Nu is dat wedder März worden un wi hebbt Hoffnung, dat de Winter vörbi is. Jo, eegentlich is ja de 1. März de Beginn vun Fröhjohr. Bloots de Astronomen makt dar 'ne annere Reeknung mit den 21. März. Dat hett aber bloots wat mit den Sünnstand an Heben to dohn.
Aber dorüm brukt wi uns eegentlich gar nich so veel to kümmern.
Kiekt man ut'n Finster, wat ji dar süht, dat is vör us würklich un warraftig.
Na un buten is Fröjohr, dar beet keene Muus 'n Faden vun af.
De lütt Buschens warrt all'n beten greun un de Sneeklocken un Krokus un Forsythien blöhn ook all. Abers wat schall nu kamen? Wo geiht dat wieder? Kummt nu keen Snee mehr?

Ja, dat is nu woll leider nich so goot as dat schient.
Kiekt wi us dat mal näger an.
Dar seggt de Kalenner: Wenn dat so üm den 3. März regent, denn warrt de Sommer gräsig. Abers wenn de Sünn schient, dröfft wi us op eenen goden Sommer frein.
So üm den 13. März rüm warrt dat Wedder meist lau un fründlich. Eben so richtich Fröhjohr, abers wenn een düchtigen Wind weiht, warrt dat een Fröhjahr mit veel Storm un Wind.
An den 25. März is dat de meiste Tiet mit dat scheune Wedder all vörbi. Dann sett sick erstmal wedder koole Widderung dörch. Villicht gar mit Glattiis un Snee.
Een anner Spruch seggt: Wenn dat an 21. März regent, dann warrt dat heele Fröhjahr natt as ne Katt. Dann mööt ji eben Gummistebel kööpen.
Wenn abers in Gaarn de Stickelbeerbuschen un in Wald de scheunen witten Anemonen blöhn, dann is dat Fröhjahr nu doch vull in Gang.
Ja leeve Lüüd, gaht ji man henn na'n Holt, wenn de Sünn schient. De Vagels singt all un ji köönt se sogar seen, denn dar sünd ja noch keen Bläder an de Bööm. Dat is ne feine Sook.

Un gegen Regen gifft dat ja een Regenschirm.

Tschüß bet April seggt de Sünnschien-Kieker