Dat Kruut för'n Heumaand:
De Bickbeer (Heidelbeer)

vun Anke Nissen

Vaccinium myrtillus — Familie Ericaceae

 

 

 

 

 

 

Anner Namen:

Bickbeer, Blaubeer,
Äugelbeere, Bäukbeer, Bicksbeer, Blaubeere, Blaue, Besinge, Gandelbeere, Griffelbeere, Haselbeere, Häeselbeere, Heberte, Heidbeere, Heibeere, Heilebern, Heipelten, Heiti, Herpel, Krähenaugen, Kranaugen, Kuhtecken, Mehlbeere, Moosbeere, Mostbeere, Pickelbeere, Puckelbeere, Rißbeere, Schnuderbeere, Schwarzbeere, Sentbeere, Setbeere, Siebbeere, Walberte, Waldbeere, Wehlen, Wolbeere, Wolber, Worbeln, Worber
Sammelt warrt:
 De Frucht (Fructus Myrtilli) in'n Juli un August;
De Bläder (Folia Myrtilli) in'n Juni

Warrt bruukt:

Bläder:

  • As Tee gegen Dörchfall (Gerbstoff).
  • As Mittel to'n Gurgeln bi Entzündungen in'n Mund.

Frucht:

  • gegen lichten Dörchfall,
  • to'n Farven vun Likör un Essig,
  • för Heidelbeerwien,
  • Heidelbeersaft,
  • Heidelbeergeist.
So warrt't anwennt: 3 Eetlöpel dröögt Beern mit ½ l kolt Water övergeten,
hitt warrn laten, 10 Minuten trecken laten.
"Myrtillus" kümmt vun Myrte, de Bläder seht en beten ut as Myrtenbläder.
De Beeren smeckt roh heel goot, villicht mit mit'n lütt beten Zucker un veel Melk. Se warrt geern to Muus kaakt.
Hüüt gifft dat Bickbeerbüüsch, de een in 'n Goorn planten kann. De hebbt feine, grote Früchte, un de smeckt mi bannig goot. Ik back dormit geern mal Bickbeer-Pannkoken orrer Bickbeertort.

Dat gifft 'n lütt feine Geschicht:
As mal en grote Hungersnoot weer, hett en ole Fru in de Kirch üm Hülp beedt. Dor is ut den Rosenkranz vun de Madonna en Perl rünnertrudelt. Se truller na buten un dor, wo se liggen bleev, dor is de eerste Bickbeerbusch wussen.
Dorüm mutt 'n bi't Sammeln all de Beeren, de rünnerfallt, liggen laten. De höört Maria to. De gellt as "Muttergottesbeern".

Fröher geev dat veel to bedenken:

  • So hett'n glöövt, dat dor, wo Bickbeern wasst, en Ingang vun Ünnereerdsche is.
  • Wenn en Bickbeern plücken wull, müß jümmers de eerste Beer up enen Steen leggt warrn as Opfer för den "Bickbeermann".
  • Later as Bartholomä (24. August) dörven kene Bickbeern mehr plückt warrn. Denn sünd se nich mehr to eten, denn hett de Düvel dor up scheten.
  • En Fru, de en Kind kriggt, schull kene Bickbeern plücken, anners hett dat Kind nastens vele Placken (Muttermale).
  • Wenn'n an'n Johanni Bickbeern itt, hett'n dat hele Johr keen Buukpien, keen Fever.
  • Wenn'n vun Bickbeern dröömt, bedüüdt dat Truur un Krankheit.

Tee ut Bickbeer-Bläder — Heidelbeerblätter-Tee

  • 40 g Bickbeerbläder mit 1/2 l hitt Water övergeten.
  • 10 Minuten trecken laten.
  • Dörchseihen.
  • 3 bet 4 Tassen dorvun elkeen Dag drinken.

Disse Tee helpt bi en swake Blaas un to'n Afwehren vun Bakterien.
De Tee warrt ok to'n Gurgeln nahmen, wenn een Besweer in'n Rachen hett.
Vun buten kann he to'n Waschen un för Ümslääg nahmen warrn bi Kranksien vun de Huut, as Bispill bi Schuppenflechte.
Ok bi Brandwunnen is Bickbeerbläder-Tee goot un ok bi Entzünden vun de Ogen.
(Ut den Natur-Kalenner vun Dr. Barbara Wedekind)

Gegen Entzünden in'n Mund

Bläder vun de Bickbeern utpressen.
Vun dissen Saft enen Sluck in'n Mund nehmen un lang binnen laten.
Dit mehrmals an'n Dag wedderhalen.
Tee ut Bickbeern — Heidelbeerfrüchte-Tee

Wenn Kinner Dörchfall harrn, denn hebbt uns Vöröllern al jümmers dröögt Bickbeern dorgegen bruukt:

  • 3 groot Eetlöpel vull dröögt Bickbeern
  • mit 1/2 Liter Water övergeten,
  • 10 bet 15 Minuten bi lütte Flamm kaken laten,
  • afseihen.
  • Den Tee licht sööt maken.
  • Hiervun mehrmals an'n Dag 1/4 orrer 1/2 Tass drinken.

Helpen kann Bickbeern-Tee bi't Behanneln vun Dörchfall bi Lüttkinner.
Ok kann disse Tee dorför sorgen, dat de Kinner veel drinkt.

Wenn wi Kinner Dörchfall harrn, denn hett mien Grootmudder versöcht uns to helpen. Se hett so 40 g Bickbeern in 1/4 l Water kaakt.
Dor hett se denn Haferflocken ünnermischt.
Kann ik empfehlen, hett jümmers goot hulpen.

Gegen Hämorrhoiden

  • 4 Eetlöpel dröögt Bickbeern mit 1/2 l kolt Water övergeten,
  • 10 Minuten kaken,
  • afseihen.
    Veer Weken lang elkenen Dag twee Glääs dorvun drinken.
    Dat helpt, dat de Hämorrhoiden utheilt.

Heidelbeer-Shake (för twee Glääs)

  • 100 g Bickbeern
  • de Saft vun een Zitroon
  • ene Prise Muskat
  • 2 Eetlöpel Joghurt
  • 2 Teelöpel Honig
  • Minzbläder
  • Allens pürieren un mit Water upfüllen.

Smeckt goot. Gifft Energie. Is goot för den "Kreislauf". För Sportler goot to bruken.


na baven