Dat Kruut för'n Hornung:

Rosskastangel
— Arzneiplant vun't Johr 2008 —

vun Anke Nissen

Aesculus Hippokastanum — Familie Hippokastanaceae

Chestnut (englisch), Drusenkesten, Gichtbaum, Kestenbaum, Pferdekastanie, Saukesten, wilde Kastanie, wilder Kästenbaum, Zierkestenbaum.

Plattdüütsch: Kastangel, Kastana (Angeln), Kastang, Kastani (Pellworm), Kastandel, Katanje, Kastannel, Kristandel, Kristangel (Fehmarn), Kristannel.

de düüsterbrunen, glänzen Kerne, de "Kastangels" (Semen hippocastani)

• Mittel to'n Inrieven gegen Besweer in de Been, Venenlieden
• Stillt den Ramm (krampflösend)
• Ok vun binnen to bruken (Präparate ut de Apotheek)
• As Wildfoder
  

• För buten: Tinkturen un Salven / morgens un avends up de Stellen an't Been updragen, ok as Ümslag.
• För binnen: meist Kapseln orrer Drüppen. Een sull nich mehr as 250-300 mg Roßkastangel-Extrakt an'n Dag to sik nehmen, in de Schwangerschaft sull Roßkastangel nich bruukt warrn!

De Kastangel is keen heimisch Boom. He is eerst so üm dat 16. Johrhunnert herkamen, herbröcht worrn. Sien Heimat is Binnerasien, Tibet, Persien. Hüüt findt wi den Kastangel-Boom överall bi uns, an Alleen, in Parks un in de frie Natur.

De Kastangel-Boom blöht heel schöön in'n Mai. He hett grote, kegelförmige Blöden-Druven (Blütentrauben), de staht uprecht un sind witt orrer root mit gele Placken.

De Frucht is en gröön stachelig Kapsel (Schale). Dor sünd runde (wenn blots een Kern dor in steckt) orrer halfrunde (wenn twee dor in steckt) Kerne in. De sünd düüsterbruun un glänzt as poleert.

Dat gifft wohl keen Kind, dat in'n Harvst nich geern Kastangeln söken deit. De Kinner speelt mit disse schönen blanken Früchte un bastelt dormit.

Präparate vun Rosskastanien kann een in de Apotheek köpen.
En Roßkastangel-Tinktur kann een sik ok sülms maken:

Roßkastanientinktur

• Riepe un frische Kastangel-Früchte sammeln,
  glieks in Schieven snieden.
• De Schieven in en Buddel mit enen wieden Hals füllen (half vull füllen).
• Denn de Buddel mit kloren Snaps (38-40%) upfüllen.
  Goot dicht maken.
• 2 bet 3 Weken an enen warmen Platz stellen.

De Rinde vun de Roßkastangel (Cortex Hippocastani) gell fröher as Ersatz för Chinarinde, Fieberrinde.

Wenn en Peerd Hoosten harr (Pferde-Asthma), hett man fien-mahlen Kastangel-Mehl in't Foder mischt.
Vele meent, dat de Naam "Hippocastanaceae" dorher kümmt, denn "Hippo" bedüüdt Peerd.

Dat Öl ut de Frucht gell as Mittel gegen Gicht un Rheumatismus.
Ok en Tee ut de affullen Blöden gell as Rheumamittel.
Ik kann mi erinnern, dat mien Grootmudder extra ene lütte Tasch in ehren Ünnerrock neiht harr, un dor steken jümmers dree Kastangeln in. Elkeen Johr in'n Harvst kemen dor dree frische Früchte rin. Oma sä, dit weer en Schutz gegen ansteken Krankheiten, vör allen aver gegen Rheuma.

Mien Opa weer de Meen: Wenn de Kastangeln al in de Mitt vun'n September riep sünd, so is dat en Teken, dat dat enen strengen Winter warrt.

Dor kiek ik nu jümmers na hen — un för dissen Winter is dor keen Gefohr; de Kastangeln weern an'n 14. September 2007 noch nich riep.