Osterbloom (Paaschbloom)

vun Anke Nissen


Ik heff ene Fründin — ene gode Fründin —, de schimpt mit mi, wenn ik bi't Vertellen över Planten jümmers den latiensch Namen dorbi segg orr schriev. "Dat interessiert doch keen — dor kennt sowieso nüms wat vun — dat is unnütz — dumm Tüüg" — so versöcht se mi dorvun aftobringen.

Göösbloom

KüchenschelleSnackt wi mal vun Osterblomen. Wat sünd Osterblomen? Ik heff dissen Namen funnen för uns lütt Gänseblümchen (bellis perennis), för de gemeine Küchenschelle, för den Lütten Zegenboort, de ok Wiesenanemone (Anemone pratensis) nöömt warrt. Ik heff em funnen för de Slötelbloom (Primula officinalis). Alleen för disse Plant heff ik 30 ünnerschiedlich Namen tohoopsammelt, as Bispill Karkenslötel, Slantelbloom, Himmelbloom, Himmelsslötel...

Primel

"De Slötelbloom hett den Himmel Narzisseupslaten", sä mien Grootmudder, un dormit meen se, de kole Winter is vörbi, de Fröhjohrstiet fangt an. Villicht warrt de Slötelbloom dorüm in mennig Gegenden Osterbloom nöömt. Villicht kümmt de Naam aver ok dorher, wiel fröher glöövt wörr, wenn en Deern in de Kar-Week al en Slötelbloom funnen harr, denn wörr se noch in datsülvig Johr heiraten, un se wörr later so veel Kinner kriegen, as disse Bloom Blöden harr.

Wenn ik "Osterbloom" höör, denn denk ik an Osterglocken, also an Narzissen. Dat gifft aver Lüüd, för de is en "Osterbloom" uns lütt witt Buschwindröschen (Anemone nemorosa). Uns Vöröllern hebbt glöövt, de Knospen vun de Buschwindröschen helpt gegen Fever un anner Krankheit, een mütt blots de eersten dree Knospen, de een in't Fröhjohr findt, upeten.

Buschwindröschen. Opnahm: Stina Nissen

SumpfdotterbloomIk heff ok höört, dat een dat Leberblümchen (Hepatica triloba) Osterbloom nöömt hett, jüst so as de Sumpfdotterbloom (Caltha palustris). In Dithmarschen wies en Fründ up Gele Oschen, dat is de gele Primel, un snack vun Osterbloom. Un noch annerswo is de rode Aurikel as Osterbloom bekannt. In Stormarn warrt to de lüchen gelen Blödenköpp vun'n Huflattich (Tussilago farfare) Osterbloom seggt un in Kiel to den Hohlen Lerchensporn (Corydalis cava), un in Rendsburg to den "echten Goldstern" (Gagea lutea).

rode Aurikel

Hohler LerchenspornHuflattich

För all disse 13 verschieden Planten warrt de Naam "Osterbloom" bruukt, villicht, wiel se üm de Ostertiet blöht, wiel de Minschen Osterstrüschen plückt för den Osterdisch. Villicht...

Maßliebchen


23.3.2008


na baven