Harvsttiet in'n Klützer Winkel

vun Antje Heßler


Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.

De Sommer is vörbi. De Harvst steiht vör de Döör. An de Bööm hängt riepe Appels un Plummen. Dat Koorn is afmeiht un up de Stoppelfeller liegt grote Heu- un Strohrullen. Hocken as fröher gifft dat nich mehr. De Larm vun Trecker is to höörn. De Buurn bearbeit de Feller för de Wintersaat.

Wedder mal weern wi na den Klützer Winkel föhrt. Müssen doch mal kieken, wi wiet uns Buur vun den Biohof bi Kalkhorst mit de Feldarbeit weer. Up he ok mit enen Trecker bi de Arbeit weer?

Up unsen Weg na sien Feller weer nix to höörn. Keen Trecker möök Larm. Wat hebbt wi uns freut, as wi em up dat Land wies wöörn. He harr sien twee Peer vör den Ploog spannt, möök de Harvstarbeit noch mit de Peer!


"Da wunnerwarkt ji, wat? Wi maakt de Arbeit!"

De beiden Meckelnborger Kooltbloot trocken den Ploog dörch den sworen natten Bodden. De Buur harr dat Leih in de en Hand. Mit de anner Hand drück he den Ploog in de Eer. Dat weer swore Arbeit, dat kunn man sehn.


Bargdaal...


...in de Kehr...


...un wedder bargop!


Is keen lichte Arbeit!


Düt is de Ploog

As de Naversche mit ehr lütt Deern vörbi keem, möök he eerstmal Paus. Se bröch ehr Peer up de Koppel. Ehr lütt Dochter seet as so'n olen Rieder up en Pony. De korte Paus kunnen de Peer un de Buur goot bruken. Wi hebbt uns dorto stellt un en richtig schönen Klöönsnack hollen. Denn güng de Arbeit aver wieder. De Peer hüngen bi de Kehr richtig in de Sielen. Ümmer noch en Runn un ümmer noch een. Endlich weer Meddagstiet. De Buur spann de Peer ut un nehm de Speelwaag up den Rüch. De beiden Peer wüssen genau, dat dat na Huus güng un dat se an de Krüff kemen. De Buur kunn se nich mehr hollen. He müss achterna. Wi hebbt blots noch unser "Tschüüs!" achterran ropen.


Nu man sutje!


So, nu köönt wi...


...Fieravend maken!


Up den Nahuusweg hebbt wi noch wedder enen Trecker mit'n Ploog in Sleeptau bi de Arbeit sehn. De Arbeit weer so veel lichter. De Buur müss blots up dat Gaspedaal petten. En annern Trecker harr nich blots enen Ploog, de harr glieks Schieveneggen un Sleepbalken achter sik. Dormit möök he de Eer vun dat Feld för de Wintersaat glatt.

 


"Ha, so'n komische Trecker, da kannst ja nich mal mit snacken! Da sünd wi doch beter!"

Wi hebbt unsen Biobuurn bewunnert, de noch na ole Oort sien Land bestellt. De Peer möken kenen Larm un hebbt ok de Ümwelt nich mit Afgas belast!



To'n Anhören hier klicken:

Lesen deit Antje Heßler in holsteiner Platt.

Fotos: A. Heßler
18.9.2011


na baven