Bottervageljohr 2018

In de verleden Johrn sünd uns flegen Insekten gewaltig trüchgahn. Dorüm hebbt wi düt Johr en Kalenner uns Bottervagels toegnet. Thomas Seemann hett för en Fotokalenner (rutbröcht vun sien Team "Tandem"/OBW) de schöönsten Bottervagelfotos tohoopstellt. Wi bringt de Fotos hier, stellt de Bottervagels vör un ehrt ehr mit en Vers.

Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.


Bottervagel vun'n Maimaand:
Dat Grote Ossenoog

vun Thomas Seemann un Marlou Lessing


Dat Ossenoog is en "Ogenfalter", woso, dat is glieks to kennen. Wat so sünnerlich as en Oog wirkt, is de lierlütte witte Fleck merrn in dat swatte Oog. — All Ogenfalters höört to de Eddelfalters, man nich all Bottervagels, de "Ogen" op de Flünken hebbt, sünd Ogenfalter.

Hier is dat en Heken, dat sik op den Sünnenhoot den Buuk vulllsleit. De Sünnenhoot kümmt ut Noordamerika un is en heel beleevte Goornplant bi uns worrn. Ok dat Ossenoog is in Noordamerika tohuus, avers ok in Europa un Asien — op de ganze Noordhalvkugel, 'neem dat Klima nich to koolt is.

Sien Rupen bruukt Gräser to'n Freten, un apen, aartenrieke Graswischen warrt ror in uns Agrarwöösten. Noch is dat Ossenoog nich bedrauht, avers dat kümmt langsam ünner Druck.

De Ogenfleck

Woso hebbt Falter eentlich düsse opfallen Flüchten, woto deent dat "Oog"? Nu, bi all düsse Falter kannst sehn, dat de Bövensied vun de Flünken opfällig tekent is, de Ünnersied avers heel unopfällig. Dat is in dat Bild baven good to kennen. De Trick is ganz eenfach: De Ünnersiet is för de Tarnung — wenn se t.B. an en Boomstamm sitt, denn is so'n Ossenoog reinweg nich to kennen. Hett avers jichenseen Fiend ehr liekers utfunnen un drauht ehr to freten — ja denn foolt se de Flüchten uteneen, un de Fiend kiekt miteens in de "Ogen" vun en veel grötter Deert, kriggt dat mit de Angst to doon un neiht ut. De Bövensiet is also to Afschreckung!

Dat Bild nerrn wiest en Ossenoog-Heken mit opslaan Flünken. Kiekt Se dör de Wimpern, denn köönt Se sik en anner Deert vörstelln, dat Se ankiekt.


Bild: cocoparisienne

 

Unschienbor bruun
un freedvull
en flegen
Stück Holt

Gefohr? — du sleist
dien Flögel apen
un kiekst mi an
mit Ogen ut en anner Welt.


1.5.2018


na baven