Bottervageljohr 2018

In de verleden Johrn sünd uns flegen Insekten gewaltig trüchgahn. Dorüm hebbt wi düt Johr en Kalenner uns Bottervagels toegnet. Thomas Seemann hett för en Fotokalenner (rutbröcht vun sien Team "Tandem"/OBW) de schöönsten Bottervagelfotos tohoopstellt. Wi bringt de Fotos hier, stellt de Bottervagels vör un ehrt ehr mit en Vers.

Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.


Bottervagel vun'n Oostermaand:
De Kohlwittling

vun Thomas Seemann un Marlou Lessing


De Kohlwittling weer fröher een vun de Allerweltsbottervagels — sünnerlich sien weke, behoorte, gröönswatte Rupen, de jümmers in Koppels an't Freten sünd, geev dat överall. De Rupen freet wohraftig geern Kohlplanten, dorvun hett de Bottervagel ok sien Naam. De utwussen Bottervagel will, as all Bottervagels, söte Nektarplanten to'n Sugen.

Jümmer noch is de Kohlwittling wiedhen antodrepen; düsse warm-dröge Sommer hett reinweg to en Kohlwittlingsjohr föhrt. Kann ok ween, dat dör den Mangel an annere Bottervagels de Kohlwittlinge mehr opfallt.

De genöögsam lütt Falter betövert jüst dör sien Slichtheit. De Flünken vun dat Heken sünd meist dörsichtig, so zaart sünd se, un de lütte swatte Fleck schient dör de stückerwat Lagen vun Flüchten dör.

Dat Wievken hett avers noch dunkel Flünkenspitzen dorto. De sünd in dat Bild baven bloots ganz licht to kennen. De nafolgen Biller wiest de griesen Flünkenspitzen nauer.

Dat Wievken in dat neegst Bild is en beten versehrt an een Flünkenspitz. Se kunn avers noch flegen. — De Kohlwittling flüggt vun Märzmaand af an bi wied in'n Oktobermaand. Wüllt höpen, noch lang!

 

Lütt witt Lufttoog,
so eenfach,
nich to begriepen —

dien swatt
Flünkenspitzen
wiest wied ut de Welt,
dien lütt
swatt Fleck
leggt sik
sacht
op mien Hart.


5.3.2018


na baven