X-31 un P-18


De Eemkenhügel — Deel 4:

"Ho-Ruck!" — Vun't Lastenslepen

vun Antje Heßler

na Deel 2
na Deel 3
Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.


De Woold in'n Lent


"Na, ji Eemken?"

Dat wöör Tiet, dat ik mal wedder na de Eemken keek. Upwaakt weern se al bi den letzten Besöök. Harrn al den Hügel goot utbetert un dorna en Sünnenbad nahmen. Intwischen weer de Wooldgrund gröön, de Anemonen blöhen. Müss doch kieken, ob sik noch wat verännert harr.


"Na du grote Büüt?"


De Eemken hebbt keen richtige Naams, bloots so'n Aart Nummern, as de Borgs.
Hier begrööt de Eemk C-31 de Kollegin U-09


"Ik heff en grote Büüt in en rode Jack tofaat! Deerns, helpt mi düsse Büüt aftransporteern! Packt mit an!"

Al as ik in de Neegde vun den Hügel keem, wöör ik wies, dat veel Eemken up dat Ümfeld vun den Hügel rümlepen. Dor weer Hochbedreev! Ik müss uppassen, dat se nich an mien Been hochkrabbeln. Ümmer wedder weern welk an mien Büx.


De Eemk L-39 (28. vun links ünner den Grasspier) un ehr Kolleginnen

An den Hügel kunn ik utmaken, dat de Eemken all in een Richt lepen. Mit ehr'n Geruch, de Pheromone, harrn se ehr Kolleginnen anlockt. Dor weer en richtige Straat entstahn, en Eemkenstraat. Vörsichtig güng ik de Straat na. Dree Meter wieder weer anschienend dat Enn vun de Eemkenstraat. Dor drepen sik ganz veel Eemken. Dicht bienanner deelwies överenanner billen se enen richtigen Hupen. Dat sehg na enen niegen Eemkenhügel ut. Oder geev dat dor besünneres Foder? Dat de sik nich ümrennt!


Op düsse Eemkenstraat herrscht Linksverkehr!


Op düssen Deel vun de Straat is dat nich so eendüdig...


Maximal verdichtete Eemken


Dree Bargstieger-Eemken (P-59, A-76 un M-04)

Erstaunlich weer för mi ümmer wedder dat Verholen vun de Eemken. Keeneen dünn den Naver wat. De Eemken sünd för ehr soziales Verhollen bekannt!


Dannennadel-Transport-Grootkampfdag!
De ganzen Naams wüllt Se nich wirklich weten...


De Eemk F-82

För den niegen Bu schaffen de Arbeiderinnen nieges Bumaterial ran. Dat weern in de Hauptsaak Dannennadeln. Ievrig krabbeln se hin un her. "Se weern flietig as en Ameis". Aver de Nadeln weern för de Eemken deelwies to groot un to swoor. Dor müssen noch welk helpen.


W-15 versöcht sik an en welkes Blatt (links)

Eemken sünd allerdings recht stevig un sleept oftins dat Veelfache vun ehr egen Gewicht. Ümrekent op den Minschen, köönt se ganze Autos, ja Laster in de Luft stemmen!


En Büüt warrt afsleept

Bi de Insekten gifft dat en ganze Gewichtheber-Liga, mit de de Wirbeldeerten nich mithollen köönt. Uns rode Woold-Eemk is ehrder noch Mittelfeld, aver welk Eemkenaarten sünd, tosamen mit bestimmte Spinnen un Milben, de stärksten Deerten op de Welt. Poor vun düsse Aarten köönt dat Dusendfache vun ehr egen Gewicht slepen! Denkt Se sik dat mal bi'n Minschen: En Schipp vun 80 bit 100 Tonnen eenfach mal so op de Schuller stemmen... Pippi Langstrump lett gröten! De Stärksten sünd even eenfach de Fruunslüüd. Eemken sünd ja ok allens Fruuns.


P-59, A-75 un M-04 sleept Dannennadeln un Plantenreste

Arbeit maakt aver ok Hunger. Welk vun de Eemken sorgen för Foder. Dode Käver un Würmer stünnen up den Spiesplan.

De Melk vun Blattlüüs tellt to de Delikatessen in de Eemkenwelt. Dorför nehmen se enen wieden Weg in Koop. Se krabbeln an hoge Bööm na baven. Dor fünnen se Lüüs un de hebbt de Eemken mit ehr Föhler betrillert. Denn geven de Lüüs vun ehr Melk aff. De Saft vun de Boomrinn wöör vun de Eemken drunken. Hm, lecker! — Is wirklich wohr: Dat Sekret vun de Blattlüüs hett en hogen Andeel an Zucker. Wenn Se Ehr Auto in'n Sommer ünner en Boom parkt, is dat an'n Avend kleevrig. Dat is de Blattluus-Saft! De Bööm sülven sünd dor ganz unschüllig an. Op den Zucker sünd de Eemken scharp. Verständlich, se köönt ja nich eenfach Schokolaad futtern.


Eemken kennt nix, wenn dat üm Büüt orr Lastenslepen geiht.
Ok en ganzen Dannentappen versöökt se mal so antoslepen...


R-09, E-86 un B-24 sleept den Rest vun en Tappen.
P-51, A-51 un I-19 kiekt to un füert de annern an.

Ok gröteres Aas zerlegten de Eemken. Nix Eetbores bleev up den Grund liggen. So sorgten de Eemken för enen sauberen Woold. Nicht ümsünst hett man de Eemken ünner Schutz stellt. Se warrd ok as "Polizei des Waldes" betekend.

Mi hebbt se dittmal mit ehr Säure verdreven. Fief Eemken seten an mien Büxenbeen. En Eemken weer sogoor in mien Büxenbeen na baven krabbelt. Hett mi beten un in de Wunn Ameisensäure spritt. Dat hett ganz schöön brennt.


Hier warrt en Made transporteert


Lütten Boom in de Schonung

Bald is nu de Tiet, dat de Eemken Hochtiet fiert. Denn kriegt de männlichen Eemken Flünken un fleegt in grote Swarms mit de Königinnen hoch in de Luft. Dor hebbt de Vagels al up töövt. För de is dat en funnen Freten.

Na de Hochtiet hebbt de männlichen Eemken ehr Opgaav daan un verleert de Flünken. Ehr Leven is denn to Enn. De Königinnen warrd bit to 15 Johr olt. Se mütt nu ehr Leven lang Eier leggen. De Arbeiderinnen hebbt verscheden Upgaven un warrd bit to söss Johr olt.

Weer to schöön, wenn ik de Hochtiet mitkriegen wöör. Aver de Eemkenhügel is to wiet vun mien to Huus. Ik müss jedeen Dag up de Luur liggen. Up ik dat schaff, weet ik nich.


De Hupen in'n Fröhlingswoold


10.4.2016


na baven