Dat Kruut för'n Nevelmaand:

Muskaatnutt

vun Anke Nissen

Semen Myristicae = Muskatnüsse — Familie Myristicaceae

 

 

 

Anner Namen:

Muskat, Muskatnuss
Nuces moschatae = Macisnüsse
In de Ümgangsspraak heet de Samen Muskaatnutt orrer Muskaat, de Samenmantel heet Muskaatblööd (Muskatblüte) orrer Macis.

Sammelt warrt:

Samenkerne vun'n Muskaatboom = myristica fragrans

Warrt bruukt:

  • as Gewürz in de Köök, in de Bäckerie, bi't Herstellen vun Likör...
  • to'n Gewinnen vun't ätherisch Muskaatöl.
  • to'n Gewinnen vun Muskaatbotter (warrt bruukt as Huutreizmittel bi Inrieven, Plaaster, Salven).

"Ene Prise Muskaat is en smackhaft Gewürz."
Utspruch vun mien Grootmudder

Wi alltohoop kennt "Muskat", he höört aver nich to uns' heimisch Planten, de Muskaat-Boom. Tohuus is de Boom up de Bandainseln. Anbuut warrt he up de Molukken, de Groten Sundainseln, Indien un Ceylon.

Poppen-KoopmannsladenDe geel-roden Früchte vun den Boom hebbt jümmers blots enen Samen. Disse Samen is vun en lüchen root Samenmantel ümhüllt. De warrt vörsichtig afpellt un dröögt. Dorbi warrt he orange-geel un kümmt so as "Macis" in'n Handel. (Macis, ok Mazis, fälschlich ok Mazisblööd orrer Muskaatblööd, is de Samenmantel vun de Muskaatnööt. He kümmt ganz orrer mahlen in den Handel, warrt as Gewürz bruukt.)
Ok de Samen warrt dröögt un upslagen, in binnen is de Samenkern, de Muskaatnutt.

Männichmal warrt de Kerne kalkt, to'n Schutz gegen Insektenfraß.
De besten Muskaatnööt sünd de Bandanööt. De Nööt ut Papua (beten wat länglich, spitzig) un de ut Bombay (grötter, oft kugelig) sünd an'n wenigsten wert.

Blage Krink: Hier gifft't Muskaat!
Ok in den Poppen-Koopmannsladen gifft dat Muskaat (blage Krink)

Wenn de Minsch to veel vun de Muskaatnutt to sik nimmt, kriggt he Halluzinationen. Dat liggt an de Inhaltsstoffe vun dat Ätherisch Öl in de Nööt.
Wunnen warrt dat Ätherisch Öl dörch Dampfdestillation ut lüttmaakt Muskaatnööt. Dat Öl is meist ahn Farv orrer licht geel, un dat rüükt un smeckt as Muskaatnutt. Dat Ätherisch Öl warrt as Aromastoff bruukt, in Zahnpasta, in Medikamente, in de Parfümerie, as Bispill in Parfüm för Mannslüüd.

To 40 % besteiht de Muskaatnutt ut fettig Öl. Dat warrt Muskaatbotter nöömt.

Dat warrt seggt:

Ene Prise Muskaat is en smackhaft Gewürz.
Ene Muskaatnutt wirkt aphrodisisch.
Twee Muskaatnööt bringt den Rausch.
3 bet 6 Muskaatnööt bringt den Dood.

In lütte Mengen hett dat Gewürz en ähnlich Wirken as Amphetamine: Dat maakt den Minschen glücklich. In grötter Konzentration führt dat denn aver to Halluzinationen, jüst as bi LSD orrer Ecstasy.
De Muskaatrausch kann sogoor tödlich Folgen hebben: drei Muskaatnööt laat al dat Hart still stahn.

 

Uns Fründ Rudi Witzke vertell:

"Mien Beleevnis mit Muskaat vergeet ik so schnell nich.
Wi harrn in'n Knast en Realschaul inricht, un nu weer Prööv anseggt. Een vun de Knastbräuder dreihte dörch. Ik leet mi mit em in sien Zell insluten un heff denn versöcht, em to begöschen. Hei spendeer mi en besünner Drunk:

  • half Koffiepulver,
  • half reven Muskaat
  • un nich to veel kaken Water
  • un veel Zucker!

