Seis-Logo

InSicht lustert up den Mars-Wind

van Ludgerd Lüske


Dei NASA-InSicht-Sonde (InSight), dei kortens up den Mars landen dö, nöhm eiersmaols dat Klingen van den Mars-Wind up. Dei InSicht-Sensoren faotden ein orig deip klingen Rumpeln. Dat köm her van ein Bäwern dör den Wind, dei mit Geschwinnigkeiten tüschken 10 un 15 km/h an den 01.12.2018 van Nordwest nao Südoost weihde. Dei Winde harren dei glieke Richtung at dei Stoffdüwels. Dei löten Striepens up den Bodden an dei Lande-Stä achter sick. Dei kann man van den Mars-Ümloop ut knipsen.


Kosmisches Selfie: InSicht knipsde sienen Sünnenkollektor. Bild-Daoten: NASA

Einen InSicht-Sünnenkollektor (2,2 Meter Bredde) knipsde dei Kamera an dei Armbugen van den Roboterarm.


Skandaol: InSicht hett keen Selfie-Stick an Bord! Woans schall dat denn richtige Selfies maoken?! Sik verrenken, as hier?! Dat wichtigste Element fehlt!! För wat kriggt de unfähige NASA denn de velen Stüergeller?! — Kameransicht bi't Knipsen van den Solarkollektor. Bild-Daoten: NASA, affännert. Süh ok NASA-Artikel

Ein Bild van den Mars-Bodden knipsde dei HiRISE-Kamera van dei NASA Mars Ümloop-Sonde (MRO) an den 30. Mai 2014. Den Kontrast van dit Bild mök man starker. So kann man bäter wiesen, wor InSicht an den 26.11.2018 landen dö. Dei Upschrift wieset so einigermaoten dei Landestä van InSicht in Elysium Planitia.

Inteiket sünd baoben dei Richtung van dei Schwingungen, dei dei Wätenschup-Instrumente van InSicht faoten dön. Dei schwacken, diagonaolen Striepens van baoben lünks nao den rechten, neern Bild-Timpen wieset dei Paddwege van dei Stoffdüwels up den Marsbodden. Dei van InSicht upnaohmen Schwingungen loopet äöwerein mit dei Paddwege van dei Stoffdüwels.


Windfaohne un Stoffdüwelpadds. Ein Padd is naoteiked. Bild-Daoten: NASA, affännert. Süh ok NASA-Artikel

Dei Schwingungs-Spektrogramme (Frequenzspektrum äöwer den Tied-Affloop) up den Marsbodden nöhmen twei van dei drei InSicht-Seismometer-Sensoren (SP1, Sp2, SP3) för eine korte Tied up. Disse Spektrogramme wieset dei eiersten 1000 Sekunnen (bold 20 min) van dei eiersten InSicht-Seismik-Daoten up den rotfarvigen Planet. Disse Schwingungen an dei Sonde kömen van den Wind, sünners äöwer dei groten Solar-Anlaogen.

Süh hier: Audio/Video, kort; Audio/Video, lang.


SP2: Spektrogramm — Schwingungen van InSicht in dei eiersten 20 Minuten up den Mars. Bild-Daoten: NASA


SP3: Spektrogramm — Schwingungen van InSicht in dei eiersten 20 Minuten up den Mars. Bild-Daoten: NASA. Süh ok NASA-Artikel

Nu weit dei InSicht-Mannschkup, dat dei Seismometer-Anlaoge van dei disse Mars-Sonde pass warket. So käönt wi nu spannt wän, wat man up disse Oort äöwer den Marsunnergrund rutfinnen kann.


SO-Platt: Ludgerd Lüske
9.12.2018


na baven