Dei Biller käönt Se per Klick vergröttern!

Dei Mars krieget in dei neegsten Johrn veel Besöök van dei Eern. Dat ligget doran, dat "de Steerns günstig staoht", as dei Astrologen seggen wöörn: dei Planeten staoht günstig, dei Reis nao'n Mars is nich so lang. Dat nüttet drei Länner ut, ehr Sonden hentauschicken. Natüürlich häbbet dei Sonden uk wedder schöne Naoms afkregen. Hier dei niegen Missionen:

Niege NASA-Missioon

Dei Weltruum-Agentur NASA geef den Start frei för dei Mars-Mission mit dat Mars-Fohrtüg orr Mars-Driewer "Perseverance", wat so veel heit as Taognackigkeit. An'n 30. Juli 2020 schall dei Mars-Rakete in Cape Canaveral in den US-Bundesstaot Florida üm 13.50 Uhr MESZ upstiegen.

Mars-Driewer bi einen Test in't Labor. Bild-Daoten: NASA

Dei Reise werd säben Maonde duurn, för den 18. Februar 2021 is dei Landung up den Mars plaont.

Dat SUV-grote un bold eine Tonne schwore Fohrtüg schall ein heelet Mars-Johr — dat sünd 687 Daoge up dei Eern — up den Planet warken. Dorbi schall hei Fels- un Bodden-Prowen upnähmen. Dei werd 2031 van eine naokaomen Missipon up dei Eern trüggebröcht.

Mars-Fohrtüg-Modell. Bild-Daoten: Wikipedia

China stellt den Häwen eine Fraoge

China settde an'n 23. Juli 2020 eine Marsmission in'n Gang.

Eine Rakete mit einen Orbiter "Tianwen-1" un einen Lander mit ein Mars-Fohrtüg is unnerwägens. "Tianwen" heit soveel as Häwenfraoge. Dei Orbiter schall in'n Februar 2021 in den Mars-Ümlop gaohn. Drei Maonde läöter schall dat 200 kg schwore Fohrtüg up den Mars landen. Drei Maonde lang schall hei dei Mars-Atmosphäre un den Mars-Bodden ünnerseuken.

Dei eierste Marsmission van dei Araobischken Emiraote

Dei Amerikaoner faotet ehre Daoten direkt up den Marsbodden, dei Mission van dei Arabischken Emiraote bliewt in den Mars-Ümlop. Dei Sonde "Al-Amal" ("Haopen") steeg all an'n 20. Juli up. Twei Johre lang schall sei üm den Planet ehre Baohnen fleigen. Dorbi werd sei dei Atmosphäre un den Mars-Klima-Wannel ünnerseuken.

Al-Amal-Sonde. Bild-Daoten: L. Lüske

Süh uck hier:
Microsoft-News
Wikipedia: Tianwen
Wikipedia: Al-Amal