Kanarischer Safran

vun Anke Nissen

Canarian saffron, Azafram Canario


To'n Anhören hier klicken:

Lesen deit Anke Nissen in holsteiner Platt.

Se köönt de Fotos per Klick vergröttern.
Trüch kaamt Se denn mit den Zurück-Knoop vun'n Browser.

 

 

 

 

Ole bröch mi vun de Canarischen Inseln Safran mit. Ik heff mi bannig freut, man ik heff glieks sehen, dat disse gelen Fadens nie nich echten Safran sünd.

De Kanarisch Safran warrt vun de Färberdistel wunnen (Cartamus tinctorius). Disse Safran warrt up de Kanaren mehrst to'n Farven vun Eten bruukt. Up Ole sien Geschenk stünn: "Disse Safran bringt Smack un Farv up juuch Töller". Man mit sien Smack is dat nich wiet her, dor is em de echte Safran wiet över. Ik heff later unsen Ole mal echten Safran wiest un ünner de Nääs hollen. Un denn leet ik em an "sien" Kanarisch Safran snuppern. Ok he hett den groten Ünnerschied glieks faststellt.

De Kanarische hett en angenehm aromatisch Krüderduft — man he rüükt keen beten as Safran. Ik kann de Röhrenblöden vun de Färberdistel up'n eersten Blick vun den echten Safran siene fadenförmig Narbenlappen ünnerscheiden. De Färberdistel, also de Kanarisch Safran, farvt dat Gericht veel, veel weniger as echten Safran un he bringt so goot as gor keen Aroma rin.

De Färbedistel is in fröher Tieden to'n Farven vun Seide bruukt worrn.

Mi is disse falsche Safran vör vele Johr al mal in de Mööt kamen. Wi weern up Fuerte Ventura. Dor heff ik up en Buurnhoff, de beten wat alleen leeg, dröögt Röhrenblöden sehn, de wohl vun de Färbedistel stammen kunnen. Un ik heff dormals dach: Falschen Safran.


Echter Safran


Italienische Safran

De Safran, de vun de Färbedistel stammt, warrt up de Canaren "canarion saffron" nöömt, annerswo snackt man vun "Falschen Safran" orrer "Saflor". De düre Echte Safran warrt leider veel un geern fälscht, verfälscht. So warrt as Bispill de Strahlenblöden vun de Ringelblomen (Calendula officinalis) ünner Safran mischt orrer ok de roden Blöden vun uns Färbedistel (Carthamus tinctorius = Saflorblöden), ja sogoor pökelt un dröögt Fleeschfasern. Orrer Fälschungen bestaht ut Kurkuma-Mischen (Geelwörtel, Rhizoma Curcumae) orrer ut Ringelbloom, de mit Anilinfarven farvt worrn sünd...


Safran ut den Orient




Safran ut de Toskana

För mi is dat en groot Freud, dat Ole mi dissen Canarischen Safran mitbröcht hett. Ik freu mi, dat he in de Frömde an mi dacht hett, un ik freu mi, dat sien Geschenk mi anreegt hett, mal weller beten över Safran natodenken — ditmal över den Kanarischen Safran, de egentlich gor keen Safran is.


Kanarisch Safran

 

 


14.9.2014


na baven