 |
ExoMars kummp an'n 19. Oktober 2016 bi den Mars
an
van Ludgerd Lüske An'n 19. Oktober 2016 kummp dei ExoMars-2016-Mission in den Ümloop bi den Mars an. In dei süftige Tied dait dei Landeapparaot Schiaparelli up den Marsbodden landen. Inlaoden Reporters van väle Medien sünd bi dei twei Daoge duuren Aktion in dat Ruumfohrtzentrum van dei ESA in Darmstadt mit dorbi. ExoMars is eine Mission van dei ESA un dei russischken Weltruumbehörde Roscosmos. Dortau hört dei Trace Gas Orbiter (TGO) un Schiaparelli, dei "Entry, Descent and Landing Demonstrator" (EDL).
Seuken nao dat Herkaomen van Methan up den Mars Dei TGO schall dei Gase in dei Marsatmosphäre nau mäten. Besünners wichtig sünd dei Spauergase, so uck Methan, dei up einen aktuellen Ursprung henwieset. Mit dat TGO will man dat Methanvörkaomen verbunnen mit dei geograophischke Laoge un dei Johrestieden faoten. Up disse Oort kann man rutkriegen, off dat Herkaomen eine geograofischke off eine biologischke Ursaoke hätt.
Relaisstation för dat ESA-ExoMars-2020-Fohrtüg Dat TGO fang Ende 2017 mit mit siene Wätenschkup-Mission an, naodem man äöwer ein Johr weg komplexe Bremsmanöver maoken dait. So krigg man et nau in einen runden Ümloop. Dei Sonde werd läöterhen uck as Relaisstation för dat ESA ExoMars 2020 Fohrtüg insettet. Schiaparelli spring an'n 16. Oktober van dat TGO aff, duket aff in dei Mars-Atmosphäre un landet nao ein 6 Minuten duuren Daolstiegen an'n 19. Oktober in dei Gägend van Meridiani Planum.
Dorbi probeiert man as Vörsorge för taukaomen Missionen eine Riege van Technologien ut, dei för ein kontrolleiertet Affstiegen un Landen up den Mars nödig sünd, so ein Hitteschild, Fallscherm, Andriew-System un eine quetschbore Hüllenkonstruktion. Schiaparelli hätt uck ein lüttket Wätenschkup-Paket bi sick, dat Windgeschwinnigkeiten, Feuchtigkeit, Druck un Temperatur an den Landeplatz upnimmp. Doräöwer weg werd dat Modul dei eiersten Mätdaoten tau Elektromagnetischke Felder up den Marsbodden faoten, dei vellicht Informationen äöwer dei Start-Ursaoke van dei Sandstürme gäwen käönt. Van dat Afftrennen van Schiaparelli van dat TGO an den 16. Oktober geef et ein Online-Äöwerdrägen för Medien ut aale Welt. Tausaome mit den ESA-Generaoldirektor Jan Wörner, den Astronaut Alexander Gerst un den Experten för disse Mission bi dei ESA/ESOC löp dat Beobachten van den Intritt van dat TGO in den Ümloop un uck van dei Landung van Schiaparelli. Dortau giff et an'n 20. Oktober eine Pressekonferenz. Denn wätet wi, dat dei Sonde up'n Mars off in'n Mors is. ExoMars-Signaole wiest den stabilen Marsümloop van dat TGO an
Dei Signaole van dat TGO kennt man an dei hogen Spitzen. Doran käönt dei Forschkers seihn, dat disse Sonde pass un stabil in den Marsümloop ankaomen is un den Landeapparaot (Schiaparelli) affsetten dö. Dei üm den Mars fleigen Satelliten mäötet noch dei Signaole van Schiaparelli äöwernähmen un nao dei Eern wiederleiten. Solange weit man nich, wat mit den Landeapparaot up den Marsbodden los is.
19.10.2016
|
