Snickenkuss

Leevde bi 35°

vun Antje Heßler


Se köönt de Fotos per Klick vergröttern! Trüch kaamt Se denn mit den Zurück-Knoop op de Browser-Symboolliest

As jedeen Moorn tapp ik toeerst frisch Water för mien Blomen ut den Waterhahn up de Terrass. För hüüt weern wedder 35° C plus anseggt.

Up den Weg na den Waterhahn harr ik meist en Snickenpoor breet pett, twee Wienbargsnicken. De legen ganz dicht bieenanner. Dat seeg ut, as weer dor Amor in't Speel, den een vun de beiden harr de Leevpiel (Liebespfeil) drapen.


Snickenleevde op'n Lünkendisch

Mit ehr Footsahlen kleevten se aneenanner. Up ehr Hüüs stütt, recken se de Köpp piel in de Höcht. Seeg ut, as wenn se sik in de Ogen keken un sik toswiestern: "Ik mag di lieden!" Mit de Föhler strakeln se sik. De Liever bewegten sik dorbi hin un her. Dat weer wull so 'ne Oort Snickensex. För mi weer dat richtig grote Leevde.


Oh, oh, de Kant is nehgbi!


De Verleevten sünd blind för de Gefohr...


De Leevste höllt de(n) Leevste(n) fast...

 


...denn stört se beid hendal, un da geiht de Leevde wieder!


Un twoors eerst recht!

Vörsichtig heff ik de beiden ut'n Weg rüümt un up mien Lünkendisch böört. De beiden Snicken leten sik nich bi dat Tosamensien stören. Dat Leevspeel güng ümmer wieder. De beiden weern so miteenanner togang, dat se dorbi vun den Lünkendisch hindaal fullen. Dorbi harrn se sik verloorn. Aver gau weern se wedder bieenanner un möken wieder Leevde. Dat weer al Meddagstiet woorn un dat Thermometer weer wedder up 35° in Schadden anstegen. Dat stöör de beiden Snicken aver nich. De Leevde vun ehr weer to groot!

Ik harr in de Twischentiet naleest, dat dat Leevspeel vun de Wienbargsnicken bit to 20 Stunnen duurn kann. — So lang heff ik aver nich tokeken.

De Snicken sünd Zwitter. Beid köönt Eier leggen, un beid sünd mit enen Leevpiel utrüüst. De Englänner seggt "love dart" dorto. Wenn de Snicken Leevde wüllt, scheet se den Piel in de Footsahl vun den oder de Utsöchte. De is denn praat, Leevde to maken. An de rechte Koppsiet wies sik denn ehr'n Begattungsdeel.


Stickt da en Leevspiel in'n Foot?

Dorto mütt se aver eerst dree Johr olt ween. So lang buut se an ehr Huus. Un so olt warrt nich veel, dat gifft to veel Fiende. De Wienbargsnick kann aver bit to 19 Johr olt warrn. In Düütschland steiht se ünner Naturschutz. Un dat mit Recht! Wi wünscht ehr en langes Leven mit veel Leevde.


25.7.2010


na baven