütt Söhn hett de "Schöönheit" vun de Unkrüder sehn. He hett enen smucken Blomenstruß plöckt. Mit de Wöör: "Sieh Vater, nur die Pracht, die hat der liebe Gott gemacht!", keem he freudestrahlend na Huus.

Dütt Unkruut maakt de Buurn ok hüüt noch to schaffen. Se harrn bi de Utsaat un de Fruchtfolg Probleme. Mittel gegen dat Unkruut, "Herbiziden", wöörn insett. Dat güng so wiet, dat de Ackerunkrüder meist all tonicht maakt weern. Mahnbloom, Roggenbloom, Kamille un wie se all heet geev dat nich mehr. De lütt Jung harr kenen smucken bunten Blomenstruß mehr plücken kunnt.

Internationale Blomenschau!

Dat ganze Land rükt as en Kamillenteepott!

All düsse Planten sünd keen Unkruut, sünnern Bikruut un keen Düvelstüüg. För de Insekten un anner Deerten sünd se bannig wichtig. Dat ganze Ökosystem weer stöört. De Landwirtschaft hett dor al siet 1980 en Ackerrandstriepen-Programm inföhrt. De Buurn müssen gegen en Entschädigung toseggen, den Ackerrandstriepen nich mehr mit Plantenschutzmittel to behanneln.

Düsse Ackerrandstriepen (3 bit 10 Meter) is uns bi uns Utfohrten över Land ümmer upfullen. Dat geev wedder Mahnblomen, Kamille, wilde Wicke un Roggenblomen. Düsse Roggenbloom mit ehr blage Faarv is besünners smuck.

Der Bauer und sein Kind
von Julius Sturm

Der Bauer steht vor seinem Feld
Und zieht die Stirne kraus in Falten:
"Ich hab' den Acker wohl bestellt,
Auf reine Aussaat streng gehalten;
Nun seh' mir eins das Unkraut an!
Das hat der böse Feind getan."

Da kommt sein Knabe hochbeglückt,
Mit bunten Blüten reich beladen;
Im Felde hat er sie gepflückt,
Kornblumen sind es, Mohn und Raden;
Er jauchzt: "Sieh, Vater, nur die Pracht!
Die hat der liebe Gott gemacht."

De Roggenbloom

Sweevfleeg op en Roggenbloom

De Roggenbloom (Koornbloom) hett enen korfoortigen Blödenstand. De Plantenoort tellt to de Flockenblomen. De Roggenbloom is dörch ehr upfallend hellblage Farv nich to översehn. Dorna hett se ok ehr'n latinschen Naam (Centaurea cyanus) kregen. De Familie vun de Flockenblomen is groot. Dat gifft ok lila Flockenblomen. Hüüt findt man düsse Blomen in de Haupsaak in den Ackerrandstriepen vun en Koornfeld.

De Roggenbloom is en eenjährig kruutig Plant. Se överwintert as Samen. De kiemt in't Fröhjohr, kann aver ok al in Harvst utkiemen un as lütte Plant överwintern. De Plant warrt in Sommer bit to 100 cm hoch. Se hett smalle Bläder. De ünnersten verdröögt to Blöhtiet un fallt af.

De Blööt is vun lüchend blage Röhrenbläder ümgeven. De lockt de Insekten, besünners Immen un Hummeln an. Vun de warrt de Körbchenblöden in de Meern bestöövt. De hebbt en besünners hogen Zuckergehalt. Dorüm warrt se vun de Imker geern sehn. Dat is för de Immen en gode Neventracht.

Imm op en Koornbloom

Wassen deit de Roggenbloom vun Juni bit September in de Hauptsaak in Koornfeller. Dörch dat Överdüngen un den Insatz vun Herbiziden weer se böös roor woorn. Siet de 1980er Johrn steiht se ünner Natuurschutz. Hüütigendaags is se wedder öfter antodrapen.

Se gellt sogoor as Heelplant, un de Bitter- un Gerbstoffe warrt gegen Probleme vun Darmkrankheiten insett. Ok Huutprobleme sall se lindern. De bekannte griechische Dokter Hippokrates sall al en Wunn an den Foot vun Achilles heelt hebben.

Hier denkt wi meist al an Aarndank-Deko

De Roggenbloom is dörch ehr upfallend Faarv ok in vele Symbole to finnen. Königin Luise hett se to de "Preußische Bloom" maakt. För Kaiser Wilhelm den I. weer dat de Leevlingsbloom. Hüüt noch snackt wi bi en bestimmte blage Faarv vun "Preußisch Blau". So en smuckes un reines Blaag finnt wi kuum bi en anner Bloom. Wat schöön, dat se hüüt wedder dörch dat Ackerrandstriepenprogramm antodrapen is.