Den witten Klee laavt de Hummeln över den grönen Klee!

Hummelhoochtied bi de Boomhummeln

vun Antje Heßler


Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.

Bi godes Weder in August fleegt vele Hummeln in unsen Goorn. Up mien Blomen seh ik meistens Boomhummeln. De Boomhummeln sünd besünners flink. Kuum dat se sik up en Blööt daallaten hebbt, sünd se al wedder weg. Se fleegt vun Bloom to Bloom. Se leggt grote Strecken trüüch, mehr as twee Kilometer. Sünd so richtig richtig wilde Hummeln!


De Hummelfloog — aver nich vun Rimski-Korsakow, sünnern vun't Original


Hummel op'n Storkensnavel


De Boomhummeldrohn — also He

Boomhummeln sünd hellbruun bit dunkelbruun, mitünner meist swatt. Up den Kopp hebbt se en kreisrunden, gelen bit düsterbrunen Hoorbüschel, süht meist en Kroon liek. Dor kannst se goot an erkennen. De Königin is ornlich wat gröter as de Drohnen un de Arbeiderinnen.

De Boomhummeln, de in den Augustmaand noch fleegt sünd meistens Jungköniginnen. Se freet sik Wintervörraat an, dormit se den Winter överstaht. Överwintern doot se in de Eer.


De Arbeitshummel. Hier kümmt de gode Figuur beter rut:
Hummeln sünd gor nich dick!


De Königin vun de Boomhummeln

In't kamende Johr sünd dat de Nestgründer. Jede Hummel, de in't tiedige Fröhjohr updükert, is en Königin. Wenn se ut de Eer krabbelt, warmt se sik eerstmal in Sünnenschien up. Denn söcht se na en goden Placken, nehm se ehr Nest buun un de eersten Larven groot trecken kann. Dat sünd later de Helpslüüd, de Arbeiderinnen vun de Hummeln.

De Boomhummeln buut ehr Nest ümmer över de Eer. In Boomhöhlen, Muurritzen, verlaten Vagelkassens, ole Schüüns un Bööns usw. Ok ünnert Dack vun en Garaag buut se. Se sünd heel waak un verteidigt ehr Nest. Kümmst du to dicht an dat Nest, denn griept se di an un fleegt di in't Gesicht.


Mutter, unterm Dach — is en Flooglock vun't Hummelnest!


Kiek eis, de lütt Kiekinnewelt vun Hummel!

So is mi dat ergahn. Jedeen Mal, wenn ik mien Auto ut de Garaag holt heff, full mi en luut Brummen vun Hummeln över mien Kopp up. Se kemen ganz dicht an mi ran. Ik heff mi ümmer gau wegdükert. Se harrn över de Garaagendöör en Fluglock. Door weer ümmer regen Verkehr. Dat güng rin un rut. Grote un ok lüttere Boomhummeln wöör ik wies. Verkehrsstau geev dat nich, se möken sik ümmer goot den Weg frie.

 


Hummel op Malve. Dat deit se vunwegen de Farv!


"Social Media": An't Flooglock is jümmers wat los!


De Arbeitersche in'n Anfloog op de Arbeit


Düsse Arbeitersche hett al mächtig wat an de Hacken — Pollen


Duppelhummel? Hummelhummel? Sünd de etwa vun Hamborg?

Enes Daags, ik wull jüüst de Garaagendöör tosmieten, wöör ik up de Eer en seltsam grote Hummel wies. Weer dat een vun de Hummeln? As ik mi de wat genauer ankieken wull, flöög se an de Garaagenwand.

Dat weer nich een Hummel, dat weern ja twee! En grote un en lütte Hummel! De lütte Hummel seet huckepack up de Grote. So krabbeln de beiden tohoop an de Wand na baben. En Hummelhochtiet! Goot, dat ik mien Knipskassen bi mi harr.


Hummelhummel is ehrder Morsmors...


...avers se is nu mal sien Swarm!

En poor Biller kunn ik maken, aver denn föhlen sik de Hummeln stöört un flögen in Tandem dorvun. Nu heff ik jeden Dag de Boomhummeln beobacht. Se weern to wiet weg un flögen ok ümmer glieks dorvun. Aver up eens vun mien Biller kunn ik en Boomhummel utmaken. Vun de Tiet an heff ik versöcht, de Boomhummel niep un nau ünner de Luup to nehmen. Erkennen kunn ik se goot an den Haarbüschel up den Kopp.


Dat Haarbüschel is de Hummel!


Faken kennst de Hummel(hummel) ok an'n Mors(mors)

Nu kann ik de Boomhummel goot vun de Eerdhummel ünnerscheden. De Flugsaison vun beide Hummelnoorten is ok bald vörbi.


Hummel seggt Adjüs!


En kaptaalen lütten Film to de Hummelhoochtied finnst ok hier.
18.8.2013


na baven