Luftakrobaten 2019

In de verleden Johrn sünd uns flegen Insekten gewaltig trüchgahn. Al siet 'n Tied maakt de oostfreesche Hobbyfotograf Thomas Seemann Insektenfotos för Fotokalenner, de sien Team "Tandem"/OBW rutgifft. Verleden Johr hebbt wi mit düsse Fotos en Kalenner uns Bottervagels toegnet. Düt Johr schall dat üm annere Luftakrobaten in Pagels' Goorn gahn.

Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.


Mai-Akrobatin:
Huus-Feldwöps flüggt op Phacelia

vun Thomas Seemann un Marlou Lessing


Beid Fotomodelle, de lütte Wöps un ok de blöhen Phacelia, kannst mit Glück al Enn Mai beobachten.

Feldwöpsen sünd en Ünnerfamilie vun de Wöpsenaardigen, dorto höört ok wedder mennig Ünneraarten. All Wöpsen sünd Roofdeerten un freet anner Insekten, mehrst avers ok Plantennektar — se maakt dat jüst as wi Minschen, de wi ok Grööntüüch un Fleesch freet. De Huus-Feldwöps kannst an kennen, dat se bi't Flegen de Been so'n beten lösig na nerrn bummeln lett. Se is even so'n ganz Lockere. Düsse Aart is överall op'n Globus antodrepen; buten vun Eurasien sünd se avers inslepen woorn. Geern leevt se ok in minschliche Ümgeven. In de verleden Dekaden hebbt se sik mit den Klimawannel wied na Noord utbreedt, över Noorddüütschland bet na Skandinavien.

Anners as wilde Immen, de faken alleen leevt, leevt de wilden Wöpsenaarten ok in Staaten mit Königinnen. Woans dat passeert, is spannend: En Koppel Jungköniginnen deit sik tosamen un buut tohoop ut dröögte Holtfasern un Spucke en Nest. Kümmt dat avers an't Eierleggen, is dat ut mit de Fründschap: De stärkste Königin fritt de Eier vun de swackeren eenfach op. Dat deit se so lange, bit de annern opstekt un sik to eenfache Arbeiterinnen degradeert. Vun dor an löppt de Laden rund: De ca. 30 Arbeiterinnen pleegt un fodert de Brut un köhlt dat Nest in'n Sommer mit Water, bit al Anfang Juni de eersten Kinner sluppt. In uns warme Tieden villicht ja al in'n Maimaand!

Nu avers de Phacelia! Phacelia tanacetifolia, wat för en Plant! Ehr anner Naam is "Immenfründ", un dat is en verdeente Ehrentitel. Ut Mexiko inföhrt, warrt se egentlich vunwegen ehr smucke, duften Blöden tücht, avers för Immen, Hummeln, Sweevflegen, Wöpsen, Bottervagels & Co. is se en wunnerbore Nohrnquell. Bavento is se robust un bescheiden, verbetert den Bodden un blöht wohraftig vun Enn Mai bet deep in'n laten Harvst. Bi mi hett se sik vun sülvst mang Steen utseit un en wunnerboorn Sommer lang duft't. Man na een Johr starvt de Moderplant, kannst bloots höpen, dat se sik sülvst wieder utseit hett.

De Natuur helpt sik sülvst doch allerbest, muttst ehr bloots laten.

phacelia, woold
vun utreckte arms
lindblaag, himmellila,
atmen verspreken —

lütte pünktköpp beedt: kaam,
laat mi di
wat schenken!

so
beedt natuur
an, uns to geven
uns all to good.


Bild 2: kieker/pixabay

1.5.2019


na baven