Dat Kruut för'n September:
Dat Johanniskruut

Johanniskraut - Hypericum perforatum (durchlöchertes Hartheu) - Familie: Guttifrae - Ünnerfamilie: Hyperiaceae

Anner Naams:
Alfblut, Blootkruut, Christi Krüüzbloot, Dusendlockkruut, Unserer Frauen Bettstreu, Elfenbloot, Fruunskruut, Wilde Gartheil, Hartheu, Herrgottsbloot, Unseres Herrgotts Wundenkruut, Hexenkruut, Jageteufel, Jungfernkruut, Liefwehbloom, St. Johannis-Bloot, Teufelsflucht, Tüpfelhartheu, Johanniskruut, Johanniswurz, Mannskraft, Dusendlochkruut, Düwelsfuchtel.
Sammelt warrt:
de ganze Plant (Kruut), in 'n Juli bet September. Uppassen bi't Sammeln: De Stengel mütt tweekant wesen, nich veerkant!
Wirken:
beruhigt, antidepressiv
So warrt't anwennt:
1 Eetlöpel mit ¼ l Water upkaken, 10 Minuten trecken laten.
Ik do geern Kandis in dissen Tee.

För buten: Oleum Hyperici = Rodes Johannisööl, för Wunnen, ok Brandwunnen.
Johannisööl nich drinken orrer innehmen!


Johanniskruut is'n Plant, de ik bannig geern mag. Man kann so feine Geschichten spinnen, wenn man ehre gelen Blöden afbreken deit un denn de rode Saft - root as Bloot - rutkümmt.

En Dichtersmann ut Lübeck - Hans Heitmann - as Bispill vertellt: Wenn en jungen Minsch twee Johanniskruut-Telgen in en ole Muur steken deit un dor ünner sienen egen Namen schrifft un den vun sien hemelige Leevste, - un wenn denn de beiden Telgen sik to'nanner böögt, denn so kann en höpen, dat dat mit de beiden wat warrt. Böögt de beiden Telgen sik vun'nanner weg, denn gifft dat keen Höpen.

De Bläder vun't Johanniskruut hebbt vele lütte Löcker, dörchsichtig Punkten. Dat seggt ok de latiensch Naam Hypericum perforatum, wat soveel heten deit as "durchlöchertes Hartheu". In mien Kinnertiet hebbt wi jümmer söcht, wat wi nich mal en Johanniskruutblatt mit negen Löcker finnen kunnen, denn dat bedüüdt, dat een sik wat wünschen dörv. Man, ik heff nie nich dat Glück hatt.

Johanniskruut hebbt al de olen Germanen kennt. Dat schull de Minschen bistahn gegen Gespenster.

 

Johanniskruut gell as en hillig Kruut. "Gott hett en groot Geheimnis in disse Plant leggt" heet dat in M. Treben sien Book "Heilkräuter aus dem Garten Gottes"(1986).

 

Johanniskruut höör ok mit in den Weihbuschen, den de Lüüd an'n 15.August (Maria Himmelfohrt) in de Kirch bröcht hebbt, dat he segent wörr. Nastens wörr he an de Stall- orrer Hoffdöör hängt (ok hüüt noch!).

Johanniskruut maakt den Minschen ruhig.
As mien Moder doot bleven weer un wi all trurig - man ok upreegt - weern, heff ik uns - un vör allen mienen olen Vadder - mit Johanniskruut-Drüppen hulpen.
As de Truurfier sien schull, keem Wiebke - ene moderne, junge Fru - un fraag:
"Tante Anneke, allens an mi is an't Bevern un ik mütt jümmer wenen, kann ik en poor vun diene ‚Zaubertropfen' kriegen?"
Un disse Töverdrüppen weern ut wieder nix as ut Johanniskruut.

Ik meen, swore Tieden, hille Tieden, kann en beter dörchstahn mit Johanniskruut.

Anke Nissen

To'n Wiederlesen över dat Johanniskruut twee schöne Links:

www.feiler-binzwangen2.de/pflanzen/hypericum/hypericum.htm
www.feiler-binzwangen2.de/Galerie/johanniskraut.htm (schöne Biller!)



na baven