Bottervageljohr 2018

In de verleden Johrn sünd uns flegen Insekten gewaltig trüchgahn. Dorüm hebbt wi düt Johr en Kalenner uns Bottervagels toegnet. Thomas Seemann hett för en Fotokalenner (rutbröcht vun sien Team "Tandem"/OBW) de schöönsten Bottervagelfotos tohoopstellt. Wi bringt de Fotos hier, stellt de Bottervagels vör un ehrt ehr mit en Vers.

Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.


Bottervagel vun'n Februar:
De Distelfalter

vun Thomas Seemann un Marlou Lessing


Ok Distelfalters, liek as dat Landkärtchen, sünd bi uns inwannert; se sünd ut Noordaafrika na Noordeuropa kamen.

De Distelfalter hett dat also geern dröög un warm, he leevt dat apen Gelänn, sünnerlich wenn dor Disseln staht. Natüürlich leevt he ok den Bottervagelboom orr Schmetterlingsflieder, den sien Nektar Spies för meist all Bottervagels is. In dat Bild baven suugt he an en Wichelkatten — en Höpen för dat kamen Fröhjohr. De Rupen freet ok geern Bläder vun Disseln, dorwegen sett de Disselfaltersche ehr Eier faken op de Ünnersiet vun Disselbläder. De swatte, dornige Ruup verpuupt sik na veer Weken Freterie un sluppt na twee Weken Puppenstadium as fertige Disselfalter.

Wenn ehr dat to koolt warrt, wannert de Distelfalters wedder weg. Dorbi laat se sik vun'n Wind dragen. Kole Winter köönt se nich verknusen, se wannert wiede Strecken, sogor över de Alpen, üm vör den Winter to flüchten. Wenn se dat nich fix noog schafft, blievt mennig vun ehr dood. Liekers hebbt se dat meist üm de ganze Welt schafft, sogor in Island un Noordamerika gifft dat welk. Op Bargen truut he sik bit 3000 m Hööcht.

De Disselfalter is en Verwandte vun Lütten Voss, Pfauenoog & Co. — en Eddelfalter. Dat Bild baven wiest de schön tekente Ünnersiet vun sien Achterflögels — bruun marmoreert, meist as bi dat Landkärtchen, avers mit de smucken Ogenflecken buten. De Plant, op de he sitt, is hier Iesenkruut.

 

Wanderfalter,
vun'n Wind dragen
na uns, vun uns weg —
söchst niegen Ruum
to'n Leven —
dornig
dien Ruup
wehrhaftig
as de Dissel —
du warrst överleven.
As wi.


1.2.2018


na baven