Modderdagsbloom

vun Antje Heßler

Endlich harr de Sturm sik leggt. Wenn nu noch de Sünn dörch de Wulken keem, kunn uns Utfohrt to'n Modderdag losgahn! Wi harrn uns Modder dat toseggt. Mit dicke Jacken utrüst, möken wi uns up den Weg.

Wokeen is schöner, Hunnenbloom orr Modderdagsbloom?

Sogor dat Heck hett de Storm ümweiht? Oder?

Wiesenschuum! Dor is welk!

De lütte Aurorafalter sitt an en Modderdagsbloom

So grugeligen Storm mit Küll un veel Regen harrn wi lang nich mehr to düsse Tiet beleevt. De Lent wies sik düt Johr vun sien ruge Siet. Aver wi wullen doch de Modderdagsbloom — dat Wiesenschuumkruut — för uns Modder plücken! Dor leten wi uns partu nich vun afbringen. De Storm harr deelwies ganze Bööm ümweiht. Hoffentlich weern de lütten Blööm verschoont bleven!

De Wisch is bunt...

...un schüümt!

En enkelte Plant

Aver up de eerste Wisch lüchen uns al de lila-witten Modderdagsblööm mit ehr Blödenpracht an. Den Naam "Schuumkruut" harr de Bloom vun de Schuumzirpe, en Zikadenaart. De suug ut den Stengel Saft, un wenn se satt weer, bleven lütte Schuumklumpen trüch. Ok sehg so en Wisch ut, as wenn se mit Schuum vun de witten Blöden överseit weer. In'n Volksmund geev dat noch veel anner Naams för dat Wiesenschuumkruut: Kiwittbloom, Storkbloom, Pingstbloom, Aadborslötel, Kuckuksbloom un ok Modderdagsbloom.

Ok de lütt lila Bloom...

...süht vun wieden witt ut, wenn se op de Wischen schüümt

Ünnerscheedlich Wischenplanten

Von April bit Juni verwannelt sik de natten Wischen in en Meer ut witte un rosafarbene Blööden.

De Plant

Wieldat de Feuchtwischen dörch Entwässerung ümmer weniger warrd, wöör dat Wiesenschuumkruut (Cardamine pratensis) vun de Stiftung Naturschutz Hamburg un Stiftung zum Schutz gefährdeter Pflanzen to "Blume des Jahres 2006" utsöcht.

Aurorafalterchen!

Dat Wiesenschuumkruut is mit de eerst Plant, de veel Nektar hett un geern vun de eersten Bodderlecker (Falter) upsöcht warrd. De Aurorafalter freut sik al up dat Wiesenschuumkruut, findt he dor doch rieklich Nektar. Uns fallt besünners dat Männchen vun de Aurorafalter up. Den kann man goot an de orangefarvig Flünken kennen.

Blööt mit Knubben

Dat Wiesenschuumkruut tellt to de Kreuzblütler — de grote Familie vun Planten, de veer Blödenbläder in Krüüzfoorm hebbt. Dat kannst good in dat Foto sehn. Vele Kohlaarten un Röven, aver ok de Raps, de nu blöht, höört ok to düsse Familie.

To glieke Tiet mit de Modderdagsbloom blöht ok de Hunnenbloom (Löwentähn) mit de Modderdagsbloom üm de Wett. Meist as weer dat en Wettstriet mank de beiden Bloomensorten! Up en Fohrt dörch de Natuur wesseln sik de Farven up de Wischen in witt un geel af. Is en Droom.

Dat Geel vun de Hunnenblööm domineert de annern Farven

Mit enen smucken Blomenstruß vun Modderdagsbloom kemen wi fröhlich to Huus bi Modder an.