Ik heff dat drunken, man denn leep in mienen Kopp allens verdwass. Ik kreeg allens dörcheenanner, Stierns blänkern un danzen vör mien Ogen, de Ohren weern vull Knacken un Ruschen.
En half Stunn müss ik mi bi de Uppasser in ehr Stuuv langleggen un verhalen. "Muskat ist ein Rauschmittel!" — Dat weit ik nu."

En Empfehlen ut dat 15. Johrhunnert:

"Bohr Löker in en Muskaatnutt un drääg disse alsodann ünner de Achselhöhlen orrer an de Scham.
Na poor Daag mahl de Nutt twei
un misch vun dit Pulver wat dien Leevsten in enen Trank.
He (orrer se) warrt di leev hebben möten."

En Empfehlen för Mannslüüd — ok ut dat 15. Johrhunnert:

"Bohr en Lok dörch ene Muskaatnutt un drääg disse Nutt üm den Hals, dat steigert diene Potenz!"

De Araber hebbt reven Samenkerne orrer lüttmaakt Blöden vun'n Muskaatboom as Aphrodisiakum bruukt.

 

Siet mien Kinnertiet kenn ik de lütt Muskaatreibe. Jümmers wörr — un warrt — bi uns över Blomenkohl — ok över Rosenkohl orrer stoovten Wirsing — en Hauch Muskaatnutt afreven. Den MuskatreibeUtspruch vun mien Grootmudder is mi jümmers in mien Ohr:
"Ene Prise Muskaat is en smackhaft Gewürz", wobi ehre Betonung up de "Prise" leeg.

Besünners veel un oft aver warrt Muskaat in de Wiehnachtsbäckerie bruukt. Vele Minschen verbindt dat Wiehnachtsfest mit den charakteristisch Duft vun bestimmte Gewürze. De geevt dat Wiehnachtsgebäck nich blots den eenzigordig Smack, nee, se maakt ok, dat de Minsch sik ganz besünners wohl föhlt.
To disse Gewürze höört de Muskaatnutt. Ok Muskaat heevt de Stimmung un "maakt dat Hart vun uns Minschen apen", as Hildegard von Bingen dat al in't Middelöller seggt hett.

De Muskaatnutt, de uns in Wiehnachtsgebäck un Glühwien so goot smeckt, findt wi ok in en vun de bekanntest Getränke up de Welt: in Cola. De "Cola" hett — neven Koffein un Zucker — Gewürz-Uttöög vun Ingwer, Zimt, Koriander, Nelken, Vanillin un Muskaat in sik. Villicht is dat ja de Kombination vun de Gewürze — de heilen Gewürze —, de dit Getränk so erfolgreich maakt hebbt.

MuskatnöötIn uns' Familie warrt geern "Muskatklößchen" eten. Ik heff dat Rezept vun mien Mudder övernahmen:

Muskaatklümp

  • Margarine mit Solt in'n Pott up de hitt Heerdplatt dünn warrn laten.
  • Liek veel Mehl dorto geven — goot rögen,
  • liek veel Water dorto geven — goot rögen,
  • liek veel Eier dorto geven — goot rögen,
  • bet allens to'n glatten Deeg worrn is.
  • Muskaatnutt dor över rieven — goot rögen.
  • Afköhlen laten.
  • Denn lütte Klümp mit'n Teelöpel afsteken,
  • in ganz sachen un even kaken Water goor trecken laten.

Ik dreih geern lütte runde Klümp, dat geiht mi gauer vun de Hand. Un jichtens kneedt ik noch 'n beten Mehl ünner den Deeg, bevör ik de Klümp dreih, anners sünd se mi meist 'n beten to week un licht.

De Klümp smeckt goot to Frische Supp, Höhnersupp, Spargelsupp.



na baven