Gaia

Gaia mök einen gauen Start

van Ludgerd Lüske

Nao Deil 4

19. Dezember 2013: Dei ESA-Sonde Gaia steeg an dissen Dag an Bord van eine Sojus-Drägerrakete van Europa sienen Weltruumbaohnhoff in Kourou in Französchk-Guayana in den Weltruum up. Dei Updrag is eine Bestandsupnaohme van eine Milliarde Sünnen.

Gaia schall dei bit nu hen nauste Korte van use Melkstraoten upnähmen. Dat präzise Faoten van dei Positionen un Bewägungen van 1 % van bold 100 Milliarden Sterne werd ein neiet Upkloren van dat Herkaomen un dat Entstaohn van use Galaxie möglick maoken.


Ariane-Start

Dei van Arianespace insettde Sojus steeg an'n 19. Dezember üm 10.12.Uhr MEZ up.

Nao dat Affschmieten van dei eierste Stufe zündede teihn Minuten läöter dei bäöwere Fregat-Stufe, womit Gaia eiers maol up einen Parkorbit in 175 km Höchte bröcht werd.

Dat tweide Zünden van dei Fregat, ölf Minuten dornao, bröchde Gaia denn up ehre Äöwergangsbaohn, up dei sei 42 Minuten nao den Start van dei bäöweren Raketenstufe afftrennt wörd. Dei Eerdstation in dat Europäischke Ruumfleigkontrollzentrum van dei ESA in Darmstadt stellde dei Kontakte för dei Telemetrie un Laogestürbefähle her, dormit dat Ruumfohrtüg siene Systeme hochfeuhern kunn.

Gaia is nu up den Weg tau den Lagrange-Punkt L2

Video: Gaia: Dei Start in't All

Dat Sünnenschild, dat dei Arbeitstemperatur van Gaia wohrt un up dat noch Solarzellen för ehr Andriewen upbawed sünd, wörd in einen teihn Minuten langen, automatischken Vörgang upspannt. 88 Minuten nao den Start was dit Wark fardig.
Gaia is nu up den Weg nao ehre Ümloopbaohn üm den so neumten Lagrange-Punkt L2 in bold 1,5 Mio. km Affstand van dei Eern, wo dei Schworkraft van Eern un Sünne in dei Waoge sünd.



Hier is wieset, wat dei Lagrange-Pünkt sünd

Einen Dag läöter gäwet dei Ingenieure van dei Eerdstation an Gaia Order för dei eierste van dei beiden wichtigen Driewwarkzündungen, womit sei up dei vörseihn Fleigbaohn in Richtung van den Lagrange-Punkt L2 kummp. Dat tweide Zünden is so 20 Daoge nao den Start plaont, so kummp dei Sonde denn up ehre Insatzbaohn üm L2.

Up den Weg dorhen werd uck dei veier Maonde duuren Insatzprobeierphaose inleitet, wobi man aale Systeme un Instrumente anstellen, naokieken un kalibreiern dait. Eiers denn is Gaia praot för ehre fief Johre duuren Wätenschkupsmission.

Dat Sünnenschild dait Gaia van dei Hitte un dat Lecht van Sünne un Eern affschermen un so för gliekblieben Ümgäbungsbedingungen sorgen, dei dei orig empfindlicken un komplexen Instrumente van dei Sonde för ehre präzise Bestandsupnaohme van dei Sterne in dei Melkstraoten bruket.

Gaia werd bold eine Milliarde Sterne anviseiern


Gaia schall dei bit nu hen naueste Korte van use Melkstraoten upnähmen

"Gaia dait up dat Wäten van dei all 1989 startete eierste ESA-Mission tau'n Upnähmen van eine Sternkorten, Hipparcos, upbawen, so winnt man Inblicke in dei Geschichte van dei Galaxie, in dei wi läwet", so sägg dei ESA-Generaoldirektor Jean-Jacques Dordain. "Dat disse Mission van dei neie Generation nu up'n gauen Weg is, us neie, baohnbräken Künne äöwer dei Melkstraoten tau gäben, verdanket wi dat Know-how van dei europäischke Ruumfohrtindustrie un dei europäischken Forschkers."

Bi dat fäökener affloopen Hemmelsdörseuken in ehre fiefjöhrige Insatztied werd Gaia jeden einkeln van dei bold eine Milliarde Sterne in'n Dörschnä 70 Maol anvisiern un den siene Position, wichtigsten Eigenschkupen, Lechtheit un Temperatur un chemischket Tausaomesetten faoten.

Dör dei minnen Ännerungen van den Blickwinkel van Gaia bi ehren jöhrlicken Sünnenümmloop kann sei nich blots den Affstand van dei Sterne, sünners in dei Tied van ehren Insatz uck dei ehr Eigenbewägen an den Hemmel mäten. Position, Bewägung un Eigenschkupen van einen Stern gäwet Wiesteiken up dei Geschichte van sien Entstaohn.

Dör dat breit anleggte Sternetellen van Gaia käönt dei Forschers eine Ort Stammboom äöwer use Galaxie tausaomestellen. Dei Bewägungen van dei Sterne kann man in'n Tiedraffer sotausäggen "trüggespulen", so kann man rekonstrueiern, wo dei entstünnen un wie sick dei Melkstraoten äöwer Milliarden Johre hen dör Verschmelten van lüttkere Galaxien upbawen dö, off in't Gägendeil "vörspulen", so kann man ehr Schicksaol in dei Taukunft aohnen.

Nao Deil 2


Originaolartikel hier, Südollnborger Platt: Ludgerd Lüske
Bild Ariane-Start, Gaia in'n Weltruum: ESA
Bild Lagrange-Pünkt afännert nao Wikipedia

26.12.2013


na baven