Bottervageljohr 2018

In de verleden Johrn sünd uns flegen Insekten gewaltig trüchgahn. Dorüm hebbt wi düt Johr en Kalenner uns Bottervagels toegnet. Thomas Seemann hett för en Fotokalenner (rutbröcht vun sien Team "Tandem"/OBW) de schöönsten Bottervagelfotos tohoopstellt. Wi bringt de Fotos hier, stellt de Bottervagels vör un ehrt ehr mit en Vers.

Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.


Bottervagel vun'n Novembermaand:
De Lüttje Füerfalter

vun Thomas Seemann un Marlou Lessing


Dat düsse lüchen orangerode Falter, mit latienschen Naam Lycaena phlaeas, nu ok en Bläuling is, muchst nich glöven — is avers so. He un Se seht liek ut.


Lüttje Füerfalter verstekt sik. Klick op to'n Vergröttern!

De Foorm vun de Flünken is bläulingstypisch, de helle Binde ok, de buten rund üm de Flünken löppt, un sachs ok noch annere Merkmalen. Avers düsse lütte Weltbörger, de op de ganze Noordhalvkugel tohuus is, süht ansünsten ut as en Tiger orr Leopard, de sik in't Struukwark verstekt, orr en Füerfunken (wat bi den drögen Sommer gefährlich laten kann).

De Lütte Füerfalter leevt apen, locker bewussen Gelänn mit Ampfer-Planten. Sueramper & Co. bruukt se nämlich för ehr Rupen. De dekorativen Eier leggt se püük op de Ünnersiet vun Ampferbläder af, un de Rupen överwintert denn dor un verpuppt sik in'n Lent. Kümmt de Sommer, köönt de Falters twee, dree, sogor veer Generaschoonen produzeern, bet de Winter ehr inhaalt. Överwintern doot denn wedder bloots Rupen.

De Lüttje Füerfalter gellt nich as bedrauht, weer avers düt Johr heel selten to sehn. Much dat neegst Johr man beter warrn.


Lüttje Füerfalter. Klick op to'n Vergröttern!

 

Warm
lücht dat twüschen de Halms
flüggt mit di
ahn Russeln
warrt heller un lichter
heevt sik
rut in't Apene

un liekers blifft
de orangerode Schemer
verhöllt
mang de Bläder

dat Füer wahnt ünner uns


4.11.2018


na baven